‘Mfek Fapi Thin Ngam Pi’ Ngak e Pi Pumoon ni Ke Pagan’um Ngorad’

1, 2. Uw rogon ni ma lemnag boor e girdi’ e maruwel ni yad ma rin’?

BOOR e girdi’ ni yad ma lemnag nib ga’ farad ara dariy farad ni bochan e maruwel ni yad ma rin’. U boch e nam e ra be gay be’ rogon ni nge nang rarogon be’, ma n’en nth’abi som’on ni ma fith ngak e, “Ba miti mang maruwel e ga ma rin’?”

² Bay yu ngiyal’ ni ma weliy e Bible murung’agen e girdi’ ni be yan u rogon e re miti maruwel ni yad ma rin’. Be yog e Bible ni Matthew e ir be’ nib “takunuy e tax”; me Simon e ir be’ ni ma “fal’eg rogon keru’ e gamanman”; ma Luke e ir reb e “togta.” (Matt. 10:3; Acts 10:6; Kol. 4:14) Ku bay yu ngiyal’ ni ma weliy e Bible murung’agen boch e girdi’ ni be yan u rogon e re miti maruwel ara tow’ath ni ke pi’ Got ngorad. Bod ni, be weliy murung’agen David ni Pilung, nge Elijah ni profet, nge apostal Paul. Rib ga’ fan u wan’ e pi pumoon ney e maruwel rorad ni ke pi’ Got. Ku arrogodad ni faanra bay boch e maruwel ni ke pi’ Got ngodad ma thingar ki ga’ fan u wan’dad.

3. Mang fan nib t’uf ni nge skulnag e piin ni kar piilalgad e piin ni ka yad bbitir ngorad? (Mu guy e sasing ni bay u tabolngin e re article ney.)

³ Boor i gadad e ri baadag e maruwel ni ma rin’ ma dabun ni nge tal riy. Machane, ba gel e kireban’ riy ya ka nap’an Adam keb i mada’ ko ngiyal’ ney ni ma pilibthir e girdi’, ma nap’an e bayi chuw reb e mfen miki yib reb nga lon. (Ekl. 1:4) Ere, aram fan ni tin riyul’ e Kristiano e ngiyal’ ney e bay boch e magawon ni yad ma mada’nag ni bochan e re n’ey. Ngiyal’ ney e ke ga’ yang e gin nthingari maruwel e girdi’ rok Jehovah riy ma kki mo’maw’ rogon e maruwel ni yad be rin’. Ere, nap’an ni gad ra tabab i rin’ boch e maruwel nib beech ma thingar da fanayed e computer nge boch e masin ni yibe fanay e ngiyal’ ney ya nge yag nda rin’ed e pi maruwel nem. Ere, bay boch e girdi’ ni kar pilibthirgad nib mo’maw’ ngorad ni ngar filed rogon ni ngar maruwelgad ko pi n’ey. (Luke 5:39) Maku reb e, ku rayog ni piin ni ka yad ba pagel e kab gel gelngirad ma piin ni kar pilibthirgad e kar meewargad. (Prov. 20:29) Ere, ba puluw ni nge guy rogon e piin ni kar piilalgad ni ngar ayuweged e piin ni yad bbitir ngorad ni ngar rin’ed boch e maruwel u lan e ulung rok Jehovah, ya faan yad ra rin’ ni aray rogon ma aram e yad be dag e t’ufeg ngorad.​—Mu beeg e Psalm 71:18.

4. Mang fan ni bay boch e walag nib mo’maw’ ngorad ni ngar pied boch e maruwel rorad ngak yugu boch e walag? (Mu guy fare thin ni kenggin e “Fan Nder Ma Pi’ Boch e Girdi’ e Maruwel Rorad ngak Yugu Boch e Girdi’.”)

