Mu Sap Ngak Jehovah ni Nge Fal’eg Lanin’um

1. Mu weliy rogon e par rok e pi Jew ni yad ba kalbus u Babylon.

AM SUSUNNAG rogon laniyan’ e pi Jew ni yad ba kalbus u Babylon. Kar guyed taferad ni kan kirebnag, ma kan chuwegrad u rom kan fekrad nga yugu reb e nam ni bochan e denen rorad nge denen rok e pi ga’ rorad. (2 Kron. 36:​15, 16, 20, 21) Riyul’ ni girdi’ ni yad ba kalbus u Babylon e ba puf rogorad ni ngar rin’ed e pi n’en yad ma rin’ u reb e rran ngu reb. (Jer. 29:​4-7) Machane de mom e par rorad u rom, maku gathi aram e gin yad baadag ni ngar pared riy. Ere uw rogon u wan’rad e par rorad u rom? Mu tay fanam i yan ko n’en ni yog bagayad ni gaar: “Nap’an ni yib yu Zion nga lanin’mad ma gamad par nga but’ u tooben e yu pa’ i lul’ nu Babylon nguug yorgad.” (Ps. 137:1) Ere ba t’uf ni ngan fal’eg laniyan’ e pi Jew nem, machane mini’ e ra rin’ e re n’ey?

2-3. (a) Mang e rin’ Jehovah ni fan ko pi Jew ni yad ba kalbus? (b) Mang e gad ra weliy ko re article ney?

² Jehovah e ir “fare Got ni ma fal’eg lanin’uy.” (2 Kor. 1:​3, NW) Bochan ni ir ba Got ni ma t’ufegey, ma baadag ni nge fal’eg laniyan’ e piin yad ma chugurnaged yad ngak. Manang Jehovah ni bay boch e pi Jew nem nra m’agan’rad nga rogon ni be yal’uwegrad mar sulod ngak. (Isa. 59:20) Ere ba pag 100 e duw u m’on ni ngan kalbusnagrad, me thagthagnag nga laniyan’ Isaiah ni profet ni nge yoloy fare babyor ni Isaiah. Mang fan? I yog Isaiah ni gaar: “Be gaar e Got romed, ‘Mu fal’eged laniyan’ e girdi’ rog, mu fal’eged lanin’rad!’” (Isa. 40:1) Arrogon, i fanay Jehovah fare babyor rok Isaiah ni nge fal’eg laniyan’ e pi Jew ni yad ba kalbus.

³ Ku gad bod e pi Jew nem ni bay yu ngiyal’ nib t’uf ni ngan fal’eg lanin’dad. Ere gad ra weliy ko re article ney dalip e kanawo’ ni fal’eg Jehovah laniyan’ e pi Jew nem riy ni aram e: (1) I micheg ni nge n’ag fan e kireb rok e piin kar kalgadngan’rad, (2) i pi’ e athap ko girdi’ rok, ma (3) i ayuwegrad ndab kur rusgad. Nap’an ni gad be weliy e pi n’ey, mag tay fanam i yan u rogon nrayog ni nge yib angin ngodad rogon ni i fal’eg Jehovah lanin’rad.

MA RUNGUYDAD JEHOVAH NGE N’AG FAN E DENEN RODAD

4. Uw rogon ni dag Jehovah ni ir reb e Got ni ma runguyey? (Isaiah 55:7)

⁴ Jehovah e “ir e Chitamangiy nrib tarunguy e girdi’.” (2 Kor. 1:3) I dag e re fel’ngin ney u nap’an ni micheg ngak e pi Jew nra n’ag fan e kireb rorad. (Mu beeg e Isaiah 55:7.) I gaar: “Bay mu par ni gab t’uf rog ndariy n’umngin nap’an ma gu be runguyem.” (Isa. 54:​8, NW) Uw rogon nra dag Jehovah e runguy rok? Yugu aram rogon ni ka yad ra gafgow ni bochan wenegan e kireb nrin’ed, machane i micheg Jehovah ngorad ndab ra pared u Babylon ndariy n’umngin nap’an. Ya kemus ni yira kalbusnagrad u lan ba ngiyal’. (Isa. 40:2) Ba mudugil nri fal’eg e pi thin ney laniyan’ e pi arorad nra kalgadngan’rad!

