Dab Mu Chuw u Lan Fare Paradis ni Be Yip’ Fan Ban’en

1. Mang fare paradis ni be yip’ fan ban’en, ma mang e susun ni ngad dugliyed u wan’dad ni ngad rin’ed?

BAY ba paradis u fayleng e ngiyal’ ney nib sug e girdi’ riy ni boor ban’en ni yad be rin’ ma bay e bin riyul’ e gapas u thilrad. Piin yad bay u lan e re paradis ney e kar dugliyed u wan’rad ndab ra chuwgad riy. Ku yad baadag ni nge yib urngin e girdi’ nrayog ni ngar bad nga lan e re paradis ney. Mang e re paradis ney? Aram fare paradis ni be yip’ fan ban’en!a

2. Mang e yira ngat ngay u rarogon fare paradis ni be yip’ fan ban’en?

² Ke sunmiy Jehovah bangi ban’en nib fanathin nrayog ni nge par e girdi’ rok riy ni yad ba gapas mab taareban’rad ni yugu aram rogon ni yad be par u lan e re fayleng rok Satan ney ni ke gel e kireb nge riya’ riy mab sug e fanenikan u thilin e girdi’ riy. (1 John 5:19; Rev. 12:12) Be guy e Got rodad ni be gafgow e girdi’ u tan e re m’ag ney, machane be ayuweg e pi tapigpig rok ni ngar pared nib pagan’rad ya nge yag nra ululgad ko pigpig ni yad be tay ngak u fithik’ e felfelan’. Be yog e Thin rok nre paradis ney ni be yip’ fan ban’en e “bang i ban’en ni dariy ban’en nra buch riy” ma “ba milay’ ni pire’ e ran riy.” (Isa. 4:​6, BT; 58:11) Bochan ni be tow’athnag Jehovah e piin yad be par u lan e re paradis ney, ma aram fan ni yad be par ni yad ba felfelan’ mab pagan’rad e ngiyal’ ney ko tin tomuren e rran ni ke mo’maw’ e par.​—Isa. 54:14; 2 Tim. 3:1.

3. Uw rogon ni lebug e Isaiah ko guruy ni 65 kakrom?

³ I weliy Jehovah u daken Isaiah ni profet rarogon e girdi’ u lan fare paradis ni be yip’ fan ban’en. Kan weliy e pi n’ey ko Isaiah ko guruy ni 65, ma re n’ey e lebug ko yay nsom’on u nap’an e duw ni 537 B.C.E. Aram e ngiyal’ nni chuweg e pi Jew nra kalgadngan’rad ko kalbus u Babylon mar sulod nga taferad. I tow’athnag Jehovah e girdi’ rok me ayuwegrad ni ngar ngongliyed fare mach nu Jerusalem ngki fel’ bayay mar ngongliyed fare tempel ni ngki mang tagil’ e bin riyul’ e liyor u Israel bayay.​—Isa. 51:11; Zek. 8:3.

4. Uw rogon ni be lebug e Isaiah ko guruy ni 65 e ngiyal’ ney?

⁴ Yay ni migid ni lebug fare yiiy rok Isaiah e tabab ko duw ni 1919 C.E. u nap’an ni chuw e pi tapigpig rok Jehovah u tan gelngin fare Babylon nib Gilbuguwan. Tomuren ma aram me tabab ni nge garer fare paradis ni be yip’ fan ban’en u ga’ngin yang e fayleng. Boor e ulung ni sunmiy e pi tamachib ni yad ba pasig ma ur daged pi fel’ngin e Kristiano. Girdi’ ni immoy nib kireb e ngongol rorad ma yad ba ta cham e ‘ron’ed nga dakenrad e bin nib beech i yad ni bod rogon e munmad, ni bin nib beech i yad ni Got e sunumeg ni bod ir.’ (Efe. 4:24) Riyul’ ni boor ban’en ni weliy Isaiah murung’agen ni fin nra lebug u lan e bin nib beech e fayleng boch nga m’on. Machane mus ko chiney ni boor e tow’ath nib manigil ni be yag ngodad. Ere ngad weliyed rogon angin e re paradis ney ni be yib ngodad nge fan nsusun e dab da chuwgad riy.

RAROGON E PIIN YAD BAY U LAN FARE PARADIS NI BE YIP’ FAN BAN’EN

5. Mang boch e tow’ath ni bay rodad ni bochan e gad bay u lan fare paradis ni be yip’ fan ban’en nrogon ni kan micheg ko Isaiah 65:13?