⁴ Rayog ni nge mo’maw’ ngak e pi walag ni boor ban’en ni yad ma tay murung’agen ni ngar pied boch e maruwel rorad ngak e piin ni yad bbitir ngorad. Bay boch i yad ndabun ni nge rin’ e re n’ey ni bochan e dabun ni nge mul reb e maruwel u pa’. Maku bay boch i yad ni yad be magarnag nri daki yag ni ngaur ted murung’agen boch ban’en, maku yad be lemnag ndabiyog ko piin ni yad bbitir ngorad ni ngar rin’ed boch ban’en nib fel’ rogon ni bod yad. Maku boch i yad e ma lemnag ndariy e tayim rok ni nge skulnag yugu boch e walag. Maku reb e, pi walag ni yad bbitir ko pi walag ney e ba t’uf ni ngar gum’an’naged yad ni faanra danir pi’ boor e maruwel ngorad ni ngar rin’ed.

5. Mang deer e gad ra weliy ko re article ney?

⁵ Ere, chiney e ngad weliyed murung’agen l’agruw ban’en ni bay rogon ko maruwel ni ngan pi’ ngak boch e walag ni ngar rin’ed. Som’on e, uw rogon nrayog ni nge ayuweg e piin ni kar piilalgad e piin ni yad bbitir ngorad ni ngar yoornaged e maruwel ni yad be rin’, ma mang nib ga’ fan e re n’ey? (2 Tim. 2:2) Bin migid e, mang nib ga’ fan ni nge puluw e lem rok e pi walag ni ka yad ba pagel u nap’an ni yad be ayuweg e pi walag ni boor ban’en ni yad manang, mar filed boch ban’en rorad? Machane, som’on e gad ra weliy rogon ni ayuweg David ni Pilung fak ni nge rin’ reb e maruwel nib ga’ fan.

I FAL’EG DAVID ROGON SOLOMON NI NGE RIN’ REB E MARUWEL

6. Mang e baadag David ni Pilung ni nge rin’, machane mang e yog Jehovah ngak?

⁶ Tomuren e pi duw ni i mil David rok Saul, ma aram me mang pilung me yan i par nga reb e naun nrib manigil. Machane, ri kireban’ ni bochan e dariy reb e “naun” ara tempel ni kan ngongliy ni fan ngak Jehovah, ere ri baadag ni nge toy reb. Ere, gaar ngak Nathan ni profet: “Gu be par u lan ba naun nni toy ko ren e gek’iy ni cedar, machane fare Kahol ko M’ag rok Somol e kan tay u lan ba tent!” Me fulweg Nathan ngak ni gaar: “Mu rin’ lanin’um, ya bay Got rom.” Machane, ba thil e n’en ni yog Jehovah ni ngan rin’. I yog ngak Nathan ni nge yog ngak David ni gaar: “Gathi gur e en ni ngam toy ba tempel ni nggu par riy.” Ere, yugu aram rogon ni micheg Jehovah ngak David nra ulul nga i tow’athnag, machane i yog ngak ni Solomon ni fak e ir e en ni nge toy e re tempel nem. Ere, mang e rin’ David?​—1 Kron. 17:1-4, 11, 12, BT; 29:1.

7. Mang e rin’ David ko n’en ni yog Jehovah ngak?

⁷ De tal David nde pi’ e ayuw ko re maruwel nem ara kireban’ ni bochan e ra yan i m’ay e re tempel nem ma dab nog ni ir e ke toy. Bin riyul’ riy e, unog nre tempel nem e tempel rok Solomon ma gathi David. Ere, yugu aram rogon nsana i kireban’ David ni bochan e re n’em, machane i pi’ e ayuw ko re maruwel nem. I yarmiy boch e girdi’ ni ngar rin’ed e maruwel, me kunuy e wasey, nge bronze, nge silber, nge gol, nge ren ni cedar ni ngan fanay. Ngemu’ miki pi’ e athamgil nga laniyan’ Solomon ni gaar: “Fakag, ere chiney e mang e yigi i par Somol rom ni Got rom, ma mang e yigi tay nga tagil’ e re bugithin ney ni micheg ni nge tem nge yag rom ni mu toy ba tempel ni fan ngak.”​—1 Kron. 22:11, 14-16, BT.

