Guruy ni 12

Ngan Ayuweg e Maruwel ko Gil’ilungun Got u Lan e Binaw Ngu Gan’gin Yang e Fayleng

BE LEBUG e thin ni i yiiynag Jesus u murung’agen e tin tomren e rran ya ke wereg e Pi Mich Rok Jehovah fare thin nib fel’ “nge yan ni mada’ ko yungi n’en ni yan i mus e fayleng ngay.” (Acts 1:8; Matt. 24:14) Kar pied e tayim rorad nge gelngirad ni ngar wereged e tirok Got ban’en. Ke pagan’rad ku Jehovah ni nge pi’ e tin nib t’uf ko piin ni yad be maruwel u taabang, ma de magafan’rad nga ban’en ya kar mon’eged Gil’ilungun Got ko yafos rorad. (Matt. 6:25-34; 1 Kor. 3:5-9) Angin ni yib ngorad e be micheg ni ke felan’ Jehovah ngorad ma be flaabnagrad.

NGAN AYUWEG E TIROK GIL’ILUNGUN GOT U GA’NGIN YANG E FAYLENG

Boch e girdi’ e ra lemnag ko uw rogon ni be wereg e Pi Mich Rok Jehovah fare thin nib fel’ ko ngiyal’ ney ni yad be wereg e babyor ni boor ko girdi’ ndariy puluwon ma yad ra fith ni gaar: “Uw rogon nrayog urngin e pi n’ey?” Rriyul’ ma ba t’uf e salpiy ni ngan fl’eg e pi masin ni ngan fl’eg e pi Bible nge boch e babyor. Maku ba tolang puluwon ni ngan toy e pi naun ko Bethel ni fan ko pi tapigpig ni ma maruweliy e pi masin ni printing press nge piin ni ma yog e thin ko maruwel ko machib nge piin ni ma rin’ yugu boch ban’en nib full-time ni fan ko fare thin nib fel’. Maku yibe skulnag e pi missionary ma yibe l’ograd nga boor yu yang u fayleng. Ma yibe dugliy boch e girdi’ ko special pioneer ma yad ma ayuweg e pi ulung nib achig fa yad ma machib u yu gin nib palog. Yibe pi’ e ayuw ngak e pi piilal ni ma lekag e ulung ni ngar rin’ed e maruwel rorad. Ere ba tamilang ni boor e salpiy nib t’uf ni ngan ayuweg e maruwel ko machib ko ngiyal’ ney u lan e binaw ngu ga’ngin yang e fayleng. Ba uw e ma yib riy?

Yibe wereg e pi babyor rodad ni dariy puluwon machane boor e girdi’ ni yad ma tay fan e maruwel ko Pi Mich Rok Jehovah ma be felan’rad ni ngar pied e ayuw ko maruwel ko machib u polo’ u fayleng. Ma Pi Mich Rok Jehovah e yad ma pi’ e ayuw ko pi branch ofis ko Pi Mich Rok Jehovah. Yad manang nib t’uf e ayuw rorad me ere yad ma pagrad ni bod e pi tapigpig rok Got nkakrom ni kar ayuweged e dimow naun ko liyor rok Jehovah. (Ex. 35:20-29; 1 Kron. 29:9) Boch e ayuw e ma yib u daken e will ko estate ma baga’ ni ma yib e ayuw u daken e salpiy ni ma pi’ e girdi’ ni ta taareb nge pi ulung nge pi circuit. Ngan tay u taabang ma re ayuw ney e ba gaman ni ngan ul’ul ko maruwel ko machib.

Pi Mich Rok Jehovah e ma un i wereg fare thin nib fel’ maku yad ma lemnag ni yad ba tow’ath ya rayog ni ngar pied e salpiy rorad nge yugu boch ban’en ni ngan mon’ognag fare maruwel ko machib. Jesus nge pi gachalpen e immoy rorad e kahol ko salpiy ni ngan ayuwegrad ko tin nib t’uf rorad ma ngan ayuweg e piin nib gafgow. (John 12:6; 13:28, 29) Be weliy e Bible u murung’agen e pi ppin ni kar pied e ayuw ko machib ni tay Jesus nge pi gachalpen. (Mark 15:40, 41; Luke 8:3) I pining apostal Paul e magar ko ayuw ni pi’ e piin ni ba adag ni ngar mon’ognaged fare thin nib fel’ mar ayuweged e machib ni tay. (Fil. 4:14-16; 1 Thess. 2:9) Ma ul’ul e Pi Mich Rok Jehovah i fol ko pi girdi’ ney nkakrom ni kar pasiggad ko machib mar pied e ayuw ni boor. Ere rayog ko piin nib yul’yul’ u ga’ngin yang e fayleng ni ngar ‘feked fare ran ko yafos nib tow’ath.’​—Rev. 22:17.

