Kan N’ag Fan e Kireb u M’on ni Ngan Pi’ Fare Biyul

Kemus nu daken fare biyul ni maligach ni pi’ Jesus u daken rachaen e rayog ni ngan n’ag fan e denen rodad riy. (Efe. 1:7) Yugu aram rogon ma be gaar e Bible: “Kakrom e gum’an’nag Got ir, ngi i fek owchen ko denen rok e girdi’,” nre n’ey e i rin’ u m’on ni nge pi’ Jesus fare biyul. (Rom. 3:25) Ere uw rogon nrayog ni nge rin’ Jehovah e re n’ey ndabi togopuluw nga rarogon ni ir reb e Got nib mat’aw urngin ban’en ni ma rin’?

Nap’an ni dugliy Jehovah ni nge pi’ be’ ni “fak” ara owchen ni nge ayuweg e yafos ko piin nra michan’rad ngak, ma rogon u wan’ e gowa ke mu’ i pi’ fare biyul. (Gen. 3:15; 22:18) Rib mich u wan’ Got nnap’an nra taw ko ngiyal’ ni ke dugliy ma ra m’agan’ Fak ngay ni kari maagirag rok ni nge pi’ fare biyul. (Gal. 4:4; Heb. 10:​7-10) Ma nap’an ni immoy Jesus u fayleng ni ir owchen Got, me pi’ Got mat’awun ni nga i n’ag fan e denen ko girdi’ u m’on ni nge pi’ fare biyul. Rayog ni nge n’ag Jesus fan e denen rok e piin ni i michan’rad ngak ni bochan e manang nre maligach nem nra pi’ e ra upunguy e denen rorad.​—Matt. 9:​2-6.