Ma Lemnagem Got
RAYOG ni ngad pirieged e tin th’abi fel’ e fonow u Bible ni bochan e ke yib e Bible rok Got. Re ke babyor ney e gathi ba ke babyoren e tafalay, machane bay boch e kanawo’ nrayog ni nge ayuwegdad riy u rogon ni ngad gelgad nga boch ban’en ni ma buch ni ma k’aring e magafan’ ngodad, me magawonnag rogon e lem rodad, me amithnag lanin’dad, miki kirebnag fithik’ i dowdad nge man’ey rodad.
Bin th’abi ga’ fan riy e be micheg e Bible ndariy be’ ni manang rogon lanin’dad nge migid Jehovah Gota ni ir e En Ke Sunmiydad. Baadag ni nge ayuwegdad ni ngad gelgad ko pi magawon ni gad be mada’nag. Am lemnag l’agruw e thin nu Bible nrayog ni nge pi’ e athamgil nga lanin’um:
“I Somol e ba chugur ngak e piin ke mulan’rad; ma ma ayuweg e piin dakuriy ban’en ni be l’agan’rad ngay.”—PSALM 34:18, BT.
“I gag e Somol ni Got rom; i gag e gu ma pi’ gelngim ma be lungug ngom, Dab mu rus; ya bay gu ayuwegem.”—ISAIAH 41:13.
Machane uw rogon ni ma ayuwegdad Jehovah ni ngad gelgad nga boch ban’en ni ma mo’maw’nag ni ngaud lemgad nib fel’ rogon? Ga ra guy ko tin migid e article ni boor e kanawo’ ni ma dag Jehovah riy nriyul’ ni ma lemnagdad.
a Jehovah e aram fithingan Got. (Psalm 83:18) Be yog e foreword ko fare Bible ni Thothup ni “fithingan Got ni Hebrew e Yahweh (YHWH) ni kan piliyeg ni SOMOL ko thin ni waab.”