ARTICLE NI NGAN FIL 8
TANG 130 Um N’ag Fan e Kireb u Wan’um
Uw Rogon ni Ngam N’ag Fan e Kireb ni Bod Jehovah?
“Thingar um n’iged fan u wun’med e n’en ni ke rin’ bigimed ngak bigimed ni bod rogon ni ke n’ag Somol fan u wan’ e tin ni kam rin’ed nib togopluw ngak.”—KOL. 3:13.
N’EN YIRA FIL RIY
Re article ney e be weliy boch ban’en nrayog ni ngad rin’ed ni ngad n’aged fan e kireb ni ke rin’ be’ ngodad.
1-2. (a) Mingiyal’ e rayog ni ngari mo’maw’ ni ngad n’aged fan e kireb rok be’? (b) Uw rogon ni dag Denise ni ke n’ag fan e kireb ni kan rin’ ngak?
BA MO’MAW’ ni ngam n’ag fan e kireb rok yugu boch e girdi’, fa? Boor i gadad e ba mo’maw’ ngak, nib ga’ ni faanra ke yog ara ke rin’ be’ ban’en ni kari kirebnag laniyan’. Machane faanra ke buch e re n’ey rodad, ma rayog ni nge m’ay e damumuw rodad ma gad n’ag fan e kireb ni kan rin’ ngodad. Am lemnag e n’en ni buch rok reb e walag nib pin ni ka nog Denisea ngak nri yira ngat nga rogon ni n’ag fan e kireb rok be’. Nap’an e duw ni 2017, ma ranod chon e tabinaw rok ni ngar guyed reb e Tochuch ko Pi Mich Rok Jehovah ni ka fini m’ay. Nap’an ni yad be sul i yan nga tabinaw me yib i pag be’ e karrow ko karrow rorad, me maad’ad Denise ndaki nang ban’en. Nap’an ni yan i od me nang ni ke maad’ad pi fak ma ke yim’ Brian ni figirngin. Nap’an ni lemnag e re ngiyal’ i n’em me yog ni gaar, “Ri kireban’ug nib gel miki balyangan’ug.” Boch nga tomuren me yan i nang ni faen ni pag e karrow ngorad e gathi ba ching ara der tiyan’, ma aram me meybil ngak Jehovah ni ngan pi’ e gapas ngak.
2 Fare pumoon ni pag e karrow ngorad e kol e polis min fek nga tagil’ e puf oloboch ni ngan pufthinnag ni bochan e yim’ figirngin Denise u nap’an e re accident nem. Faan yira dugliy nib kireb e rok, ma rayog ni ngan kalbusnag. Machane nog ngak Denise ko re tagil’ e puf oloboch nem nrogon e n’en nra yog u nap’an nra weliy rogon laniyan’ ko n’en ni buch e ir e ra dugliy ko yira kalbusnag e re pumoon nem fa danga’. I gaar: “Gowa bod ni ke pithig be’ e m’ag ko maad’ad u dowag ke puog ba gallon i sol nga lan mit, ya thingar gu weliy boch ban’en nri dabug ni ke buch u lan e yafos rog.” In e wik nga tomuren, me yan nga tagil’ e puf oloboch ni nge non u p’eowchen fare pumoon ni kari gafgownag laniyan’ chon e tabinaw rok. Ere mang e yog? I yog ngak fare tapuf oloboch ni nge runguy fare pumoon.b Nap’an ni mu’ ko numon me yor fare tapuf oloboch. I yog ni gaar: “Ke gaman 25 e duw ni kug mang reb e tapuf oloboch, ma dariy borran ni kug rung’ag ni ke yog be’ ban’en u lan e re tagil’ e puf oloboch ney ni arrogon. Da gur ma rung’ag ni ke wenig chon e tabinaw rok be’ ni kan rin’ e kireb ngak ni ngan runguy e en nib kireb e rok. Ku da gur ma rung’ag e thin ni ka nog u fithik’ e t’ufeg ara be m’ug riy ni kan n’ag fan.”
3. Mang e ayuweg Denise ni nge n’ag fan e kireb ni kan rin’ ngak?
3 Mang e ayuweg Denise ni nge n’ag fan e kireb ni kan rin’ ngak? I fal’eg i lemnag rogon ni ma n’ag Jehovah fan e kireb. (Mik. 7:18) Nap’an nra ga’ fan u wan’dad rogon ni ke n’ag Jehovah fan e kireb rodad, ma ra k’aringdad ni ngkud n’aged fan e kireb rok yugu boch e girdi’.
