Mu Dugliy ko Mini’ e Ngam Pigpig Ngak

1. Ra ngar da felfelan’gad, ma mang e thingar da rin’ed, ma mang fan? (Isaiah 48:17, 18)

RI GAD ba t’uf rok e Chitamangidad ni bay u tharmiy, ma baadag ni ngad felfelan’gad e chiney nge boch nga m’on. (Ekl. 3:12, 13) I sunmiydad ni bay boch e salap rodad ni yira ngat ngay, machane de sunmiydad ni ngad gagiyegnaged gadad ara ddugliyed rodad ko mang e ba fel’ ma mang e ba kireb. (Ekl. 8:9; Jer. 10:23) Manang ni faanra ngar da felfelan’gad, ma thingar da pigpiggad ngak ma gad fol ko pi motochiyel rok.​—Mu beeg e Isaiah 48:17, 18.

2. Mang e baadag Satan ni ngad lemnaged, ma mang e ke rin’ Jehovah ya nge micheg nde riyul’ e n’en ke yog?

² Baadag Satan ni ngad lemnaged nrayog ni ngad felfelan’gad ni faanra dab da pigpiggad ngak Jehovah, ma rayog ko girdi’ ni ngar gagiyegnaged yad nib fel’ rogon. (Gen. 3:4, 5) Ke pag Jehovah e girdi’ ni yad be togopuluw ni ngar gagiyegnaged yad u lan ba ngiyal’ ya nge micheg nde riyul’ e n’en ke yog Satan. De t’uf ni ngad sapgad nga palog ni ngad guyed wenegan e gagiyeg ni be tay e girdi’. Machane boor murung’agen boch e pumoon nge ppin u Bible ni ur felfelan’gad ko pigpig ni yad be tay ngak Jehovah. En th’abi felfelan’ u fithik’rad e aram Jesus Kristus. Som’on e ngad weliyed boch i fan ni mel’eg ni nge pigpig ngak Jehovah. Ngemu’ ma gad weliy fan ni bay rogon ni ngad liyorgad ngak e Chitamangidad ni bay u tharmiy. Tomur riy e gad ra weliy boch i fan ni kad mel’eged ni ngad pigpiggad ngak Jehovah.

FAN NI MEL’EG JESUS NI NGE PIGPIG NGAK JEHOVAH

3. Mang e ni ognag ngak Jesus, ma mang e mel’eg ni nge rin’?

³ Nap’an ni immoy Jesus u fayleng, ma thingari mel’eg e en nge pigpig ngak. De n’uw nap’an nga tomuren nni taufenag, me yog Satan nra pi’ urngin e nam nu fayleng ngak ni faanra ragbug nga but’ nge tayfan. Me fulweg Jesus ni gaar: “Satan, mman ngam chuw! Ya babyor nib thothup e be gaar, Mu ta’ fan Somol ni Got rom ma yigo ir e ngam pigpig ngak!” (Matt. 4:8-10) Mang fan ni mel’eg Jesus ni nge rin’ e re n’ey? Am lemnag boch i fan.

4-5. Mang boch i fan ni mel’eg Jesus ni nge pigpig ngak Jehovah?

⁴ Bin th’abi ga’ i fan ni mel’eg Jesus ni nge pigpig ngak Jehovah e bochan nrib t’uf e Chitamangin rok. (John 14:31) Maku reb e ma pigpig ngak Jehovah ni bochan e aram e n’en nib fel’ ni nge rin’. (John 8:28, 29; Rev. 4:11) Manang ni Jehovah e Ir Enggin gubin e yafos, ma rayog ni ngan pagan’uy ngak, ma kub gol. (Ps. 33:4; 36:9; Jas. 1:17) Gubin ngiyal’ ni i yog Jehovah e tin riyul’ ngak Jesus ma gubin ban’en ni bay rok ni Jehovah e ke yib rok. (John 1:14) Machane rib thil Satan ya ir e ke k’aring e yam’. Ir be’ nib malulfith l’igin nib chogow ma yigoo ir e ma lemnag ir. (John 8:44) Bochan ni manang Jesus e pi n’ey, ma aram fan ndariy ba ngiyal’ ni lemnag ni nge folwok rok Satan me togopuluw ngak Jehovah.​—Fil. 2:5-8.

