Rogon ni Ma Folwok e Ulung u Rogon ni Ma Lemnag Jehovah e Pi Tadenen

1. Mang e baadag Jehovah ni nge rin’ gubin e girdi’?

I SUNMIY Jehovah e girdi’ ni bay e puf rogon rorad. Gubin e rran ni ga ma maruwel ko re tow’ath ney ni ngam dugliy boch ban’en. N’en nth’abi ga’ fan nrayog ni nge dugliy be’ e aram e nge ognag ir ngak Jehovah me mang bang ko tabinaw rok ni yad ma pigpig ngak. Ireray e n’en baadag Jehovah ni nge rin’ gubin e girdi’. Mang fan? Bochan nib t’uf e girdi’ rok ma baadag e tin nth’abi fel’ ni fan ngorad. Baadag ni ngar manged fager rok mar pared ndariy n’umngin nap’an.​—Deut. 30:​19, 20; Gal. 6:​7, 8. 

2. Mang e baadag Jehovah ni nge rin’ e piin ndawor ra kalgadngan’rad ko denen ni kar rin’ed? (1 John 2:1)

² Machane der towasariy Jehovah be’ ni nge pigpig ngak. Ma pagdad ni nge bagadad me dugliy e n’en nge rin’. Ere uw rogon ni faanra th’ab reb e Kristiano ni kan taufenag e motochiyel rok Got me rin’ reb e denen nib ubchiya’? Faanra dabi kalngan’, ma thingar ni tharbog ko ulung. (1 Kor. 5:13) Yugu aram rogon, maku be athapeg Jehovah ni nge sul facha’ ngak. Bin riyul’ riy e reb i fan ni pi’ Jehovah fare biyul e bochan e nge yag ni n’ag fan e denen rok e piin kar kalgadngan’rad. (Mu beeg e 1 John 2:1.) Got rodad ni gad ba t’uf rok e ma tay ir ngak e piin kar rin’ed boch e denen nib ubchiya’ ni ngar kalgadngan’rad.​—Zek. 1:3; Rom. 2:4; Jas. 4:8.

3. Mang e gad ra weliy ko re article ney?

³ Baadag Jehovah ni ngad lemnaged e denen nge piin kar rin’ed boch e denen nib ubchiya’ ni bod rogon ni ma lemnag. Re article ney e ra weliy rogon nrayog ni ngad rin’ed e re n’ey. Nap’an ni ga be beeg, mag yaliy (1) rogon e n’en nrin’ nga reb e denen nib ubchiya’ ni buch u lan e ulung nu Korinth ko bin som’on e chibog, (2) n’en ni yog apostal Paul ni ngan rin’ u nap’an nra kalngan’ be’ ni ke rin’ reb e denen nib ubchiya’, nge (3) n’en be dag e re n’ey u rogon ni ma lemnag Jehovah e pi Kristiano ni kar rin’ed reb e denen nib ubchiya’.

N’EN NRIN’ NGA REB E DENEN NIB UBCHIYA’ NI BUCH KO BIN SOM’ON E CHIBOG

4. Mang e buch u lan e ulung nu Korinth ko bin som’on e chibog? (1 Korinth 5:​1, 2)

⁴ Mu beeg e 1 Korinth 5:​1, 2. Nap’an e yay ni dalip e milekag ni tay Paul ni be machib, me rung’ag murung’agen ban’en nrib gel e kireb riy ni be buch u lan fare ulung nu Korinth ni ka fini sum. Bay reb e walag ni pumoon ni yow be par leengin e chitamangin ko pa’ ndarngal. Mus ngak e piin ndarur liyorgad ngak Got ni yad manang nrib kireb e mit ney e ngongol! Gathi kemus ni i pag e ulung ni nga i rin’ e mit ney e ngongol, ya ku rayog ni yad ba uf ngay. Sana rayog ni bay boch i yad ni i lemnag nre n’ey e be dag gelngin nri ma runguy Got e girdi’ ndawor ra flontgad ma manang rarogorad. Machane dabi pag Jehovah e girdi’ rok ni ngaur rin’ed e kireb. Ba mudugil ni be kirebnag e re moon nem thin e ulung ni bochan e ngongol nib kireb ni be rin’. Ku rayog ni be suruy laniyan’ yugu boch e Kristiano ni yad be chag ngak ni ngar uned i rin’ e n’en be rin’. Ere mang e yog Paul ko re ulung nem ni ngar rin’ed?

