GURUY NI 08

Rayog ni Ngam Mang Fager rok Jehovah

Bin ni Kan Printnag

Baadag Jehovah ni ngam nang rarogon nib fel’ rogon. Mang fan? Ya be athapeg ni faanra yoor ban’en nim nang u rarogon, nge rogon ni ma rin’ ban’en, nge n’en nib m’agan’ ngay, ma aram e ga ra adag ni ngam mang fager rok. Gur, rayog ni ngarim mang fager rok Got, fa? (Mu beeg e Psalm 25:14.) Ma uw rogon ni ngam mang fager rok? Be pi’ e Bible e fulweg ko gal deer ney, maku be tamilangnag fan ni Jehovah e aram e bin th’abi fel’ e fager nra yag ngom.

1. Mang e baadag Jehovah ni ngam rin’?

“Mu chugurgad ngak Got, me chugur ngomed.” (James 4:8) Mang e be yip’ fan e re n’ey? Baadag Jehovah ni ngam mang fager rok. Sana bay boch e girdi’ nib mo’maw’ ni nge mich u wan’rad nrayog ni ngar manged fager rok Got ni bochan e dabiyog ni ngar guyed. Yugu aram rogon, ma be tamilangnag Jehovah ngodad u daken e Thin rok u Bible urngin ban’en nib t’uf ni ngad nanged u rarogon ya nge yag ni ngad chugurgad ngak. Nap’an ni gad ra beeg e thin rok u Bible, ma aram e ra chugur e tha’ u thildad ni yugu aram rogon ndariy ba ngiyal’ ni kad guyed.

2. Mang fan ni Jehovah e aram e bin th’abi fel’ e Fager nra yag ngom?

Dariy be’ nri gab t’uf rok ni bod gelngin nri gab t’uf rok Jehovah. Baadag ni ngam felfelan’ mag meybil ngak u nap’an ni ke t’uf e ayuw rom. Rayog ni ngam ‘pag fan urngin e magafan’ rom ngak, ya be lemnag rogom.’ (1 Peter 5:7) Gubin ngiyal’ ni ma ayuweg Jehovah e pi fager rok, me fal’eg lanin’rad, me motoyil ngorad.—Mu beeg e Psalm 94:18, 19.

3. Mang e baadag Jehovah ni nge rin’ e pi fager rok?

Ba t’uf urngin e girdi’ rok Jehovah, “machane ma fek e girdi’ nib mat’aw ngar manged tafager rok.” (Proverbs 3:32, BT) Baadag Jehovah ni nge guy e pi fager rok rogon ni ngar rin’ed e tin nib fel’ u wan’ mar siyeged e tin nib kireb. Bay boch e girdi’ ni yad ma lemnag ndabiyog ni ngar rin’ed urngin ban’en ni baadag Jehovah ni ngar rin’ed mar siyeged urngin ban’en nib kireb. Machane Jehovah e manang rarogodad. Ba fel’ u wan’ urngin e piin yad ma t’ufeg ma yad ma athamgil u rogon nrayog rorad ni ngar rin’ed e n’en nib m’agan’ ngay.—Psalm 147:11; Acts 10:34, 35.

KUM FIL BOCH BAN’EN U MURUNG’AGEN

Kum fil boch ban’en u murung’agen rogon nrayog ni ngam mang fager rok Jehovah, nge fan ni ir e bin th’abi fel’ e Fager nra yag ngom.

4. Abraham e fager rok Jehovah

N’en be yog e Bible u murung’agen Abraham (ni ku yima yog Abram ngak) e be ayuwegdad ni ngad nanged e n’en be yip’ fan ni ngad manged fager rok Got. Mu beegew murung’agen Abraham ko Genesis 12:1-4. Tomuren mi gimew weliy e fulweg ko pi deer ni baaray:

Mang e yog Jehovah ngak Abraham ni nge rin’?
Mang e micheg Jehovah ngak?
Uw rogon ni fol Abraham ko n’en ni yog Jehovah ngak?

5. N’en baadag Jehovah ni nge rin’ e pi fager rok

Ba ga’ ni bay boch ban’en ni gad baadag ni nge rin’ e pi fager rodad.

Mang boch ban’en ni ga baadag ni nge rin’ e pi fager rom ni fan ngom?

Mu beegew e 1 John 5:3, mi gimew weliy e fulweg ko re deer ni baaray:

Mang e baadag Jehovah ni nge rin’ e pi fager rok?