4. Mang e baadag Jehovah ni ngad rin’ed? (Efesus 4:32)
4 Baadag Jehovah ni ngaud n’aged fan e kireb rok yugu boch e girdi’ ni bod rogon ni ke n’ag fan e kireb rodad. (Mu beeg e Efesus 4:32.) Baadag ni nge m’agan’dad ngay ni ngad n’aged fan e kireb rok e piin kar kirebnaged lanin’dad. (Ps. 86:5; Luke 17:4) Gad ra weliy dalip ban’en ko re article ney nra ayuwegdad ni ngaud n’aged fan e kireb.
DAB MU PAG E N’EN KAM DABUY NI NGE PAR NDAB MU RIN’ BAN’EN NGAY
5. Mang e rayog ni nge buch rodad u nap’an ni ke kirebnag be’ lanin’dad nrogon ni be yog e Proverbs 12:18?
5 Rayog ni ngari kireban’dad ni bochan ban’en ni ke yog ara ke rin’ be’ ngodad, nib ga’ ni faanra facha’ e ir be’ nrib fel’ e thin rodad ara reb i chon e tabinaw rodad. (Ps. 55:12-14) Yu ngiyal’ e rayog ni ngari amith lanin’dad ni gowa bod ni kan rugoy bangi yar ngodad. (Mu beeg e Proverbs 12:18.) Sana rayog ni ngad guyed rogon ni nga yu gud digeyed fare n’em ndab da rin’ed ban’en ngay. Machane faan gad ra rin’ e re n’ey ma gowa bod ni kan rugoy bangi yar nga bang u dowdad min pag nge par u fithik’. Ere ku arrogon ndabiyog ni ngad lemnaged nra fel’ lanin’dad ni faanra dab da rin’ed ban’en ngay.
6. Mang e rayog ni ngad rin’ed u nap’an ni ke rin’ be’ ban’en ndubdad?
6 Nap’an nra rin’ be’ ban’en ndubdad, ma sana n’en gad ra rin’ ko som’on e ngad damumuwgad. Be yog e Bible nsana ra ud damumuwgad. Machane be yog nde fel’ ni ngad pared ni gad ba damumuw. (Ps. 4:4; Efe. 4:26) Mang fan? Ya ba ga’ ni n’en bay u lanin’dad e ir e ma k’aringdad ni ngad rin’ed ban’en. Ma damumuw e der ma yib angin nib fel’. (Jas. 1:20) Dab mu pagtalin ni gathi gubin ngiyal’ nrayog ni ngad gagiyegnaged e damumuw rodad, machane rayog ni ngad dugliyed ko ngad pared ni gad ba damumuw fa danga’.
Gathi gubin ngiyal’ nrayog ni ngad gagiyegnaged e damumuw rodad u nap’an ni kan kirebnag lanin’dad, machane rayog ni ngad dugliyed ko ngad pared ni gad ba damumuw fa danga’
7. Mang boch ban’en ni ku rayog ni ngad lemnaged u nap’an ni ke kirebnag be’ lanin’dad?
7 Nap’an ni yira rin’ ban’en nib kireb ngodad, maku rayog ni nge kireb lanin’dad u yugu boch e kanawo’. Bay reb e walag nib pin ni ka nog Ann ngak ni gaar: “Nap’an ni ku gub bitir me digey e papa’ rog e nina’ rog nge leay e re ppin ni baaram ni kan pi’ puluwon ni nga i ayuwegeg. Gu lemnag ni kan digeyeg, ma nap’an nra fakayew e bitir mug lemnag ndaki ga’ fag. Ug ilal nug be lemnag nda kug t’uf.” Ku bay reb e walag nib pin ni ka nog Georgette ngak ni weliy rogon laniyan’ u nap’an ndaki yul’yul’ figirngin ngak ni gaar: “Ka nap’an ni ka gamow bbitir nib fel’ e thin romow, ma ug pioneergow u taabang! Ere ri kireban’ug nib gel.” Ku bay reb e walag nib pin ni ka nog Naomi ngak ni gaar: “Da ug lemnag nra kirebnag figirngig lanin’ug. Ere nap’an ni yog ni ka i mith ka i yaliy yaan e ngongol ni puwlag, ma aram mug lemnag ni ke bannageg ma daki yul’yul’ ngog.”