5. Mang e yog Paul ko ulung ni ngar rin’ed? Mang e be yip’ fan e re n’ey? (1 Korinth 5:13) (Kum guy e sasing.)

⁵ Mu beeg e 1 Korinth 5:13. Nni thagthagnag nga laniyan’ Paul ni nge yoloy bangi babyor nge pi’ ko re ulung nem ni be yog nthingar ni tharbog e re moon nem nder kalngan’. Ere susun ni uw rogon e ngongol ni nge dag e pi Kristiano ni yad ba yul’yul’ ngak? I yog Paul ‘ndab kur chaggad’ ngak. Mang e be yip’ fan e re n’ey? I weliy Paul nre n’ey e ba muun ngay ni mus ni ngar ‘uned ngak e mit i girdi’ nem ko abich’ ma dab rrin’ed. (1 Kor. 5:11) Faan gimew ra par be’ nga but’ ngam abichgow u taabang, mab mom nrayog ni ngaum chag ngak. Ere ba tamilang ni be yog Paul nsusun e dab kur chaggad ko re moon nem. Re n’ey e ra ayuweg ndabi af e ngongol nib kireb ni be rin’ ko pi walag u lan e ulung. (1 Kor. 5:​5-7) Maku reb e faanra dab kur chaggad ngak, ma rayog ni nge nang ni ke rin’ ban’en nib kireb me k’aring ni nge kalngan’.

6. Mang angin fagi babyor ni yoloy Paul ngak fare ulung nge fare moon ni ke denen?

⁶ Tomuren ni pi’ Paul e babyor rok nge yan ko pi Kristiano u Korinth, ma aram me tabab ni nga i lemnag e n’en yad ra rin’ u tomuren ni yad ra beeg. Munmun me sulweg Titus e thin ngak nri felfelan’ ngay. Ke fol e ulung ko n’en ni yog Paul u lan fagi babyor ni yoloy, ma kan tharbog fare moon ni be denen. (2 Kor. 7:​6, 7) Maku reb e de n’uw nap’an nga tomuren ni pi’ Paul fagi babyor ngorad, ma aram me kalngan’ fare moon ko denen ni i rin’! I thilyeg e lem nge ngongol rok, me tabab ni nge fol ko pi motochiyel rok Jehovah bayay. (2 Kor. 7:​8-11) Ere mang e migid ni yog Paul ni nge rin’ e re ulung nem?

N’EN NGE RIN’ E ULUNG KO FARE MOON NI KE KALNGAN’

7. Mang angin ni yib riy ni bochan e nni tharbog fare moon ni be denen ko ulung? (2 Korinth 2:​5-8)

⁷ Mu beeg e 2 Korinth 2:​5-8. I yog Paul ni ‘gechig ni kan ta’ ngak faanem e ke gaman.’ Re n’ey e be yip’ fan ni ke yib angin e gechig ni kan tay ngak. Ni uw rogon? Ke k’aring ni nge kalngan’.​—Heb. 12:11.

8. Mang e migid ni yog Paul ni nge rin’ fare ulung?

⁸ Ere yog Paul ko ulung ni gaar: “Ngam n’iged fan u wun’med e tin ni ke rin’ [walagmed] mi gimed pi’ e athamgil nga laniyan’” ma “ngam guyed rogon nge nang nri kab t’uf romed.” Mu tay fanam i yan riy ni gathi kemus ni baadag Paul ni nge pag e ulung e re moon nem ni nge sul ko girdi’ rok Jehovah, ya ku baadag ni ngar micheged nga laniyan’ u daken e thin nge ngongol rorad nriyul’ ni kar n’aged fan e kireb rok, ma yad be t’ufeg. Bochan e re n’ey, ma ra nang ni kar felfelan’gad ni ke sul ko ulung.