NGAN AYUWEG E ULUNG KO BINAW KO TIN NIB T’UF RORAD

Yibe pi’ puluwon e tin nib t’uf ko ulung ko binaw u daken e salpiy ni ayuw. Gathi yima ning ara kunuy e salpiy ma der ma yog ko girdi’ ni thingara pied e salpiy ya yibe tay e kahol u tagil’ e muulung ma ra be’ ma rayog ni nge “pi’ ban’en nrogon ni ir e ke dugliy u laniyan’.”​—2 Kor. 9:7.

Yibe fanay e ayuw ni kan pi’ ni fan ko tin nib t’uf ko Kingdom Hall. Pi piilal ko ulung e ra turguy ni ngan pi’ boch ko tochuch ko Pi Mich Rok Jehovah ni ngan ayuweg e maruwel ko machib u ga’ngin yang e fayleng. Faanra er rogon ma ulung e ra pi’ e thin ni ngan rin’ e re n’ey u daken e resolution. Aram rogon ma boor e ulung e ma pi’ e ayuw ko maruwel u ga’ngin yang e fayleng u gubin ngiyal’. Yu ngiyal’ ma bay boch ban’en nib t’uf e ayuw riy machane de t’uf ni nga nog ko ulung u gubin ngiyal’ u murung’agen e salpiy ni ayuw.

ROGON NI NGAN AYUWEG E SALPIY NI AYUW

Pi piilal e ra dugliy l’agruw e piilal ara ministerial servant ni ngar theeged e salpiy ni kan tay ko kahol u tomren ra reb e muulung ma yad ra yoloy nga but’. (2 Kor. 8:20) Pi piilal e ra yarmiy ko uw rogon ni nga ayuweg e re salpiy ney nge mada’ ko ngiyal’ ni ngan pi’ ko tochuch fa ngan fanay ko tin nib t’uf ko ulung. Sana ba t’uf e bank account ko ulung. Fare walag ni be ayuweg e salpiy ko ulung e ra fl’eg e babyor ni ngan weliy ko ulung ma ra yan dalip e pul ma ra yarmiy fare presiding overseer e audit ko account. Yibe weliy e re n’ey u lan fare babyor ni Machib Rodad Ni Fan Ko Gil’ilungun Got.

NGAN PI’ E AYUW KO CIRCUIT ASSEMBLY NGE SPECIAL ASSEMBLY DAY

Yibe tay e pi assembly u daken e ayuw ni pi’ e Pi Mich u lan fare circuit. Yibe tay e kahol ko salpiy ni ayuw ko gin ni bay e assembly ni bod rogon ni yibe rin’ ko pi muulung ko ulung. Aram rogon ma rayog ni ngan pi’ e ayuw ko fare circuit. Fare circuit overseer e ra dugliy reb e walag ni nge ayuweg e salpiy ko fare circuit ma ra pi’ puluwon e pi malfith ni yog fare circuit overseer

Susun, ra reb e assembly e ra thang e malfith rorad ma tin ni ka bay e salpiy e ra yan ko circuit account. Faanra de gaman e salpiy u tomren reb e assembly ma salpiy ko circuit e ra pi’ puluwon ma de t’uf ni nga nog ko pi ulung. Machane faanra de gaman e salpiy ko circuit account ni ngan pi’ puluwon e bin tomur e assembly ara bin migid e assembly ko deposit ni ngan fanay reb e naun ma fare circuit overseer e ra yog ko pi ulung ni ngan tamilangnag ngorad ni yad ba tow’ath ya rayog ni ngar pied e ayuw. Ra reb e ulung ko piilal e ra puruy’nag ko in puluwon nrayog ni nge pi’ e ulung rorad ko circuit fund. Ma aram ma yad ra yog e re n’ey ko ulung u daken e resolution.