5. Mang fan nri kab gel e pagan’ rodad nra n’ag Jehovah fan e denen rodad nga rogon e pagan’ ni i tay e pi Jew?

⁵ Mang e gad be fil riy? Ba m’agan’ Jehovah ngay ni ngari n’ag fan e denen rok e pi tapigpig rok. Ma bay tapgin ni nge mich e re n’ey u wan’dad ni bod e pi Jew ni yad ba kalbus e ngiyal’ nem. Mang fan? Ya gad manang e n’en ke rin’ Jehovah ya nge yag ni n’ag fan e denen rodad. Bokum miriay e duw nga tomuren e thin ni yiiynag Isaiah, ma aram me l’og Jehovah Fak nrib t’uf rok nga fayleng ni nge biyuliy e pi tadenen ni kar kalgadngan’rad. Re maligach nem ni pi’ e ke bing e kanawo’ ni ngan “chuweg” urngin e denen rodad riy. (Acts 3:19; Isa. 1:18; Efe. 1:7) Ere riyul’ ni gad be pigpig ngak reb e Got nri ma runguyey!

6. Uw rogon nrayog ni nge yib angin ngodad ni faanra ud lemnaged e runguy rok Jehovah? (Kum guy e sasing.)

⁶ Fapi thin ni thagthagnag Jehovah ngan yoloy ni bay ko Isaiah 55:7 e rayog ni nge fal’eg lanin’dad ni faanra be magawon lanin’dad ni bochan e kireb ni ud rin’ed. Bay boch i gadad nrayog ni nga i magawon laniyan’ ni bochan e kireb ni i rin’ kafram ni yugu aram rogon ni ke kalngan’. Rayog ni ngaud lemgad ni aray rogon ni faanra ka gad be gafgow u wenegan e kireb ni ud rin’ed. Machane faanra ka dogned e denen rodad ma kad thilyeged e ngongol rodad, ma rayog ni nge pagan’dad ngay ni ke n’ag Jehovah fan. Ma nap’an nra n’ag Jehovah fan e denen rodad ma ma dugliy ndab ki lemnag. (Mu taarebrogonnag ko Jeremiah 31:34.) Ere faanra dakir lemnag Jehovah e denen ni ud rin’ed kafram, me ere susun ni ku arrogodad ndab kud lemnaged. N’en gad be rin’ e chiney e aram e n’en nib ga’ fan u wan’, ma gathi kireb ni ud rin’ed kafram. (Ezek. 33:​14-16) Maku reb e, dabki n’uw nap’an ma Chitamangidad nrib tarunguy e girdi’ e ra chuwegdad u fithik’ wenegan e kireb ni ud rin’ed.

7. Faanra gad be mithag reb e denen ni kad rin’ed, ma mang e ra k’aringdad ni ngad ninged e ayuw?

⁷ Mang e susun ni ngad rin’ed ni faanra be magawon e nangan’ rodad ni bochan reb e denen nib ubchiya’ ni kad rin’ed ma gad be mithag? Be pi’ e Bible e athamgil nga lanin’dad ni ngad ninged e ayuw ko piin piilal. (Jas. 5:​14, 15) Machane rayog nde mom ni nga dogned e kireb ni kad rin’ed. Yugu aram rogon ma faanra kad kalgadngan’dad ma gad manang nra runguydad Jehovah nge pi pumoon ni ke tayrad ni ngaur ayuweged gadad, ma aram e n’en nra k’aringdad ni ngad weliyed e kireb rodad ko piin piilal. Am lemnag rogon ni fal’eg e runguy rok Jehovah laniyan’ reb e walag ni pumoon ni ka nog Arthura ngak ni kari magawon e nangan’ rok. I yog ni gaar: “Sogonap’an reb e duw ni ug yaliy yaan e ngongol ni puwlag. Machane tomuren nug rung’ag ba welthin nni pi’ ni murung’agen e nangan’, ma aram mug weliy e denen rog ngak leengig nge piin piilal. Tomuren nug rin’ e re n’ey me baud lanin’ug, machane ka be kireban’ug ni bochan e n’en ka ug rin’. Ere puguran e piin piilal ngog ni ka baadag Jehovah ni nge mang fager rog. Ma yal’uwegdad ni bochan e gad ba t’uf rok. Thin rogned ngog u fithik’ e sumunguy e ri taw nga gum’irchaeg me ayuwegeg ni nggu thilyeg e lem rog.” Chiney e ma pigpig Arthur ni ir reb e pioneer nge ministerial servant. Ri gad ba felfelan’ ngay ni kad nanged ni faan gad ra kalngan’dad ma ra runguydad Jehovah!