Rayog nib t’uf ni ngad thilyeged e ngongol rodad ara boch ban’en u rarogodad ya nge yag nda folgad rok Jehovah. Mu beegew e Isaiah 48:17, 18, mi gimew weliy e fulweg ko re deer ni baaray:

Mang fan ni ma yog Jehovah ko pi fager rok ni ngar thilyeged boch ban’en u rarogorad?

Reb i girdien e dimow naun ni be pi’ ba urwach ngak be’ ni yow ma maruwel ni nge ayuweg lolugen. — Reb e fager nib manigil e ra puguran ngodad boch ban’en nrayog ni nge ayuwegdad me yib angin ngodad. Ku aram e n’en ma rin’ Jehovah ni fan ko pi fager rok

6. N’en ma rin’ Jehovah ni fan ko pi fager rok

Ma ayuweg Jehovah e pi fager rok ni ngar athamgilgad u fithik’ e pi magawon rorad. Mu yaliyew e re VIDEO ney, mi gimew weliy e fulweg ko re deer ni baaray.

VIDEO: Jehovah Has Done So Much for Me (3:20)

Uw rogon ni ke ayuweg Jehovah fare pin ni kan dag yaan ko fare video ni nge siyeg boch e lem nde puluw ni ma tay?

Mu beegew e Isaiah 41:10, 13, mi gimew weliy e fulweg ko pi deer ni baaray:

Mang e ke micheg Jehovah nra rin’ ni fan ngak urngin e pi fager rok?
Ga be lemnag ni Jehovah e ir reb e Fager nib manigil, fa? Mang fan?

Bogi sasing ni bay u taabang: Pi fager nib chugur thilrad ni yad be ayuweged yad. 1. Be’ nib pumoon ni be ayuweg yugu reb e pumoon ni ngar chibiyew ba tebel nib ga’. 2. Be’ nib pin ni be weliy laniyan’ ngak yugu reb e ppin. 3. Be’ nib pumoon ni be ayuweg yugu reb e pumoon ni be fek e sog. — Pi fager rom nib chugur thilmed e yad ma ayuwegem u nap’an ni ke t’uf e ayuw rom. Ku arrogon Jehovah nra ayuwegem

7. Ra ngad manged fager rok Jehovah, mab t’uf ni ngad nonad ngak ma gad motoyil ngak

Ra chugur thilin e pi fager ni faanra ur nonad ngorad. Mu beegew e Psalm 86:6, 11, mi gimew weliy e fulweg ko gal deer ni baaray:

Uw rogon nrayog ni ngad nonad ngak Jehovah?
Uw rogon ni ma non Jehovah ngodad?

Bogi sasing ni bay u taabang: 1. Be’ nib pin ni be meybil. Bay yaan ba arrow u daken lolugen nib sap nga lang. 2. Be’ nib pin ni be beeg e Bible. Bay yaan ba arrow u daken lolugen nib sap nga but’. — Gad ma non ngak Jehovah u daken e meybil, ma ma non ngodad u daken e Bible

MA GAAR BOCH E GIRDI’: “Dabiyog ni ngad chugurgad ngak Got.”

Mang thin nu Bible e ga ra fanay ni ngam tamilangnag nrayog ni ngad manged fager rok Jehovah?

N’EN KAN FIL

Baadag Jehovah ni nge mang Fager rom, ma ra ayuwegem ni ngam chugur ngak.

Ngan Sul u Daken

Uw rogon ni ma ayuweg Jehovah e pi fager rok?
Mang fan ni ma yog Jehovah ko pi fager rok ni ngar thilyeged boch ban’en u rarogorad?
Ga be lemnag ni kaygi mo’maw’ ni ngad manged fager rok Jehovah, fa? Mang fan ni ka mog ni arrogon?

Kan mu’nag e re guruy ney ko:

N’en Ngam Nameg

Mu weliy ngak reb e fager rom ban’en ni kam fil u murung’agen Jehovah.

Yugu boch ban’en:

Yugu boch ban’en

MU GAY MURUNG’AGEN

Faan ga ra mang fager rok Got, ma uw rogon nra yib angin ko yafos rom?

“Jehovah—A God Worth Knowing” (The Watchtower, February 15, 2003)

Mu fil rogon ni ngam mang fager rok Got.

“How Can I Become God’s Friend?” (Questions Young People Ask—Answers That Work, Volume 2, chapter 35)

Mu beeg fan ni be lemnag be’ nib pin ni tha’ u thilrow Jehovah e ayuweg e yafos rok.

“Dabug ni Nggum’!” (Fare Wulyang ko Damit No. 1 2017)

Mmotoyil ngak boch e fel’ yangaren ni yad be weliy rogon Jehovah u wan’rad.

What Does It Mean to Be God’s Friend? (1:46)