3 | Rogon Nrayog ni Nge Ayuwegem Boch e Girdi’ ni Bay Murung’agrad u Bible

BE WELIY E BIBLE MURUNG’AGEN . . . Boch e pumoon nge ppin ni yad ba yul’yul’ ni ur lemnaged boch ban’en ni “bod gadad e tiney e girdi’.”—JAMES 5:17.

N’en Be Yip’ Fan

Boor e pumoon nge ppin ni be weliy e Bible murung’agrad ni boor rogon e lem ni ur ted. Nap’an ni gad be beeg e n’en ni i buch rorad, ma rayog ni ngad guyed ni bay bagayad ni taareb rogon e lem rodad.

Rogon Nrayog ni Nge Ayuwegey

Gad gubin nib t’uf rodad ni nge nang fan be’ rogon lanin’dad. Machane ba ga’ nri ma t’uf e re n’ey rodad u nap’an ni ke yib ba mit e m’ar ngodad ni be mo’maw’nag rogon ni ngaud lemgad nib fel’ rogon. Nap’an ni gad ra beeg murung’agen e n’en ni i buch rok boch e girdi’ ni bay murung’agrad u Bible, ma rayog ni ngad guyed ni taareb rogon e lem rorad ko lem rodad. Ere angin nra yib riy e gad ra nang ni ku immoy boch e girdi’ ni ur gafgowgad ni bod gadad, maku i magafan’rad ma yad be lemnag boch ban’en nde puluw.

Boor e thin ni kan yoloy nga Bible ni i yog boch e girdi’ ni ur lemnaged ndariy be’ nrayog ni nge ayuwegrad ma dakuriy e athap rorad nga bang. Bay ba ngiyal’ ni ke lungum u wan’um, ‘Dabkiyog rog’? Ireray e n’en ni lemnag Moses, nge Elijah, nge David.—Numbers 11:14; 1 Kings 19:4; Psalm 55:4.
Be yog e Bible ni immoy be’ nib pin ni ka nog Hannah ngak ‘nri kireban’’ ni bochan e dabiyog ni nge fakay e bitir ma be par e bin baaram e ppin ni kar leayew taabe’ ni yugu be moningnag.—1 Samuel 1:6, 10.
Be weliy e Bible murung’agen be’ nib pumoon ni ka nog Job ngak nrayog ni ngad nanged rogon laniyan’. Yugu aram rogon nib gel e michan’ rok, machane immoy ba ngiyal’ nri gafgow laniyan’ me gaar: “Ke mulan’ug; ke chuwan’ug ko yafos rog.”—Job 7:16, BT.

Gad ra fil rogon ni yag rok e pi girdi’ ney ni bay murung’agrad u Bible ni ngar gelgad nga boch e lem nde puluw ni immoy rorad, ma aram e ku rayog ni nge yib gelngidad ni ngad athamgilgad u fithik’ e kireban’ rodad.

Rogon ni Be Ayuweg e Bible Kevin

Rogon ni Ma Magawonnageg e Bipolar Disorder

“Nap’an ni chugur ni nge gaman 50 e duw rog mi nog ni ke yib ba mit e m’ar ngog ni ka nog e bipolar disorder ngay. Yu ngiyal’ e gu ma lemnag ndemtrug e magawon nug ra mada’nag ma rayog ni nggu pithig. Machane yu ngiyal’ e gu ma lemnag ndakuriy rogon ni nggu par ni gub fos.”

Rogon ni Ma Ayuwegeg e Bible

“Apostal Peter e ir be’ ni bay murung’agen u Bible nrayog ni nggu nang rogon laniyan’. Bay boch e oloboch ni rin’ ni k’aring ni nge lemnag ndakuriy fan. Machane da i par ni be lemnag e re n’ey, ya yan i chag ko pi fager rok ni yad ma lemnag. Faanra rib gel e m’ar rog u reb e rran, ma yug gu ma par nug be lemnag e pi n’en ndabkiyog ni nggu rin’ me k’aringeg ni nggu lemnag ndakuriy fag. Kug fil rogon ni nggu par ni gub chugur ko pi fager rog ni yad baadag ni ngar ayuweged gag ndabi mulan’ug ko yafos rog.

“David ni Pilung e ku ir be’ ni bay murung’agen u Bible nri ku ma fal’eg lanin’ug. Ba ga’ ni i kireban’ ko n’en ni i buch rok miki kalngan’ ko oloboch ni i rin’. Gu manang rogon laniyan’ ni bochan e bay yu ngiyal’ nug ma rin’ ara gu ma yog boch ban’en nug ma kalngan’ug riy. Fapi thin ni yog ni bay ko Psalm 51 e ma fal’eg lanin’ug. I yog ko verse 3 ni gaar: ‘Kug nang e kireb rog; gubin ngiyal’ ni gu manang e denen rog.’ Ri aray rogon nug ma lem u nap’an nra kireban’ug nib pag rogon, ya ma mo’maw’ rogon ni nggu lemnag boch ban’en nib fel’ u rarogog. Machane ku rayog ni nggu nang rogon laniyan’ ko fapi thin ni yog ko verse 10 ni gaar: ‘Got, mu sunumeg e tafinay nib machalbog u fithik’ag, ma ga pi’ reb e tafinay ngog nib beech ma ba yul’yul’.’ Kub dake aray rogon e n’en nug ma yog ngak Got ya nge yag ni ayuwegeg ni nggu thilyeg rogon nug ma lemnag rarogog. Ma verse 17 e ma fal’eg lanin’ug, ya be gaar: ‘Got, . . . be’ ni ke kolngan’ nge fol rom e dab mu n’ag.’ Re thin ney e be micheg ngog ni gub t’uf rok Got.

“Bochan nug ma lemnag boch e girdi’ ni bay murung’agrad u Bible nge n’en ke pi’ Got ngog e chiney, ma ma ayuwegeg ni ngari l’agan’ug ko pi n’en bay nga m’on. Ba riyul’ u wan’ug e pi n’en ke micheg e Bible, ma aram e n’en nri ma ayuwegeg ni nge dabi mulan’ug.”