Rogon ni Ngan Mang Reb e Fager nib Manigil

BAY ba ngiyal’ ni kam mada’nag reb e magawon ma kam lemnag ndariy be’ nra ayuwegem, fa? Gad be par u ba ngiyal’ ni ke “mo’maw’” e par, ere rayog ni nge kireban’dad ni bochan e gad be lemnag ndariy be’ nrayog ni ngad weliyed lanin’dad ngak. (2 Tim. 3:1) Machane bin riyul’ riy e nap’an ni gad ra mada’nag e magawon, ma bay e girdi’ nrayog ni nge ayuwegdad. Be tamilangnag e Bible feni ga’ fan ni nge yag e tin riyul’ e fager ko ngiyal’ ni kan mada’nag e “gafgow.”​—Prov. 17:​17, BT.

ROGON NRAYOG NI NGE PI’ E TIN RIYUL’ E FAGER E AYUW

Pi fager rok apostal Paul ni ur milekaggad u taabang e ba ga’ e ayuw ni ur pied ngak. (Kol. 4:​7-11) Nap’an nib kalbus u Roma, ma boor ban’en ni i ayuweg e pi fager rok riy ndabiyog ni nge rin’. Bod ni Epafroditus e yib i pi’ ngak boch e chugum nib t’uf rok ni ke pi’ e pi walag u Filippi. (Fil. 4:18) Me Tykikus e i fek e yungi babyor ni ke yoloy Paul nge yan i pi’ ko pi ulung i yan. (Kol. 4:7; mu guy e study note.) Yugu aram rogon nib kalbus Paul, me yag ni nge ulul ko machib ni i tay ni bochan e ayuw ni i pi’ e pi fager rok ngak. Ere uw rogon nrayog ni ngam mang reb e fager nib manigil e ngiyal’ ney?

Bay boch ban’en ni ke buch e ngiyal’ ney ni be dag feni ga’ fan ni ngan mang reb e fager nib manigil. Am lemnag e n’en ni rin’ reb e walag nib pin ni fan ngak Elisabet nreb e regular pioneer u Spain. Nap’an nni pirieg ni ke cancer e chitiningin Elisabet nib ubchiya’, ma aram mi i textnag e re walag nem ni be yog boch e thin nra pi’ e athamgil nga laniyan’ nib puluw nga boch e thin nu Bible. I yog Elisabet ni gaar, “Pi thin ney e pi’ gelngig ni nggu athamgil u reb e rran ngu reb mug nang ni bay be’ ni be lemnageg.”​—Prov. 18:24.

Rayog ni nge chugur e tha’ u thildad e pi walag ni faanra ud ayuweged yad ni ngar uned ko machib ara muulung. Rayog ni nga mog ngak reb e walag ni ke pilibthir ni ngam man mu fek nge un ko muulung ara machib, fa? Faan ga ra rin’ e re n’ey, ma dabisiy nrayog ni nge bigimew me pi’ e athamgil nga laniyan’ bigimew. (Rom. 1:12) Machane bay boch e Kristiano ndabiyog ni ngar chuwgad u tabinaw rorad. Ere uw rogon nrayog ni ngad ayuweged yad?

MU AYUWEG E PIIN NDABIYOG NI NGAR CHUWGAD U TAFERAD

Bay boch e walag ni kar m’argad ara bay boch e magawon rorad ni be talegrad ndabiyog ni ngar uned ko muulung u Tagil’ e Liyor. Am lemnag e n’en ni buch rok David ni yib ba mit e cancer ngak ni ka nog e lymphoma ngay. Ba pag nel’ e pul ni un tafalaynag e cancer rok. Nap’an ni yibe tafalaynag, ma ur unew Lidia ni leengin ko muulung u online.

Uw rogon ni ayuwegrow e pi fager u lan e ulung? Nap’an ni yira mu’ ko muulung ma bay boch e walag u Tagil’ e Liyor ni yad ma yan nga online ngar nonad ngorow. Maku reb e nap’an ni yow ra pi’ e fulweg u nap’an e muulung, ma ma textnagrow e pi walag u tomuren e muulung nga rogned boch e thin nra pi’ e athamgil nga lanin’row. Ere mang angin ni yib riy? Ra nangew ni yow ba t’uf ko pi walag.

