N’en Ke Rin’ Jehovah ni Nge Chuweg e Girdi’ u Tan Gelngin e Denen nge Yam’

1-2. (a) Mang e denen, ma uw rogon nrayog ni ngad gelgad ngay? (Kum guy “Fan Boch e Thin.”) (b) Mang e gad ra weliy ko re article ney nge tin ka bay e article u lan e re Wulyang ko Damit ney? (Kum guy fare thin ni “Fan ko Piin Yad Be Beeg” ni bay ko re ke babyor ney.)

GA BAADAG ni ngam nang gelngin nri gab t’uf rok Jehovah Got, fa? Rayog ni ngam nang e fulweg riy ni faan ga ra fil murung’agen e n’en ke rin’ ni nge chuwegem u tan gelngin e denen nge yam’. Denena e aram reb e toogor nrib kireb ndabiyog ni ngam gel ngay ni gur rom. Gad gubin ni gad ma denen ni gubin e rran, ma gad ma yim’ ni bochan e denen ni ke af ngodad. (Rom. 5:12) Machane bay ban’en ni gad ra felfelan’ ngay. Ke micheg Jehovah nra chuwegdad u tan gelngin e denen nge yam’.

² Ke yan sogonap’an 6,000 e duw ni be ayuweg Jehovah Got e girdi’ ni ngar chamgad ko denen ni ke af ngorad. Mang fan? Ya bochan ni gad ba t’uf rok. Ka aram ko som’on nib t’uf e girdi’ rok, ere boor ban’en ni ke rin’ ni nge ayuwegrad ko re n’ey. Manang ni denen e ma fekey i yan ko yam’, ma dabun ni ngad m’ad ya baadag ni ngad pared ni manemus. (Rom. 6:23) Aram e n’en baadag ni fan ngom. Ere gad ra weliy dalip e deer ko re article ney ni aram e: (1) Uw rogon ni ognag Jehovah ban’en ko girdi’ ni tadenen nra pi’ e athap ngorad? (2) Uw rogon ni fel’ boch e girdi’ ni yad ba tadenen u wan’ Jehovah kakrom? (3) Uw rogon ni ayuweg Jesus e yafos ko girdi’ ni tadenen?

UW ROGON NI OGNAG JEHOVAH BAN’EN KO GIRDI’ NI TADENEN NRA PI’ E ATHAP NGORAD?

3. Mang e rin’ me denen Adam nge Efa?

³ Nap’an ni sunmiy Jehovah e bin som’on e pumoon nge ppin, ma baadag ni ngar felfelan’gow. I pi’ bang ni ngar parew riy nib fel’ yaan, me m’ag pa’row, me pi’ reb e maruwel ngorow nrib manigil. I yog ngorow ni ngar diyengow ngar suguyew pi fakrow u fayleng, mar ngongliyew e re fayleng ney ni ga’ngin nge mang paradis ni bod fare milay’ nu Eden. Kemus ni taa ban’en e yog ngorow ndab rrin’ew. I yog ngorow ni faan yow ra th’ab e re motochiyel nem ni lem rorow, ma aram e yow ra yim’. Ma gad manang e n’en ni buch. I yib ba engel nde t’uf Got rok maku dar t’ufgow rok nge waliyrow ni ngar rin’ew e re denen ney, ma aram mar pagew yow ni ngan waliyrow ngar denengow. Bochan nde pagan’row ko Chitamangirow ni i t’ufegrow, ma aram mar denengow. Ere riyul’ e n’en ni yog Jehovah nra buch rorow. Bochan ndar folgow ma aram mar gafgowgow u n’umngin nap’an e yafos rorow. Ra pilibthirgow i yan, me tomur riy mar m’ow.​—Gen. 1:​28, 29; 2:​8, 9, 16-18; 3:​1-6, 17-19, 24; 5:5.