⁵ Ku reb i fan ni mel’eg Jesus ni nge pigpig ngak Jehovah e bochan ni boor ban’en nib manigil nra buch ni faanra pigpig ngak u fithik’ e yul’yul’. (Heb. 12:2) Manang ni faanra par nib yul’yul’ ma ra thothupnag fithingan e Chitamangin me bing e kanawo’ ni nge chuw e girdi’ u tan gelngin e denen nge yam’.

FAN NI BAY ROGON NI NGAD LIYORGAD NGAK JEHOVAH

6-7. Mang fan ni boor e girdi’ e ngiyal’ ney ndarur pigpiggad ngak Jehovah? Mang fan ni ir e bay rogon ni ngad liyorgad ngak?

⁶ Boor e girdi’ e ngiyal’ ney e darur pigpiggad ngak Jehovah ni bochan e dawor ra nanged murung’agen pi fel’ngin nrib manigil nge urngin ban’en ni ke rin’ ni fan ngorad. Aram rogon e piin ni i machibnagrad apostal Paul u Athens.​—Acts 17:19, 20, 30, 34.

⁷ I weliy Paul ngak e piin ur motoyilgad ngak ni bin riyul’ e Got e “ir e ke pi’ e yafos nge pogofan nge urngin ban’en ngak e girdi’.” Ki ulul ngay ni gaar: “Fithik’ Got e gadad be par riy ma gadad be mithmith riy ma gadad ba’ riy.” Got e Ir e Ke Sunmiy urngin ban’en ni “taareb e pumoon ni sunumiy, me sum rok e re moon nem girdien urngin e nam,” ere ir e bay rogon ni ngad liyorgad ngak.​—Acts 17:25, 26, 28.

8. Mang e dabi rin’ Jehovah? Mu tamilangnag.

⁸ Bochan ni Jehovah e Ir e Ke Sunmiy urngin ban’en ma Ir e Th’abi Tolang u palpalth’ib, ma rayog ni nge towasariy e girdi’ ni ngar pigpiggad ngak. Machane dabi rin’ ban’en ni aray rogon. Ya ke dag e mich riy ngodad nriyul’ ni bay ma ri gad ba t’uf rok ni be’ nge be’. Baadag ni nge mang urngin e girdi’ nrayog e fager rok. (1 Tim. 2:3, 4) Aram fan ni ke fil ngodad rogon ni ngad filed ko girdi’ murung’agen e n’en nib m’agan’ ngay, mu kud weliyed ngorad murung’agen e tin nib fel’ nra rin’ ni fan ko girdi’. (Matt. 10:11-13; 28:19, 20) Ra bagadad ma bay u reb e ulung nrayog ni ngad liyorgad ngak miki ayuwegdad e piin piilal.​—Acts 20:28.

9. Mang boch e kanawo’ ni ke dag Jehovah riy nib t’uf urngin e girdi’ rok?

⁹ Ku ma m’ug e t’ufeg rok Jehovah u rogon e ngongol rok ngak e piin kar mel’eged ndabi mich u wan’rad nriyul’ ni bay. Am lemnag e re n’ey: Kab kafram i yib ni bokum milyon e girdi’ ni kar mel’eged ni ngar folgad ko n’en yad be lemnag nib fel’ ara ba kireb. Yugu aram rogon ma ke pi’ Jehovah e n’en nib t’uf nra ayuwegrad ni ngar pared ni yad ba fos mar felfelan’gad ko yafos rorad. (Matt. 5:44, 45; Acts 14:16, 17) Ke sunmiyrad nrayog ni nge yag boch e fager ngorad nge chon e tabinaw ni yad ma t’ufegrad, mu kur fakayed e bitir, mar maruwelgad, mu kur felfelan’gad ko par rorad. (Ps. 127:3; Ekl. 2:24) Re n’ey e be dag e mich riy ni Chitamangidad ni bay u tharmiy e ba t’uf urngin e girdi’ rok. (Ex. 34:6) Ere chiney e ngad weliyed boch i fan ni kad mel’eged ni ngad pigpiggad ngak Jehovah nge rogon ni ma tow’athnagdad ni bochan e re n’ey.

