Mu Fil Rogon ni Ngaum Lem ni Bod Jehovah nge Jesus

1-2. Mang e ba muun ko t’ufeg rodad ngak Jehovah? Uw rogon ni dag Jesus nib t’uf Jehovah u polo’ i lem rok?

I YOG Jesus ko bin ngan e motochiyel rok Got e ir e bin th’abi ga’ fan u nap’an ni gaar: “Thingari t’uf rom Somol ni ir e Got rom u polo’ i gum’irchaem, ngu polo’ i lanin’um, ngu polo’ i gelngim, ngu polo’ i lem rom.” (Luke 10:27) Ere ba t’uf Jehovah rodad u polo’ i gum’ircha’dad. Pi n’ey e ba muun ngay e pi n’en gad ma ar’arnag, nge n’en bay u lanin’dad, nge gelngidad. Kub muun ngay rogon e lem ni gad ma tay. Riyul’ ndabiyog ni ngari tamilangan’dad u rogon ni ma lem Jehovah. Machane rayog ni nge tamilangan’dad boch u rogon ni ma lem Got ni faan gad ra fil murung’agen “laniyan’ Kristus” ni bochan e ir e ma lem ni bod rogon e Chitamangin.​—1 Kor. 2:16 nge study note ko “we do have the mind of Christ.”

² Ba t’uf Jehovah rok Jesus u polo’ i lem rok. Manang e n’en nib m’agan’ Got ngay ni nge rin’, ma ke dugliy u wan’ ni nge fol riy ni yugu aram rogon ni manang ni yira gafgownag ni bochan e be rin’ e tin nib fel’. De pag Jesus ban’en ni nge magawonnag ndab ki rin’ e re n’ey, ni bochan e gubin ngiyal’ nib m’on u wan’ rogon ni nge rin’ e n’en nib m’agan’ e Chitamangin ngay.

3. Mang e fil apostal Peter rok Jesus, ma mang e pi’ Peter e athamgil nga laniyan’ e piin Kristiano ni ngar rin’ed? (1 Peter 4:1)

³ Ba tow’ath Peter nge tin ka bay e apostal ni bochan e boor e tayim ni ur rin’ed Jesus boch ban’en u taabang mar nanged rogon ni ma lem. Nap’an ni yoloy Peter e gin som’on e babyor rok, me pi’ e athamgil nga laniyan’ e piin Kristiano ni ngar feked e binem e lem rok Kristus nge pi’ gelngirad ngar gelgad. (Mu beeg e 1 Peter 4:1.) Nap’an ni yoloy Peter fare thin ni “mu feked e binem e lem” ko thin ni Greek, me fanay ba thin ni be dag rogon e pi salthaw ni kar feked talin e cham rorad ni ngar fal’eged rogorad ni fan ko mahl. Ere faanra fil e piin Kristiano rogon ni ngaur lemgad ni bod Jesus, ma aram e rayog ni ngar chamgad ko pi ar’ar nib kireb ni bay rorad nge ba fayleng ni be gagiyegnag Satan.​—2 Kor. 10:​3-5; Efe. 6:12.

4. Uw rogon nrayog ni nge ayuwegdad e re article ney ni ngad folgad ko fonow ni pi’ Peter?

⁴ Gad ra weliy rogon e lem ni ma tay Jesus nge rogon nrayog ni ngad folwokgad riy. Gad ra fil rogon nrayog ni (1) ngad folwokgad u rogon ni ma lem Jehovah, ni aram e n’en nra ayuwegdad ni nge taareban’dad, (2) nge sobut’an’dad, me (3) tamilangan’dad ni aram e ngaud taga’gad ngak Jehovah u daken e meybil.

MU FOLWOK U ROGON NI MA LEM JEHOVAH

5. Uw rogon ni bay bayay nde yag ni nge lem Peter ni bod Jehovah?

⁵ Am lemnag bayay nde yag ni nge lem Peter ni bod Jehovah. I yog Jesus ngak e pi apostal rok nthingari yan nga Jerusalem, ngan pi’ nga pa’ e pi tayugang’ ko teliw u rom, min gafgownag, ngemu’ min li’ nge yim’. (Matt. 16:21) Sana rayog nib mo’maw’ ngak Peter ni nge m’agan’ ngay nra pag Jehovah Jesus ni ir e athap rok piyu Israel nge fare Messiah ni kan micheg ni ngan li’ nge yim’. (Matt. 16:16) Ere fek Peter Jesus nga orel, me gaar ngak: “Somol, mang e yigi siy i pag Got nge dor! Ya thingari dabi yib e pi n’ir ngom!” (Matt. 16:22) Bochan nde lem Peter ni bod Jehovah, ma aram fan nde yag ni nge taareban’row Jesus ko re n’ey.