4. Mang fan ni ma fanenikay Jehovah e denen ma ma ayuwegdad ni ngad gelgad ngay? (Roma 8:​20, 21)

⁴ Ke n’igin Jehovah ni ngan yoloy murung’agen e re n’ey nga Bible ni fan ngodad. Ma ayuwegdad ni ngad nanged fan nri ma fanenikay e denen. Denen e ma palognagdad ko Chitamangidad me fekdad i yan ko yam’. (Isa. 59:2) Aram fan ni Satan ni fare engel ni togopuluw me k’aring gubin e pi magawon ney e ri baadag e denen ma ka be ulul ni nga i waliy e girdi’ ko denen e ngiyal’ ney. Rayog ni lemnag ndabkiyog ni nge lebug e n’en nib m’agan’ Jehovah ngay ni fan ko girdi’ u nap’an ni denen Adam nge Efa. Machane de nang gelngin e t’ufeg ni bay rok Jehovah. De thilyeg Got e n’en nib m’agan’ ngay ni fan ngak pi fak Adam nge Efa. Bochan nib t’uf e girdi’ rok, ma aram me ognag ban’en nra pi’ e athap ngorad ni ka chingiyal’ nem. (Mu beeg e Roma 8:​20, 21.) Manang Jehovah ni bay boch i pi fak Adam nge Efa ni yad ra mel’eg ni ngar t’ufeged mar paged ni nge ayuwegrad ngar gelgad ko denen. Ma bochan ni ir e Chitamangirad nge En Ke Sunmiyrad, ma aram me bing e kanawo’ ngorad ni ngar chuwgad u tan gelngin e denen mar chugurgad ngak. Ere mang e ra rin’ Jehovah ya nge yag ni buch e pi n’ey?

5. Mingiyal’ e pi’ Jehovah e bin som’on e athap ko girdi’ ni tadenen? Mu tamilangnag. (Genesis 3:15)

⁵ Mu beeg e Genesis 3:15. I pi’ Jehovah e bin som’on e athap ko girdi’ ni tadenen u nap’an ni yog e n’en nra buch rok Satan. I yog nra yib be’ ni “fak” ara owchen nra ayuweg e yafos ko girdi’. Ir e en nra munmun me thang Satan, me pithig urngin e magawon ni k’aring u Eden. (1 John 3:8) Machane som’on e ra “k’ad” Satan wurilen ay e cha’nem ni ir owchen fare pin, ara k’aring ni ngan thang e fan rok. Rib gel e kireban’ nra tay Jehovah ko re n’ey. Machane i m’agan’ ngay ni nge pag ni nge buch ni bochan e boor e girdi’ ni yad ra chuw u tan gelngin e denen nge yam’.

UW ROGON NI FEL’ BOCH E GIRDI’ NI YAD BA TADENEN U WAN’ JEHOVAH KAKROM?

6. Mang e rin’ boch e pumoon nib mich Jehovah u wan’rad ni bod Abel nge Noah ya nge yag nra chugurgad ngak?

⁶ I tamilangnag Jehovah rogon nrayog ni nge chugur e girdi’ ni tadenen ngak ni buchuuw ma buchuuw. Abel ni ir e bin migid e pumoon ni fak Adam nge Efa e ir e bin som’on e girdi’ ni mich Jehovah u wan’ u tomuren e togopuluw nni tay u Eden. Bochan nib t’uf Jehovah rok ma baadag ni nge felfelan’nag me chugur ngak, ma aram me ognag ba maligach ngak. Ir be’ ni ma chuguliy e saf, ere fek boch i pi fak e saf rok nge li’ me ognag ngak Jehovah. Uw rogon e re n’ey u wan’ Jehovah? I “fel’ Abel u wan’ nge maligach rok.” (Gen. 4:4) Kub fel’ u wan’ Jehovah e maligach ni i pi’ yugu boch e girdi’ ngak nib t’uf rorad mab pagan’rad ngak ni bod Noah. (Gen. 8:​20, 21) Bochan ni fel’ e pi maligach ney u wan’ Jehovah, ma aram me dag nrayog ni nge fel’ e girdi’ ni tadenen u wan’ mar chugurgad ngak.b

7. Mang e gad be fil u rogon ni m’agan’ Abraham ngay ni nge ognag fak ni maligach?

⁷ I yog Jehovah ngak Abraham ni be’ nrib gel e michan’ rok ni nge rin’ ban’en nrib gel e mo’maw’ riy. I yog ngak ni nge ognag Isak ni fak ni maligach. Dariy e maruwar riy nrib mo’maw’ ngak Abraham ni nge rin’ e re n’ey. Yugu aram rogon me fal’eg rogon ni nge rin’ e n’en ka nog ngak. Machane nap’an ni be n’en ni nge li’ fak nge yim’, me yib Got i taleg. Re n’ey ni buch e be fil ban’en nib ga’ fan ngak urngin e piin bay e michan’ rorad. Ra m’agan’ Jehovah ngay ni nge pi’ Fak nrib t’uf rok ni maligach. Aram gelngin feni t’uf e girdi’ rok.​—Gen. 22:​1-18.

