“Mu Pagan’um ngak Jehovah Mu Um Rin’ e Tin nib Fel’”

1. Mang boch ban’en ni ke sunmiy Jehovah e girdi’ nrayog ni ngar rin’ed ni yira ngat ngay?

KE SUNMIY Jehovah e girdi’ ni boor ban’en nrayog ni ngar rin’ed ni yira ngat ngay. Ke sunmiydad nrayog ni ngad lemnaged rogon ni ngad pithiged boch e magawon ni ma sum ma gad lemnag u m’on riy boch ban’en ni fan ko gabul nge langlath. (Prov. 2:11) Ke pi’ gelngidad nrayog ni ngad rin’ed e n’en ni kad lemnaged, ma gad lebguy boch ban’en nib fel’ ni kad nameged ni ngad rin’ed. (Fil. 2:13) Ki sunmiydad ni bay e nangan’ rodad nrayog ni ngad nanged e n’en nib thil u thilin e tin nib fel’ nge tin nib kireb, ma re nangan’ nem e rayog ni nge ayuwegdad ni ngad siyeged e ngongol nib kireb ma gad yal’uweg boch e oloboch ni kad rin’ed.​—Rom. 2:15.

2. Uw rogon ni baadag Jehovah ni ngad maruwelgad ko pi salap ni ke pi’ ngodad?

² Baadag Jehovah ni ngad maruwelgad ko pi salap ni ke pi’ ngodad u reb e kanawo’ nib manigil. Mang fan? Ya bochan ni gad ba t’uf rok, maku manang ni faan gad ra maruwel ko pi tow’ath ney nib fel’ rogon ma ra yibnag e felfelan’ ngodad. Boor yay ni ma puguran Jehovah ngodad u daken e Thin rok ni ngaud maruwelgad ko pi salap ni ke pi’ ngodad u reb e kanawo’ nib manigil. Bod ni, be gaar e Pi Babyor ko Bible nni Yoloy Nsom’on ni Thin ni Hebrew: “Ra lemnag be’ ban’en nib fel’ rogon u m’on riy, ma ra yan i aw nib fel’”; maku be yog ni “demtrug ko mang e ga be rin’ ma ngam rin’ ni kari mus rogom riy.” (Prov. 21:5, NW; Ekl. 9:10, BT) Ku be gaar e Pi Babyor ko Bible nni Yoloy Nsom’on ni Thin ni Greek: “Urngin ngiyal’ nra puf rogodad ma ngad ngongliyed e ngongol nib fel’ ngak urngin e girdi’”; ma “ra be’ ma tow’ath rok ni ke pi’ Got ngak ni nge gagiyegnag e thingari maruwel ngay nge yib fan ngak boch e girdi’.” (Gal. 6:10; 1 Pet. 4:10) Ere, ba tamilang ni baadag Jehovah ni ngad rin’ed boch ban’en u reb e kanawo’ nra yib angin ngodad nge yugu boch e girdi’.

3. Mang boch ban’en ndabiyog ko girdi’?

³ Machane, manang Jehovah ni bay boch ban’en ndabiyog rodad e girdi’. Manang ndabiyog rodad ni ngad ayuweged e girdi’ ni ngkur flontgad bayay, ara da chuweged e denen nge yam’. Ku manang ndabiyog ni ngad gagiyegnaged yugu boch e girdi’ ni bochan e gad gubin ni kan pi’ e puf rogon ngodad. (1 Ki. 8:46) Maku reb e, demtrug fadad llowan’ ara salap, ma faan yira taarebrogonnagdad ngak Jehovah ma gad bod nochi bitir.​—Isa. 55:9.

4. Mang e gad ra weliy ko re article ney?

⁴ Demtrug rogon mab t’uf ni ngad taga’gad ngak Jehovah ni nge pow’iydad u gubin ban’en, me pagan’dad ngak nra ayuwegdad me rin’ boch ban’en ni fan ngodad ndabiyog ni ngad rin’ed ni gadad rodad. Machane, yugu aram rogon, ma susun e ngad rin’ed e tin nrayog rodad, ma gad guy rogon ni ngad pithiged boch e magawon ni ma yib nga puluwdad ma gad ayuweg yugu boch e girdi’. (Mu beeg e Psalm 37:3.a) Bin riyul’ riy e, ba t’uf ni nge ‘pagan’dad ngak Jehovah mu ud rin’ed e tin nib fel’’; ma gad “ngongol u fithik’ e yul’yul’.” Ere, chiney e ngad weliyed e n’en nrayog ni ngad filed rok Noah, nge David, nge ku boch e tapigpig rok Jehovah ni i pagan’rad ngak, maku ur rin’ed e n’en nib milfan ngorad ni ngar rin’ed. Ku gad ra fil nre n’ey e ba muun ngay ni ngar nanged e pi n’en ndabiyog rorad nge n’en nrayog, mar ngongolgad u rogon nib puluw ngay.