Nap’an ni ngan puruy’ u murung’agen reb e assembly ma pi piilal ko circuit e ra turguy ko mang e ngan rin’ ko salpiy ko circuit. Ba t’uf ni ngan turguy boch ban’en u murung’agen puluwon ni ngan tay e assembly nge ngan chuw’iy e equipment nge puluwon ko milekag ni tay e piilal ni ma lekag e ulung. Ma rayog ni ngan puruy’nag ko in e salpiy ni ngan pi’ ko maruwel ko machib u ga’ngin yang e fayleng nge fare Kingdom Hall Fund nge reb e naun ni Assembly Hall u lan e binaw ara yugu boch ban’en nib t’uf e ayuw riy.

Susun ni ngan yoloy nga but’ e tin ni turguy e pi piilal ni aram e resolution ma dabi uneg ngay e tin ni yibe pi’ puluwon u gubin ngiyal’ ni operating expense. Pi resolution ney e ra yog ko ri in puluwon boch ban’en ma nga nog ko ulung ni ngar rogned ni ke felan’rad ngay ma ngan rin’ e re n’ey gubin ngiyal’ ni ngan fanay e salpiy ko circuit. De puluw ni nga nog standing resolution fa dab nog ko ri in puluwon ni ngan pi’. Rayog ni ngan pi’ e salpiy ko circuit ngak fare tochuch ngar ayuweged nge mada’ ko ngiyal’ ni ba t’uf ni nge fanay fare circuit.

Fare circuit overseer e ra yarmiy ni ngan auditnag e pi babyor ko salpiy ko circuit u tomren ra reb e circuit assembly nge special assembly day.

NGAN AYUWEG E PIIN NIB GAFGOW

Reb i fan ni fl’eg Jesus nge pi gachalpen e kahol ko salpiy ni ayuw e ngan ayuweg e piin nib gafgow. (Mark 14:3-5; John 13:29) Kub mil fan e re n’em ngak e pi Kristiano ko ngiyal’ ney ya i gaar Jesus: “Piin ni gafgow e gubin ngiyal’ ni yad ba’ romed.” (Mark 14:7) Uw rogon ni ma rin’ e Pi Mich Rok Jehovah e tin nib mil’ fan ngorad ko ngiyal’ ney?

Yu ngiyal’ ma ba t’uf e piin nib yul’yul’ ko ulung e ayuw ya kan pillibthir, fa kan m’ar, fa kan gafgow u ban’en. Boch e girdi’ u lan e ulung ni manang nib t’uf rok be’ e ayuw ma aram e ra k’aringrad ni ngar folgad ko pi thin ni yog John ni apostal ni gaar: “Faanra boor ban’en rok be’ ma be guy be’ ni walagen ni girdien Kristus ni ke gafgow nthingari yog ban’en ngak, me fek owchen rok, ma ra diin me gaar e ba t’uf Got rok? Pi fakag! Rogon nib t’uf Got nge girdi’ rodad e dabi par ni ke mus ni thin nge welthin; ya thingari yan ni aw ni bin riyul’ rogon nib t’uf Got nge girdi’ rodad ni ma m’ug ko ngongol.” (1 John 3:17, 18; 2 Thess. 3:6-12) Bin riyul’ e liyor e ba muun ngay e ngan ayuweg e piin nib yul’yul’ ni ba t’uf e ayuw rorad.​—Jas. 1:27; 2:14-17.

Bin som’on e babyor ni yoloy apostal Paul ku Timothy me weliy ko uw rogon ni ngan ayuweg e piin ni bay rogon. Ngam bieg e re n’ey ko 1 Tim. 5:3-21. Mmil fan ngak ra reb e Kristiano ni nge ayuweg e tabinaw rok ko tin nib t’uf rorad. Piin pillibthir ara m’ar ma susun ni bay e bitir ara girdi’ rorad ni ra ayuwegrad. Yu ngiyal’ ma am e ma pi’ e ayuw ma girdi’ rok be’ nib t’uf e ayuw e ra ayuweg ni nge gayiy rogon ni ngan pi’ e ayuw ngak. Faanra bay e pi walag ni pumoon fa ppin ni boor e duw ni kar pared nib yul’yul’ ma ba t’uf e ayuw rorad ma aram e rayog ni nge puruy’ e ulung ko uw rogon ni ngan ayuwegrad. Faanra bay be’ ni dariy e girdi’ rok ni ngar pied e ayuw ngak ma am e dabi pi’ e ayuw, ma pi piilal e ra lemnag ko uw rogon ni ngan ayuweg. Pi Kristiano nib yul’yul’ e ma lemnag ni yad ba tow’ath ya rayog ni ngar ayuweged e piin nib t’uf e ayuw rorad.