8. Mang fan nrayog ni lemnag David ndabiyog rok Solomon ni nge rin’ e re maruwel nem, machane mang e rin’?

⁸ Mu beeg e 1 Kronicles 22:5, BT. Sana rayog ni ke lemnag David ndawori bung rogon Solomon ni nge rin’ e re maruwel nem nrib ga’ fan. Bin riyul’ riy e, “thingari fel’ yaan” e re tempel nem, ma Solomon e ngiyal’ nem e “kab bitir ndawori yoor ban’en ni ke nang.” Machane, yugu aram rogon ma manang David nra pi’ Jehovah e tin nib t’uf rok Solomon ya nge yag ni rin’ e re maruwel nem. Ere, rin’ David e tin nrayog rok ni nge pi’ e ayuw ko re maruwel nem ni yira rin’, nib maruwel nib ga’.

MU FELFELAN’ KO SKUL NI GA MA TAY NGAK YUGU BOCH E GIRDI’

9. Uw rogon nrayog ni nge felfelan’ e pi walag ni kar piilalgad u nap’an ni yad ra pi’ e maruwel rorad ngak e piin ni yad bbitir ngorad? Mu susunnag.

⁹ Susun e dabi kireban’ e pi walag ni kar piilalgad u nap’an nra t’uf ni ngar pied e maruwel rorad ngak e pi walag ni pumoon ni yad bbitir ngorad. Bin riyul’ riy e, rayog ni nge fel’ e maruwel ni faanra ni fil ngak e pi walag ni ka yad ba pagel rogon ni ngar rin’ed e pi maruwel nem. Susun ni nge felfelan’ e piin piilal u nap’an nra bung rogon e pi walag ni ka yad ba pagel ni kar skulnaged yad ni ngar rin’ed boch e maruwel. Rayog ni ngan susunnag e re n’ey ngak reb e matam ni be fil ngak ba pagel ni fak rogon e yan u karrow. Ra nap’an ni kab bitir fare pagel, ma kemus ni ma yaliy e chitamangin ni be kol e yap’ ko karrow. Machane, nap’an nra ilal boch fare pagel, ma aram e rayog ni nge weliy e chitamangin ngak rogon e n’en ni be rin’. Ma nap’an nra taw nga yangaren fare pagel nrayog ni nge yan u karrow, ma aram e ra tabab i kol e yap’ ko fare karrow. Machane, ku ra i weliy e chitamangin ngak rogon kanawoen ni nge kol e yap’ ko fare karrow. Bay yu ngiyal’ ni fare pagel e ra kol e yap’, ma yu ngiyal’ e fare matam. Machane, ra munmun u nap’an ni ke pilibthir fare matam ma aram e fare pagel e ra i kol e yap’ ko fare karrow. Ra felfelan’ fare matam ngay ni be kol fare pagel ni fak e yap’ ko fare karrow ma dabi lemnag ni nge mang ir e kol e yap’. Ere, ku arrogon e pi walag ni pumoon ni kar pilibthirgad ni yad ma felfelan’ u nap’an nra tabab e pi walag ni yad bbitir ngorad ni ngar rin’ed e pi maruwel ni kar skulnaged yad ni ngar rin’ed ni fan ko ulung.