8. (a) Mang boch i fan nsusun e ngaud n’aged fan e kireb ni kan rin’ ngodad? (b) Mang angin nra yib ngodad u nap’an ni gad ra n’ag fan e kireb ni kan rin’ ngodad? (Mu guy fare kahol ni kenggin e “Uw Rogon ni Faanra Kari Gafgownag Be’ Lanin’dad?”)
8 Dabiyog ni ngad gagiyegnaged e n’en ma yog ara ma rin’ yugu boch e girdi’ ngodad, machane rayog ni ngad guyed rogon ni ngad gagiyegnaged e n’en gad ma rin’ u nap’an ni ke buch e re n’ey. Mab ga’ ni n’en nth’abi fel’ ni ngad rin’ed e ngad n’aged fan. Mang fan? Bochan nib t’uf Jehovah rodad, ma baadag ni ngaud n’aged fan u wan’dad e kireb ni kan rin’ ngodad. Faan gad ra par ni gad ba damumuw ma dab da n’aged fan, ma dabisiy ni gad ra rin’ ban’en ndariy e gonop riy mu kud kirebnaged fithik’ i dowdad. (Prov. 14:17, 29, 30) Mu tay fanam i yan ko n’en ma buch rok reb e walag nib pin ni ka nog Christine ngak. I gaar: “Nap’an nug ra damumuw ara kug dabuy ban’en, ma gathi ri kug ma siminmin. Kub ga’ nug ma kay boch e ggan nib kireb nga fithik’ i dowag. Ku dakir gaman e mol rog, maku ma mo’maw’ ni nggu gagiyegnag rogon e lem rog, ma re n’ey e ma rin’ ban’en nga rogon e ngongol rog ngak figirngig nge yugu boch e girdi’.”
9. Mang fan nsusun e dab kud damumuwgad?
9 Mus ni faanra de wenig facha’ ngodad, ma ka rayog ni ngad rin’ed ban’en ni nge war e amith ni be tay lanin’dad. Ni uw rogon? Georgette ni faan kan weliy murung’agen e yog ni gaar: “Gu tal nda kug damumuw ko re pumoon ni baaram ni ug mabgolgow ni yugu aram rogon ni yan ba ngiyal’ mfini yag ni nggu rin’ e re n’ey. Angin ni yib riy e yag ni ngari gapas lanin’ug.” Nap’an ni gad ra tal ndab kud damumuwgad, ma ra ayuwegdad ndab da paged e damumuw ni nge rin’ ban’en nga rogon e ngongol rodad ngak yugu boch e girdi’. Ku gad ra tal ndab kud lemnaged e n’en ke buch mu kud felfelan’gad bayay. (Prov. 11:17) Machane uw rogon ni faanra dab kaa yag rom ni ngam n’ag fan e n’en kan rin’ ngom?
ROGON NI NGE M’AY E DAMUMUW ROM ARA DABKI KIREB LANIN’UM
10. Mang fan nsusun e ngad paged ba ngiyal’ ni nge yan ya nge m’ay e damumuw rodad ara dabki kireb lanin’dad ni bochan e n’en kan rin’ ngodad? (Kum guy e sasing.)
10 Uw rogon nrayog ni nge m’ay e damumuw rom ara dabki kireb lanin’um ni bochan e n’en kan rin’ ngom? Reb e kanawo’ e aram e ngam pag ba ngiyal’ ni nge yan. Tomuren ni yira tafalaynag be’ ni ke maad’ad nib gel, mab t’uf ba ngiyal’ ni nge fos e maad’ad rok. Ere ku arrogon nrayog nib t’uf ba ngiyal’ ni nge yan mfini yag ni ngad n’aged fan e kireb ni ke rin’ be’ ngodad ni ke yib u gum’ircha’dad.—Ekl. 3:3; 1 Pet. 1:22.
Gad ra maad’ad mab t’uf ni ngan tafalaynagdad ma kub t’uf ba ngiyal’ ni nge fos fagi maad’ad. Ere ku arrogon u nap’an nra kirebnag be’ lanin’dad (Mu guy e paragraph 10)
11. Uw rogon nrayog ni nge ayuwegem e meybil ni ngaum n’ag fan e kireb u wan’um?
11 Mmeybil ngak Jehovah ni nge ayuwegem ni ngaum n’ag fan e kireb u wan’um.c Ann ni faan kan weliy murung’agen e weliy rogon ni ayuweg e meybil ni gaar: “Gu wenig ngak Jehovah ni nge n’ag fan e n’en nde fel’ ni ke yog ara ke rin’ bagamad nge bagamad u lan e tabinaw. Ngemu’ mug yoloy bangi babyor nggu pi’ ngak e chitamag nge leengin mu gog ngorow ni kug n’ag fan e n’en kar rin’ew.” I yog Ann nre n’ey ni rin’ e ban’en nde mom ngak. Machane i yog ni gaar: “Gu be athapeg nra adag e chitamag nge leengin ni ngkur filew boch ban’en u murung’agen Jehovah ni bochan e kug guy rogon ni nggu folwok rok u rogon ni ma n’ag fan e kireb.”
