Ga Ra Pithig e Magawon ni Ke Sum Mag Awnag e Gapas, Fa?

BAADAG Jehovah Got ni nga i par e pi tapigpig rok u fithik’ e gapas ni gubin ngiyal’. Bochan e gapas ni bay u thilin e tin riyul’ e tapigpig rok Got, ma aram fan ni yad ma par u fithik’ e gapas nge taareban’. Re n’ey e ma momnag ngak e piin ni yad baadag ni ngar pared u fithik’ e gapas ni ngar adaged ni ngar bad nga lan e ulung ni Kristiano.

Bod ni, immoy reb e pumoon ni ma pig ni ma par u reb e nam ni ka nog yu Madagascar ngay ni guy rogon e taareban’ ni bay u thilin e Pi Mich Rok Jehovah, ma aram me gaar u wan’, ‘Faan gomanga ra yan i taw nga ba ngiyal’ ni gu adag ni nggu un nga barba’ e teliw, ma ireray e re raba’ i teliw ni gu baadag ni nggu un ngay.’ Boch nga tomuren, ma aram me tal ndaki un nga ngongolen e pig, me thilyeg boch ban’en u rarogon e mabgol rok, ma aram me mang reb e tapigpig rok Jehovah ni fare Got ko gapas.

Bokum biyu’ e girdi’ ni yad ma mang bang ko ulung ni Kristiano u gubin e duw, ma ke yag ni ngar pirieged e bin riyul’ e gapas ni bod rogon e re moon ney. Machane, be tamilangnag e Bible ni faanra bay be’ u lan e ulung ni be ‘awan’ ngak be’, fa be fanenikay be’,’ ma rayog ni nge magawon thilin e pi tafager me sum boch e magawon u lan e ulung. (Jas. 3:14-16) Machane, gad ba felfelan’ ni bochan e bay e fonow u lan e Bible ni be ayuwegdad u rogon ni ngad siyeged e pi magawon nem ma gad mon’ognag rogon e gapas ni bay u thildad. Chiney e ngad weliyed rogon ni ke yag ni nge ayuweg e pi fonow ney boch e girdi’ ni ke sum boch e magawon u thilrad.

BOCH E MAGAWON NI KE SUM NGE ROGON NI KAN PITHIG

“Bay reb e walag ni pumoon ni gamow ma maruwel u taabang nib mo’maw’ ni gamow ma rin’ ban’en u taabang, ya gathi ri ma puluw lungumow. Ba’ bayay ni yib l’agruw ni’ ko gin ni gamow bay riy, ma gamow be tugthin nib elmerin.”​—CHRIS.

“Bay reb e walag nib pin nib ga’ ni gamow ma yan ko machib u taabang ni yigi pos me tal ndaki un ngog ko machib. De n’uw nap’an nga tomuren, ma aram me tal ndaki non ngog. Dag nang ko mang e ke buch u thilmow.”​—JANET.

“Immoy bayay ni gamad be non l’agruw ni’ u phone, ma aram me yog bagayow ndab kug nonad ya nge yan, ma aram mug lemnag ni ke hangnag e phone. Ere, gu tabab i weliy boch ban’en nib kireb u murung’agen ngak facha’ ni baaram ni ka gamow be non, machane bin riyul’ e, dawori hangnag facha’ e phone rok.”​—MICHAEL.

“Bay l’agruw e walag ni yow ba pioneer ko ulung romad ni tabab ni nge sum boch e magawon u thilrow. Ma aram me tabab bagayow ni nge puwan’ ngak bagayow. Boor e girdi’ ni magawon lanin’rad u nap’an ni yibe yaliyrow ni yow be tugthin.”​—GARY.