FAN NI KAD MEL’EGED NI NGAD PIGPIGGAD NGAK JEHOVAH

10. (a) Mang e bin th’abi ga’ i fan ni gad ma pigpig ngak Jehovah? (Matthew 22:37) (b) Uw rogon ni ke yib angin ngom rogon ni ma n’ag Jehovah fan e kireb? (Psalm 103:13, 14)

¹⁰ Bin th’abi ga’ i fan ni gad ma pigpig ngak Jehovah e bochan nrib t’uf rodad ni bod Jesus. (Mu beeg e Matthew 22:37.) Nap’an ni gad ra fil murung’agen pi fel’ngin, ma gad ra chugur ngak. Am lemnag rogon ni ma n’ag fan e kireb rodad. Nap’an ndaki fol piyu Israel rok me wenig ngorad “ni ngar talgad ndab ku ur ngongliyed e kireb.” (Jer. 18:11) Manang Jehovah ndawor da flontgad. (Mu beeg e Psalm 103:13, 14.) Nap’an ni ga ra fal’eg i lemnag pi fel’ngin nrib manigil nge rogon ni ma n’ag fan e kireb, ma gathi be k’aringem ni ngam adag ni ngam pigpig ngak ndariy n’umngin nap’an?

11. Mang boch i fan ni kad mel’eged ni ngad pigpiggad ngak e Chitamangidad ni bay u tharmiy?

¹¹ Ku gad baadag ni ngad pigpiggad ngak Jehovah ni bochan e aram e n’en nib fel’ ni ngad rin’ed. (Matt. 4:10) Ku gad manang ni boor ban’en nib manigil nra buch ni faan gad ra pigpig ngak u fithik’ e yul’yul’. Yul’yul’ ni gad ma tay e ma thothupnag fithingan Jehovah, me micheg ni Moonyan’ e ba malulfith l’igin, me yibnag e felfelan’ ngak e Chitamangidad. Ma faan gad ra mel’eg ni ngad pigpiggad ngak Jehovah e ngiyal’ ney, ma bay e athap rodad ni ngad pigpiggad ngak ndariy n’umngin nap’an!​—John 17:3.

12-13. Mang e kam fil ko n’en ni buch rok Jane nge Pam?

¹² Ra nap’an nri ka gad bbitir, ma rayog ni ngari t’uf Jehovah rodad ma re t’ufeg nem e ra gel i yan nge mada’ ko ngiyal’ ni kad pilibthirgad. Mu tay fanam i yan ko n’en ni buch rok l’agruw i ppin ni yow walag ni ka nog Jane nge Pam ngorow.a Nap’an nra tababgow i fil e Bible, ma bagayow e 11 e duw rok ma bagayow e 10. Yugu aram rogon nde adag e gallabthir rorow ni ngar filew e Bible, machane me m’agan’row ngay ni nga i chag Jane nge Pam ko Pi Mich ni faan yow ra un ngak chon e tabinaw rorow nga galesiya ko misa. I yog Jane ni gaar, “N’en ni fil e Pi Mich ngog u Bible e ayuwegeg ni nggu siyeg e towasar ni ma tay e pi taab yangar rog ngog ni nggu fanay boch e falay ni kireb mug un ko ngongol ndarngal.”

¹³ In e duw nga tomuren mar mangew l’agruw e publisher. Boch nga tomuren, mar unew ko pioneer maku yow be ayuweg e gallabthir rorow ni kar pilibthirgow. Ra sul Jane nge lemnag e n’en ni buch rorow, ma ma yog ni gaar: “Gu fil nrib fel’ rogon ni ma ayuweg Jehovah e pi fager rok maku ma ngongol nrogon nib puluw ko 2 Timothy 2:19 ni be gaar, ‘I Somol e manang e piin ni yad girdien.’” Dariy e maruwar riy ni ma ayuweg Jehovah e piin kar mel’eged ni ngar t’ufeged mar pigpiggad ngak!