⁵ Ba gaman e ggan rorad ma bay gelngirad. I weliy e yiiy rok Isaiah murung’agen e n’en nib thil u thilin e par rok e piin yad bay u lan fare paradis ni be yip’ fan ban’en nge piin yad bay u wuru’. (Mu beeg e Isaiah 65:13.) Boor ban’en ni ma pi’ Jehovah ko pi tapigpig rok ni fan ko tirok ban’en. Bay gelngin nib thothup rodad, nge Thin rok, ma kub gaman e ggan ni fan ko tirok ban’en ni be pi’ ngodad ya nge yag ni ‘yoor gadad . . . mu ud garbodgad . . . mu ud felfelan’gad.’ (Mu taarebrogonnag ko Revelation 22:17.) Machane piin yad bay u wuru’ e re paradis ney ni be yip’ fan ban’en e ‘bay ur m’ad ko bilig nge belel . . . ma bayi m’ay farad.’ Der yag ngorad e tin nib t’uf rorad ni fan ko tirok Got ban’en.​—Amos 8:11.

6. Uw rogon ni be weliy e Joel 2:​21-24 murung’agen e pi n’en ma pi’ Jehovah ngodad ni fan ko tirok ban’en, nge rogon nrayog ni nge yib angin ngodad?

⁶ I weliy Joel u lan e fanathin rok murung’agen boch ban’en nib t’uf ko par ko girdi’ ni bod e grain, nge wain, nge gapgep ni olive ni nge dag ni ma pi’ Jehovah e tin nib t’uf ko girdi’ rok nib muun ngay e ggan ni fan ko tirok ban’en. (Joel 2:​21-24) Ma rin’ e re n’ey u daken e Bible nge pi babyor rodad nib puluw e thin riy ko Bible, nge website rodad, nge pi muulung, nge assembly, nge convention ni gad ma tay. Rayog ni nge yib angin e pi n’ey ngodad ni gubin e rran mad pared nib gaman e ggan rodad ma bay gelngidad.

7. Mang e ma yibnag e “felfelan’” ngodad? (Isaiah 65:14)

⁷ Yad ba felfelan’ mab fel’ u wan’rad e tin bay rorad. Girdi’ rok Got e rayog ni ngar “tangniged e felfelan’” ni bochan e ri yad be pining e magar ngak. (Mu beeg e Isaiah 65:​14, BT.) Tin riyul’ ni bay u lan e Thin rok Got ni ma pi’ e athamgil nga lanin’dad, nge pi n’en ke micheg nra fal’eg lanin’dad, nge athap rodad ni be tor nga daken e biyul ni maligach ni pi’ Kristus e ma yibnag e “felfelan’” ngodad. Faanra ud weliyed e pi walag murung’agen e pi n’ey u taabang ma rra yibnag e felfelan’ ngodad!​—Ps. 34:8; 133:​1-3.

8. Mang l’agruw ban’en nib ga’ fan ni bay u lan fare paradis ni be yip’ fan ban’en?

⁸ T’ufeg nge taareban’ ni bay u thilin e girdi’ rok Jehovah e aram l’agruw ban’en nib ga’ fan ni bay u lan fare paradis ni be yip’ fan ban’en. Gali n’ey ni “ir e ma chugumiy urngin ban’en nga taabang” e be dag rarogon e par u lan e bin nib beech e fayleng, ni aram e ngiyal’ nra gel boch e t’ufeg nge taareban’ u thilin e pi tapigpig rok Jehovah nga rogon ni bay e ngiyal’ ney. (Kol. 3:14) I weliy reb e walag nib pin e n’en ni guy u rarogon e girdi’ rok Jehovah ko yay nsom’on ni mada’nagrad ni gaar: “Dagnang rogon ni nggu felfelan’ ni ki mada’ nga lan e tabinaw rog ndag nang rogon ni nggu par riy ni gubin felfelan’. Yay nsom’on nug guy e girdi’ ni yad be t’ufeged yad e nap’an nug mada’nag e Pi Mich Rok Jehovah.” En baadag ni nge yag e bin riyul’ e felfelan’ ngak me fel’ u wan’ e tin bay rok e ba t’uf ni nge yib nga lan e paradis ni gad bay riy ni be yip’ fan ban’en. Demtrug e n’en be lemnag e re fayleng ney u murung’agen e pi tapigpig rok Jehovah, machane ba fel’ thirad u wan’ Jehovah nge piin yad be liyor ngak.​—Isa. 65:15.