Sana ga ra lemnag ni pi magawon ney ni ke sum e nochi magawon nde ga’. Machane, gubin nrayog ni nge k’aring e amith nga laniyan’ e piin ni ke sum e magawon u thilrad, me par u lanin’rad nib mo’maw’ ni nge chuw, miki magawonnag e gapas u lan e ulung. Machane, gad ba felfelan’ ni bochan e pi walag ney e yad gubin ni kar paged e thin nu Bible ni nge pow’iyrad ma ke yag ni ngar pithiged e magawon ni ke sum u thilrad. Ga be lemnag, ma mang fonow u Bible e ke yag ni nge ayuwegrad?

“Mmarod ndab um tugthingad.” (Gen. 45:24) Ireray e fonow ni pi’ Josef ngak fapi pumoon ni walagen u nap’an ni yad be yan ni ngar sulod ko chitamangirad. Rib manigil e pi thin ney ni yog ngorad! Faanra dabi guy be’ rogon ni nge gagiyegnag e tafinay rok, me gur nge damumuw, ma aram e rayog ni ngki k’aring e damumuw ngak yugu boch e girdi’. I nang Chris ni meewar rok e ir be’ nib tolangan’ ma dabun ni nge fol ko n’en ni yibe yog ngak. Machane, bochan ni baadag ni nge thilyeg e ngongol rok, ma aram me yan i wenig ngak fare walag ni kar luagew e thin miki guy rogon ni nga i gagiyegnag e damumuw rok. Nap’an ni guy fare walag e n’en ni ke rin’, ma aram miki thilyeg boch ban’en ko ngongol rok. Chiney e yow be pigpig ngak Jehovah u taabang ni yow ba felfelan’.

“Faanra dab ni puruy’nag e n’en ni yibe lemnag ni ngan rin’, ma dabi yib angin.” (Prov. 15:22, NW) I dugliy Janet ni nge fol ko re fonow ney. Ere, yan i guy fa bin baaram e walag nib pin ngar ‘puruygow’ ara ra nonow. Nap’an ni yow be non, ma aram me yog Janet ngak fare walag ni nge weliy ngak e n’en ni ke k’aring e damumuw ngak. Som’on e de yag ni ngar nonow ngorow nib fel’ rogon. Machane, nap’an nra ululgow ko numon nra bagayow ma be non u fithik’ e sumunguy, ma aram me yag ni ngar weliyew lanin’row ngorow. Tomur riy, me tamilang u wan’ fare walag ni ir e de puluw rogon ni ke lemnag boch ban’en, ya bay ban’en ni ke buch ni ke kirebnag laniyan’ ma ke lemnag nib muun Janet ngay, machane bin riyul’ riy e danga’. Ere, wenig fare walag ngak Janet, ma aram me yag ni ngki fel’ thilrow bayay mar ululgow ko pigpig ngak Jehovah u taabang.

“Faanra mman ni ngam pi’ e n’en ni ngam pi’ ngak Got u altar me yib ngan’um ni bay ban’en nib togopluw u wan’ walagem ngom, ma ga pag e n’en ni ngam pi’ ngak Got u mit e altar ma ga yan ni ka chingiyal’ nem ngam fal’eg thilmew walagem.” (Matt. 5:23, 24) Sana keb ngan’um e re fonow ney ni pi’ Jesus u nap’an fare Welthin Rok u Daken e Burey. Tomuren ni yog Michael boch ban’en nib kireb u murung’agen e re walag nem, ma aram mi ri kireban’. Ere, dugliy u wan’ ni nge yan i guy nge awnag e gapas u thilrow. I yan i guy fare walag me wenig ngak ko n’en ni ke rin’. Ere, mang angin ni yib riy? I yog Michael ni gaar: “I n’ag walageg fan u wan’ e n’en ni kug rin’.” Tomuren e re n’ey, ma aram miki fel’ thilrow fare walag bayay.