KE GARER E KIREB U GUBIN YANG

5. Mu weliy rogon e pi magawon ni immoy Noah u fithik’.

⁵ Immoy Noah u ba ngiyal’ ni ke sug e “kireb” nge ngongol ndarngal u gubin yang u fayleng. (Gen. 6:4, 9-13) Manang ndab ki n’uw nap’an ma bayi thang Jehovah e piin nib kireb e ngiyal’ nem. Machane, dariy e maruwar riy ni kari kireban’ Noah ni bochan e ngongol nib kireb ni i buch e ngiyal’ nem. Yugu aram rogon, ma manang ni bay boch ban’en ndabiyog ni nge rin’, machane bay boch nrayog.

6, 7. (a) Mang e dabiyog ni nge rin’ Noah? (b) Uw rogon ni n’en ni be buch rodad e ngiyal’ ney e bod rogon e n’en ni i buch rok Noah?

⁶ Boch ban’en ndabiyog ni nge rin’ Noah: Yugu aram rogon ni i machibnag Noah e thin rok Jehovah ko girdi’ u tooben, machane dabiyog ni nge towasariyrad ni ngar motoyilgad ngak, ara gurnag ni nge taw ko ngiyal’ ni nge yib fare Ran ni Tharey e Fayleng. Thingari pagan’ Noah ngak Jehovah nra rin’ e n’en ni Ke micheg ni aram e nge chuweg e kireb ko ngiyal’ nib puluw ni nge rin’ riy.​—Gen. 6:17.

⁷ Ku arrogodad e ngiyal’ ney ni gad be par u ba ngiyal’ ni ke sug e fayleng ko kireb. Machane, gad manang ni ke micheg Jehovah nra thang e re fayleng nib kireb ney. (1 John 2:17) Ngiyal’ ney ni gad be sonnag e re ngiyal’ i n’em e dabiyog ni ngad towasariyed e girdi’ ni ngar motoyilgad ko fare ‘Thin Nib Fel’ ni murung’agen e gagiyeg rok Got.’ Maku dabiyog ni ngad gurnaged ni nge taw ko ngiyal’ nra yib fare “gafgow” nib ga’. (Matt. 24:14, 21) Ere, ba t’uf ni nge gel e michan’ rodad ni bod rogon Noah, me pagan’dad ndab ki n’uw nap’an ma ra chuweg Got urngin e pi magawon ney. (Ps. 37:10, 11) Ba mich u wan’dad ndabi pag Jehovah e kireb ni nge ulul nge pag e rofen ni ke dugliy ni nge chuweg riy.​—Hab. 2:3.

8. Uw rogon ni i tiyan’ Noah ko tin nrayog ni nge rin’? (Mu guy e sasing ni bay u tabolngin e re article ney.)

⁸ Boch ban’en nrayog ni nge rin’ Noah: Yugu aram rogon ni immoy boch ban’en ndabiyog ni nge rin’ Noah, ma de mulan’, ya i tiyan’ ko tin nrayog ni nge rin’. I weliy ko girdi’ e n’en ni ka nog ngak ni nge weliy ni bochan e ir reb e tamachib “ni i machibnag e tin nib mat’aw.” (2 Pet. 2:5) Dariy e maruwar riy ni ireray e n’en ni ayuweg Noah ni nge par nib gel e michan’ rok. Gathi kemus ni i machib, ya ki fanay e llowan’ rok nge gelngin ni nge lebguy e maruwel ni ke pi’ Got ngak ni aram e nge toy fare arke.​—Mu beeg e Hebrews 11:7.