12. Mang fan nsusun e nge pagan’dad ngak Jehovah, ma gathi pi n’en gad be lemnag? (Proverbs 3:5, 6)
12 Nge pagan’um ngak Jehovah, ma gathi pi n’en ga be lemnag. (Mu beeg e Proverbs 3:5, 6.) Gubin ngiyal’ ni manang e n’en th’abi fel’ ni fan ngodad. (Isa. 55:8, 9) Ma dariy ba ngiyal’ nra yog ni ngad rin’ed ban’en ni gad ra gafgow riy. Ere nap’an nra yog ngodad ni ngad n’aged fan u wan’dad e kireb ni kan rin’ ngodad, ma rayog ni nge pagan’dad ngay ni faan gad ra rin’ ma ra yib angin ngodad. (Ps. 40:4; Isa. 48:17, 18) Machane faanra gad be lemnag nib puluw e n’en gad be lemnag, ma sana rayog ndab da n’aged fan e kireb ni kan rin’ ngodad. (Prov. 14:12; Jer. 17:9) Naomi ni faan kan weliy murung’agen e yog ni gaar: “Som’on e gu lemnag ndariy rogon ni nggu n’ag fan rok figirngig ni ka i yaliy yaan e ngongol ni puwlag. Gu magarnag nri chey miki kirebnag lanin’ug bayay ara pagtalin gelngin e amith ni ke tay nga lanin’ug. Kug lemnag ni manang Jehovah fan nug be lem ni aray rogon. Machane yan i tamilang u wan’ug ni yugu aram rogon ni manang Jehovah fan nug be lem ni aray rogon, machane gathi be yip’ fan nib m’agan’ nga rogon e lem nug be tay. Manang rogon lanin’ug maku manang nib t’uf ba ngiyal’ ni nge yan mfini yag ni nge m’ay e damumuw rog, machane ku baadag ni nggu n’ag fan.”d
MU LEMNAG BOCH BAN’EN NIB FEL’
13. Mang e ba t’uf ni ngad rin’ed nrogon ni be yog e Roma 12:18-21?
13 Nap’an ni gad ra n’ag fan e kireb rok be’ ni kari kirebnag lanin’dad, ma gathi kemus ni ngad dugliyed ndab kud weliyed murung’agen e n’en ke buch. Faanra facha’ e ir reb i walagdad u lan e ulung, ma susun e ngad awnaged e gapas u thildad. (Matt. 5:23, 24) Ngad dugliyed ni ngad daged e runguy ma gad n’ag fan ko bin ngad damumuwgad. (Mu beeg e Roma 12:18-21; 1 Pet. 3:9) Ere mang e rayog ni nge ayuwegdad ni ngad rin’ed e re n’ey?
14. Mang e susun ni ngad guyed rogon ni ngad rin’ed, ma mang fan?
14 Susun e ngam guy rogon ni ngam lemnag facha’ ni ke kirebnag lanin’um ni bod rogon ni be lemnag Jehovah. Jehovah e ma mel’eg ni nga i sap nga fel’ngin e girdi’. (2 Kron. 16:9; Ps. 130:3) Ba ga’ ni gad ra pirieg e n’en gad be yaliy rok be’ ndemtrug ko ban’en nib fel’ ara ban’en nib kireb. Ra ud sapgad nga fel’ngin e girdi’ ma ra mom ni ngaud n’aged fan e kireb rorad. I yog reb e walag ni pumoon ni ka nog Jarrod ngak ni gaar, “Kug guy ni faan gu ra lemnag urngin ban’en nug baadag u rarogon reb e walag ko bin nggu lemnag e oloboch rok, ma ma momnag ngog ni nggu n’ag fan e kireb rok.”