6. Uw rogon ni dag Jesus nib puluw e lem rok ko lem rok Jehovah?

⁶ Rib puluw e lem rok Jesus ko lem rok e Chitamangin ni bay u tharmiy. I gaar ngak Peter: “Satan, mu chuw rog! Ya kam dibchay u kanawo’ rog, ya lem ni ga be tay e lem rok e girdi’, ma gathi lem rok Got.” (Matt. 16:23) Manang Jesus ni faanra nge rin’ e n’en nib m’agan’ Jehovah ngay, ma aram e ba t’uf ni nge gafgow me yim’. Ere de motoyil ko fonow rok Peter ni yugu aram rogon ndabisiy ni be guy Peter rogon ni nge ayuweg. I fil Peter ko re n’ey nib t’uf ni nge lem ni bod ni ma lem Got. Ireray ban’en nib ga’ fan ni kub t’uf ni ngad filed.

7. Uw rogon ni dag Peter boch nga tomuren ni baadag ni nge puluw e lem rok ko lem rok Jehovah? (Mu guy e sasing .)

⁷ Boch nga tomuren me dag Peter ni baadag ni nge puluw e lem rok ko lem rok Jehovah. Ngiyal’ nem e ke taw nga nap’an ni nge mang e piin gathi yad e Jew ndawor ni maad’adnagrad boch e girdi’ rok Got. Nog ngak Peter ni nge yan i machibnag Kornelius ni gathi ir reb e Jew ni ir bagayad e tin som’on e girdi’ ni gathi yad e Jew ni mang Kristiano. Ba ga’ nder ma chag e pi Jew ngak e piin gathi yad e Jew, ere ba t’uf ni nge thilyeg Peter e lem rok ya nge yag ni machibnagrad. Nap’an ni nang Peter e n’en nib m’agan’ Got ngay ni bay rogon ko re n’ey, ma aram me thilyeg e lem rok. Ere angin ni yib riy e nap’an nni l’og ni nge yan ma de “siyeg.” (Acts 10:​28, 29) I machibnag Kornelius nge chon e tabinaw rok, ma aram min taufenagrad.​—Acts 10:​21-23, 34, 35, 44-48.

8. Uw rogon nrayog ni ngad daged nib puluw e lem rodad ko lem rok Jehovah? (1 Peter 3:8)

⁸ Boch e duw nga tomuren, me pi’ Peter e athamgil nga laniyan’ e piin Kristiano ni nge ‘taareb rogon e lem rorad.’ (Mu beeg e 1 Peter 3:8.) Gadad e girdi’ rok Jehovah e rayog ni nge taareban’dad ni faanra ud folwokgad ko lem rok nrogon ni bay ko Thin rok. Bod ni tay Jesus ir ngak pi gachalpen ni ngar m’oneged Gil’ilungun Got u lan e yafos rorad. (Matt. 6:33) Ere rayog ni nge dugliy reb e walag ko ulung rom ni nge pigpig u polo’ e tayim rok. Susun e nga dogned ngak fel’ngin e n’en be nameg, ma gad yog ngak ni ngad ayuweged ko bin nga dogned ngak ni nge mel’eg reb e par nib mom ngak.

MU SOBUT’NAG LANIN’UM

9-10. Uw rogon ni dag Jesus ni ir be’ nrib sobut’an’?

⁹ Fare nep’ u m’on ni nge yim’ Jesus, me fil ngak Peter nge tin ka bay e apostal ban’en nib ga’ fan u murung’agen e sobut’an’. Ke l’og Jesus Peter nge John u m’on riy ni nga ranow ra fal’egew rogon boch ban’en ni fan ko bin tomur e abich ni yad ra tay u taabang u m’on ni nge yim’. Reb e ban’en nrayog nrin’ew e aram e ngar guyew rogon ni ngan tay ba dabiy nge yu yang i tawol nrayog ni ngan luknag rifrifen ay e piin kar bad ko re madnom nem ngay u m’on ni ngan abich. Machane mini’ e ra rin’ e re maruwel ney?