9. Mang fan nrayog ni bay boch e girdi’ u lan e ulung ni gathi ri yad baadag ni ngar n’aged fan e kireb rok fare walag ni ke kalngan’?

⁹ Gur, bay boch e girdi’ u lan e ulung ni gathi ri yad baadag ni ngar daged ni kar felfelan’gad ni ke sul fare walag ko ulung, fa? Der yog e Bible, machane rayog ni bay boch i yad ni gathi rib felfelan’ ngay. Bin riyul’ riy e kireb ni rin’ e magawonnag e ulung ni ga’ngin, ma sana rayog ni ki k’aring e tamra’ ngak boch e walag u lan e ulung. Sana rayog ni bay boch i yad ni i lemnag nde mat’aw ni ngan pag e re moon nem ni aram feni gel e kireb ko denen ni ke rin’ ni ngki mang reb e walag bayay, ma yad e yad be athamgil u rogon nrayog rorad ni ngar pared nib fel’ e ngongol rorad. (Mu taarebrogonnag ko Luke 15:​28-30.) Ere mang nib ga’ fan ni ngari t’ufeg e ulung e re walag ney?

10-11. Mang e rayog ni nge buch ni faanra siyeg e piin piilal ni ngar n’aged fan e denen rok fare moon ni ke kalngan’?

¹⁰ Am lemnag e n’en nrayog ni nge buch ni faanra de pag e piin piilal e re moon nem ni ke kalngan’ ni nge sul ko ulung, fa reb e tomuren ni sul ma de m’agan’ e pi walag ngay ni ngar daged e t’ufeg ngak. Rayog ni nge “gel e kireban’ rok nge pag ir.” Ba mom nrayog ni nge lemnag ndakuriy e athap rok. Fa reb e rayog ni nge mulan’ ma dabki guy rogon ni nge fel’ e tha’ u thilrow Got bayay.

¹¹ Ma bin th’abi gel e kireb riy e faanra dabi m’agan’ e pi walag u lan e ulung ngay ni ngar n’aged fan e kireb rok, maku rayog ni nge kireb e tha’ u thilrad Jehovah. Mang fan? Ya aram e yad be folwok rok Satan ni ir be’ nrib kireb ma der ma dag e runguy, ma darur folwokgad rok Jehovah ni ma n’ag fan e kireb rok e pi tadenen ni kar kalgadngan’rad. Ku rayog ni nge fanayrad Moonyan’ ni ngar taleged e re moon nem ndab ki pigpig ngak Jehovah.​—2 Kor. 2:​10, 11; Efe. 4:27.

12. Uw rogon nrayog ni nge folwok fare ulung rok Jehovah?

¹² Ere uw rogon nrayog ni nge folwok fare ulung nu Korinth rok Jehovah ma gathi Satan? Aram e ngar folwokgad u rogon ni ma n’ag Jehovah fan e denen rok e piin kar kalgadngan’rad. Mu tay fanam i yan u rogon ni weliy boch e girdi’ nra yoloyed boch e babyor u lan e Bible murung’agen Jehovah. David e yog ni gaar: “Gur e gab gol ngomad ma ga ma n’ag fan u wun’um e kireb romad.” (Ps. 86:​5, BT) Me Mikah e yoloy ni gaar: “Somol, dakuriy yugu reb e kan nga bayang ni bod gur; kam n’ag fan e denen rok e tin ni ke magey ko girdi’ rom.” (Mik. 7:18) Me Isaiah e yog ni gaar: “Piin nib kireb e ngongol rorad e ngar paged, mi yad thiliyeg rogon e lem ni yad be tay. Mi yad chel ngak Somol, ni Got rodad; ya ri ma runguy e girdi’, ma ba gur ni nge n’ag fan ban’en u wan’.”​—Isa. 55:7.

13. Mang fan nib puluw ni ngan sulweg fare moon ni ke kalngan’ ko ulung bayay? (Mu guy fare kahol ni kenggin e “Mingiyal’ e Nni Sulweg Fare Moon nu Korinth ko Ulung?”)

