Gad Ra Chugur Nga “Tooben Got” Mab Fel’ Ngodad!

1-2. (a) Mang e ba t’uf ni ngad rin’ed ya nge yag ni ngari pach e thin rodad be’? (b) Mang e gad ra weliy ko re article ney?

BAY e fager rom nrib pach e thin romew, fa? Uw rogon ni fel’ e thin romew? Sana rayog ni um rin’ew boch ban’en u taabang, me weliy ngom e pi magawon ni i mada’nag, mu kum nang e n’en baadag nge n’en ndabun. Kum nang ni bay boch i fel’ngin nib manigil ni ga baadag ni nge yag ngom. Ere ke t’uf rom fare fager rom.

² Ba t’uf e tayim nge athamgil ya nge yag ni ngari chugur e tha’ u thilmew be’. Ku arrogon ni faanra ngari chugur e tha’ u thilmew Jehovah Got mab t’uf ni ngam nang nib fel’ rogon, mi ri t’uf rom. Re article ney e ra weliy rogon nrayog ni ngad chugurgad ngak e Got rodad nge angin nra yib riy. Machane som’on e ngam lemnag fan nib fel’ ni ngad chugurgad ngak Jehovah ni ir e bin th’abi fel’ e Fager rodad.

3. Mang fan nsusun e ngad fal’eged i lemnag angin nra yib ngodad ni faan gad ra chugur ngak Jehovah? Mu susunnag.

³ Dariy e maruwar riy nib m’agan’um ngay nib fel’ ni ngad chugurgad ngak Jehovah. Machane faan gad ra fal’eg i lemnag rogon feni manigil ni ngad rin’ed e re n’ey, ma rayog ni nge k’aringdad ni ngad ululgad ni ngad chugurgad ngak. (Ps. 63:6-8) Bod ni gad manang nib fel’ ngodad ni ngaud ked e ggan nib fel’ nga fithik’ i dowdad, ma gad be rin’ boch ban’en nib chamag ngodad, ma nga i gaman e toffan rodad, ma gad be unum e ran ni boor. Yugu aram rogon ma boor e girdi’ nde ga’ fan e pi n’ey u wan’rad ma darur ayuweged fithik’ i dowrad. Machane faanra ud lemnaged angin nra yib ngodad ni faanra ud ayuweged fithik’ i dowdad, ma aram e ra k’aringdad ni ngad rin’ed e pi n’ey. Ku arrogon nrayog ni gad manang nib fel’ ni ngad chugurgad ngak Jehovah, machane faan gad ra fal’eg i lemnag angin nra yib ngodad ma rayog ni nge k’aringdad ni ngad ululgad ngad chugurnaged e tha’ u thildad e Fager rodad.​—Ps. 119:27-30.

4. Mang e tamilang u wan’ e en ni yoloy e Psalm 73:28?

⁴ Mu beeg e Psalm 73:28, BT. Reb e Levite ni kan dugliy ni nge pigpig u tempel rok Jehovah ni nge mang reb i girdien e musik e ir e yoloy e Psalm 73. Dabisiy ni ke n’uw nap’an ni ke pigpig ngak Jehovah u fithik’ e yul’yul’. Yugu aram rogon me guy ni kab t’uf ni nge puguran ngak nge yugu boch e girdi’ nib fel’ ni ngan “par u tooben Got.” Mang boch i angin nra yib riy ni faan yira rin’ e re n’ey?

GAD RA CHUGUR NGA “TOOBEN GOT” MA GAD RA FELFELAN’

5. (a) Mang fan ni gad ma felfelan’ ni faanra i chugur e tha’ u thildad Jehovah? (b) Mu weliy boch e kanawo’ nra ayuwegem e gonop rok Jehovah riy me yororiyem nrogon nib puluw ko Proverbs 2:6-16.

⁵ Ra i chugur e tha’ u thildad Jehovah, ma ra gel e felfelan’ rodad. (Ps. 65:4) Boor fan nriyul’ e re n’ey. Reb riy e ma yib angin ngodad e gonop ni bay u lan e Thin rok u Bible ni gad ma fol riy. Re gonop ney e ma yororiydad u boch ban’en nra gafgownagdad miki ayuwegdad ndab da rin’ed boch e oloboch nib gel e kireb riy. (Mu beeg e Proverbs 2:6-16.) Aram fan ni be gaar e Bible: “Ba felan’ e en ni ke yog e gonop ngak, ya ke yib e tamilangan’ ngak.”​—Prov. 3:13.