¹⁰ De tuntun Jesus ni nge rin’ e re maruwel ney me dag nrib sobut’an’. Ba mudugil ni gin fapi apostal u nap’an nra guyed ni ke rin’ ban’en nib ga’ ni ma rin’ e pi tapigpig. I luf Jesus e thal ni wuru’ e mad rok, me bachiy bangi tawol nga lukngun, me puog boch e ran nga lan baraba’ i dabiy, me tabab i maluknag rifrifen ayrad. (John 13:​4, 5) Rayog nib n’uw nap’an ni maluknag rifrifen ay fa 12 i apostal nib muun Judas ngay ni ir e bayi yognag. Yugu aram rogon me sobut’nag Jesus laniyan’ nge mu’nag e re maruwel ney. Ngemu’ me gum’an’nag ir nge weliy fan ngorad ni gaar: “Kam nanged fan e n’en ni ka fini gu rin’ ngomed? Gimed ma pining Tamachib nge Somol ngog ma mmat’aw ni gimed be rin’, yi gag. I gag e Somol romed nge Tamachib romed, ma ka fini gu mu’ i luknag e rifrif u aymed. Ere nge bigimed mi i luknag e rifrif u ay bigimed.”​—John 13:​12-14.

11. Uw rogon ni dag Peter ni ke fil rogon ni nge dag e sobut’an’? (1 Peter 5:5) (Kum guy e sasing.)

¹¹ I fil Peter ban’en ko sobut’an’ ni dag Jesus. Tomuren ni sul Jesus nga tharmiy, me ngongliy Peter ba maang’ang ni aram e golnag be’ nib moon nni gargeleg mab mugutgut. (Acts 1:​8, 9; 3:​2, 6-8) Boor e girdi’ nra guyed e re maang’ang ney ni buch mar muulunggad nga tooben Peter. (Acts 3:11) Yugu aram rogon ni ilal Peter u bang ni girdi’ riy e rib ga’ fan u wan’rad rogon ni nge gilbuguwrad, machane dabun ni nge pining e girdi’ e sorok ngak. I dag nib sobut’an’ me yog ko fapi girdi’ ni ngar pininged e sorok ngak Jehovah nge Jesus u nap’an ni gaar: “Gelngin i fithingan [Jesus] e ke pi’ gelngin e re moon ney nib mugutgut. N’en ni kam guyed ma kam nanged e ke yog u daken e pagan’ nga fithingan.” (Acts 3:​12-16) Thin ni yog Peter u lan bangi babyor ni yoloy ngak e piin Kristiano ni murung’agen fan nib t’uf ni ngan maruweliy e sobut’an’ e rayog ni nge puguran ngodad fa ngiyal’ nem ni bachiy Jesus bangi tawol nga lukngun nge maluknag rifrifen ay e pi apostal rok.​—Mu beeg e 1 Peter 5:5.

12. Uw rogon nrayog ni ngad ululgad i maruweliy e sobut’an’ ni bod Peter?

¹² Rayog ni ngad folwokgad rok Peter u rogon ni ngad maruweliyed e sobut’an’. Be’ nib sobut’an’ e gathi kemus ni ma m’ug ko thin rok ni ir be’ nib sobut’an’. Fare thin ni fanay Peter ni kan pilyeg ni “sobut’ laniyan’” e be dag ni sobut’an’ e ba muun ngay rogon ni gad ma lemnaged gadad nge yugu boch e girdi’. Gad ma rin’ boch ban’en ni fan ko girdi’ ni bochan e ba t’uf Jehovah nge girdi’ rodad, ma gathi bochan e gad baadag ni nge adag e girdi’ dakendad. Faan gad ra pigpig ngak Jehovah ma gad ayuweg pi walagdad u rogon nrayog rodad ni yugu aram rogon ndanir guy e n’en gad be rin’, ma aram e be m’ug riy nib sobut’an’dad.​—Matt. 6:​1-4.

