Ba Magawon u Rogon e Lem ni Ma Tay e Girdi’

Ireray e n’en ke yog boch e girdi’ ni bay ba mit e m’ar rorad ni ma mo’maw’nag rogon ni ngaur lemgad nib fel’ rogon. Gur, ireray e magawon rom ara bay be’ nib t’uf rom ni be mada’nag e biney e magawon, fa?

Nge pagan’um ngay ni gathi kemus ni yigoo gur e bay e biney e magawon rom. Boor e girdi’ e ngiyal’ ney ni yad be mada’nag e biney e magawon ara piin nib t’uf rorad e bay e biney e magawon rorad.

Dariy e maruwar riy ni gad be par u ba ngiyal’ ni ke “mo’maw’” rogon e par riy, ma re n’ey e be k’aring boor mit e gafgow ko girdi’. (2 Timothy 3:1) Bay boch e girdi’ ni kar fal’eged i gay murung’agen e re n’ey ni ka rogned nsogonap’an taabe’ u fithik’ meruk e girdi’ u ga’ngin yang e fayleng e bay ba mit e m’ar rok ni ma mo’maw’nag rogon ni nga i lem nib fel’ rogon. Nap’an e duw ni 2020, ma sogonap’an 26 e pasent ni mun nga urngin e girdi’ ni i magafan’rad nib pag rogon, ma 28 e pasent ni mun nga urngin e girdi’ ni i kireban’rad nib pag rogon ni bochan fare m’ar ni COVID-19.

Yugu aram rogon nib ga’ fan ni ngad nanged urngin e girdi’ e ngiyal’ ney ni be magafan’rad ma be kireban’rad nib pag rogon, machane ri kub ga’ fan ni ngad nanged rogon nrayog ni nge fel’ lanin’um nge piin nib t’uf rom.

Mang rogon e lem ko girdi’?

Faanra ba fel’ rogon ni ga ma lem, ma rayog ni ngam thamiy ni gab baud maku rayog ni ngam rin’ boch ban’en nib fel’ rogon. Rayog ni ngam athamgil u fithik’ e pi n’en ma k’aring e mochuch ngom, mu kum maruwel nib fel’ rogon, miki fel’ u wan’um e yafos rom.

Re n’ey ni nge kireb ban’en ko man’ey rok be’. . .

• E GATHI bochan ni bay e meewar rok.

• E ARAM e ke yib ba mit e m’ar ngak ni ma k’aring ni nge magafan’ nib pag rogon, me magawonnag rogon ni ma lem, miki mo’maw’ ni nge gagiyegnag rogon e lem ni ma tay, nge ngongol rok.

• E ba ga’ nrayog ni nge mo’maw’nag ni nge yag e fager ngak miki rin’ e pi n’en ma rin’ u reb e rran ngu reb.

• E demtrug yangaren e girdi’ nrayog ni nge yib ngorad, ara rogon e yalen rorad, ara ramaen dowrad, ara nam rorad, ara teliw rorad, ara tolngin e skul rorad, ara urngin e salpiy ni ma yag ngorad.

Mu ning e ayuw ni faanra be mo’maw’ rogon ni ngam lem nib fel’ rogon

Faanra kam nang rom ni ke thil rarogom, ara ke magawon rogon e mol ara abich rom, ara ke n’uw nap’an ni yugu be magafan’um ara be kireban’um nib pag rogon, ara be’ nib t’uf rom e be buch e pi n’ey rok, ma rayog nib t’uf ni ngan ning e ayuw ngak e piin yad manang murung’agen e pi n’ey ya ngan nang e n’en be k’aring min tafalaynag. Machane uw e rayog ni ngam man ngay ni ngan ayuwegem?

Jesus Kristus ni ir e en th’abi gonop ni immoy e yog ni gaar: “Piin ni yad ba gol e dariy fan e togta ngorad, ya ke mus ni piin ni yad mm’ar e ba’ fan e togta ngorad.” (Matthew 9:12) Piin yad ba m’ar e faanra ba puluw rogon e tafalay nni tay ngorad mu kun pi’ e falay nib puluw ko m’ar rorad, ma aram e rayog ni nge fel’ boch rogorad, mar rin’ed boch ban’en nib fel’ rogon, miki yag ni ngar pared ni yad ba felfelan’. Faanra be guy e pi girdi’ ney nib ubchiya’ e m’ar rorad ara ke n’uw nap’an nder chuw, mab fel’ ni nga ranod ra guyed e togta nib papey.a

Yugu aram rogon ni Bible e gathi ba ke babyoren e tafalay, machane n’en bay riy e rayog ni nge ayuweg rogon ni ga ma lem. Gamad be pi’ e athamgil nga lanin’um ni ngam beeg e pi article ni bay nga tomuren e biney ni be weliy rogon nrayog ni nge ayuwegdad e Bible ni ngad gelgad nga boch ban’en ni ma mo’maw’nag rogon ni ngaud lemgad nib fel’ rogon.