Rogon ni Ngan Ayuweg e Piin Bay e Pi M’ar Ney Rorad

N’en Be Yip’ Fan

Faanra bay ba mit e m’ar rok reb e fager rodad ni be mo’maw’nag ngak ni nga i lem nib fel’ rogon, ma rayog ni ngad lemnaged ndabiyog ni ngad ayuweged. Machane rayog ni ngad daged gelngin ni gad be lemnag fare fager rodad ni aram e ngad ayuweged ni nge athamgil u fithik’ e m’ar rok. Ni uw rogon?

Rogon Nrayog ni Nge Ayuwegey

“Gubin e girdi’ ma thingar ra gurgad ko motoyil.”​—JAMES 1:19.

Reb e kanawo’ nrib manigil ni ngam ayuweg e fager rom riy e aram e ngam motoyil ko ngiyal’ ni baadag ni nge weliy laniyan’. Dab mu lemnag nib t’uf ni ngam pi’ e fulweg u gubin ban’en ni be yog. Mu guy rogon ni nge nang ni ga be motoyil ngak ma ga be lemnag. Mu guy rogon ni ngam nang rogon laniyan’ ma dab mu gathibthibnag. Dab mu pagtalin nrayog ni nge yog boch ban’en ni gathi lem rok me yan i boch nga tomuren me kalngan’ riy.​—Job 6:1-3.

“[Mu] pi’ e athamgil ngak.”​—1 THESSALONIKA 5:14.

Rayog ni be magafan’ e fager rom ara be lemnag ndariy fan. Ere faan ga ra micheg nga laniyan’ ni ga be lemnag, ma aram e rayog ni ngam fal’eg laniyan’ mag pi’ e athamgil ngak ni yugu aram rogon ndam nang e n’en nga mog ngak.

“Pi tafager e gubin ngiyal’ ni yad ma dag e t’ufeg rorad.”​—PROVERBS 17:17, BT.

Mu ognag e ayuw ngak. Mu fith ko mang e rayog ni ngam rin’ ngak ko bin ngam lemnag ni ga manang rogon ni ngam ayuweg. Faanra be mo’maw’ ko fager rom ni nge yog e n’en nib t’uf rok, mag guy rogon ni nga mog ban’en ni ngam rin’ew u taabang ni bod ni ngam marow ko walk. Fa reb e rayog ni nga mog ngak ni ngam man mu fek e chuway’ rok, ara mu klinnag e naun rok, ara ngam rin’ yugu boch e maruwel.​—Galatia 6:2.

“Um pired nib gum’an’med.”​—1 THESSALONIKA 5:14.

Rayog ni gathi gubin ngiyal’ ni baadag e fager rom ni nge weliy laniyan’. Ere mu guy rogon ni nge nang ni gab felfelan’ ngay ni ngam motoyil ngak ko ngiyal’ ni baadag ni ngam nonow. Rayog ni nge yog ara rin’ fare fager rom ban’en nra kirebnag lanin’um ni bochan e m’ar rok. Rayog ni nga mognew ban’en ni ngam rin’ew me boch nga tomuren me siyeg ndab ki un ara par nib kankanan’. Ere mu gum’an’nagem mag guy rogon ni ngam nang rogon laniyan’ u nap’an ni ga be ognag e ayuw ngak.​—Proverbs 18:24.

Ga Ra Ognag e Ayuw ma Rayog ni Ngam Ayuweg e Fager Rom

“Ba pagan’ug ngay ni gag reb e fager rok nrayog ni nge non ngog. Yugu aram rogon ndabiyog ni nggu pithig e magawon rok, machane gu ma guy rogon ni nggu motoyil ko n’en be yog. Yu ngiyal’ e kemus nib t’uf rok ni nge motoyil be’ ngak ya nge yag ni fel’ laniyan’.”​—Farraha ni fager rok e bay fapi m’ar rok ni eating disorder, nge anxiety disorder, nge clinical depression.

“Bay reb e fager rog nrib gol ma ma pi’ e athamgil nga lanin’ug. I piningeg nga tabinaw rok ni nggu abichgow u taabang. Bochan ni dag e t’ufeg ngog, ma aram fan nib mom ni nggu weliy lanin’ug ngak. Re n’ey e ri pi’ e athamgil nga lanin’ug!”​—Ha-eun ni bay fare m’ar rok ni clinical depression.

“Rib ga’ fan e gum’an’. Nap’an nra rin’ leengig ban’en ni ke kirebnag lanin’ug, ma gu ma puguran ngog ni fan ni ke rin’ e re n’em e bochan e m’ar rok. Re n’ey e ma ayuwegeg ndab gu damumuw ngak me yag ni nggu dag ngak ni gu be lemnag rarogon.”​—Jacob ni bay fare m’ar ni clinical depression rok leengin.

“Rib ga’ e ayuw ni ma pi’ leengig ngog maku ma fal’eg lanin’ug. Nap’an nra magafan’ug nib pag rogon, ma der ma towasariyeg ni nggu rin’ ban’en ndabug ni nggu rin’. Bochan e re n’ey, ma aram fan ni yu ngiyal’ e der ma rin’ ban’en ni baadag ni nge rin’. Rib ga’ fan u wan’ug ni bochan e rib gol ma gathi yigoo ir e ma lemnag ir.”​—Enrico ni bay fare m’ar rok ni anxiety disorder.