MA PI’ JEHOVAH E ATHAP NGODAD

8. (a) Mang athap e pi’ Jehovah ngak e pi Jew ni yad ba kalbus? (b) Uw rogon laniyan’ e pi Jew ni kar kalgadngan’rad ni bochan e athap rorad nrogon ni be yog e Isaiah 40:​29-31?

⁸ Rogon u wan’ e girdi’ e dariy e athap ko pi Jew ni kan kalbusnagrad. Piyu Babylon e ba ga’ ndarur paged e kalbus rorad. (Isa. 14:17) Machane i pi’ Jehovah e athap ko girdi’ rok. I micheg nra pagrad u kalbus, ma dariy ban’en nrayog ni nge taleg ndabi rin’ e n’en ke lemnag. (Isa. 44:26; 55:12) Piyu Babylon e yad bod ba ab u wan’ Jehovah. (Isa. 40:15) Yira thoy taab yay me m’ay nga bang. Ere uw rogon nra ayuweg e re n’ey e pi Jew? Ra fal’eg lanin’rad. Machane gathi kemus rogon nra ayuwegrad, ya yoloy Isaiah ni gaar: “Piin ni yad be tor ngak Somol ni nge ayuwegrad e bay ra pirieged ni ke yib gelngirad bayay.” (Mu beeg e Isaiah 40:​29-31.) Arrogon, ra yib gelngirad ni bochan e athap rorad, ma yad ra ‘changeg ni bod rogon e eagle.’

9. Mang boch i fan nsusun e nge pagan’ e pi Jew ko tin ke micheg Jehovah?

⁹ Ki dag Jehovah ngak e pi Jew ni bay fan ni nge pagan’rad ko tin ke micheg. Ni uw rogon? Am lemnag e pi n’en nni yiiynag ngorad ni ke lebug. Yad manang ni ke gel piyu Assyria ko fa ragag i ganong nu Israel ni bay ko lel’uch ma kar feked e girdi’ riy ni kalbus. (Isa. 8:4) Kur guyed piyu Babylon nra gotheyed yu Jerusalem mar feked e girdi’ riy ni kalbus. (Isa. 39:​5-7) Ur moyed u nap’an nni luf lan owchen Zedekiah ni Pilung nruw raba’ min fek nga Babylon. (Jer. 39:7; Ezek. 12:​12, 13) Gubin ban’en ni yog Jehovah u m’on riy ni goo ke riyul’. (Isa. 42:9; 46:10) Ere dariy e maruwar riy ni ayuwegrad gubin e pi n’ey ni nge mich u wan’rad nra riyul’ e n’en ke yog Jehovah ni aram e yira chuwegrad u kalbus!

10. Mang e rayog ni nge ayuwegdad ni ngaud pared ni gad be athapeg e pi n’en bay nga m’on e ngiyal’ ney ko tin tomuren e rran?

¹⁰ Mang e gad be fil riy? Nap’an nra kireban’dad, ma athap rodad e rayog ni nge fal’eg lanin’dad me ayuwegdad ni ngki yib gelngidad bayay. Gad be par u ba ngiyal’ ni ke mo’maw’ e par ma bay boch e toogor rodad nib gel gelngirad. Machane thingar dabi mulan’dad. Rib manigil e athap rodad ni ke pi’ Jehovah ni aram e yafos ni manemus u fithik’ e gapas nge pagan’. Thingar ud pared ni gad be lemnag e re athap ney. Ya faanra danga’, ma ra maruwar u wan’dad e athap rodad ni bod ni be mo’maw’ ni ngad guyed bangi ban’en nrib fel’ yaan ni bochan e ba alit e winda ni gad be sap riy. Ere uw rogon nrayog ni ngad “klinnaged e re winda nem” ni aram e be yip’ fan ni ngaud pared ni gad be athapeg e pi n’en bay nga m’on? Rayog ni ngad ted e tayim ni gubin ngiyal’ ni ngaud lemnaged rogon feni manigil e par rodad u lan e bin nib beech e fayleng. Rayog ni ngad beeged boch e article, ma gad be yaliy boch e video, ma gad be motoyil nga boch e tang rodad ni murung’agen e athap rodad. Ku rayog ni ngaud weliyed ngak Jehovah u lan e meybil rodad murung’agen e pi n’en ke micheg nri gad be sonnag ni nge lebug.

