Guruy Ni 16

Ba Ulung I Walag

SOGONA’PAN 2,000 e duw ma kari mus ni Abraham nge pi fak ni yad piyu Israel e ke ayuwegrad Jehovah Got ma aram me “dag Got nib t’uf rok e piin ni gathi yad piyu Israel ni fan e ke fek e girdi’ u fithik’rad ni ngar manged e girdi’ ni fan ko ngochol rok.” (Acts 15:14) Girdi’ ni fan ko ngochol rok Jehovah e yad e Pi Mich Rok ma ke taareb rogon e ngongol nge lem rorad ni yugu demtrug e gin ni yad bay riy u fayleng. Ra taab laniyan’ e girdi’ ni fan ko ngochol rok Got ya ke tay Jesus Kristus chilen ko pi gachalpen. I gaar: “Ere marod ngak girdien e pi nam u gubin yang ngam pingeged yad ngar manged pi gachalpeg, mi gimed taufenagrad nga fithingan e Chitamangiy nge Fak nge fare Kan ni Thothup, mi gimed fil ngorad rogon ni nguur folgad u gubin e tin ni ku gog ngomed ni nguum rin’ed. Ma dab mpaged talin ni gubin ngiyal’ ma gu ba’ romed nge yan i mada’ nga tomren e fayleng.”​—Matt. 28:19, 20.

Kam ognagem ku Jehovah ma kam mang reb e gachalpen Jesus Kristus ma kam mang bang ko fare ulung i walag ni Kristiano u ga’ngin e fayleng ma nde yu raba’ ni bochan e nam ara ganong rorad fa rogon fene fel’ rogorad ko salpiy. (Ps. 133:1) Ma bochan e re n’em ma ga ma t’ufeg ma ga ma tay fan e pi Kristiano u lan e ulung ni yugu aram rogon nib thil e nam fa ganong rorad. Sana bay boch e girdi’ ni fager rom u lan e ulung e chiney ma kafram e damur chag ngorad ya yad e girdi’ nu bang fa ba thil e yalen rorad ara skul rorad ara par rorad. Gad ma par ni taareb lanin’dad nra bagadad ma ba t’uf rok bagadad ni kab gel ko yugu boch e girdi’ nib thil e teliw rorad ara tabinaw ara rogon e par rorad.​—Mark 10:29, 30; Kol. 3:14; 1 Pet. 1:22.

NGAN YAL’UWEG LANIN’UY

Faanra ba mo’maw rom ni ngam yal’uweg e lem rom ya ga be laniyan’ ko girdi’ nu bang ara yugu boch ban’en ma ngam lemnag e pi Kristiano ni Jew nkakrom ni ke fel’ u wan’rad ndabra pared ni yab ba laniyan’ ko girdi’ nu yugu boch e nam. Nap’an ni ka nog ngak Peter ni nge yan nga tafen Kornelius ni ir e salthaw nu Roma ma ke ayuweg Jehovah Peter nge yog ni nge rin’. Amu bieg u murung’agen u Acts guruy ni 10.

I pig i changar Peter ma ka nog ngak ni nge li’ me kay ba mit e gamanman ni de klin rok piyu Jew nsusun dab ra mathgad ngay. I togopuluw Peter ko re n’em me yib ba lam nu tharmiy ni gaar ngak: “Dariy ban’en ni ngam lemnag nde beech ni faanra ke yog Got ni ke beech.” (Acts 10:15) Ba t’uf ni nge tamilangnag Got Peter me fl’eg laniyan’ ko maruwel ni nge rin’ ni aram e nge yan i guy be’ ni gathi ir reb e girdi’ nu Israel. Ma nap’an ni be fol Peter rok Jehovah me weliy ko girdi’ ni gaar: “Gimed manang faram ni be’ u Israel e de mat’aw ko ba’ rok e teliw ni nge yan i guy ara i chag ngak be’ ni gathi be’ u Israel. Machane Got e ke dag ngog nthingari dab ku ug lemnag be’ ni de beech ara ba alit ni rogon ni ba’ ko Motochiyel. Aram fan ni taw e thin rom ngog ni nggub, mu gub nda gu siyeg.” (Acts 10:28, 29)

Ma aram me guy Peter e mich riy ni ke felan’ Jehovah ku Kornelius nge tabinaw rok.​—1 Pet. 3:10-12.

Saul nu Tarsus e thingari sobut’an’nag ir me chag ko piin ni de klin u wan’ faram, ya ir reb e Farise nib tolang e skul rok. Ma thingari fol ko thin rorad. (Acts 4:13; Gal. 1:13-20; Fil. 3:4-11) Ma ngad lemnaged ko uw rogon ni thiliyeg boch e girdi’ e lem rorad ni Sergius Paulus, nge Dionysius, Damaris, Philemon, Onesimus, nge yugu boch e girdi’ ya kar uned ko thin nib fel’ mar manged pi gachalpen Jesus Kristus.​—Acts 13:6-12; 17:22, 33, 34; Filem. 8-20.