10. Mang e lemnag Moses u murung’agen e tayfan ni ngan dag ngak nge pi n’en ni i yog e thin riy?

¹⁰ Pi walag ni kar piilalgad e thingar ra kol ayuwgad ndabi awan’rad ngak yugu boch e walag. Am lemnag e n’en ni rin’ Moses u nap’an ni tabab l’agruw e pumoon u fithik’ piyu Israel ni ngar welthingow ni bod rogon e profet. (Mu beeg e Numbers 11:24-29.) Baadag Joshua ni ir e taayuw rok Moses ni ngan talegrow, ya be lemnag ni yow be darifannag Moses ni ir e en ni be yog e thin rorad. Machane, i fulweg Moses ngak ni gaar: “Mog, ke awan’um ngorow ni bochag? Ku gum’ ni bochan ni manga yigi pi’ Somol e gonop rok ngak urngin e girdi’ rok ngar welthingad ni bod rogon e profet.” Manang Moses ni Jehovah e ir e be pow’iy e n’en ni be buch. Ere, aram fan ni yog nib m’agan’ ngay ni nge urngin e pi tapigpig rok Jehovah min pi’ e re tow’ath nem ngorad ko bin ni nge guy rogon ni nge mang ir e nog e sorok ngak. Ere, gathi gad ma felfelan’ u nap’an ni yira pi’ boch e tow’ath ngak yugu boch e walag ma dan pi’ ngodad ni bod rogon ni rin’ Moses, fa?

11. Mang e yog reb e walag ni pumoon u murung’agen e maruwel rok ni ke pi’ ngak yugu reb e walag?

¹¹ Ngiyal’ ney e boor e walag ni ke yoor e duw ni kar maruwelgad nib gel ni ngar skulnaged yugu boch e walag u rogon ni ngar rin’ed boch e maruwel ni boor. Bod ni, bay reb e walag ni pumoon ni Peter fithingan ni ke pag 74 e duw ni ke pigpig ngak Jehovah u polo’ e tayim rok, ma 35 ko pi duw nem e ke pigpig u reb e branch ofis u Europe. Ba n’uw nap’an ni i maruwel ko Service Department ko branch ofis u rom, machane chiney e kan pi’ e maruwel rok ngak Paul nreb e walag ni pumoon nib bitir ngak ni i skulnag kafram. Nap’an nnog ngak Peter ni nge weliy rogon laniyan’ ko maruwel rok ni ke thil, me fulweg ni gaar, “Kar gu felfelan’ ni bay boch e walag ni pumoon ni kan skulnagrad nrayog ni ngar rin’ed boor e maruwel, maku yad be rin’ nib fel’ rogon.”

NGE GA’ FAN U WAN’DAD E PI WALAG NI KAR PILIBTHIRGAD

12. Mang e rayog ni ngad filed ko n’en ni buch rok Rehoboam?

¹² Tomuren ni yim’ Solomon, ma aram me mang Rehoboam ni fak e pilung. Nap’an ni t’uf e ayuw rok Rehoboam u rogon ni nge rin’ e maruwel rok, ma aram me yan i fith laniyan’ e pi pumoon ni yad ba piilal ngak. Machane, de fol ko n’en nrogned ngak, ya n’en ni rin’ e fol ko fonow ni pi’ e pi pagel ngak nra ilalgad u taabang. Ere, rib kireb wenegan ni yib nga tomuren. (2 Kron. 10:6-11, 19) Mang e gad be fil ko re n’ey? Gad be fil riy ni gad ba gonop ni faan gad ra ning e fonow ngak e piin ni yad ba piilal ngodad ni boor ban’en ni yad manang, ma gad fol riy. Maku reb e, susun e dabi lemnag e piin ni yad bbitir nthingar dab ra thilyeged rogon ni yibe rin’ boch ban’en ni bochan e aram rogon ni un rin’ kafram. Machane yugu aram rogon, ma susun e ngar ted fan e pi fonow ni ke pi’ e piin ni yad ba piilal ngorad ma yugu dab ra gurgad ngar lemnaged ndabi yib angin e fonow ni kar pied.

