Ri Ma Lemnag Got e Bitir, Fa?

BOKUM miriay e milyon e bitir e yima darifannagrad maku yima gafgownagrad u gubin e duw. Yima maruwel ngorad ni bod e sib. Yima towasariyrad ni ngar manged salthaw ma ra pied yad ni chuway’. Dakuriy e pagan’ ko bitir ni bochan e gafgow ni ma tay e girdi’ rorad ngorad, maku yad ma rus ni bochan e kireb ni yima rin’ ngorad.

Gad manang ni be kireban’ e girdi’ ni yad ma lemnag e bitir ni faan yad ra guy ni yibe gafgownag e bitir. Ma kad nanged ni chogow nge lem nib kireb ko girdi’ e ke gafgownag e bitir, machane boch e girdi’ e ma lemnag ko mang fan ni bay e t’ufeg rok Got ma ke pag e pi kireb ney. Sana yad ma lemnag ni ke pag Got e pi bitir ney ma der lemnagrad. Riyul’ fa? Ere bochan ni yibe darifannag e bitir ma yibe gafgownagrad e be yip’ fan ni der ma lemnagrad Got? Mang e be yog e Bible?

Dabun Got e Girdi’ ni Ma Gafgownag e Bitir

De lemnag Jehovah ni nge darifannag e girdi’ ni dariy e runguy rorad e bitir. Re n’ey ni yibe gafgownag e bitir e wenegan e togopuluw ni tay e girdi’ ko fare milay’ nu Eden. Bochan ni kan pag mat’awun Got ma aram fan ni ke puf rogon e girdi’ ngar darifannaged yugu boch e girdi’.​—Genesis 3:11-13, 16; Eklesiastes 8:9.

Ri dabun Got e piin ni yad ma darifannag e bitir. Boor e nam kakrom ni daur pigpiggad ngak Jehovah e ur pied e bitir rorad ni maligach, machane yog Jehovah ni, ‘de ning chilen ngorad ni nguur rin’ed e binem e pa’, ma ku de pat ngan’.’ (Jeremiah 7:31) Ke ginang Got e girdi’ rok kakrom ni gaar: “Ya faan gimed ra gafgownagrad, nri yorgad nga lang ngog ni nggu ayuwegrad, me Gag Somol, e gu ra rung’ag lamrad ma gu ra damumuw, mug ra li’med.”​—Exodus 22:22-24.

Ma T’ufeg Jehovah e Bitir

Thin ni ke yog Jehovah ngak e piin gallabthir e be micheg ni be lemnag rarogon e bitir. Bitir ni kan chuguliy u tabinaw ni bay e pagan’ riy e ba ga’ nra ilal e lem rorad nib fel’ rogon. Arfan ni ke sunumiy Got e mabgol ni “be’ nib moon e ma pag e chitamangin nge chitiningin nge yan i chag ngak e ppin rok, ngar pirew ni kar taab girdi’gow.” (Genesis 2:24) Be yog e Bible ni par ko pumoon nge pin e kemus ni fan ngak e piin kar mabgolgad. Ya faanra aram rogon ma urngin e bitir ni yira gargelnag e rayog ni ngan ayuweg nib fel’ rogon.​—Hebrews 13:4.

Maku be tamilangnag e Bible ni rib ga’ fan ni ngan chuguliy e bitir. Be gaar e Bible: “Bitir e ba tow’ath ni ma pi’ Somol ngak e girdi’; ma rriyul’ ni ma fel’ rogoy u puluwrad. Pi bitir ni pumoon ni fak be’ ni kab pagel e bod bogi ggan e gat’ing ni bay u pa’ ba salthaw.” (Psalm 127:3, 4) Bitir e tow’ath ni yib rok Got ma baadag Got ni nge fel’ rogon e yafos rorad. Be fonownag Got e piin gallabthir ni ngar pow’iyed pi fakrad ni bod be’ ni be yangliy ggan e gat’ing nib fel’ rogon. Thin rok Got e be gaar: “Ma gimed e pi matam, dab um k’aringed e damumuw ngak pi fakmed, machane ngam chuguliyed yad nrogon ni ma fonownigey Jehovah nge rogon ni ma pow’iy e lem.”​—Efesus 6:4, NW.

Yugu reb e kanawo’ ni be m’ug e t’ufeg rok Got riy e aram e be fil ngak e gallabthir rogon ni ngar ayuweged pi fakrad rok e girdi’ nib kireb. Kan tay chilen ngak piyu Israel kakrom nib muun e piin bitir ngay ni ngar folgad ko fare Motochiyel ni reb riy e ngan palog ko ngongol ni darngal. (Deuteronomy 31:12; Levitikus 18:6-24) Baadag Got ni ngari athamgil e piin gallabthir ni ngar ayuweged pi fakrad rok urngin e girdi’ nib kireb.

Athap ko Piin Bitir

Kari m’ug e t’ufeg rok Jehovah ngak e piin bitir ko n’en ni rin’ Jesus. Nap’an ni yog e pi apostal rok Jesus ngak e pi gallabthir ni dab ra feked pi fakrad ngak Jesus me puwan’ ngorad me gaar: “Mpaged e pi bitir nir ngar bad ngog!” Ma tomur riy me “kunuy Jesus fapi bitir ngak me tay pa’ nga dakenrad, ni aram e ke yibilayrad.” (Mark 10:13-16) Ba ga’ fan e piin bitir u wan’ Jehovah nge Jesus.

Bin riyul’ riy, ra fanay Jehovah Jesus ni nge rin’ ban’en ni nge dab ki magawonnag e piin kireb e bitir. Yira chuweg e girdi’ nib kireb u daken e re fayleng ney ni manemus. Be yog e Bible murung’agen e pi tapigpig rok Jehovah ni gaar: “Ma bayi n’ag urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith. Ya tin kakrom ban’en e ke chuw.”​—Revelation 21:3, 4.

Ngiyal’ ney e be dag Got e t’ufeg ma be ayuweg e piin ni kan gafgownagrad. Ke micheg ngorad ni gaar: “Bay gu gayiy e tin ni ke yan nga bang, mu gu fulweg e tin ni kar olobochgad ka ranod nga bang, mu gu m’ag e mad ko yungi n’en ni ke maad’ad u downgin e tin ni ke maad’ad, mu gu golnag e tin ni ke m’ar, mu gu matanagiy e tin nib sugsug ma ba gel.” (Ezekiel 34:16) Ma fanay Jehovah e thin rok nge gelngin nib thothup nge ulung rok ni nge fal’eg laniyan’ e pi bitir ni kar magawongad. Ri gad ba felfelan’ ni kad nanged ni Got rodad e “ma ayuwegdad u urngin e gafgow nge kireban’ ni ma yib ngodad.”​—2 Korinth 1:3, 4.

[Picture Credit Line on page 26]

© Mikkel Ostergaard/Panos Pictures