“Nge bigimed mi i ayuweg bigimed ko meewar rok u fithik’ e runguy, mu um n’iged fan u wun’med e n’en ni manga ke kirebnag bigimed u laniyan’ bigimed ko re ngiyal’ i n’en ni ba’ ban’en ni ke dabuy bigimed ni ke rin’ bigimed ngak.” (Kol. 3:12-14) Fa gal walag ni yow ba pioneer ni faani sum e magawon u thilrow e ayuwegrow reb e piilal ni ngar nangew ni n’en ni kar rin’ew e ke magawonnag laniyan’ yugu boch e walag u lan e ulung. Ki puguran ngorow nsusun e ngar guyew rogon ni ngaur gum’an’gow u puluwrow mar guyew rogon ni nga i par ni bay e gapas u lan e ulung. Ere, m’agan’row ko fonow ni pi’ fare piilal ngorow mu kur folgow riy. Chiney e ke yag ni ngar ululgow i machibnag fare thin nib fel’ u taabang ni ke fel’ thilrow.

Ku rayog ni ngam fol ko fare fonow ni bay ko Kolose 3:12-14 u nap’an ni ke yog be’ ban’en ni ke kirebnag lanin’um. Boor e walag ni kar guyed ni faan yad ra sobut’nag lanin’rad ngar folgad ko re fonow ney, ma aram e rayog ni ngar n’aged fan u wan’rad e n’en ni ke buch ma dab kur lemnaged. Machane, faanra der yag rom ni ngam n’ag fan u wan’um, ma aram e rayog ni nge ayuwegem fare kenggin e motochiyel ni bay ko Matthew 18:15. Fonow ni pi’ Jesus u roy e be weliy e n’en nib t’uf ni ngan rin’ ko ngiyal’ ni ke rin’ be’ reb e denen nib ubchiya’ nib togopuluw ngak be’. Machane, ku rayog ni ngam fol ko re fonow ney. Rayog ni ngam man mu guy fare walag ngam weliyew fare magawon u taabang u fithik’ e sumunguy nge sobut’an’, mi gimew guy rogon ni ngam pithigew u taabang.

Ku bay yugu boch e fonow u Bible nrayog ni nge yib angin. Machane, faanra ngad folgad riy, mab t’uf ni ngad taga’gad nga gelngin Got nib thothup, ya nge yag ni m’ug wom’engin ko ngongol rodad ni aram e “t’ufeg, nge felfelan’, nge gapas laniyan’, nge gum’an’, nge gol, nge fel’ ngak e girdi’, nge yul’yul’, nge sobut’an’, nge t’ar laniyan’.” (Gal. 5:22, 23) Am lemnag e re n’ey. Faan yira tay e oil ko yungi n’en nib t’uf ni ngan oilnag u reb e masin, ma aram e rayog ni nge mom ni nge maruwel fare masin nib fel’ rogon. Ere, ku arrogon ni faan gad ra guy rogon ni nge m’ug e pi fel’ngin ney ko ngongol rodad ma aram e rayog ni nge mom ni ngad awnaged e gapas u thildad pi walagdad.