11. Mang e ma ayuweg reb e walag nib pin ni bay boch e m’ar rok nib ubchiya’ ni nge yib gelngin bayay?

¹¹ Bay reb e walag nib pin ni ka nog Joy ngak ni bay boch e m’ar rok nib ubchiya’. Machane am lemnag rogon ni ke fel’ laniyan’ ma kki yib gelngin ni bochan e athap rok. I yog ni gaar: “Nap’an nra mulan’ug ma gu ma weliy urngin ban’en ni bay u lanin’ug ngak Jehovah ni bochan e gu manang ni manang rogon lanin’ug. Nap’an nug ra rin’ e re n’ey, ma ma pi’ Jehovah gelngin ngog ‘ni ir e ba th’abi gel.’” (2 Kor. 4:7) Ku ma susunnag Joy e ngiyal’ ni bay u lan e bin nib beech e fayleng ko ngiyal’ ‘ndariy be’ ni bay ki yog nib m’ar.’ (Isa. 33:24) Ku arrogodad ni faan gad ra weliy urngin ban’en ni bay u lanin’dad ngak Jehovah mu ud lemnaged e athap rodad, ma aram e rayog ni nge yib gelngidad bayay.

12. Mang boch i fan ni bay rogon ni nge pagan’dad ko tin ke micheg Jehovah? (Kum guy e sasing.)

¹² Ku boor ban’en ni ke rin’ Jehovah ni be dag ngodad ni bay fan ni nge pagan’dad ko tin ke micheg ni bod e n’en ni rin’ ni fan ko pi Jew. Am lemnag e pi yiiy ni gad be guy ni be lebug. Bod ni gad be guy reb e am nib gel lungun u fayleng ni ‘be par nib gel bang riy, ma ba war bang.’ (Dan. 2:​42, 43) Ku gad be rung’ag murung’agen e “durru’ u gubin yang,” maku gad be machibnag e “girdi’” u gubin e nam. (Matt. 24:​7, 14) Pi yiiy ney nge ku boch e yiiy ni gad be guy ni be lebug e be ayuwegdad ni ngari pagan’dad nra riyul’ urngin ban’en ni ke micheg Jehovah.

MA AYUWEGDAD JEHOVAH NDAB KUD RUSGAD

13. (a) Mang boch e magawon nra mada’nag e pi Jew u nap’an nra taw nga nap’an ni ngar chuwgad u kalbus? (b) Uw rogon ni fal’eg Jehovah laniyan’ e pi Jew ni yad ba kalbus nrogon ni kan tamilangnag ko Isaiah 41:​10-13?

¹³ Yugu aram rogon ni pi’ Jehovah ba athap ngak e pi Jew nrayog ni nge fal’eg lanin’rad, machane ku manang ni bay boch e magawon ni yad ra mada’nag u nap’an nra taw nga nap’an ni ngar chuwgad u kalbus. I yiiynag u m’on riy ni bay ba pilung nib gel gelngin nra gel ko pi nam nib liyeg yu Babylon, ngemu’ miki cham nga Babylon. (Isa. 41:​2-5) Ere gur, bay rogon ni nge rus e pi Jew, fa? I fal’eg Jehovah laniyan’ e girdi’ rok u m’on riy ni gaar: “Dab mu tamdag, ya gu ba’ rom. I gag e Got rom, dab mu rus nga ban’en.” (Mu beeg e Isaiah 41:​10-13.) Mang e be yip’ fan fare thin ni “gag e Got rom”? Gathi be puguran Jehovah ko pi Jew ni ngar liyorgad ngak, ya yad manang nib t’uf ni ngar rin’ed e re n’ey. N’en be rin’ e be puguran ngorad ni bay rorad maku ra ayuwegrad.​—Ps. 118:6.