6. Mang fan ndaki felfelan’ faen ni yoloy e Psalm?

⁶ Riyul’ ni mus ko pi fager rok Jehovah ni bay yu ngiyal’ ni ma kireban’rad. Nap’an ni tabab faen ni yoloy e Psalm 73 ni nge lemnag boch ban’en ni be buch nde puluw u wan’, ma aram e daki felfelan’. I kankanan’ miki awan’ ni bochan e be lemnag nib fel’ e par rok e piin nib kireb ndariy fan Got ara pi motochiyel rok u wan’rad. I lemnag ni piin nib ta cham mab tolangan’rad e ba fel’ rogorad, mab fel’ fithik’ i dowrad, ma darur gafgowgad. (Ps. 73:3-7, 12) Bochan ni i lem ni aray rogon, ma aram me lemnag ndariy fan e pigpig ni be tay ngak Jehovah. Ere ri kireban’ me yog ni gaar: “Gur mm’ay fan ni kug tiyeg ni gub machalbog, ma gu be ayuw gu be par ndagur ngongliy e denen?”​—Ps. 73:13.

7. Mang e rayog ni ngad rin’ed u nap’an ni ke kireban’dad? (Kum guy e sasing.)

⁷ Yugu aram rogon nri kireban’ faen ni yoloy e Psalm, machane me thilyeg rogon e lem ni i tay. I yan “nga lan e tempel” rok Got ni aram e gin ni yal’uweg Jehovah e lem rok riy. (Ps. 73:17-19) Nap’an nra kireban’dad, ma manang Jehovah e re n’ey ni ir e bin th’abi fel’ e Fager rodad. Faan gad ra meybil ngak ni nge pow’iydad me m’agan’dad ko ayuw ni be pi’ ngodad u daken e Thin rok nge ulung rodad, ma aram e ra yib gelngidad ni ngad athamgilgad u fithik’ e kireban’ rodad. Mus ni faanra be magafan’dad nib pag rogon, ma ra fal’eg lanin’dad.​—Ps. 94:19.a

GAD RA CHUGUR NGA “TOOBEN GOT” MA RA FEL’ E PAR RODAD ME YAG E ATHAP NGODAD

8. Ku mang l’agruw i angin nra yib ngodad ni faanra ud chugurgad ngak Got?

⁸ Faanra ud chugurgad ngak Got, maku bay l’agruw i angin nra yib ngodad nib ga’ fan. Bin som’on e ra fel’ e par rodad. Ma bin l’agruw e ra yag e athap ngodad boch nga m’on. (Jer. 29:11) Ere chiney e ngad weliyed murung’agen e gali n’ey.

9. Uw rogon nra fel’ e par rodad ni faanra i chugur e tha’ u thildad Jehovah?

⁹ Faanra i chugur e tha’ u thildad Jehovah, ma ra fel’ e par rodad. Boor e girdi’ e ngiyal’ ney ni yad ma yog ndariy e Got ni yad ma lemnag ndariy fan e yafos rodad ma ra munmun me m’ay e girdi’ u fayleng. Machane bochan ni kad filed e Thin rok Got, ma ke mich u wan’dad “ni ba’ Got ma ra tow’athnag e piin ni yad be gayiy.” (Heb. 11:6) Mus ko chiney ni gad ba felfelan’ ni bochan e gad be rin’ e n’en kan sunmiydad ni ngad rin’ed ni aram e ngad pigpiggad ngak Jehovah ni Chitamangidad ni bay u tharmiy.​—Deut. 10:12, 13.

10. Mang e athap rok e piin be l’agan’rad ngak Jehovah nrogon ni be yog e Psalm 37:29?

¹⁰ Boor e girdi’ ni kemus ni yad ma yan ko maruwel, mar fakayed e bitir, mar kunuyed e salpiy ni fan ko ngiyal’ ni kar talgad ko maruwel, machane dariy ban’en ni yad be athapeg ni fan ko par rorad boch nga m’on. Dar nanged e n’en ke micheg Got ni fan ngodad boch nga m’on. Machane pi tapigpig rok Jehovah e be l’agan’rad ngak. (Ps. 25:3-5; 1 Tim. 6:17) Ba pagan’dad ko fare Got ni kad chugurgad ngak nge n’en ke micheg ni fan ngodad. Re n’ey e ba muun ngay e athap rodad ni ngad pigpiggad ngak u Paradis ndariy n’umngin nap’an.​—Mu beeg e Psalm 37:29.