9. Mang e be yog e Isaiah 65:​16, 17 u murung’agen e pi n’en ma k’aring e amith nge gafgow ngodad?

⁹ Ba gapas lanin’rad. Be yog e Isaiah 65:14 ni piin yad ra mel’eg ni ngar pared u wuru’ fare paradis ni be yip’ fan ban’en e ‘bay ur yorgad ni kari mooch’och lanin’rad.’ Machane uw rogon urngin ban’en ni ke k’aring e amith nge gafgow ko girdi’ rok Got? Ra munmun ma gubin e pi n’ey nra “chuw [u p’eowchen Got] min pagtalin.” (Mu beeg e Isaiah 65:​16, 17, BT.) Ra chuweg Jehovah e pi magawon rodad ma ra munmun ma dabki yib e pi n’em ngan’dad.

10. Mang fan ni ga be lemnag ni gab tow’ath ni ga ma chag ngak e pi walag? (Kum guy e sasing.)

¹⁰ Mus ko ngiyal’ ney nrayog ni nge gapas lanin’dad u nap’an ni gad ra un ko muulung ni bochan e aram e gin nrayog ni ngad pirieged e toffan riy ma dab kud lemnaged e pi n’en bay ko re fayleng nib kireb ney ni ma k’aring e mochuch ngodad. Ku gad ma ayuweg pi walagdad ni ngki gapas lanin’rad u nap’an ni gad ra dag e t’ufeg, nge felfelan’, nge gapas, nge gol, nge sumunguy ni aram yu yang u wom’engin gelngin Got nib thothup. (Gal. 5:​22, 23) Ri gad ba tow’ath ni gad bang ko ulung rok Got! Piin yad ra par u lan fare paradis ni be yip’ fan ban’en e yad ra guy ni kari lebug e n’en ke micheg Got ni aram e ra sunmiy “reb e fayleng nib beech nge reb e lan e lang nib beech.”

11. Susun nge uw rogon u wan’dad fare paradis ni ke sunmiy Jehovah nrogon nib puluw ko Isaiah 65:​18, 19?

¹¹ Yad be pining e magar ma yad ba felfelan’. Bin migid e weliy Isaiah fan nsusun e ngad ‘felfelan’gad’ u lan fare paradis ni be yip’ fan ban’en. Re paradis ney e Jehovah e ke sunmiy. (Mu beeg e Isaiah 65:​18, 19.) Ere aram fan ni be fanaydad ni ngad ayuweged e girdi’ ni ngar chuwgad ko pi ulung ko re fayleng ney ndarur filed e tin riyul’ ngorad u murung’agen Got, mad ayuweged yad ni ngar manged bang ko fare paradis nrib manigil ni be yip’ fan ban’en! Gad ba felfelan’ ko pi tow’ath ni ke yag ngodad ni bochan e kad uned ko tin riyul’ ma gad baadag ni ngad weliyed e pi n’ey ngak yugu boch e girdi’.​—Jer. 31:12.

12. Uw rogon u wan’um fapi thin ni kan micheg ko Isaiah 65:​20-24, ma mang fan?

¹² Ku gad ba felfelan’ ko athap ni ke yag ngodad ni bochan e bay e gapas u thildad Jehovah. Am lemnag urngin ban’en ni gad ra guy ma gad rin’ u lan e bin nib beech e fayleng rok Got! Be micheg e Bible ni be gaar: “Bitir ni kabran e dab kur m’ad, ma urngin e girdi’ ni bay ra pired . . . ni n’umngin nap’an ni ngar pired.” Gad ra ‘toy e naun ma gad par u lan, ma gad yung e woldug ni grapes me fel’ rogodad u logowen.’ Gubin e ‘maruwel ni bay ud ngongliyed e bay yan i aw nib fel’’ ni bochan e be ‘fal’eg Somol waathdad.’ Ke micheg ngodad ni gad ra par u fithik’ e felfelan’, mab pagan’dad, maku bay fan e yafos rodad. ‘Ra dawor da meybilgad’ ma manang e tin nib t’uf rok bagadad nge bagadad, mab gaman urngin ban’en nra pi’ ngodad nge yan i aw ni ‘ke fel’ u wun’dad ni gad gubin e tin ni ke yog ngodad.’​—Isa. 65:​20-24; Ps. 145:16.