Ba mo’maw’ e par ko ngiyal’ ney ere boor e pi walag e ba gafgow ni bochan e togopuluw nge mahl, nge durru’ nge ran ni tharey e binaw, nge uyungol, nge yugu boch ban’en. (Matt. 24:7-9) Ngiyal’ nem ma sana dariy ban’en ni nge pi’ e ulung ko girdi’ ere fare Governing Body e ra yarmiy e ayuw nra pi’ e pi walag u yugu bang ngar pied e tin nib t’uf. Aram rogon ni rin’ e pi Kristiano nu Asia Minor u nap’an ni kar ayuweged e pi walag nu Judea ya ke yib e uyungol ngorad. (1 Kor. 16:1-4; 2 Kor. 9:1-5) Gad ra fol rorad ma aram e gad be micheg nib t’uf rodad e pi walagdad ma gad be dag nib riyul’ ni gad pi gachalpen Jesus Kristus.​—John 13:35.

YARAM KO BABYOR NI NGAN WEREG

Ba ga’ fan e pi Bible nge babyor ni yibe wereg ni ngan tamilangnag e thin ko Gil’ilungun Got. Ba ga’ ni pi piilal e ra dugliy reb e ministerial servant ni nge ayuweg e pi babyor ko ulung ni pi booklet nge brochure nge boch ban’en, ma yugu reb e ministerial servant e ra ayuweg e pi magazine. Urngin e pi babyor ney e fan ko pi publisher ni rayog ni ngar pied ko girdi’ ni ba adag e machib.

Pi walag ni kan dugliyrad ni ngar ayuweged e pi babyor ney ma ba ga’ fan u wan’rad ni ngar rin’ed e tin nib mil fan ngorad. Yad ma yoloy nga but’ e pi babyor ni kan fek. Yad ma tiyan’ ko mang babyor ni ba’ ma uw fene yoor ni yibe wereg me ere yad ma guy rogon nib gaman e pi babyor ni fan ko ulung. Be yib angin ni ngan wereg fare thin nib fel’ u daken e pi babyor ma yibe pining e pi publisher ni ngar fanayed ko machib. Fare babyor ni Machib Rodad Ni Fan Ko Gil’ilungun Got e ma yog ko mang babyor ni ngan wereg reb e pul ma aram e rayog ni ngan wereg e machib u lan e binaw uw rogon nib yaram.

Gad e pi Kristiano ni kad ognaged gadad ku Got ere gad manang ni tayim rodad nge laniyan’dad nge gelngidad nge salap rodad nge tin ni bay rodad nge yafos rodad ma pi n’ey e tow’ath ni pi’ Got ngodad ma susun ni ngad fanayed ko pigpig ngak. (Luke 17:10; 1 Kor. 4:7) Ngad fanayed e pi n’en rodad nrogon ma gad be dag ko uw fene t’uf Jehovah rodad. Gad ba adag ni ngad ted fan Jehovah u daken e tirodad ban’en ma gad manang ni ke felan’ ko tow’ath ni gad ma pi’ ni yugu demtrug ko miti mang ya be dag ni gad ba yul’yul’ ngak u polo’ i lanin’dad. (Prov. 3:9; Mark 14:3-9; Luke 21:1-4; Kol. 3:23, 24) Ngad pareb nib puluw e lem rodad u murung’agen e chugum nge tirodad ban’en ma ngad golgad ko girdi’ ma gad ra nang e n’en ni yog Jesus ni gaar: “Ke yog ngomed nda mpied puluwon, ere mpied ndab ni pi’ puluwon ngomed.” Ma aram ma kab gel e falfalan’ rodad.​—Matt. 10:8; Acts 20:35.