Ba Fel’ ni Nge Bagadad Me Chugur Ngak Bagadad!

1-2. Mang e ba ga’ fan u wan’ Jehovah, ma mang e baadag ni ngad rin’ed?

RIB ga’ fan u wan’ Jehovah rogon ni gad ma ngongol ko girdi’. I yog Jesus nthingari t’uf rodad e en nib migid ngodad ni gowa gadad. (Matt. 22:37-39) Re n’ey e ba muun ngay ni ngad daged e sumunguy ngak e piin nib thil e michan’ rodad. Nap’an ni gad ra dag e sumunguy, ma aram e gad be folwok rok Jehovah Got ni ma “mateg ramaen e yal’ rok nga daken e girdi’ nib tagan nge girdi’ nib fel’ ntaareb rogon, ma be pi’ e n’uw ngak e piin ni yad be rin’ e tin nib mat’aw nge piin ni yad be rin’ e tin nib kireb.”​—Matt. 5:45.

² Yugu aram rogon ni ma t’ufeg Jehovah urngin e girdi’, machane rib t’uf rok e piin yad ma fol rok. (John 14:21) Baadag ni ngad folwokgad rok. Ere be pi’ e athamgil nga lanin’dad ni ‘ngari t’uf’ pi walagdad rodad. (1 Pet. 4:8; Rom. 12:10) Nap’an ni gad ra lemnag ni ngad t’ufeged be’ ni aray rogon, ma sana ra yib ngan’dad rogon ni gad ma t’ufeg reb e girdi’ ara fager rodad nib t’uf rodad.

3. Mang e thingar dab da paged talin u murung’agen e t’ufeg?

³ T’ufeg e bod ba woldug u milay’ rodad nib t’uf ni ngan ayuweg ya nge yag ni ga’ ken. I fonownag apostal Paul e piin Kristiano ni gaar: “Um pired ni ra bigimed ma ba t’uf bigimed rok nrogon e walag ni ma par u fithik’ Kristus.” (Heb. 13:1) Baadag Jehovah ni ngaud gelnaged e t’ufeg rodad ko girdi’. Gad ra weliy ko re article ney fan nsusun e ngad chugurnaged e tha’ u thildad pi walagdad nge rogon nrayog ni ngad ululgad ni ngaud rin’ed e re n’ey.

FAN NSUSUN E NGE BAGADAD ME CHUGUR NGAK BAGADAD

4. Uw rogon nrayog ni ngaud pared nib ga’ fan u wan’dad e taareban’ ni bay u thildad e pi walag nrogon ni kan weliy ko Psalm 133:1? (Kum guy e sasing.)

⁴ Mu beeg e Psalm 133:1, BT. Ba puluw u wan’dad e thin rok faen ni yoloy e Psalm ni faani yog nib “fel’” mab “manigil” ni ngan m’ag fager ngak e piin nib t’uf Jehovah rorad. Machane rayog ni ngad paged talin feni manigil e taareban’ ni bay u thildad e pi walag ni bod be’ nrayog ni nge pagtalin feni fel’ yaan ba ke gek’iy nib ga’ ken ni ma guy ni gubin e rran. Ba ga’ ni yug gad ma guy pi walagdad, nsana rayog nra reb e wik ma boor yay ni kad guyed yad. Ere uw rogon nrayog ni ngaur pared nib ga’ farad u wan’dad? Ra gel feni t’uf pi walagdad rodad ni faan gad ra tay e tayim ni ngad lemnaged rogon feni ga’ farad ngodad nge ulung.

5. Mang e rayog ni nge nang e girdi’ u nap’an ni yad ra guy e t’ufeg ni bay u thildad e pi walag?

⁵ Bay boch e girdi’ ni yad ra un ko muulung ko yay nsom’on, ma ri yad ma ngat nga rogon e t’ufeg ni bay u thildad. Rayog ni kemus e n’en yad ra guy mar nanged ni kar pirieged e tin riyul’. I yog Jesus ni gaar: “Faanra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.” (John 13:35) Am lemnag e n’en ni buch rok Chaithra ni i un nga reb e skul nib tolang u nap’an ni yad be fil e Pi Mich Rok Jehovah e Bible. I m’agan’ ngay ni nge un nga reb e regional convention. Tomuren e bin som’on e rran ko re convention nem, me yog ngak e en yow ma fil e Bible ni gaar: “Dariy ba ngiyal’ ni ke gumuchmuch e gallabthir rog ngog. Machane nap’an ni kug un ko convention romed, ma 52 e girdi’ ni kar gumuchmuchgad ngog u lan taareb e rran! Kug thamiy gelngin e t’ufeg rok Jehovah u daken e girdi’ rok. Gu baadag ni nggu mang bang ko tabinaw rok.” I ulul Chaithra ni nge mon’og ko tirok Got ban’en, min taufenag ko duw ni 2024. Arrogon, nap’an nra guy e piin ka yad bbeech e tin nib fel’ ni gad be rin’ nib muun ngay e t’ufeg ni bay u thildad, mab ga’ ni ma k’aringrad ni ngar adaged ni ngar pigpiggad ngak Jehovah.​—Matt. 5:16.

