4 | Bay e Fonow nib Manigil u Bible

N’en Be Yip’ Fan

Yugu aram rogon ni Bible e gathi ba ke babyoren e tafalay, machane bay e fonow riy nib manigil ma ra yib angin. Re fonow ney e rayog ni nge ayuweg be’ ni bay ba mit e m’ar rok ni ma mo’maw’nag ngak ni nga i lem nib fel’ rogon. Baaray boch e pi fonow nem.

Rogon Nrayog ni Nge Ayuwegey

“Piin ni yad ba gol e dariy fan e togta ngorad, ya ke mus ni piin ni yad mm’ar e ba’ fan e togta ngorad.”​—MATTHEW 9:12.

Be yog e Bible nrayog nib t’uf ni ngad uned ko tafalay. Boor e girdi’ ni bay ba mit e m’ar rorad ni ma mo’maw’nag ni ngaur lemgad nib fel’ rogon ni ke yag ni ngan ayuwegrad ni bochan e kar nanged boch ban’en nib puluw u murung’agen e m’ar rorad, nge ku bochan ni ka ranod ra guyed e togta.

“Ra um mithmith mab fel’ nga fithik’ i dowam.”​—1 TIMOTHY 4:8, Contemporary English Version.

Ra um rin’ boch ban’en nib fel’ nga fithik’ i dowam, ma rayog ni nge fel’ boch rogon e lem ni ga be tay. Pi n’ey e ba muun ngay ni ngaum mithmith ni gubin ngiyal’, ma ga be kay e ggan nib fel’ nga fithik’ i dowam, ma be gaman e mol rom.

“Faanra gab felfelan’ ni ga ma par ma ba falay nga fithik’ i dowam. Kirkireban’ e ma milik’nag e pi yil.”​—PROVERBS 17:22, BT.

Ra um beeg boch e thin nu Bible nra pi’ e athamgil nga lanin’um ma ga be nameg boch ban’en nrayog rom, ma aram e rayog ni ngam par ni gab felfelan’. Ra um lemnag boch ban’en nib fel’ me mich u wan’um nra fel’ rogon e par boch nga m’on, ma ra ayuwegem ni ngam athamgil u fithik’ e pi n’en ma mo’maw’nag rogon ni ngaum lem nib fel’ rogon.

“Kab gonop e en ba sobut’an’.”​—PROVERBS 11:2, BT.

Sana ga ra guy ndabiyog ni ngam rin’ urngin ban’en ni ga baadag ni ngam rin’, ere nge m’agan’um ngay ni nge ayuwegem yugu boch e girdi’. Dabisiy ni baadag e pi fager nge chon e tabinaw rom ni ngar ayuweged gur, machane sana dar nanged rogon ni ngar rin’ed e re n’ey. Ere nga mog ngorad ko ri mang ayuw e bay nrayog ni ngar pied ngom. Yugu dab mu lemnag ni ngar rin’ed boor ban’en ni fan ngom, ma gubin ngiyal’ ni ngaum pining e magar ngorad ko ayuw ni yad be pi’ ngom.

Rogon ni Be Ayuweg e Fonow nu Bible Boch e Girdi’

“Gu thamiy ni bay ban’en ni ke kireb u rarogog, ma aram mug wan gguy e togta me yag ni nge yog ko mang e ke buch rog. Re n’ey e ayuwegeg ni nga rug nang e magawon rog mu kug nang e re miti tafalay nrayog ni nggu un ngay ni nge ayuwegeg.”​—Nicolea ni bay e bipolar disorder rok.

“Kug nang ni faanra ug beegew leengig e Bible u taabang ma rayog ni ngaug lemnag boch ban’en nib fel’ ni gubin e rran. Ba ga’ ni pi rran nib mo’maw’ rogon ni nggu athamgil u fithik’ e kireban’ rog e bay reb e thin nu Bible ni ma fal’eg lanin’ug.”​—Peter ni ma kireban’ nib pag rogon.

“Ba mo’maw’ ni nggu weliy murung’agen e m’ar rog ngak yugu boch e girdi’ ni bochan e rug be tamra’ ngay. Machane immoy reb e fager rog nri ma motoyil ngog nib fel’ rogon, ma ma guy rogon ni nge nang rogon lanin’ug. Ri ayuwegeg ni nge fel’ boch lanin’ug ma dab kug lemnag ni yigoo gag.”​—Ji-yoo ni bay e m’ar rok ni ka nog e eating disorder ngay.

“Ke ayuwegeg e Bible ni nge puluw rogon e lem rog, me gaman e toffan rog, ma dab kug maruwel nib pag rogon. Gonop ni bay riy e ke ayuwegeg ni nggu gel nga boch e lem nde puluw ni bay rog.”​—Timothy ni bay fare m’ar rok ni obsessive-compulsive disorder.