8. Mang e be dag yaan e pi maligach ni un pi’ u tan fare Motochiyel? (Levitikus 4:​27-29; 17:11)

⁸ Fare Motochiyel nni pi’ ko fare nam nu Israel boch e chibog nga tomuren e be tamilangnag ni boor e maligach nib t’uf ni ngan pi’ ni nge yan nga lon e denen ko girdi’ rok Got. (Mu beeg e Levitikus 4:​27-29; 17:11.) Pi maligach nem e be dag yaan reb e maligach ni kab gel e fel’ riy ni ir e rra chuweg e girdi’ u tan gelngin e denen. Nni thagthagnag nga laniyan’ e pi profet rok Got ni ngar yoloyed ni faen owchen ni kan micheg ni aram Fak Got e thingari gafgow me yim’. Yira pi’ ni maligach ni bod ba saf ni kan ognag ni maligach. (Isa. 53:​1-12) Am lemnag e re n’ey: Ra pi’ Jehovah Fak nrib t’uf rok ni maligach ni bochan e nge chuweg e girdi’ u tan gelngin e denen nge yam’ ni gab muun ngay!

UW ROGON NI AYUWEG JESUS E YAFOS KO GIRDI’ NI TADENEN?

9. Mang e yog John ni Tataufe u murung’agen Jesus? (Hebrews 9:22; 10:​1-4, 12)

⁹ Nap’an e bin som’on e chibog C.E., me guy John ni Tataufe Jesus nu Nazareth me gaar: “Baaram fare Fak e Saf rok Got ni ir e nge chuweg e denen rok e girdi’ nu fayleng!” (John 1:29) Be dag e pi thin ney ni Jesus e ir faen owchen ni ke micheg Got. Ir e ra ognag fare maligach ni kan micheg. Ere ke yib faen owchen Jehovah ni ir e rra chuweg e girdi’ u tan gelngin e denen.​—Mu beeg e Hebrews 9:22; 10:​1-4, 12.

10. Uw rogon ni dag Jesus ni ke ‘yib ni nge pining’ e pi tadenen?

¹⁰ Ba ga’ ni i ayuweg Jesus e girdi’ ni ke kireban’rad ni bochan e yad bogi tadenen me piningrad ni ngar manged boch i gachalpen. Manang ni denen e aram tapgin e gafgow ni be tay e girdi’. Ere ba ga’ ni i ayuweg e pi pumoon nge ppin ni yimanangrad ni yad boch e tadenen. I weliy u daken ba fanathin ni gaar: “Piin ni yad ba gol e dariy fan e togta ngorad, ya ke mus ni piin ni yad mm’ar e ba’ fan e togta ngorad.” Ki ulul ngay ni gaar: “Gathi ku gub ni nggu pining e piin ni yad ba yal’uw, ya ku gub ni nggu pining e piin ndabun e girdi’ nu lan binaw dakenrad [“pi tadenen,” NW].” (Matt. 9:​12, 13) Ireray e n’en ni i rin’ Jesus. I n’ag fan e denen rok fare pin ni munurnag e rifrif u ay ko lu’ rok. (Luke 7:​37-50) Me fil boch ban’en nib riyul’ mab ga’ fan ngak fare pin nu Samaria ni immoy ko fare luwed ni yugu aram rogon ni manang ni yow be par be’ nib pumoon ni gathi figirngin. (John 4:​7, 17-19, 25, 26) Ma yim’ e girdi’ ni bochan e denen ni ke af ngorad. Machane i pi’ Got gelngin Jesus ni nge faseg boch e pumoon, nge ppin, nge bitir ni kar m’ad.​—Matt. 11:5.

11. Mang fan nda i rus e piin ur rin’ed boch e denen ni ngar bad ngak Jesus?

¹¹ Aram fan ni mus ko piin ur rin’ed boch e denen ni ur bad ngak Jesus. I runguyrad ma i dag ni manang rogon lanin’rad. Da ur rusgad ni ngar nonad ngak. (Luke 15:​1, 2) Ki yog nib fel’ e n’en kar dugliyed me tow’athnagrad ni bochan e ra daged nib mich u wan’rad. (Luke 19:​1-10) N’en ni rin’ e ri be m’ug riy rogon e runguy rok e Chitamangin. (John 14:9) I dag u daken e thin nge ngongol rok ni Chitamangin e ir be’ ni ma runguy e girdi’, ma ma t’ufegrad, ma baadag ni nge ayuwegrad ni ngar gelgad ko denen. I ayuweg e girdi’ ni tadenen ni ngar adaged ni ngar thilyeged e ngongol rorad mar manged boch i gachalpen.​—Luke 5:​27, 28.

