Gimed Be Fal’eg e Tabinaw Rom Rogomed ni Ngam Mageygad nib Fos, Fa?

¹ Pi yiiy ko Bible ni ke lebug e be micheg ni kari chugur e tomur ko re m’ag ni kireb ney. Gad bay ko ngiyal’ nib mo’maw’ e par riy ntaareb rogon ko fa ngiyal’ n’em u m’on ko fare Ran ni Tharey e Fayleng. (Matt. 24:37-39) I magey Noah nib fos e ngiyal’ nem ni bochan e i “par ni ba’ Got rok.” (Gen. 6:9) Dabisiy ni ki fil Noah murung’agen Jehovah ko tabinaw rok ya kur mageygad ni yad ba fos. Mang kanawo’ e rayog ni ngad folwokgad rok Noah riy ngad fl’eged rogodad nge tabinaw rodad ngad mageygad nib fos u tomren ni yira thang ere m’ag nib kireb ney?

² Tamachib ko Tin nib Mat’aw: I athamgil Noah u lan 40 i yan ko 50 e duw ni ir reb e ‘tamachib ko tin nib mat’aw.’ (2 Pet. 2:5) Yugu demtrug ko ke suwey e pi engel nib kireb laniyan’ e pi buguli yoror rok fa danga’, machane kar moningnaged ko machib ni i tay. Be m’ug e mich riy ni kar da chugurgad nga tungun ere m’ag ney ni bochan e ba ga’ ni gad ma mada’nag e girdi’ ndariy fan e machib u wan’rad maku yad ma moningnagdad. (2 Pet. 3:3, 4) Machane n’en nib thil riy nga nap’an Noah e boor e girdi’ e ngiyal’ ney ni kar adaged e machib yad be ‘un’ ko liyor ngak Jehovah. (Isa. 2:2) Rogon me yog nda ‘ayuweged gadad nge piin ni be motoyil ngodad’ e faanra da athamgilgad. (1 Tim. 4:16) Rib ga’ fan ko piin gallabthir ni ngar filed ngak pi fakrad feni ga’ fan fare maruwel ni machib u daken e thin nge ngongol rorad!​—2 Tim. 4:2.

³ I Rin’ “Urngin e Tin ni Yog Got Ngak”: Noah nge tabinaw rok e ra mageygad nib fos ni bochan e ra folgad ko n’en ni yog Jehovah ngorad ni ngar rin’ed. (Gen. 6:22) Ku arrogodad e ngiyal’ ney nib ga’ fan ni ngad pared ni kad “fl’eged rogodad ni ngad folgad” ko fonow ko Bible nge fonow ni be pi’ fare tapigpig nib yul’yul’ mab gonop. (Jas. 3:17) Immoy bogi bitir u reb e tabinaw ni kar ilalgad ni kar weliyed rogon ni ke fol e chitamangirad ko fonow ni ke pi’ e ulung rok Jehovah ngak. Bod ni, ke yarmiy e fol Bible ni nguur ted e tabinaw rok u taabang u gubin e wik maku ma fekrad ko machib u gubin e wikend ni bod ni ka nog ngak. Ma gay rogon ni gubin e wik ma bay reb i fak ni ke un ngak ko machib. Bochan ni ke ‘rin’ urngin e tin ni ka nog ngak’ ma aram e ke ayuweg pifak ni yad nel’ u gubin ke yog nra ilalgad ni yad boch e tapigpig rok Jehovah nib yul’yul’.

⁴ Ra yib e tomur ko re m’ag ney nib tomgin. (Luke 12:40) Gad ra folwok ku Noah ngad maruweliyed e michan’ rodad ma aram e rayog ni ngad fal’eged rogodad nge tabinaw rodad!​—Heb. 11:7.