6. Faan gad ra chugurnaged gadad ko pi walag, ma uw rogon nrayog ni nge yororiydad u boch ban’en?

⁶ Gad ra chugurnaged gadad ko pi walag ma rayog ni nge yororiydad u boch ban’en. I yog Paul ngak e piin Kristiano ni gaar: “Rogon ni ngam pired ndariy bigimed ni ngeb e denen i bannag nge gel laniyan’ e thingari bigimed me ayuweg bigimed ni gubin e rran.” (Heb. 3:13) Faanra kari mulan’dad ni ke mo’maw’ ni ngaud rin’ed e tin nib mat’aw, ma rayog ni nge k’aring Jehovah reb e walag ni ke nang e re n’ey ni nge ayuwegdad. (Ps. 73:2, 17, 23) Mit ney e ayuw e ban’en nib fel’ ngodad.

7. Mang rogon e t’ufeg ko taareban’ ni bay u thildad? (Kolose 3:13, 14)

⁷ Gad ba muun ngab ulung i girdi’ nib gel e athamgil ni yad ma tay ni ngar t’ufeged yad, ere boor e tow’ath ni ma yag ngodad. (1 John 4:11) Bod ni t’ufeg e ma k’aringdad ni ‘nge bagadad mi i ayuweg bagadad ko meewar rok u fithik’ e runguy,’ ma re n’ey e ma mon’ognag e taareban’ u thildad e pi walag. (Mu beeg e Kolose 3:13, 14; Efe. 4:2-6) Aram fan nnap’an ni gad ra yib ko muulung mab gel e felfelan’ u thildad e pi walag ndariy ba ulung e girdi’ u fayleng ni aray rogon.

NGE BAGADAD MI I TAYFAN BAGADAD

8. Uw rogon ni ma ayuwegdad Jehovah ni nge taareban’dad pi walagdad?

⁸ Taareban’ ni bay u thildad e pi walag u ga’ngin yang e fayleng e ba maang’ang. Ke k’aring Jehovah ni nge buch e re n’ey ni yugu aram rogon ndawor da flontgad. (1 Kor. 12:25) Be yog e Bible ni ‘ke fil Got rogon ngodad ni nguud pired nib t’uf bagadad rok bagadad.’ (1 Thess. 4:9) Re n’ey e be yip’ fan ni ma fanay Jehovah e Bible ni nge yog ngodad e n’en nib t’uf ni ngad rin’ed ya nge yag ni bagadad me chugur ngak bagadad. Rayog ni nge “fil Got” boch ban’en ngodad ni faanra ud fal’eged i fil e thin rok ma gad fol riy. (Heb. 4:12; Jas. 1:25) Ma aram e n’en ma guy e Pi Mich Rok Jehovah rogon ni ngar rin’ed.

9. Mang e gad be fil ko Roma 12:9-13 u murung’agen rogon ni nge bagadad mi i tayfan bagadad?

⁹ Uw rogon ni ma fil e Thin rok Got ngodad ni nge bagadad me chugur ngak bagadad? Am lemnag e n’en ni yog Paul u murung’agen e re n’ey ko Roma 12:9-13. (Mu beeg.) Mu tay fanam i yan riy ni yog ni ‘nge pasigan’dad ngay ni nge bagadad mi i ta’ fan bagadad.’ Mang e be yip’ fan e re n’ey? Susun e ngad gayed boch e kanawo’ ni ‘nge bagadad me t’uf bagadad rok’ ni aram e ngaud n’aged fan e kireb, ma ra bagadad me gol ngak bagadad, nge ku boch ban’en. (Efe. 4:32) Susun e dab mu sonnag walagem ni nge mang ir e chugur ngom. Ya rayog ni ‘nge pasigan’um ngay’ ni ngam rin’ e re n’ey. I gaar Jesus: “Ba gel e felfelan’ ni ma yib ko pi’ ban’en ngak be’ ko bin ni be’ e nge pi’ ban’en ngom.”​—Acts 20:35.