NGE ‘TAMILANGAN’UM’

13. Mu weliy e n’en nib muun ngay ni nge ‘tamilangan’dad.’

¹³ Mang e ba muun ngay ni nge ‘tamilangan’dad’? (1 Pet. 4:7) Reb e Kristiano nib tamilangan’ e ma athamgil u rogon nrayog rok ni nge dugliy boch ban’en nib puluw nga rogon ni ma lem Jehovah. Be’ ni aray rogon e manang ndariy ban’en nib ga’ fan nge migid e tha’ u thilrow Jehovah. Ba puluw rogon ni ma lemnag rarogon, ma manang ni gathi gubin ban’en ni manang. Ku ma dag ni ma taga’ ngak Jehovah ni aram e gubin ngiyal’ ni ma meybil ngak u fithik’ e sobut’an’.a

14. Uw rogon ni bay bayay nde yag ni nge taga’ Peter ngak Jehovah?

¹⁴ Fare nep’ u m’on ni yim’ Jesus, me ginang pi gachalpen ni gaar: “Nep’ ney e gimed gubin ni bay mmilgad ngam paged gag.” Machane me non Peter u fithik’ e pagan’ ni gaar: “Ra pagem e pi cha’ney ni yad gubin, mi gag e ri dab gu pagem!” Re nep’ i n’em me fonownag Jesus boch i gachalpen ni gaar: “Um odgad nguum meybilgad ngak Got.” (Matt. 26:​31, 33, 41) Faan gomanga fol Peter ko re fonow ney u m’on riy, ma sana rayog ndabi rus ni nge yog ni ir reb i gachalpen Jesus. Machane n’en ni rin’ e yog nde nang e Masta rok me boch nga tomuren mi ri kalngan’ riy.​—Matt. 26:​69-75.

15. Uw rogon ni dag Jesus nib tamilangan’ u nap’an e bin tomur e nep’ ko yafos rok nib girdi’?

¹⁵ Jesus e ri taga’ ngak Jehovah. Boor yay ni i meybil ni yugu aram rogon ni ir be’ nib flont. Ireray e n’en ni ayuweg ni nge dabi rus ni nge rin’ e n’en nib m’agan’ Jehovah ngay. (Matt. 26:​39, 42, 44; John 18:​4, 5) Ba mudugil nde pagtalin Peter ni boor yay ni i meybil Jesus u nap’an e bin tomur e nep’ ko yafos rok nib girdi’.

16. Uw rogon ni dag Peter ni ke yag ni nge mang be’ nib tamilangan’? (1 Peter 4:7)

¹⁶ Munmun me nang Peter feni ga’ fan ni nga i taga’ ngak Jehovah u daken e meybil. Nap’an nni faseg Jesus ko yam’ me micheg ngak Peter nge tin ka bay e apostal ni yira pi’ gelngin Got nib thothup ngorad ya nge yag nra machibnaged fare thin nib fel’. Machane i yog ngorad ni ngar songad u Jerusalem nge mada’ ko ngiyal’ ni ke buch e re n’ey. (Luke 24:49; Acts 1:​4, 5) Mang e rin’ Peter u nap’an ni be son? ‘Ur meybilgad’ boch e Kristiano u taabang. (Acts 1:​13, 14) Boch nga tomuren u nap’an ni yoloy e gin som’on e babyor rok, me yog ngak e piin Kristiano ni ngaur pared nib tamilangan’rad ma yad be taga’ ngak Jehovah u daken e meybil. (Mu beeg e 1 Peter 4:7.b) I fil Peter rogon ni nga i taga’ ngak Jehovah, me yag ni nge ayuweg pi walagen ma be pi’ gelngirad.​—Gal. 2:9.

17. Mang e ba t’uf ni ngaud rin’ed ni yugu demtrug e re miti salap ni bay rodad? (Kum guy e sasing.)

¹⁷ Ra nge tamilangan’dad, ma thingar ud meybilgad ngak Jehovah ni gubin ngiyal’. Gad manang nib t’uf ni ngaud meybilgad ngak Jehovah ni yugu demtrug e re miti salap ni bay rodad. Ere gad ma meybil ngak ni nge pow’iydad, nib ga’ nu nap’an ni ngad dugliyed boch ban’en nib ga’ fan ni bochan e ba pagan’dad ngay ni manang e n’en nib fel’ ni fan ngodad.

18. Uw rogon nrayog ni ngaud thilyeged rogon ni gad ma lem ya nge yag ni ngaud lemgad ni bod Jehovah?

¹⁸ Ri gad ba felfelan’ ni ke sunmiydad Jehovah u reb e kanawo’ nrayog ni nge m’ug pi fel’ngin rodad. (Gen. 1:26) Riyul’ ndabiyog ni ngad folwokgad rok nrib fel’ rogon. (Isa. 55:9) Machane gad baadag ni ngaud guyed rogon ni ngaud folwokgad u rogon ni ma lem Jehovah, mu ud pared nib sobut’an’dad, mab tamilangan’dad ni bod Peter.