13. Uw rogon ni be weliy e Isaiah 65:25 rogon ni ma thilyeg boch e girdi’ e ngongol rorad u nap’an ni yad ra tabab ni ngar pigpiggad ngak Jehovah?

¹³ Yad ba gapas ma dariy ban’en ni be buch rorad. Boor e girdi’ ni ur moyed ni yad ba ta cham, ara yad ba damumuw, ara yad ba sasalap ni ke ayuwegrad gelngin Got nib thothup ni ngar thilyeged e ngongol rorad. (Mu beeg e Isaiah 65:25.) Ba gel e athamgil ni kar ted ni ngar digeyed e ngongol nib kireb ni ur rin’ed. (Rom. 12:2; Efe. 4:​22-24) Yugu aram rogon ma gadad e girdi’ rok Got e dawor da flontgad, ere ku ra ud olobochgad. Machane ke kunuy Jehovah ‘urngin mit e girdi’’ nga taabang ni ngar pared ni bay e t’ufeg nge gapas u thilrad. (Titus 2:11) Ireray reb e maang’ang ni kemus ni yigoo Got ni gubin ma rayog rok e rayog ni nge rin’!

14. Uw rogon ni buch rok reb e walag ni pumoon e n’en bay ko Isaiah 65:25?

¹⁴ Gur, riyul’ nrayog ni nge thilyeg e girdi’ boch ban’en u rarogorad, fa? Am lemnag ban’en ni buch rok be’. Immoy reb e pagel ni gaman 20 e duw rok ma boor yay ni ka non’ nga kalbus, maku ma un ko ngongol ndarngal ma kub ta cham. U non’ nga kalbus ni bochan e be iring e karrow, nge yugu boch e chugum, maku be rin’ boch e oloboch nib gel e kireb riy. Gubin ngiyal’ ni ke fal’eg rogon ni ngar chamgow be’. Nap’an ni rung’ag e tin riyul’ u Bible me un ko muulung ko Pi Mich Rok Jehovah ko yay nsom’on, ma aram me mich u wan’ ni ke pirieg ban’en nra yibnag fan e yafos rok ni aram e nge liyor ngak Jehovah u lan fare paradis ni be yip’ fan ban’en. Tomuren ni un ko taufe nge mang reb e Pi Mich, mab ga’ ni ma lemnag rogon nib puluw fare thin ngak ni bay ko Isaiah 65:25. Immoy ni ir be’ nib ta cham ni bod e layon ma chiney e ke mang be’ nib gapas ni bod ba pi fak e saf.

15. Mang fan ni gad baadag ni ngad pininged yugu boch e girdi’ ni ngar bad nga lan fare paradis ni be yip’ fan ban’en? Uw rogon nrayog ni ngad rin’ed e re n’ey?

¹⁵ Tin som’on e thin ni bay ko Isaiah 65:13 (NW) e be gaar: “Baaray e n’en be yog Jehovah ni ir e Somol ni Th’abi Tolang.” Ma tungun e verse 25 (NW) e be gaar, “ireray e n’en ke yog Jehovah.” Gubin ngiyal’ ni ma riyul’ e thin rok. (Isa. 55:​10, 11) Bay fare paradis ni be yip’ fan ban’en e ngiyal’ ney. Ke kunuy Jehovah ba ulung i girdi’ nga taabang ni yad bogi walag ni yugu yad ba thil. Bochan ni gadad e girdi’ rok, ma gad be par ni gad ba gapas mab pagan’dad ndabi buch ban’en rodad ni yugu aram rogon ni gad be par u ba fayleng ni yugu yibe cham riy. (Ps. 72:7) Aram fan ni gad baadag ni ngad ayuweged urngin e girdi’ nrayog ni ngad ayuweged ni ngar manged boch i walagdad. Rayog ni ngad rin’ed e re n’ey ni faan gad ra tedan’dad ngad ayuweged e girdi’ ngar manged boch i gachalpen Jesus.​—Matt. 28:​19, 20.