Gur, rayog ni ngad ayuweged e pi walag ndabiyog ni ngar chuwgad u tabinaw rorad ni ngar uned ko machib, fa? Rayog ni ngad thilyeged boch ban’en ko tin gad ma rin’ ya nge yag ndaged ngorad ndawor da paged tilrad. (Prov. 3:27) Sana rayog ni ngam man mu guyrad ngaum yoloyed boch e babyor ni ngam pied ko girdi’ ara mmachibgad u telefon. Piin ndabiyog ni ngar chuwgad u taferad e sana rayog ni ngar uned ko muulung ni fan ko machib u online. Ba felfelan’ David nge Lidia ngay ni i rin’ e ulung rorow e re n’ey. I weliy David ni gaar, “Re n’ey ni kemus ni nggu weliyed e pi walag ni gamad ma machib boch ban’en u taabang ndabi n’uw nap’an ma gamad meybil e rib gel e athamgil ni ma pi’ nga lanin’mow.” Sana rayog ni ngam fek be’ ni gimew ma fil e Bible ngam marow nga tafen reb e walag ndabiyog ni nge yan nga bang mi gimed fil e Bible u rom. Machane ngam fith fare walag u m’on riy ko rayog ni ngam rin’ e re n’ey fa dabiyog.

Nap’an ni gad ra rin’ e pi walag ndabiyog ni ngar chuwgad u taferad boch ban’en u taabang ma gad guy fel’ngirad, ma aram e ra chugur e tha’ u thildad. Bod nnap’an ni gimew ra machib reb e walag u taabang mag guy rogon ni be fanay e Thin rok Got ni nge ayuweg be’ ni nge chugur ngak Jehovah, ma dabisiy nra gel boch e chugur ko tha’ u thilmew. Nap’an ni ga ra ayuweg e pi walag u boch ban’en ni yima rin’ ni fan ko tirok Got ban’en, ma aram e rayog ni nge yag boch e fager nib beech ngom.​—2 Kor. 6:13.

Nap’an ni mada’nag Paul e magawon, me yag ni nge fel’ laniyan’ ni bochan e yan Titus ni fager rok i guy. (2 Kor. 7:​5-7) Re n’ey e be puguran ngodad ni gathi kemus nrayog ni ngad fal’eged laniyan’ pi walagdad ni faanra u dogned boch e thin ni nge pi’ e athamgil nga lanin’rad, ya ku rayog ni ngad fal’eged lanin’rad ni faanra darod da guyed yad ma gad rin’ boch ban’en ni ngad ayuweged yad.​—1 John 3:18.

MU AYUWEG E PI FAGER ROM U NAP’AN NI YIBE GAFGOWNAGRAD

Rib manigil e kanawo’ ni ke dag e pi walag u Russia nrayog ni ngan folwok riy u rogon ni yad ma ayuweged yad. Am lemnag e n’en ni buch rok Sergey nge Tatyana ni leengin. Tomuren ni yib e polis i gay boch ban’en u taferow, ma aram min fekrow nga tafen e polis ni ngan fith boch e deer ngorow. Tatyana e som’on nni pag me sul nga tabinaw. I gaar Sergey: “Nap’an ni yigi taw [Tatyana] nga tabinaw, me yib reb e walag nib pin nder rus i guy. Ki yib boch e fager ra ayuweged gamow ni nggu yarmiyew lan e naun ni gamow ma par riy.”

I ulul Sergey ngay ni gaar: “Gu baadag fare thin ko Proverbs 17:17 (BT) ni be gaar: ‘Pi tafager e gubin ngiyal’ ni yad ma dag e t’ufeg rorad. Mang gam’engin e walag ni faanra dab ra puruy’naged e gafgow rorad?’ Kug guy ni ke riyul’ e pi thin ney e ngiyal’ ney nug be mada’nag e gafgow ndabiyog ni nggu athamgiliy ni yigoo gag. Ke pi’ Jehovah boch e fager ngog ndarur rusgad ni ngar ayuweged gag.”

Chiney ni gad be mada’nag boch e magawon nrib gel e mo’maw’ riy e ba t’uf boch e fager nrayog ni ngad taga’gad ngorad. Ku ra t’uf e pi fager ney rodad u nap’an fare gafgow nib ga’. Ere ngad athamgilgad u rogon nrayog rodad ni ngad manged reb e fager nib manigil e chiney!​—1 Pet. 4:​7, 8.