14. Uw rogon ni gad ma ayuweg e girdi’ ni ngar nanged e tin riyul’ u murung’agen Jehovah? (Kum guy e sasing.)

¹⁴ Gad baadag ni nge nang e girdi’ e tin riyul’ u murung’agen Jehovah. Am lemnag e re n’ey: Bay reb e fager rom nrib pach e thin romew ni ir be’ nib sumunguy, mab gol, ma ma n’ag fan e kireb. Me yan i reb e rran mag rung’ag ni bay be’ ni be yog ni fare fager rom e ir be’ nib kireb ma de yul’yul’. Ere mang e ga ra rin’? Ga ra yog e tin riyul’ u murung’agen. Ere ku arrogon nnap’an nra guy Satan nge piin yad bay u tan gagiyeg rok rogon ni ngar kirebnaged thin Jehovah ni aram e ngar wereged boch ban’en nde riyul’ u murung’agen, ma aram e gad ma weliy e tin riyul’ u murung’agen Jehovah. (Ps. 34:1; Isa. 43:10) Gad ma dag ko thin nge ngongol rodad ni gad baadag ni ngad pigpiggad ngak u polo’ i lanin’dad.

15. Mang angin ni yib ngak apostal Paul ni bochan e thilyeg e tin be nameg? (Filippi 3:7, 8)

¹⁵ Ba m’agan’dad ngay ni ngad thilyeged e tin gad be nameg u lan e yafos rodad ya nge yag nda pigpiggad ngak Jehovah u rogon nib m’agan’ ngay ara da yoornaged e tin gad be rin’ ni fan ngak. Bod ni apostal Paul e mel’eg ni nge digey reb e liw nib tolang ya nge yag ni lek Kristus me pigpig ngak Jehovah. (Gal. 1:14) Bochan e re n’ey ma boor ban’en nib manigil ni buch rok miki yag e tow’ath ngak ni nge un ngak Kristus ko gagiyeg u tharmiy. Dariy ba ngiyal’ ni kalngan’ ni ke dugliy ni nge pigpig ngak Jehovah, maku arrogodad.​—Mu beeg e Filippi 3:7, 8.

16. Mang e gad be fil ko n’en ni buch rok Julia? (Kum guy e sasing.)

¹⁶ Faan gad ra m’oneg u wan’dad e pigpig rodad ngak Jehovah, ma ra tow’athnagdad e chiney nge boch nga m’on. Am lemnag e n’en ni buch rok reb e walag nib pin ni ka nog Julia ngak. U m’on ni nge fil e tin riyul’, ma ma tang u galesiya u nap’an ni kab buliyel. Bochan nrib fel’ laman ko tang, ma aram me tabab be’ ni nge fil ngak rogon ni nge mang be’ ni ma tang. De n’uw nap’an nga tomuren me mang be’ nib gilbuguwan mi i tang u yu yang ni boor e girdi’ ni ma yan ngay. Nap’an ni be un nga reb e skul ni yima fil e musik riy ni goo yimanang murung’agen, ma bay reb e pagel ni yow nga skul ni tabab ni nge weliy murung’agen Got ngak miki yog ngak ni bay fithingan Got ni aram Jehovah. De n’uw nap’an nga tomuren me tabab ni nga i fil e Bible ni l’agruw yay u reb e wik. Munmun me dugliy ni nge m’oneg u wan’ e pigpig rok ngak Jehovah ko bin nge mang be’ ni ma tang. De mom e re n’ey ni dugliy. I yog ni gaar, “Boor e girdi’ nrogned ngog ni kug adbey e tow’ath ni bay rog, machane gu baadag ni nggu fanay e yafos rog ni nggu pigpig ngak Jehovah nib fel’ rogon.” Uw rogon u wan’ e re n’em ni dugliy ni ke pag 30 e duw? I gaar, “Ba gapas lanin’ug, mab pagan’ug ngay nra pi’ Jehovah urngin ban’en nug baadag boch nga m’on.”​—Ps. 145:16.