14. Uw rogon ni ki ayuweg Jehovah e pi Jew ndab kur rusgad?

¹⁴ Ki ayuweg Jehovah e pi Jew ndab kur rusgad ni aram e puguran ngorad rogon feni gel gelngin nge feni ga’ e tamilangan’ rok. I yog ngorad ni ngar yaliyed e pi t’uf u lan e lang. I yog ngorad ni gathi kemus ni ir e ke sunmiy e pi t’uf nem ya ku manang fithingrad ni tat’abagayad! (Isa. 40:​25-28) Faanra arrogon, me ere ku manang fithingan e pi tapigpig rok ni be’ nge be’! Maku reb e faanra bay gelngin Jehovah ni nge sunmiy e pi t’uf, me ere ba mudugil ni ku bay gelngin ni nge ayuweg e girdi’ rok. Arrogon, dariy rogon ni nge magafan’ ara nge rus e pi Jew ni yad ba kalbus.

15. Uw rogon ni fal’eg Got rogon e girdi’ rok ni fan ko n’en nra buch boch nga m’on?

¹⁵ Ki fal’eg Jehovah rogon e girdi’ rok ni fan ko n’en nra buch boch nga m’on. Boch nga tabolngin fare babyor rok Isaiah e yog Got ko girdi’ rok riy ni gaar: “Marod nga lan e naun romed ngam man’niged e mab nga fiti keru’med. Mi gimed mith boch ngiyal’ nge taw ngilan’ ni ke m’ay e damumuw rok Got.” (Isa. 26:​20, BT) Rayog ni lebug e re thin ney ko yay nsom’on u nap’an ni gel Cyrus ni Pilung ko fare mach nu Babylon. Immoy be’ u Greece kakrom ni ma weliy chepin e girdi’ ni yog nnap’an ni yan Cyrus nga lan yu Babylon me “yog ko [pi salthaw rok] ni ngar thanged e fan rok urngin e girdi’ ndar moyed u lan e naun rorad.” Am lemnag gelngin e marus ni tay e girdi’ nu Babylon ni bochan e re n’ey! Machane dabisiy nde buch ban’en ko pi Jew ni bochan e ra folgad ko n’en ni yog Jehovah ngorad.

16. Mang fan nsusun e dabi magafan’dad nib pag rogon ko n’en nra buch rodad boch nga m’on? (Kum guy e sasing.)

¹⁶ Mang e gad be fil riy? Dabki n’uw nap’an ma ra tabab e bin th’abi ga’ e gafgow nra yib nga fayleng. Nap’an nra tabab e re gafgow ney, ma ra balyangan’ e girdi’ maku yad ra rus. Machane dariy ban’en nra buch ko girdi’ rok Jehovah. Gad manang ni Jehovah e Got rodad. Dab da rusgad ni bochan e gad manang ni “ke chugur ni ngan [chuwegdad] u fithik’ e gafgow.” (Luke 21:28) Mus nga nap’an nra cham fare ulung i nam ngodad, maku gad ra par ni gad ba mudugil. Ra fanay Jehovah e pi engel ni ngar ayuweged gadad maku ra yog e n’en ngad rin’ed ya nge dabi buch ban’en rodad. Uw rogon nra yog ngodad e n’en ngad rin’ed? Dawor da nanged rogon nra rin’. Machane dabisiy nra rin’ u daken e pi ulung rodad. Ere rayog ni nga nog ni pi ulung ni gad ma un ngay e aram “lan e naun” rodad ni aram e gin nrayog ni ngad pared riy ndabi buch ban’en rodad. Uw rogon nrayog ni ngad fal’eged rogodad ni fan ko pi n’en nra buch boch nga m’on? Thingar da chugurnaged gadad ko pi walagdad, me m’agan’dad ngay ni ngad folgad ko pi fonow ni be yib ko ulung rok Jehovah, miki mich u wan’dad ni Jehovah e ir e be pow’iy e ulung rodad.​—Heb. 10:​24, 25; 13:17.

17. Uw rogon nrayog ni ngam sap ngak Jehovah ni nge fal’eg lanin’um?

¹⁷ Yugu aram rogon nde mom e par rok e pi Jew u Babylon, machane i fal’eg Jehovah lanin’rad. Ku aram e n’en nra rin’ ni fan ngodad. Ere mu ulul ni ngaum sap ngak Jehovah ni nge fal’eg lanin’um ni yugu demtrug e n’en nra buch boch nga m’on. Arrogon, nge pagan’um nga rogon ni ma runguyey. Um par ni ga be athapeg e pi n’en bay nga m’on. Ma dab mu pagtalin ndariy ban’en ni ngam rus ngay, ya Jehovah e Got rom.