13. Uw rogon ni susun e nga i maruwel e pi walag ni ka yad ba pagel nge pi walag ni kar piilalgad u taabang?

¹³ Bay boch e walag ni ka yad ba pagel ni yad be yarmiy rogon ni yima rin’ boch e maruwel nib muun ngay boch e maruwel ni ma rin’ e pi walag ni kar piilalgad. Yugu aram rogon ni ke thil e maruwel ni be rin’ e pi walag ney ni ka yad ba pagel, machane u m’on ni ngar dugliyed boch ban’en ma rayog ni ngar fanayed boch ban’en ni kar filed ko pi walag nem ni yad ba piilal ngorad ni bochan e boor ban’en ni yad manang. Baaray e n’en ni yog Paul ni faani fek e maruwel rok Peter u reb e department u Bethel. I yog ni gaar, “Gu ma tay e tayim ni nggu fith laniyan’ Peter u boch ban’en, ma kug ma pi’ e athamgil nga laniyan’ e pi walag ni gamad ma maruwel u taabang ni ngkur rin’ed e re n’em.”

14. Mang e gad ra fil u rogon e maruwel ni i rin’ Timothy nge apostal Paul u taabang?

¹⁴ Ri kab pagel Timothy u nap’an nra tababgow apostal Paul ko maruwel u taabang, mar maruwelgow u taabang u lan boor e duw. (Mu beeg e Filippi 2:20-22.) I yol Paul ngak piyu Korinth ni gaar: “Kug l’og Timothy ke yib ngomed. Yi ir e ke mang be’ ni fakag u daken Somol, ni be’ nib t’uf rog ma ba yul’yul’. I ir e bayi puguran ngomed rogon e ngongol ni gu ma rin’ u fithik’ e bin nib beech e wok ni ke pi’ Got ngog u daken Kristus Jesus, ni ir e gu be machibnag ngak e girdi’ ko galesiya u gubin yang i yan.” (1 Kor. 4:17) Ba tamilang ko n’en ni yog Paul nib fel’ rogon ni ur maruwelgow Timothy u taabang ma ur ayuwegew yow. I tay Paul e tayim ni nge fil ngak Timothy kanawoen ni i “rin’” boch e maruwel riy ni ke pi’ Got ngak u daken Kristus. Ere, boor ban’en ni i fil Timothy rok Paul ma aram me par nrib t’uf rok. Kub pagan’ Paul ngay nrayog rok Timothy ni nge ayuweg e pi walag nu Korinth ko pi n’en nib t’uf rorad ni fan ko tirok Got ban’en. Ere, rib manigil e kanawo’ ni ke dag Paul nrayog ni nge folwok e piin piilal riy e ngiyal’ ney u nap’an ni yad be skulnag yugu boch e walag ni pumoon u rogon ni nga rogned e thin u lan e ulung.

RA BAGADAD MA BAY REB E MARUWEL NIB MILFAN NGAK

15. Nap’an nra thil boch ban’en ni bay rogon ngodad, ma uw rogon nrayog ni nge ayuwegdad fare fonow ni pi’ Paul ngak e pi Kristiano u Roma?

¹⁵ Gad be par u ba ngiyal’ nri boor ban’en ni be buch riy. Boor e kanawo’ ni be mon’og e ulung rok Jehovah riy u fayleng. Bochan e re n’ey, ma aram fan ni boor ban’en ni be thil u lan e ulung. Bay boch e pi n’ey ni be thil ni bay rogon ngodad. Machane, manga yugu da sobut’naged lanin’dad ngad lemnaged e n’en nib m’agan’ Jehovah ngay ma gathi n’en nib m’agan’dad ngay. Ya faan gad ra rin’ ni aray rogon ma aram e rayog ni ngad pared nib taareban’dad. I yol Paul ngak e pi Kristiano u Roma ni gaar: “Nggog ngomed ni gimed gubin ndab um tolangniged gimed u lanin’med nge pag rogon e lem nsusun e nguum tiyed, machane nguum lemgad u fithik’ e lem nib sobut’, me bigimed me gonopiy u wan’ e tin nrayog rok nib m’ag nga gelngin e michan’ rok ngak Got ni ke pi’ Got ngak. Boor yang i dowdad ni kan chadguy ke yog dowdad riy, ma urngin e yungi n’em ndowdad e ra bang ma bay e maruwel rok. Me ere ku er rogon ni yig gadad pire’, machane taareb dowdad ni kan puthuy ngak Kristus.”​—Rom. 12:3-5.