FAANRA BA THILTHIL RAROGON E PI WALAG MA RAYOG NI NGE GELNAG E FELFELAN’ U LAN E ULUNG

Ra bagadad ma rogon. Ba thilthil fel’ngidad, nge rogon ni gad ma lemnag ban’en, nge rogon ni gad ma weliy e n’en ni bay u lanin’dad. Ma pi n’ey e rayog ni nge fal’eg e tha’ u thildad e pi fager rodad ni nge manigil. Machane, bay yu ngiyal’ nrayog ni nge sum boch e magawon ni bochan e re n’ey. Baaray e n’en ni yog reb e piilal ni ke n’uw nap’an ni ke pigpig ngak Got. I gaar: “Faanra ba tamra’ be’ ni gathi ri ma non, mab mo’maw’ ni ngar m’aggow be’ nib ta welthin. Rayog ni ngan lemnag ni yug de ga’ fan e re n’ey; machane rayog ni nge k’aring boch e magawon nib ga’.” Machane gur, ga be lemnag nib mo’maw’ ni nge fel’ thilin l’agruw ni’ nib thil rarogorow? Am lemnag Peter nge John ni yow l’agruw e apostal rok Jesus. Uw rogon Peter? Gad ra lemnag Peter, ma ir be’ nib aduduw ma der ma magagawon ni nge weliy e n’en ni bay u laniyan’. Ma uw rogon John? Gad ra lemnag John ma ir be’ nib ta t’ufeg e girdi’, mab ga’ ni ma lem u m’on ni nge welthin ara nge rin’ ban’en. Ere, gal apostal ney e ri yow ba thil ni girdi’. Machane, ba fel’ rogon e maruwel ni ur tew u taabang ni ur pigpiggow ngak Jehovah. (Acts 8:14; Gal. 2:9) Ere, ku arrogon e ngiyal’ ney nrayog ni nge maruwel l’agruw e Kristiano u taabang nib fel’ rogon ni yugu aram rogon nib thil rarogorow.

Rayog nsana bay reb e walag ko ulung rom ni gathi ri ga baadag rogon ni ma non ngom ara rogon ni ma rin’ ban’en. Yugu aram rogon, ma ga manang ni ke yim’ Kristus ni fan ko re walag ney, ma thingar mu dag e t’ufeg ngak. (John 13:34, 35; Rom. 5:6-8) Ere, de fel’ ni ngam dugliy ndabi mang e re walag nem e fager rom ara mu tal ndab kum non ngak. Ya ngam fithem ni nge lungum: ‘Gur, bay ban’en ni be rin’ walageg nib togopuluw ko thin nu Bible? Ma gur, lem rok ni nga i yog e pi thin ney ara nga i rin’ e pi n’ey ni nge kirebnag lanin’ug? Fa kemus ni bochan e ba thil rarogomow?’ Ma bin th’abi ga’ fan e deer ni ngam fithem riy e: ‘Bay boch i fel’ngin e re walag ney nib manigil ni gu baadag ni ngki m’ug ko ngongol rog, fa?’

Bin tomur ko pi deer ney e aram e bin th’abi ga’ fan. Faanra fare walag e ir be’ nib ta welthin me gur e gathi ri ga ma non, ma aram e ngam lemnag rogon feni mom ngak ni ma non ko girdi’ u nap’an e machib. Ere, rayog ni ngam pining ngam marow ko machib u taabang mag guy e n’en nrayog ni ngam fil rok. Faanra ba ga’ ni ma gol ko girdi’, me gur e danga’, ma mang ndab mu fal’eg i yaliy rogon e felfelan’ ni ma yib ngak u rogon ni ma ayuweg e piin pilibthir, nge piin ni kar m’argad, ara piin ni yad ba gafgow? N’en ni gad be fil ko re n’ey e, yugu aram rogon nib thil rarogomew reb e walag ni pumoon ara ppin u lan e ulung, machane rayog ni nge chugur e tha’ u thilmew ni faanra um yaliyew fel’ngimew. Yugu aram rogon nsana dab ri pach e thin romew ni bod rogon boch e fager, machane rayog ni nge chugur thilmew me yag ni nge par ni bay e gapas u thilmew ngu lan e ulung.

Euodia nge Sintike e dabisiy ni yow l’agruw ni’ nrib thil rarogorow. Machane, i pi’ apostal Paul e athamgil nga lanin’row ni ngar ‘guyew rogon nge taareban’row ni bod rogon e walag ni ppin ni ma par u fithik’ Somol.’ (Fil. 4:2) Ere, ga ra fol ko re thin ney mag guy rogon ni nge par ni bay e gapas u thilmed e pi walag u lan e ulung, fa?