10. Uw rogon nrayog ni ngad pasiggad u rogon ni ‘nge bagadad mi i ta’ fan bagadad’? (Kum guy e sasing.)

¹⁰ Tomuren ni yog Paul ni nge pasigan’dad ngay ni nge bagadad mi i tayfan bagadad, me yog ni ngad ‘maruwelgad nib gel, ma dab ud malmalgad.’ Be’ ni aray rogon e nap’an ni yira pi’ reb e maruwel ngak, ma ma rin’ u fithik’ e pasig. Be gaar e Proverbs 3:27, 28 (BT): “Demtrug e ngiyal’ nrayog rom, mag pi’ e ayuw ko piin ke t’uf e ayuw rorad.” Ere nap’an ni gad ra guy ni ke t’uf e ayuw rok be’, ma gad ma rin’ e tin nrayog rodad ni ngad ayuweged. Darud songad ara da lemnaged ni bay yib yugu be’ ni nge ayuweg.​—1 John 3:17, 18.

11. Mang e rayog ni nge ayuwegdad ni nge bagadad me chugur ngak bagadad?

¹¹ Ku reb e kanawo’ nrayog ni ngad ted fan yugu boch e girdi’ riy e aram e ngad gurgad ngad n’aged fan e kireb rorad u nap’an ni kar rin’ed ban’en ni ke kirebnag lanin’dad. Be gaar e Efesus 4:26: “Dab mpired ni gimed ba damumuw nge polo’ reb e rran.” Mang fan? Ya be yog e verse 27 ni faan gad ra rin’ e re n’ey, ma aram e kad “binged e kanawo’ ngak moonyan’.” Boor yay ni ke yog Jehovah ngodad u lan e Thin rok ni nge bagadad me n’ag fan e kireb rok bagadad. Be yog e Kolose 3:13 ni nge bagadad ‘mi i . . . n’ag fan u wan’ e n’en ni manga ke kirebnag bagadad u laniyan’.’ Reb e kanawo’ nrib manigil ni ngad chugurgad riy ngak pi walagdad e aram e ngaud n’aged fan e kireb rorad. Nap’an ni gad ra rin’ e re n’ey, ma aram e kad ‘pired ni kad taab girdi’gad ni fare Kan ni Thothup e ke pi’ ngodad u daken fare gapas ni ir e ke m’agdad nga taabang.’ (Efe. 4:3) Ere ba tamilang ni faanra bagadad mi i n’ag fan e kireb rok bagadad, ma aram e rayog ni ngaud pared nib taareban’dad mab gapas thildad.

12. Uw rogon ni ma ayuwegdad Jehovah ni ngad n’aged fan e kireb rok e piin kar kirebnaged lanin’dad?

¹² Riyul’ nrayog nib mo’maw’ ni ngad n’aged fan e kireb rok e piin kar kirebnaged lanin’dad. Machane rayog ni nge ayuwegdad gelngin Got nib thothup ni ngad rin’ed e re n’ey. Tomuren ni yog e Bible ni nge ‘bagadad me t’uf bagadad rok’ mu kud ‘maruwelgad nib gel,’ me yog ni gaar: “Mpigpiggad ngak Somol ni gimed ba pasig ngay u lanin’med [“u daken e ayuw ni be pi’ gelngin Got nib thothup,” NW].” Ere rayog ni nge ayuwegdad gelngin Got nib thothup ni nge bagadad me t’uf bagadad rok miki bagadad me n’ag fan e kireb rok bagadad. Aram fan ni gad ma wenig ngak Jehovah ni nge ayuwegdad.​—Luke 11:13.

“DABIYOG NI NGAM YOOR RABA’GAD”

13. Mang e rayog ni nge k’aringdad ni ngad ruw raba’gad?

¹³ ‘Urngin mit e girdi’’ ni bay u lan e ulung nra bagayad ma rogon e gin ke yib riy. (1 Tim. 2:3, 4) Faanra dab da kol ayuwgad, ma rayog ni ngad ruw raba’gad ni bochan e ba thilthil rogon e pi n’en gad ma dugliy ni bod rogon e munmad ni gad ma tay nge rogon ni gad ma fal’eg yaadad, ara rogon e re miti tafalay ni gad ma un ngay, ara pi n’en gad ma chuweg e chalban rodad ngay. (Rom. 14:4; 1 Kor. 1:10) Thingar da kol ayuwgad ndab da k’aringed e girdi’ ni ngar lemnaged ni kab fel’ e tin gad be dugliy ko tin be dugliy yugu boch e girdi’ ni bochan e ke fil Got ngodad ni ngaud t’ufeged gadad.​—Fil. 2:3.