16. Mang e rayog ni nge rin’ e pi walag ni kar piilalgad, nge pi walag ni ka yad ba pagel, nge piin leengirad ya nge yag nra ayuweged e ulung rok Jehovah ni nge par ni bay e gapas nge taareban’ riy?

¹⁶ Ere demtrug rarogodad, ma ngad athamgilgad ni gad gubin ngad maruwelgad ni fan nga Gil’ilungun Jehovah. Gimed e pi walag ni kam piilalgad e ngam skulnaged e pi walag ni yad bbitir ngomed u rogon ni ngar rin’ed e maruwel ni gimed be rin’. Ma gimed e pi walag ni ki gimed ba pagel e nge m’agan’med ngay ni ngam rin’ed boch e maruwel, mi gimed nang e gin ni ngam musgad riy, mu um ted fan e pi walag ni kar piilalgad. Ma gimed e piin leengiy e ngam folwokgad rok Priscilla ni leengin Aquila u rogon ni i un ngak Aquila ni figirngin ma yow be maruwel u taabang u fithik’ e yul’yul’ u nap’an ni thil boch ban’en u rarogon e par rorow.​—Acts 18:2.

17. Mang e ba pagan’ Jesus ngay nrayog rok pi gachalpen ni ngar rin’ed? Mang maruwel e skulnagrad riy?

¹⁷ Jesus e ir e dag e bin th’abi fel’ e kanawo’ u rogon ni ngan skulnag yugu boch e girdi’ u rogon ni ngar rin’ed boch e maruwel ni boor. Manang nnap’an nra taw ko ngiyal’ ni nge m’ay e maruwel rok u fayleng, ma aram e yugu boch e girdi’ e yad ra ulul i rin’ e re maruwel nem. Yugu aram rogon ndawori flont pi gachalpen, machane ba pagan’ ngorad, miki yog ngorad ni ka boor e maruwel ni yad ra rin’ ko tin ni i rin’. (John 14:12) Rib fel’ rogon ni skulnagrad, ma aram me yag ni ngar wereged fare thin nib fel’ ko pi nam e ngiyal’ nem.​—Kol. 1:23.

18. Mang e athap rodad boch nga m’on? Mang e rayog ni ngad rin’ed e chiney?

¹⁸ Tomuren ni yim’ Jesus, ma aram min faseg ko yam’ me yan nga tharmiy, ma aram mu kun pi’ yugu boch e maruwel ngak ni nge rin’, ma ke par ni “ir e ba’ nga daken urngin e piin ni be gagiyeg . . , nge piin ni yad be tay murung’agen ban’en, nge piin ni ba ga’ lungurad, nge pi pilung.” (Efe. 1:19-21) Ere, faan gad ra yim’ ni gad ba yul’yul’ ngak Jehovah u m’on ko Armageddon, ma yira fasegdad u nap’an ni yira beechnag e fayleng. Ma ngiyal’ nem e boor e maruwel nrib manigil ni yira pi’ ngodad ni ngad rin’ed. Machane, ka bay reb e maruwel nrib ga’ fan nrayog ni ngad rin’ed ni gad gubin e ngiyal’ ney. Re maruwel nem e aram e ngad machibnaged fare thin nib fel’ ma gad yognag boch e girdi’ ni ngar manged pi gachalpen Jesus. Ere, ndemtrug ko kad pilibthirgad fa ka gad ba gel ma ngad athamgilgad ni gad gubin ni ‘nguud muruwliyed e maruwel rodad ni fan ngak Somol.’​—1 Kor. 15:58.