2 | “Athamgil Laniyan’ ni Be Pi’ e Thin ko Babyor nib Thothup Ngodad”

BE GAAR E BIBLE: “Urngin ban’en nni yoloy nga lan e babyor nib thothup e ni yoloy ni nge fonownagdad, ni bochan e nge yog e l’agan’ ngodad u fithik’ e gum’an’ nge athamgil laniyan’ ni be pi’ e thin ko babyor nib thothup ngodad.”—ROMA 15:4.

N’en Be Yip’ Fan

Bay e thin u lan e Bible ni ma fal’eg lanin’uy, ma re n’ey e rayog ni nge pi’ gelngidad ni ngad athamgilgad u nap’an ni gad ra lemnag boch ban’en nde puluw. Ku be yog e Bible ndab ki n’uw nap’an me chuw e pi n’en ma k’aring e amith nga lanin’dad.

Rogon Nrayog ni Nge Ayuwegey

Gad gubin ni ma kireban’dad yu ngiyal’; machane piin bay ba mit e m’ar rorad ni ma k’aringrad ni ngaur pared nib kireban’rad ara be magafan’rad e rayog ni nga i amith lanin’rad ni gubin ngiyal’. Ere uw rogon nrayog ni nge pi’ e Bible ayuw?

Boor e thin nib fel’ u Bible nrayog ni nge ayuwegdad ni nge dab kud lemnaged boch ban’en nde puluw. (Filippi 4:8) Pi thin ney e rayog ni nge fal’eg lanin’dad mad nanged rogon ni ngad gagiyegnaged rogon e lem rodad.—Psalm 94:18, 19.
Rayog ni nge ayuwegdad e Bible ni nge dab kud lemnaged ndariy fadad.—Luke 12:6, 7.
Boor e thin nu Bible ni be micheg ngodad ni bay Got ni Ir e Ke Sunmiydad ni be ayuwegdad ma ri manang rogon lanin’dad.—Psalm 34:18; 1 John 3:19, 20.
Be micheg e Bible nra chuweg Got e pi n’en ke par u lanin’dad ni ma k’aring e kireban’ ngodad. (Isaiah 65:17; Revelation 21:4) Nap’an nra kireban’dad nib gel ma rayog ni nge pi’ e re n’ey gelngidad ni ngad athamgilgad.

Rogon ni Be Ayuweg e Bible Jessica

Rogon ni Ma Magawonnageg e Kireban’

“Nap’an ni gaman 25 e duw rog, me yib e kireban’ ngog nib pag rogon ndabkiyog ni nggu rin’ e pi n’en nug ma rin’ u reb e rran ngu reb, ma aram me yog e togta ni ke yib ba mit e m’ar ngog ni ma k’aring e kireban’ ko girdi’ nib pag rogon. Ba tomgin ni i yib ngan’ug boch ban’en nib kireb ni i buch rog kafram ndabkiyog ni nggu tal i lemnag. I ayuwegeg e togta ni nggu nang ni pi n’en nde puluw nug be lemnag ni bochan e tin nib kireb ni i buch rog kafram e aram e n’en ni be k’aring e kireban’ ngog nib pag rogon. Ere ba t’uf ni nggu fek e falay mu kug un ko tafalay ya nge yag ni nggu nang boch ban’en nde puluw nug be lemnag mug yal’uweg.”

Rogon ni Ma Ayuwegeg e Bible

“Nap’an ni kireban’ug nib pag rogon, ma aram mu ug rus ma be magafan’ug nib pag rogon, ma dakir yag ni nggu mol. Ba ga’ nra nep’ ma be yan yan e lem rog. Be yog e Psalm 94:19 nrayog ni nge fal’eg Got lanin’dad u nap’an ni be magafan’dad nib pag rogon. Ere gu ma tay e Bible u tooben e bet rog nge boch ke babyor ni kug yoloy e thin nu Bible ngay ni ma pi’ e athamgil nga lanin’ug. Bayi n’en ndabiyog ni nggu mol, mug beeg boch e thin nu Bible ya nge yag nug pag e thin rok Got ni nge fal’eg lanin’ug.

“Be pi’ e Bible e athamgil nga lanin’dad ni ngad thilyeged boch e lem ni bay rodad nde puluw ko n’en ni gad manang u murung’agen Got. Kafram e mich u wan’ug ndariy fag, ma dariy be’ nra t’ufegeg, maku dariy ban’en ni gub fel’ ngay. Machane kug fil ni mit ney e lem e de puluw ko Bible ya be yog e Bible ni Got e ir reb e Matam ni ma t’ufegey, ma ma runguyey, ma ma lemnagdad ni be’ nge be’. Ere munmun me yag ni nggu gagiyegnag e pi n’en nug ma lemnag ko bin ni nggu pag e pi n’em ni nge mang ir e gagiyegnageg. Kug fil rogon ni ngaug lemnageg ni bod rogon ni ma lemnageg Got. Ireray reb e ban’en nib ga’ fan ni ayuwegeg ni nggu tal ndab kug lemnag boch ban’en nde puluw u rarogog.

“Gu be athapeg e ngiyal’ nra chuw boch ban’en nib kireb ni ke par u lanin’dad ma dab kud lemnaged boch ban’en nde puluw. Bochan ni kug nang nra boch nga m’on ma ra chuw e pi m’ar ni ma mo’maw’nag rogon ni ngaun lem nib fel’ rogon, ma aram e n’en ni be ayuwegeg ni ngaug athamgil e chiney ma gu be athapeg e ngiyal’ nra chuw e kireban’ rog boch nga m’on.”