9. Uw rogon nrayog ni ngad folwokgad rok Noah?

⁹ Gubin ngiyal’ ni gad be athamgil ni ‘nguud muruwliyed e maruwel rodad ni fan ngak Somol’ ni bod rogon Noah. (1 Kor. 15:58) Pi maruwel ney e rayog nib muun ngay ni ngad toyed ara da ngongliyed e yungin ni ke kireb ko pi tagil’ e liyor rodad, ara ngad ognaged gadad ni ngad pied e ayuw u boch e maruwel ni yima rin’ u nap’an e pi assembly nge convention ni gad ma tay, ara da rin’ed boch e maruwel ko pi branch ofis rodad ara pi ofis ni yima pilyeg e pi babyor rodad riy. Machane, bin th’abi ga’ fan riy e gad ma fanay e tayim rodad ni fan ko fare maruwel ni machib ni bochan e gad manang ni ireray e re maruwel nra ayuwegdad ni ngad pared nib mudugil e athap rodad ni fan ko pi n’en ni ka bay boch nga m’on. Baaray e n’en ni yog reb e walag nib pin nib yul’yul’. I gaar: “Nap’an ni ga ra weliy murung’agen e pi flaab nra yibnag Gil’ilungun Got, ma ga ra nang ni piin ni yad be motoyil ngom e dariy ban’en ni be l’agan’rad ngay maku yad be lemnag ndabi chuw e pi magawon ni yad be mada’nag e ngiyal’ ney.” Arrogon, faanra ud machibgad ma aram e rayog ni ngad pared nib mudugil u wan’dad e pi n’en ni gad be athapeg ni ka bay boch nga m’on, ma dabi mulan’dad ko sagreng ni gad be tay ni fan ko yafos.​—1 Kor. 9:24.

NAP’AN NI GAD RA OLOBOCH

10. Mu weliy e n’en ni buch rok David.

¹⁰ I yog Jehovah ni David ni Pilung e aram e ‘cha’ ni ba adag.’ (Acts 13:22) I par David nib yul’yul’. Machane, bay ba ngiyal’ ni rin’ reb e denen nib ubchiya’. Ra parew Bath-sheba ni leengin yugu be’. Ma n’en nth’abi gel e kireb riy e yan u thaan Uriah ni figirngin Bath-sheba ni ngan li’ nge yim’ u nap’an e mahl ya nge mith e ngongol nib kireb ni ke rin’. Ngemu’ miki yoloy murung’agen nga babyor me pi’ ngak Uriah ni nge mang ir e fek i yan! (2 Sam. 11:1-21) Machane, munmun ma aram me yib i tamilang e denen ni ke rin’ David. (Mark 4:22) Ere, mang e rin’ u nap’an ni buch e re n’ey?

11, 12. (a) Tomuren ni denen David, ma mang e daki yag ni nge rin’? (b) Faanra da kalgadngan’dad ko kireb rodad, ma mang e rayog ni nge pagan’dad ngay nra rin’ Jehovah ni fan ngodad?

¹¹ Boch ban’en ndabiyog ni nge rin’ David: Dabkiyog ni nge thilyeg David e n’en ni ke rin’. Maku dabiyog ni nge siyeg wenegan e kireb rok. Bin riyul’ riy e, bay boch i wenegan e denen rok David nde chuw u n’umngin nap’an e yafos rok. (2 Sam. 12:10-12, 14) Ere, ba t’uf e michan’ rok. Thingari pagan’ nra n’ag Jehovah fan e denen rok ni faanra kalngan’ maku ra ayuweg ni nge athamgil u fithik’ wenegan e denen rok.

¹² Gad gubin ni gad ma denen ni bochan e dawor da flontgad. Bay boch e denen nib gel e ubchiya’ riy nga boch. Maku bay boch ban’en nib kireb ni kad rin’ed ndabkiyog ni ngad thilyeged. Ere, rayog ndabi chuw wenegan. (Gal. 6:7) Machane, ba pagan’dad ko thin rok Got, maku gad manang ni faan gad ra kalngan’dad ma ra ayuwegdad ni ngad athamgilgad u fithik’ boch e magawon ni gad ra mada’nag ni mus ni faanra ke yib e pi magawon nem ngodad ni bochan e kireb ni kad rin’ed.​—Mu beeg e Isaiah 1:18, 19; Acts 3:19.