11. Mang angin nra yib ngodad ni faanra ud chugurgad ngak Got, ma uw rogon e re n’ey u wan’?

¹¹ Ku boor angin nra yib ngodad ni faanra ud chugurgad ngak Got. Bod ni ke micheg Jehovah nra n’ag fan e denen rok e piin kar kalgadngan’rad. (Isa. 1:18) Bochan e re n’ey, ma dariy rogon ni nga i magawon e nangan’ rodad ni bochan e denen ni ud rin’ed kafram. (Ps. 32:1-5) Ku ra felfelan’ Jehovah u nap’an ni gad ra chugur ngak. (Prov. 23:15) Dariy e maruwar riy nrayog ni ngki yib ngan’um boch e tow’ath nra yag ngodad ni faanra chugur e tha’ u thildad Got. Machane uw rogon nrayog ni nge ulul ni nge chugur e tha’ u thilmew Got?

ROGON NI NGAUD CHUGURGAD I YAN NGA “TOOBEN GOT”

12. Mang e kam rin’ ya nge yag ni chugur e tha’ u thilmew Got?

¹² Faanra gur reb e Kristiano ni kam un ko taufe, mab mudugil ni ke chugur e tha’ u thilmew Jehovah. Boor ban’en nib riyul’ ni kam fil u murung’agen Jehovah Got nge Kristus Jesus, ma kam kalngan’um ko denen ni um rin’ kafram, ma kam dag nriyul’ nib mich Got u wan’um, ma kam guy rogon ni nge puluw e ngongol rom ko n’en nib m’agan’ ngay. Machane faanra nge gel e chugur ko tha’ u thildad Got, ma thingar da ululgad i rin’ e pi n’ey.​—Kol. 2:6.

13. Mang dalip ban’en nrayog ni nge ayuwegdad ni ngad ululgad ni ngad chugurgad ngak Jehovah?

¹³ Mang e ra ayuwegdad ni ngad ululgad ni ngad chugurgad ngak Jehovah? (1) Thingar da ululgad i beeg ma gad be fil e Bible. Nap’an ni gad be beeg e Bible ma gathi kemus ni ngad filed e tin riyul’ u murung’agen Got. Ya susun e ngad guyed rogon ni ngad nanged e n’en nib m’agan’ ngay ni ngad rin’ed ma gad fol ko pi kenggin e motochiyel ni bay ko Thin rok. (Efe. 5:15-17) (2) Thingar da gelnaged e michan’ rodad ni aram e ngad fal’eged i lemnag urngin e kanawo’ ni ma dag ngodad ni gad ba t’uf rok. (3) Thingar da ululgad ni ngad fanenikayed e pi n’en nib fanenikan Jehovah ma dab ud chaggad ngak e piin yad ma rin’ e pi ngongol nem.​—Ps. 1:1; 101:3.

14. Mang boch ban’en nrayog ni ngad rin’ed u reb e rran ngu reb nra felfelan’ Jehovah ngay nrogon nib puluw ko 1 Korinth 10:31? (Kum guy e sasing.)

¹⁴ Mu beeg e 1 Korinth 10:31. Ba ga’ fan ni ngad rin’ed e tin nib m’agan’ Jehovah ngay. Re n’ey e gathi kemus ni be yip’ fan ni ngaud uned ko machib nge muulung. Ngongol nib fel’ ni gad ma rin’ nib m’agan’ Jehovah ngay e ba muun ngay e n’en gad ma rin’ u reb e rran ngu reb. Bod ni faanra gad ba yul’yul’ u gubin ban’en ma gad ma gol ko girdi’, ma aram e gad ra felfelan’nag Jehovah. (2 Kor. 8:21; 9:7) Ku baadag ni ngad daged nrib ga’ fan u wan’dad e yafos rodad ni ke pi’ nib tow’ath. Faanra ud kol ayuwgad u rogon e abich nge garbod ni gad ma tay, maku gad be rin’ boch ban’en ya nge yag nda pared nib fel’ fithik’ i dowdad, ma aram e gad ra chugur ngak e En Ke Pi’ e yafos ngodad. Gad ra athamgil ngad rin’ed e n’en nib m’agan’ Jehovah ngay ni kub muun ngay e tin nib achig ban’en, ma aram e gad ra t’uf rok.​—Luke 16:10.