MU ULUL KO PIGPIG NGAK JEHOVAH

17. Bochan ni gad be par u ba ngiyal’ ni kari chugur nga tungun e re m’ag ney, ma mang rogon ngak e piin kar mel’eged ni ngar pigpiggad ngak Got nge piin ndawor ra mel’eged ni ngar rin’ed e re n’ey?

¹⁷ Gad be par u ba ngiyal’ ni kari chugur nga tungun e re m’ag ney. I yoloy apostal Paul ni gaar: “Dab ki n’uw nap’an ma en ni nge yib e bay yib, ni dabi sowath.” (Heb. 10:37) Mang rogon e re n’ey ngodad? Reb riy e ke lich e tayim ni ka bay ni nge mel’eg e girdi’ ni ngar pigpiggad ngak Jehovah. (1 Kor. 7:29) Ma faanra kad mel’eged ni ngad pigpiggad ngak Got, ma gad manang ni yugu aram rogon nib t’uf ni ngad athamgilgad u fithik’ e pi magawon ni be yib ngodad, machane ‘dabi n’uw nap’an.’

18. Mang e baadag Jesus nge Jehovah ni ngad rin’ed?

¹⁸ I pi’ Jesus e athamgil nga laniyan’ pi gachalpen ni gathi kemus ni ngar tababgad ni ngar leked ya ngar ululgad ni ngaur leked. (Matt. 16:24) Ere faanra ke yoor e duw ni gad be pigpig ngak Jehovah, ma manga yu gud dugliyed u wan’dad ndab da talgad ko pigpig ni gad be tay ngak. Ba t’uf ni ngad maruwelgad nib gel ya nge yag nda ted u gil’ e n’en kad dugliyed ni aram e ngad pigpiggad ngak. Rayog nde mom e re n’ey, machane boor e tow’ath nra yag riy ngodad ma kub gel e felfelan’ ni gad ra tay riy ngki mada’ ko ngiyal’ ney!​—Ps. 35:27.

19. Mang e gad be fil ko n’en ni buch rok Gene?

¹⁹ Bay boch e girdi’ ni yad ma lemnag ni kaygi yoor ban’en ni ngan pag fan ya nge yag nni pigpig ngak Jehovah. Faanra kab fel’ yangarem, ma gur, ga be lemnag ni faan ga ra pigpig ngak Jehovah ma aram e bay ban’en ndabiyog ni nge yag ngom? Bay reb e walag ni kab pagel ni ka nog Gene ngak ni yog ni gaar: “Gu lemnag ni boor ban’en ndabiyog ni nggu rin’ ni bochan e gag reb e Pi Mich Rok Jehovah. Bod ni boor e bitir nug ilalgad u taabang ni yad ma un nga boch e mur ni yima tay, ara ma fel’ e thin rorad boch e pagel ara rugod, ara ur fafelgad nga boch e video game ni yaan e cham, me gag e kemus ni yigoo muulung nge machib e gu ma un ngay.” Mang wenegan ni yib ngak Gene ni bochan e i lem ni aray rogon? I gaar, “Gu tabab ni nggu rin’ boch ban’en nib kireb ni be rin’ yugu boch e fel’ yangaren, ma ug felfelan’ ko re n’ey u lan ba ngiyal’. Machane de yag ni nge yag e bin riyul’ e felfelan’ ngog. Gu tabab ni nggu lemnag murung’agen e tin riyul’ u Bible ni kug mel’eg ndab kug fol riy, mug dugliy ni nggu pigpig ngak Jehovah u polo’ i gum’irchaeg. Ka aram nap’an i yib ni bod ni gubin e meybil rog ni ma fulweg Jehovah taban.”

20. Mang e susun ni ngad dugliyed u wan’dad ni ngad rin’ed?

²⁰ I tangnag reb e psalmist Jehovah ni gaar: “Ba felan’ e piin ni kam mel’egrad, ni kam fekrad ni ngar pired u lan e naun rom nib thothup!” (Ps. 65:4) Manga yu gud dugliyed u wan’dad ni ngad rin’ed e n’en ni yog Joshua ni gaar: “Gag nge girdi’ ko birog e tabinaw e nguug pigpiggad ngak Somol.”​—Josh. 24:15.