DAB MU PAG E MAGAWON NI NGE ULUL

Faanra ud pared ma gad be lemnag ban’en ni ke rin’ be’ ngodad ni dubdad, ma dab da guyed rogon ni ngad thilyeged e lem rodad, ma aram e rayog ni nge munmun ma gad dabuy daken facha’. Re n’ey e rayog ni ngan taareb rogonnag ko pan nib kireb ni be tugul u daken bangi milay’ ko floras. Faanra dab ni pug e pi pan nem, ma rayog ni nge fanay daken fagi milay’. Nap’an nra sug e fanenikan u gum’irchaen be’, ma aram e rayog ni nge magawonnag e pi walag u lan e ulung. Ere, faanra ba t’uf Jehovah nge pi walagdad rodad, ma aram e gad ra athamgil u rogon nrayog rodad ni ngad ayuweged e ulung rodad ni nga i par ni bay e gapas riy.

Faan gad ra guy rogon ni ngad pithiged e pi magawon ni ke sum u thildad be’ ni bochan e gad be guy rogon ni ngad awnaged e gapas, ma rayog ni nge yib angin ngodad. Am lemnag e n’en ni buch rok reb e Pi Mich. I yog ni gaar: “Bay reb e walag nib pin ni gu ra yaliy rogon e ngongol rok ngog ma gowa be teg ni gu bochi tir. Ma ri dabug e re n’em. Ere, munmun ma aram mug tabab ni nga u gog e thin nib gel ngak. I lungug u wan’ug, ‘Der ma tayfag u rogon nsusun e nge rin’, ere dariy rogon ni nggu tayfan.’”

I tabab e re walag ney ni nge lemnag rogon e ngongol rok. I yog ni gaar: “Nap’an nug rin’ e re n’ey, ma aram mug tabab ni ngguy boch ban’en u rarogog nib kireb. Rug dabuy e re n’em. Gu wan gu nang nib t’uf ni nggu thilyeg boch ban’en u rogon ni gu ma lem. Ere, tomuren nug meybil ngak Jehovah, ma aram mug chuw’iy bochi tow’ath ni nggu pi’ ko re walag nem, mug yoloy boch yang i babyor nggu tay ngay ni gu be wenig ngak ko n’en nib kireb ni kug rin’, ma aram mug wan gu pi’ ngak. Gu gumuchmuchgow ma gamow yog ndab kug lemnagew e n’en ni ke buch u thilmow. Ka aram nap’an i yib ndaki sum e magawon u thilmow.”

Gubin e girdi’ nib t’uf ni nge par ni bay e gapas u thilrad. Machane, faanra der pagan’rad nga boch ban’en ara tolangan’rad, ma aram e rayog ni ngar tababgad ni ngaur ngongolgad u reb e kanawo’ nra kirebnag e gapas ni bay u thilrad yugu boch e girdi’. Aram rogon e n’en ni ma rin’ boor e girdi’ ndarur pigpiggad ngak Jehovah. Machane, tin riyul’ e tapigpig rok e susun e ngaur guyed rogon ni ngaur pared ni bay e gapas nge taareban’ u thilrad. I thagthagnag Got nga laniyan’ Paul ni nge yoloy ni gaar: “Ri gu be wenig ngomed ni ngi i par ngongolmed ko fare fol ni ke m’ay i tay rok Got ko fa ngiyal’ ni piningmed riy. Mu pired nib sobut’an’med, ma gimed ba sumunguy, ma ba gum’an’med ni gubin ngiyal’. Nge bigimed mi i ayuweg bigimed ko meewar rok u fithik’ e runguy. Mu athamgiliyed nguum pired ni gimed taab girdi’ ni fare Kan ni Thothup [“gelngin Got nib thothup,” NW] e ke pi’ ngomed u daken fare gapas ni ir e ke m’agmed nga taabang.” (Efe. 4:1-3) Re gapas ney ni ke ‘m’agdad nga taabang’ e ban’en nrib pag feni manigil. Ere, ngad athamgilgad ni ngad mon’ognaged e re gapas ney ni bay u thildad, ma gad guy rogon ni ngaud pithiged e pi magawon ni ma sum u thildad pi walagdad.