12. Mang e yog Jesus u murung’agen e yam’ nra tay?

¹² Manang Jesus e n’en nra buch rok. Boor yay ni i yog ngak pi gachalpen ni yira yognag min li’ nge yim’ u daken ba ley i gek’iy. (Matt. 17:22; 20:​18, 19) Manang ni maligach nra pi’ e ra chuweg e denen ko girdi’ nu fayleng ni bod ni yog John miki yiiynag e pi profet u m’on riy. Ki yog nu tomuren nra pi’ e yafos rok, ma ra “girngiy urngin e girdi’” ngak. (John 12:32) Rayog ni nge fel’ e girdi’ ni tadenen u wan’ Jehovah ni faanra mich Jesus u wan’rad ni ir e Somol rorad mar folwokgad rok. Faan yad ra rin’ e re n’ey, ma aram e yad ra ‘chuw u pa’ e denen.’ (Rom. 6:​14, 18, 22; John 8:32) Ere m’agan’ Jesus ngay maku de rus ni nge gafgow nge yim’.​—John 10:​17, 18.

13. Uw rogon ni yim’ Jesus, ma mang e be fil e yam’ ni tay ngodad u murung’agen Jehovah Got? (Kum guy e sasing.)

¹³ Ni yognag Jesus, min kol, mi nog e thin nib kireb ngak, min t’ar e thin nga daken, mi nog ni bay rogon ni ngan thang e fan rok, mu kun gafgownag. I fek e pi salthaw ko gin ngan thang e fan rok riy mar richibiyed nga ba ley i gek’iy. Nap’an ni be athamgiliy e gafgow ni un tay ngak u fithik’ e yul’yul’, maku bay Be’ nri kab gel e amith ni i tay laniyan’. Cha’nem e aram Jehovah Got. Yugu aram rogon ni bay gelngin maku rayog rok ni nge taleg Fak ndab ki gafgow, machane de rin’. Mang fan? Mang e ra k’aring ba Matam nib t’uf Fak rok ni nge rin’ ban’en ni aray rogon? Aram e t’ufeg. I gaar Jesus: “Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.”​—John 3:16.

14. Mang e ga be fil ko fare maligach ni pi’ Jesus?

¹⁴ Maligach ni pi’ Jesus e aram e n’en nri be micheg gelngin nrib t’uf pi fak Adam nge Efa rok Jehovah. Ku be micheg gelngin nri gab t’uf rok Jehovah. I pi’ Fak nrib t’uf rok ni maligach mab gel e amith ni tay laniyan’ ya nge yag ni chuwegem u tan gelngin e denen nge yam’. (1 John 4:​9, 10) Arrogon, baadag ni nge ayuwegdad ni be’ nge be’ ni ngad chamgad ngad gelgad ko denen!

15. Faanra nge yib angin ngodad e tow’ath rok Got ni aram fare biyul ni maligach ni pi’ Jesus, ma mang e thingar da rin’ed?

¹⁵ Tow’ath ni pi’ Got ni aram fare biyul ni maligach ni pi’ Fak ni kari maagirag rok e ke bing e kanawo’ ni ngan n’ag fan e denen rodad. Machane faanra nge n’ag Got fan e denen rodad, ma bay ban’en nthingar da rin’ed. Mang e re n’em? I pi’ John ni Tataufe nge Jesus Kristus e fulweg riy ni lungurow: “Mpied keru’med ko denen ni gimed be rin’, ya gagiyeg nu tharmiy e ke chugur!” (Matt. 3:​1, 2; 4:17) Faanra gad baadag ni ngad gelgad ko denen ma gad chugur ko Chitamangidad ni gad ba t’uf rok, ma aram e thingar da kalgadngan’dad. Machane mang e ba muun ko re n’ey, ma uw rogon nra ayuwegdad ni ngad gelgad nga rarogodad ni gad bogi tadenen? Yira weliy e fulweg riy ko bin migid e article.