¹³ Ra nge folwok fare ulung nu Korinth rok Jehovah, ma aram e ba t’uf ni ngar daged ko fare moon ni ke kalngan’ ni yad ba felfelan’ ni ke sul ko ulung mar micheged nga laniyan’ nib t’uf rorad. I yog Paul ni faan yad ra n’ag fan e kireb rok fare moon ni ke kalngan’, ma aram e yad be dag ni yad be ‘fol ko tin ni be fonownagrad riy.’ (2 Kor. 2:9) Riyul’ ni ka fini gaman in e pul ni kan chuweg fare moon ko ulung, machane ba ga’ angin e gechig ni kan tay ngak ya ke k’aring ni nge kalngan’.

NGAN FOLWOK U ROGON FENI MAT’AW JEHOVAH NGE ROGON NI MA DAG E RUNGUY

14-15. Mang e kad filed u rogon nni pithig fare magawon ni sum u Korinth kakrom? (2 Peter 3:9) (Kum guy e sasing.)

¹⁴ Rogon nni pithig fare magawon ni sum u Korinth kakrom e nni yoloy nga but’ “ni nge fonownagdad.” (Rom. 15:4) Gad be fil riy ni Jehovah e der ma pag e piin yad be rin’ boch e denen nib ubchiya’ ndarur kalgadngan’rad ni ngar pared u lan e ulung rok. Der lemnag ni piin yad be rin’ e kireb ndarur kalgadngan’rad e susun e ngan “runguyrad” min pagrad ni ngar pared u fithik’ e pi tapigpig rok ni yad ba yul’yul’. Ma runguyey Jehovah, machane gathi gubin mit e ngongol nib m’agan’ ngay. Ku der ma thilyeg rogon ni ma lemnag e tin nib fel’ nge tin nib kireb. (Jude 4) Ra rin’ e re n’ey ma aram e der dag e runguy ya rayog ni nge magawonnag urngin e girdi’ u lan e ulung.​—Prov. 13:20; 1 Kor. 15:33.

¹⁵ Kud filed ndabun Jehovah ni nge thang be’. Baadag ni nge ayuweg e yafos ko girdi’ ko ngiyal’ nrayog ni nge rin’ riy. Ma runguy e piin kar thilyeged e lem nge ngongol rorad, ma yad baadag ni ngki fel’ e tha’ u thilrad Jehovah bayay. (Ezek. 33:11; mu beeg e 2 Peter 3:9.) Ere nap’an ni kal fare moon nu Korinth ngan’ me thilyeg e ngongol rok, ma aram me fanay Jehovah Paul ni nge yog ko ulung nsusun e ngan n’ag fan e kireb rok min pag nge sul ko ulung bayay.

16. Mang e ga be lemnag u rogon nni pithig fare magawon ni sum u Korinth?

¹⁶ N’en kad filed u rogon nni pithig fare magawon ni sum u Korinth e ke ayuwegdad ni ngad nanged ni Jehovah e ri ma t’ufegey mab mat’aw gubin ban’en ni ma rin’. (Ps. 33:5) Ere gathi be k’aringem e re n’ey ni ngam n’uf e Got rodad? Ya bin riyul’ riy e gad gubin ni gad bogi tadenen mab t’uf ni ngan n’ag fan e denen rodad. Gad gubin ni bay rogon ni ngad pininged e magar ngak Jehovah ko fare biyul ni ke pi’ ni aram e n’en ke bing e kanawo’ ni ngan n’ag fan e denen rodad. Kari fel’ lanin’dad ni kad nanged nriyul’ ni ma t’ufeg Jehovah e girdi’ rok ma baadag e tin nth’abi fel’ ni fan ngorad!

17. Mang e yira weliy ko gal ni migid e article?

¹⁷ Faanra rin’ be’ reb e denen nib ubchiya’ e ngiyal’ ney, ma uw rogon nrayog ni nge folwok e piin piilal u lan e ulung rok Jehovah u rogon ni ma dag e t’ufeg mar ayuweged facha’ ni nge kalngan’? Mang e susun ni nge rin’ e ulung u nap’an nra dugliy e piin piilal ni ngan tharbog be’ ara ngan sulweg ko ulung? Gad ra weliy e fulweg ko gal deer ney ko gal ni migid e article.