13. Uw rogon ni ki gel David bayay ko tirok Got ban’en?

¹³ Boch ban’en nrayog ni nge rin’ David: I pag David Jehovah ni nge ayuweg ni ngki gel bayay ko tirok ban’en. Reb e kanawo’ ni rin’ e re n’ey riy e aram e m’agan’ ko fonow ni pi’ Nathan ni profet ngak u nap’an ni yan i yog e thin rok Jehovah ngak. (2 Sam. 12:13) Ki meybil David ngak Jehovah, me wenignag e denen rok ngak me yog ngak ni baadag ni ngki fel’ e tha’ u thilrow bayay. (Ps. 51:1-17) Da i par David ni yugu be lemnag e kireb ni ke rin’, ya guy rogon ni nge fil ban’en riy. Arrogon, daki sul ngki rin’ bayay e denen ni ke rin’ nrib ubchiya’. Ere boch e duw nga tomuren, me yim’ ni ir be’ nib yul’yul’, ma de pag Jehovah talin e pigpig ni tay u fithik’ e yul’yul’.​—Heb. 11:32-34.

14. Mang e rayog ni ngad filed ko n’en ni rin’ David?

¹⁴ Mang e rayog ni ngad filed ko n’en ni rin’ David? Faanra kad rin’ed reb e denen nib ubchiya’, mab t’uf ni ngad kalgadngan’dad ma gad wenig ngak Jehovah ni nge n’ag fan rodad. Ere, thingar da weliyed e denen rodad ngak. (1 John 1:9) Kub t’uf ni ngad nonad ko piin piilal ya aram e piin nrayog ni ngar ayuweged gadad ko tirok Got ban’en. (Mu beeg e James 5:14-16.) Faan gad ra fol ko pi yaram ney ni ke ngongliy Jehovah rogon ke tay, ma aram e gad be dag nib pagan’dad ko n’en ni ke micheg ni aram e ra n’ag fan e kireb rodad me ayuwegdad ni ngkud gelgad bayay ko tirok ban’en. Tomuren e re n’ey, ma ngad guyed rogon ni ngad filed ban’en ko oloboch ni kad rin’ed, ma gad ulul ko pigpig ni gad be tay ngak Jehovah, ma gad athapeg e pi n’en ni ka bay nga m’on u fithik’ e pagan’.​—Heb. 12:12, 13.

YUGU BOCH E MAGAWON NI GAD MA MADA’NAG

15. Mang e gad ra fil ko n’en ni rin’ Hannah?

¹⁵ Dabisiy ni ku ra yib ngan’um yugu boch e tapigpig rok Jehovah kakrom ni yad ba yul’yul’ ni pagan’rad ngak, ma kur rin’ed e tin nrayog rorad ni nge ayuwegrad u fithik’ e pi magawon rorad. Bod ni Hannah e dabiyog ni nge diyen. Ere, dabiyog ni nge pithig e binem e magawon ni yigoo ir rok. Machane, ba pagan’ ni kemus ni yigoo Jehovah e rayog ni nge fal’eg laniyan’, ere aram fan ni ulul ko pigpig ni i tay u tabernacle ma be weliy laniyan’ ngak Jehovah u daken e meybil. (1 Sam. 1:9-11) Rib manigil e n’en ni rin’ Hannah nrayog ni ngad folwokgad riy. Faanra kad m’argad ara gad be mada’nag yugu boch e magawon ndabiyog ni ngad pithiged ni gadad rodad, ma ngad paged fan urngin e magafan’ rodad ngak Jehovah ya ba pagan’dad ngak nra ayuwegdad. (1 Pet. 5:6, 7) Maku reb e, ngad athamgilgad u rogon nrayog rodad ni ngaud uned ko muulung ni gubin ngiyal’ ma gad be maruwel ko pi n’en ni ke pi’ Jehovah nra ayuwegdad ko tirok ban’en.​—Heb. 10:24, 25.

16. Mang e rayog ni nge fil e piin gallabthir rok Samuel?

¹⁶ Uw rogon boch e gallabthir ni yad ba yul’yul’ ngak Jehovah machane ke malog pi fakrad? Samuel e dabiyog ni nge towasariy fa gal pumoon ni fak ni ngar folgow ko pi motochiyel rok Got nib mat’aw ni ke fil ngorow. (1 Sam. 8:1-3) Ere, thingari pag fan urngin ban’en ngak Jehovah. Yugu aram rogon, ma rayog ni ngki ulul Samuel ni nge par nib yul’yul’ ngak Jehovah ni ir e Chitamangin ni bay u tharmiy me rin’ e tin nib m’agan’ ngay. (Prov. 27:11) Ngiyal’ ney e boor e gallabthir ni Kristiano ni ke buch boch ban’en rorad ni aray rogon. Machane, ba pagan’rad ni be par Jehovah ni be sonnag e piin ni kar denengad ni ngar kalgadngan’rad ngar sulod ngak ni bod rogon fare matam u lan fare fanathin ni murung’agen fare pagel ni yan nga bang. (Luke 15:20) Machane, nap’an ni yad be sonnag e re ngiyal’ i n’em ma yad be athamgil ni ngar pared ni yad ba yul’yul’ ngak Jehovah, ma yad be athapeg ni ngongol nib fel’ ni yad be rin’ e ra k’aring pi fakrad ni ngar sulod ko ulung rok Got bayay.