15. Mang fan nrayog nib fel’ ni nga mog ngak be’ ni kam n’ag fan e kireb rok?
15 Ku reb e ban’en nib ga’ fan nib fel’ ni ngam lemnag ni ngam rin’ e aram e nga mog ngak facha’ ni kam n’ag fan e kireb rok. Mang fan? Am tay fanam i yan ko n’en ni yog Naomi ni faan kan weliy murung’agen ni gaar: “I fitheg figirngig ni gaar, ‘Kam n’ag fan rog fa dawor?’ Nap’an nug pithig langag ni nge lungug, ‘Kug n’ag fan,’ ma de yag ni nggog e pi thin nem. Ere gu nang ndawor gu n’ag fan e kireb rok ni keb u gum’irchaeg. Machane munmun mfini yag ni nggog e pi thin nem nrib ga’ fan ni, ‘Kug n’ag fan rom.’ Rug gin nga rogon nri baud laniyan’ figirngig me sugsug e lu’ nga owchen, maku arrogog ni ki gapas lanin’ug. Tomuren miki pagan’ug ngak bayay miki fel’ thilmow.”
16. Mang e kam fil u murung’agen rogon ni ngaun n’ag fan e kireb?
16 Baadag Jehovah ni ngaud n’aged fan e kireb u wan’dad. (Kol. 3:13) Yugu aram rogon ma rayog nib mo’maw’ ni ngad rin’ed e re n’ey. Machane rayog ni ngad rin’ed ni faanra dab da paged e n’en kad dabuyed ni nge par ndab da rin’ed ban’en ngay, ma gad guy rogon ni nge m’ay e damumuw rodad. Ngemu’ ma gad lemnag boch ban’en nib fel’.—Mu guy fare kahol ni kenggin e “Dalip Ban’en Nra Ayuwegey ni Ngan N’ag Fan.”
MU LEMNAG ANGIN NRA YIB RIY NI FAAN YIRA N’AG FAN E KIREB
17. Mang angin nra yib ngodad ni faanra ud n’aged fan e kireb u wan’dad?
17 Boor fan ni ngaud n’aged fan e kireb u wan’dad. Am lemnag in riy. Som’on e faan gad ra rin’ e re n’ey, ma aram e gad be folwok maku gad be felfelan’nag Jehovah ni Chitamangidad ni ma runguyey. (Luke 6:36) Bin migid e ra m’ug riy ni gad be pining e magar ngak Jehovah ni ke n’ag fan e denen rodad. (Matt. 6:12) Ma bin dalip e ra fel’ boch fithik’ i dowdad miki par nib fel’ thildad yugu boch e girdi’.
18-19. Mang e rayog ni nge buch ni faan gad ra n’ag fan e kireb ni kan rin’ ngodad?
18 Nap’an ni gad ra n’ag fan e kireb rok be’ ma rayog ni nge buch boch ban’en nib fel’ ndad lemnaged nra buch. Am tay fanam i yan ko n’en ni buch rok Denise ni faan kan weliy murung’agen. Fare pumoon ni pag e karrow ngorad e ke lemnag ni nge li’ ir nge yim’ u tomuren ni ke m’ay e pufthin ni yibe tay ngak. Machane dawori nang Denise e re n’ey e ngiyal’ nem. Yugu aram rogon mi ri ngat nga rogon ni n’ag Denise fan e kireb rok, ma aram me tabab ni ngar filed e Pi Mich Rok Jehovah e Bible u taabang.
19 Sana rayog ni ngad lemnaged nrib mo’maw’ ni ngad n’aged fan e kireb rok be’, machane rayog ni boor angin nra yib ngodad. (Matt. 5:7) Ere manga yugu da rin’ed e tin nrayog rodad ni ngaud n’aged fan e kireb ni bod Jehovah.
TANG 125 “Nge Felan’ e Piin ni Yad Ma Runguy e Girdi’!”
a Kan thilyeg fithingan boch e girdi’ u roy.
b Nap’an nra buch ban’en ni aray rogon ma ra reb e Kristiano ma thingari dugliy e n’en nge rin’.
c Mu guy e video ko fapi tang ni “Forgive One Another,” “Forgive Freely,” nge “Friends Again” ko jw.org.
d Yugu aram rogon nra yaliy be’ yaan e ngongol ni puwlag ma aram e ke denen maku ra kirebnag laniyan’ e en mabgol rok, machane gathi aram tapgin nrayog ni nge chuw faen nde kireb e rok ko en mabgol rok nrogon nib puluw ko Bible.