Ngan Ayuweg e Piin Be Fil e Bible Ngar Manged Tamachib ko Fare Thin nib Fel’ ko Gil’ilungun Got

¹ Dabisiy ni n’en ni tay Jesus chilen ko pi gachalpen ko Matthew 28:19, 20 e ra yan i taw nib palog nga orel. Kan tay chilen ko pi gachalpen Kristus ni ngar ayuweged e girdi’ ngar manged pi gachalpen, mar rin’ed ni aram rogon. Ran tay e kanawo’ ni ngan wereg fare thin nib fel’ ko Gil’ilungun Got u ga’ngin yang e fayleng ko tin tomren e rran ni aram e ngiyal’ ni gad bay riy.​—Matt. 24:14.

² Pi Bible study rodad e sana yad e pi bitir rodad ara girdi’ ni gad be fil e Bible ngorad. Gad ba adag ni ngad ayuweged e pi girdi’ nem ngar uned ko maruwel ni ngan ayuweg e yug girdi’ ngar manged pi gachalpen Jesus Kristus.​—Luke 6:40.

³ Ngam Ayuwegrad Ngar Fl’eged Rogorad ni Ngar Machibnaged e Girdi’: Nga mog ko piin ni kam fil e Bible ni ngar weliyed ko girdi’ e tin ni yad be fil. Ngam weliy ngorad ban’en ni ke pi’ athamgil lanin’um u nap’an e machib. Nap’an ni ka yad bbitir ma ngam skulnaged e bitir romed ngar uned ko machib u rogon nrayog rorad. (Ps. 148:12, 13) Ngam dag ko thin rom nge ngongol rom ni ga ma tay fa e machib.​—1 Tim. 1:12.

⁴ Ma fanay Jehovah e piin ni ma fol ko pi motochiyel rok. Tin beech e publisher ni de yoor ban’en ni yad manang ni bod e piin ni ke n’uw nap’an faram ni kar uned ko taufe, machane thingari mich u wan’rad, me yog rorad ni ngar weliyed e thin ko Bible. (Mu guy fare babyor ni Organized, pp. 79-82.) Kar paloggad ko “Babylon nib Gilbuguwan” nge ngongol ko am, ma susun ni yad be un ko pi muulung u gubin ngiyal’.​—Rev. 18:2, 4; John 17:16; Heb. 10:24, 25.

⁵ Nap’an ni kam nang nrayog rok faen ga be fil e Bible ni nge mang reb e publisher ndawori un ko taufe, ma susun ni nga nog ko fare presiding overseer. Ra yarmiy ni l’agruw e piilal e ra fith boch e deer ngomew faen ni ga be fil e Bible ngar turguyed ni faanra rayog ni nge un facha’ ni nge mang publisher ndawori un ko taufe ko Gil’ilungun Got u taabang fare ulung. Ma aram ma ga ra tow’ath ni ngam marow facha’ ko machib ngam dag rogon ngak.