17. Mang fan ni n’en ni rin’ fare pin nib gafgow ni ke yim’ figirngin e ra pi’ e athamgil nga lanin’dad?

¹⁷ Kum lemnag fare pin nib gafgow ni ke yim’ figirngin ni immoy u nap’an Jesus. (Mu beeg e Luke 21:1-4.) Dariy ban’en nrayog ni nge rin’ ko sasalap ni be tay e girdi’ u tempel. (Matt. 21:12, 13) Maku dariy ban’en nrayog ni nge rin’ ni nge dab ki magawon ko salpiy. Yugu aram rogon, me pi’ “l’agruw chi kobre’ nrow nib achig,” ni aram “urngin e chi salpiy ni ba’ rok ni ir e nge abich riy.” Re ppin nem nib yul’yul’ e dag nri be pagan’ ngak Jehovah, ma manang ni faanra m’oneg e tirok Got ban’en ma ra pi’ e tin nib t’uf ko par rok. Bochan gelngin e pagan’ ko re ppin nem ngak Got ma aram e n’en ni k’aring ni nge ayuweg e bin riyul’ e liyor ni un tay e ngiyal’ nem. Ere, ku arrogodad nib pagan’dad ni faan gad ra m’oneg Gil’ilungun Jehovah u wan’dad ma ra pi’ e tin nib t’uf rodad.​—Matt. 6:33.

18. Mu weliy e n’en ni ke rin’ reb e tapigpig rok Got e ngiyal’ ney ni i par nib puluw e lem rok u rarogon boch e magawon ni i mada’nag.

¹⁸ Boor e piin ni gad ma pigpig ngak Jehovah e ngiyal’ ney ni kar daged nib pagan’rad ngak Jehovah ma kar rin’ed e tin nrayog rorad ni nge ayuwegrad u fithik’ e pi magawon rorad. Am lemnag reb e walag ni pumoon ni ka nog Malcolm ngak ni par nib yul’yul’ ngak Got nge mada’ ko ngiyal’ ni yim’ riy ko duw ni 2015. Boor e magawon ni ur mada’nagew e ppin rok u nap’an e pi duw ni ur pigpiggow riy ngak Jehovah. I yog ni gaar: “Yu ngiyal’ e dabiyog ni ngad nanged e n’en nra buch rodad, fa reb e rayog ni nge par e yafos rodad u tayoyowol, ara da mada’naged boch ban’en nib mo’maw’ ni ngad athamgilgad u fithik’. Machane, ma tow’athnag Jehovah e piin ni yad ma taga’ ngak.” Ere, mang fonow e pi’ Malcolm? I yog ni gaar: “Mmeybil ngak Jehovah ni nge ayuwegem ni ngam pigpig ngak u fithik’ e pasig mag rin’ urngin e tin nrayog ni ngam rin’ ni fan ngak. Mu tiyan’um ko tin nrayog ni ngam rin’ ma gathi tin ndabiyog ni ngam rin’.”b

19. (a) Mang fan nib puluw e thin nu Bible ni fan ko duw ni 2017? (b) Uw rogon ni ga ra fol ko fare thin nu Bible ni fan ko duw ni 2017?

¹⁹ Chiney ni be ‘gel feni kireb’ e re m’ag ney ni gad bay riy e bayi gel e mo’maw’ ko pi magawon ni gad ma mada’nag. (2 Tim. 3:1, 13) Ere, rib ga’ fan ndab da paged e pi magawon nem ni nge magawonnag rogon e pigpig ni gad be tay. Ya ngad guyed rogon ni ngari pagan’dad ngak Jehovah ma gad rin’ e tin nrayog rodad. Ere, aram fan nib puluw fare thin nu Bible ni fan ko duw ni 2017 ni be gaar: “Mu pagan’um ngak Jehovah mu um rin’ e tin nib fel’”!​—Ps. 37:3, NW.