ROGON NI NGAD K’ARINGED E GIRDI’ NI NGAR ADAGED NI NGAR BAD NGA LAN FARE PARADIS NI BE YIP’ FAN BAN’EN

16. Mang e rayog ni nge ayuweg e girdi’ ni ngar adaged ni ngar bad nga lan fare paradis ni be yip’ fan ban’en?

¹⁶ Gad gubin nra bagadad ma rayog ni nge rin’ ban’en ni nge k’aring e girdi’ ni ngar adaged ni ngar bad nga lan fare paradis ni be yip’ fan ban’en. Rayog ni ngad rin’ed e re n’ey ni faan gad ra folwok rok Jehovah. Der ma towasariy e girdi’ ni ngar bad nga lan e ulung rok, ya ma “pow’iy” e girdi’ ngak ni buchuuw ma buchuuw. (John 6:44; Jer. 31:3) Girdi’ nib fel’ gum’ircha’rad ni kar filed murung’agen pi fel’ngin Jehovah nge rarogon nib manigil e yad baadag ni ngar bad ngak. Ere uw rogon nrayog ni ngad k’aringed e girdi’ ni ngar adaged ni ngar bad nga lan fare paradis ni be yip’ fan ban’en u daken e ngongol rodad nib manigil?

17. Uw rogon nrayog ni ngad k’aringed e girdi’ ni ngar adaged ni ngar bad nga lan fare paradis ni be yip’ fan ban’en?

¹⁷ Reb e kanawo’ nrayog ni ngad k’aringed e girdi’ ni ngar adaged ni ngar bad nga lan fare paradis ni be yip’ fan ban’en e aram e ngaud daged e t’ufeg nge sumunguy ngak pi walagdad. Nap’an nra un boch e girdi’ ni yad bbeech ko muulung rodad, ma gad baadag ni ngar lemnaged e n’en ni i lemnag e piin ndawori mich Jesus u wan’rad nsana ur uned ko muulung u Korinth kakrom ni lungurad: “Riyul’ ni ba’ Got romed u roy!” (1 Kor. 14:​24, 25; Zek. 8:23) Ere thingar da ululgad ni ngaud folgad ko fare fonow ni be yog ni ‘ngaud pired nib fel’ thildad.’​—1 Thess. 5:13.

18. Mang e rayog ni nge k’aring e girdi’ ni ngar adaged ni ngar bad nga lan e ulung rodad?

¹⁸ Gubin ngiyal’ nsusun e ngaud guyed rogon ni ngaud lemnaged pi walagdad ni bod rogon ni ma lemnagrad Jehovah. Rogon ni ngad rin’ed e re n’ey e aram e ngaud sapgad nga fel’ngirad ma gathi thibngirad ni aram e n’en nra munmun me chuw. Faanra ud ‘golgad ngodad, ma ra bagadad ma be munguy ngak bagadad, mu ud n’iged fan u wun’dad e tin nib kireb ni ke rin’ bagadad ngak bagadad,’ ma aram e rayog ni ngad pithiged e magawon ni ke sum u thildad u fithik’ e t’ufeg. (Efe. 4:32) Gad ra rin’ e re n’ey, ma aram e piin yad baadag ni ngaun ngongol ngorad ni aray rogon e yad ra adag ni ngar bad nga lan fare paradis ni be yip’ fan ban’en.b

MU PAR U LAN FARE PARADIS NI BE YIP’ FAN BAN’EN

19. (a) Mang e ke yog boch e girdi’ u tomuren ni kar sulod nga lan fare paradis ni be yip’ fan ban’en nrogon ni bay ko fare kahol ni kenggin e “Ra Chuwgad Mu Kur Sulod Bayay”? (b) Mang e susun ni ngad dugliyed u wan’dad ni ngad rin’ed? (Kum guy e sasing.)

¹⁹ Rib ga’ fan u wan’dad e re paradis ney ni gad bay riy ni be yip’ fan ban’en! Ke manigil e re paradis ney ko kafram, ma kki yoor e girdi’ ni kar bad nga langgin ni ngar liyorgad ngak Jehovah. Ere manga yugu da pared ni gad be pining e magar ko re paradis ney ni ke ngongliy Jehovah rogon ni fan ngodad. Gubin e piin yad baadag ni ngar pared ni bay gelngirad, mab fel’ u wan’rad e tin bay rorad, ma yad ba gapas, ma dariy ban’en nra buch rorad e thingar ra bad nga lan fare paradis ni be yip’ fan ban’en ma dab ra chuwgad riy! Machane thingar kud kol ayuwgad ya be guy Satan rogon ni nge k’aringdad ni ngad chuwgad ko re paradis ney. (1 Pet. 5:8; Rev. 12:9) Ere thingar dab da paged ni nge gel ngodad, ma ngad athamgilgad ni ngaud ted e re paradis ney nib manigil, mab beech, ma bay e gapas riy.