14. Mang e susun ni ngad guyed rogon ni ngad rin’ed ni gubin ngiyal’, ma mang fan?

¹⁴ Ku rayog ni ngad ayuweged e ulung rodad ni nga i par ni bay e taareban’ riy ni faanra ud guyed rogon ni ngad pied e athamgil nga laniyan’ yugu boch e girdi’ ni gubin ngiyal’. (1 Thess. 5:11) Boor e girdi’ ni kar talgad ko muulung nge machib ara kan tharbograd ni ka fin nra sulod ko ulung ndawori n’uw nap’an. Gad ba felfelan’ ni kar sulod ko ulung bayay! (2 Kor. 2:8) Mu tay fanam i yan ko n’en ni buch rok reb e walag nib pin ni sul nge un ko muulung bayay u tomuren ni ke tal ko muulung nge machib u lan ragag e duw. I yog ni gaar, “Gubin e girdi’ nra sapgad ngog mar siminmingad mu kur bad ra ruruged paag.” (Acts 3:19) Mang angin e re n’ey ni yib ngak? I yog ni gaar, “I k’aringeg ni nggu nang ni be ayuwegeg Jehovah ni nggu pirieg e felfelan’ bayay.” Faan gad ra guy rogon ni ngad pied e athamgil nga laniyan’ yugu boch e girdi’, ma rayog ni nge fanaydad Kristus ni ngad fal’eged laniyan’ e piin ‘ke aw parowrad i fek e n’en nib tomal ni yad be fek.’​—Matt. 11:28, 29.

15. Ku mang reb e kanawo’ nrayog ni ngad mon’ognaged e taareban’ ni bay u thildad? (Kum guy e sasing.)

¹⁵ Ku reb e kanawo’ nrayog ni ngad mon’ognaged e taareban’ ni bay u thildad e u daken e thin ni gad ma yog. Be gaar e Job 12:11 (BT): “Teliy e ma skengnag e thin ni ke rung’ag, ni bod rogon bolowthey ni ma ri’ lamen e ggan.” Ba fel’ ni ngad fal’eged i lemnag e n’en nga dogned u m’on ni nga dogned ni bod be’ nib salap ko lum ni gubin ngiyal’ ni ma ri’ lamen e ggan ni ke ngongliy ni nge nang ko ba fel’ lamen fa danga’ u m’on ni nge pi’ ni nge kay e girdi’. (Ps. 141:3) Gubin ngiyal’ nsusun e ngad nameged ni nga dogned ban’en nra pi’ e athamgil, me fal’eg laniyan’ e “piin ni kar motoyilgad” ngodad, me yib fan ngorad.​—Efe. 4:29.

16. Mini’ e piin nsusun e nga u rogned e thin nra pi’ e athamgil nga lanin’uy?

¹⁶ Ba ga’ ni piin figirngiy nge piin gallabthir e susun e ngar guyed rogon ni nga u rogned e thin nra pi’ e athamgil nga lanin’uy. (Kol. 3:19, 21; Titus 2:4) Ku arrogon e piin piilal nsusun e ngaur fal’eged laniyan’ e pi saf rok Jehovah. (Isa. 32:1, 2; Gal. 6:1) Be puguran reb e thin ko Proverbs ngodad ni be gaar: “Ri dakuriy ba felfelan’ ngay, ni ga ra pirieg e re bugithin nib mat’aw ni nga nog ko ngiyal’ ni nga mog.”​—Prov. 15:23, BT.

T’UFEG ROM E NGE “YAN I AW NI BIN RIYUL’ ROGON NIB T’UF GOT NGE GIRDI’ RODAD NI MA M’UG KO NGONGOL”

17. Uw rogon ni ngaud t’ufeged pi walagdad nrogon ni ke yib u gum’ircha’dad?

¹⁷ I pi’ apostal John e athamgil nga lanin’dad ni “rogon nib t’uf Got nge girdi’ rodad e dabi par ni ke mus ni thin nge welthin; ya thingari yan i aw ni bin riyul’ rogon nib t’uf Got nge girdi’ rodad ni ma m’ug ko ngongol.” (1 John 3:18) Gad baadag ni ngad t’ufeged pi walagdad nrogon ni ke yib u gum’ircha’dad. Uw rogon nrayog ni ngad rin’ed e re n’ey? Ra yoor e tayim ni ud rin’ed pi walagdad boch ban’en u taabang, ma aram e ra gel e chugur ko tha’ nge t’ufeg u thildad. Ere mu gay boch e kanawo’ ni ngaum rin’ed e pi walag boch ban’en riy u taabang u nap’an e muulung nge machib. Mu tay e tayim ni ngaum man mu guy boch e walag. Faanra ud rin’ed e pi n’ey, ma aram e gad be dag ni ‘ke fil Got rogon ngodad ni nguud pired nib t’uf bagadad rok bagadad.’ (1 Thess. 4:9) Ku gad ra guy nib “fel’ mab manigil, ni ngi i par e girdi’ rok Got u taabang nib taareb lungurad!”​—Ps. 133:1, BT.