15. Uw rogon ni baadag Jehovah ni ngaud ngongolgad ko girdi’?

¹⁵ Ba gol Jehovah ngak e piin nib mat’aw nge piin nde mat’aw. (Matt. 5:45) Ku baadag ni ngaud ngongolgad ko girdi’ ni aray rogon. Bod ‘ndab da t’ared e thin nga daken be’, machane ngad pired nib fel’ thildad e girdi’, . . . ma gubin ngiyal’ ni ngad sumunguygad ngak urngin e girdi’.’ (Titus 3:2) Bochan e re n’ey, ma aram fan ndarud lemnaged ni ka gad ba fel’ ngak yugu boch e girdi’ ni bochan e ba thil e michan’ rodad. (2 Tim. 2:23-25) Faanra gad ba gol ma gad ba sumunguy ko girdi’, ma aram e ra i chugur e tha’ u thildad Jehovah.

RAYOG NI NGAD CHUGURGAD I YAN NGA “TOOBEN GOT” NI YUGU ARAM ROGON NI KAD OLOBOCHGAD

16. Munmun ma mang e tabab faen ni yoloy e Psalm 73 ni nge lemnag?

¹⁶ Machane uw rogon ni faanra munmun mag tabab ni ngam lemnag ndariy rogon ni nge t’ufegem Jehovah? Kad weliyed faram ni ireray e n’en ni buch rok faen ni yoloy e Psalm 73. I yog ni gaar: “I chugur ni nggu dol’; rifrif rog e chugur ni nge sirgig.” (Ps. 73:2) I yog ni ke “mooy” e lem rok, ma ke “manan’ ni bod ba gamanman” u p’eowchen Jehovah. (Ps. 73:21, 22, BT) Machane gur, i lemnag ndakuriy rogon ni nge t’ufeg Jehovah ni bochan e oloboch rok, fa?

17. (a) Mus ko ngiyal’ ni baaram ni kari kireban’ faen ni yoloy e Psalm, ma mang e rin’? (b) Mang e rayog ni ngad filed ko n’en ni buch rok? (Kum guy e sasing.)

¹⁷ Faanra lemnag faen ni yoloy e Psalm ndaki fel’ u wan’ Jehovah, mab mudugil ni taa bochi ngiyal’ e i lem ni aray rogon. Be m’ug riy ni mus ko ngiyal’ ni baaram ni kari kireban’, ma manang nib t’uf ni nge chugur ngak Got. I yoloy ni gaar: “Machane gubin ngiyal’ ni gu ba’ rom [Jehovah], ni ga be kol paag. Ga be pow’iyeg ko fonow ni ga be tay ngog, ma tomur e bay mu fekeg nga fithik’ e flaab ni aram e kam ta’ fag.” (Ps. 73:23, 24) Ku arrogodad nnap’an ni gad ra meewar ara mulan’dad, ma susun e ngad weniggad ngak Jehovah ni nge pi’ gelngidad. (Ps. 73:26; 94:18) Mus ni faanra kad maloggad taa bochi ngiyal’, ma rayog ni ngad sulod ngak Jehovah ya ba pagan’dad ngay nra ‘n’ag fan u wan’ e kireb rodad.’ (Ps. 86:5) Ba ga’ ni ngiyal’ ni kari kireban’dad e aram e ngiyal’ nrib ga’ fan ni ngad chugurgad ngak e Got rodad.​—Ps. 103:13, 14.

NGAD CHUGURGAD I YAN NGA “TOOBEN GOT” NDARIY N’UMNGIN NAP’AN

18. Mang fan ni gubin ngiyal’ nrayog ni ngaud chugurgad ngak Jehovah?

¹⁸ Gubin ngiyal’ nrayog ni ngaud chugurgad ngak Jehovah, ma dariy ba ngiyal’ ni gad ra tal i fil murung’agen. Be yog e Bible ni pi kanawo’ rok Jehovah, nge gonop rok, nge llowan’ rok e “rib toar.” (Rom. 11:33) Gad ra ulul i fil murung’agen ndariy n’umngin nap’an.

19. Mang e rayog ni nge pagan’dad ngay nrogon ni be yog fapi thin ko Psalm?

¹⁹ Be gaar e Psalm 79:13 (BT): “Gamad e tirom e girdi’ e gamad e saf rom, e bay gu pininged e magar ngom ndariy n’umngin nap’an, nge sorok i yan ngaram.” Nap’an ni be ulul ni nge chugur e tha’ u thilmew Got, ma rayog ni nge pagan’um ngay ni yira tow’athnagem ndariy n’umngin nap’an, ma gog fapi thin ni be gaar: “Got e ir gelngig; kari mus ni ir e nge yag ngog!”​—Ps. 73:26, BT.