ROGON NI NGUUD PARED NI GAD TAAB GIRDI’ U GA’NGIN E FAYLENG

Dabisiy ni t’ufeg u fithik’ e pi walag ni pumoon nge ppin u lan e ulung e ke ayuwegem ni ngam chugur ngak Jehovah nge ulung rok. Gathi aram rogon ni kam guy ko yugu boch e ulung. Kam guy e t’ufeg nge taab lanin’uy ni aram e pow ko tin riyul’ gachalpen Jesus Kristus. (John 13:35) Machane kari gel rogon ni ga ma tay fan rogon ni ma ngongol Jehovah ko girdi’ e ngiyal’ ney ya kam guy ni t’ufeg u lan e ulung rom e kari mus ni bang e t’ufeg ni bay ko girdi’ rok Jehovah u ga’ngin e fayleng! Gur reb e mich ma gab bang ko thin ko profet u lan e Bible ni be lebug u murung’agen e girdi’ u nap’an e tin tomren e rran ni ra un ko liyor ku Jehovah u taabang ngu fithik’ e gapas. Mang ni dab mu beeg e re thin ko profet nem? Bay ko Mikah 4:1-5.

Boor ban’en ko ngiyal’ ney ni be ruw raba’nag e girdi’, ere dan lemnag ni rayog ni ngan kunuy e girdi’ nga taabang “nra bad u gubin e nam nge ganong, nge gubin mit e girdi’, ngu gubin e thin.” (Rev. 7:9) Ngan lemnag rogon fene thil thilin e girdi’ u lan e binaw nib fel’ rogon nge binaw ni ma fol ko yalen rorad nkakrom. Ngan lemnag e magawon u thilin e girdi’ ko pi yuraba’ i teliw ko taareb e nam ara binaw. Ngiyal’ ney ma ba gel laniyan’ e girdi’ ko reb e nam nga reb, ere ke yu raba’ e girdi’ ni bochan e am. Ma ngan lemnag rogon nib thil thilin e girdi’ ko salpiy u gubin yang nge yugu boch ban’en ni ma yuraba’nag e girdi’ ma kari mus ni Got Nth’abi Ga’ e rayog ni nge kunuy e girdi’ nga taabang u urngin e nam nge ganong, mar pared u fithik’ e t’ufeg nge gapas ndabi m’ay biid.​—Zek. 4:6.

Re taareban’uy nem e briyul’ ma kam mang bang riy u nap’an ni kam ognagem ku Jehovah ma kam taufe ma kam mang reb e Mich Rok Jehovah. Bochan ni ke mich u wan’um ma kam un ko fare paradis nib spiritual. Ke yib angin ngom me gur e ba mil fan ngom ni faanra ngii par ni aram rogon. Rogon ni ngam rin’ e ngam fol ko pi thin ko apostal u Galatia 6:10 ni gaar: “Ere urngin ngiyal’ nra puf rogodad ma ngad ngongliyed e ngongol nib fel’ ngak urngin e girdi’, machane nge ga’ fadad ngak e piin ni kad manged girdien e tabinaw rok Got u fithik’ e mich u wun’uy ngak Kristus.” Rogon ni ngan ayuweg fare paradis nib spiritual e “dabi suk’ ngan’dad ni ngad muruwilyed ban’en ni gadad e ngad m’onod riy ni fan e nga nogdad riy ni gadad e sorodad, ara bochan e nge yib ufan ngodad; machane nge bagadad me subut’nagan’, ma dabi finey bagadad ni ir e ba sorok ngak e tin ni ka bay e girdi’. Ra bagadad ma ngi i lemnag bagadad ngi i ayuweg u rogon nrayog rok, ma gathi go ir e ngi i lemnag ir.” (Fil. 2:3, 4) Ngad skulnaged gadad ni ngad guyed e pi walag ni Kristiano uw rogon ni ma guyrad Jehovah ma gathi rogon ni yibe guyrad u owchey​—dab ni tiyan’ nga thibngirad ya munmun ma ra m’ay—​ma aram e nguud pared nib fel’ thildad ma gad ra par nib falfalan’ mab gapas.​—Efe. 4:23, 24.

RA BAGADAD MA NGE LEMNAG BAGADAD

I tamilangnag apostal Paul ni girdi’ ko ulung e bod taab dowef ni boor yu yang riy ma ra bagadad ma ba t’uf rok bagadad. (1 Kor. 12:14-26) Ra buch ban’en nga bang e ulung ma bay fan ko urngin e girdi’ rok Got. Gad be par nib palog nga orel ko pi walagdad u ga’ngin e fayleng machane gathi dariy fan u wan’dad ko uw salperad. Faanra yibe gafgownag boch e pi walagdad ma tin ni ka bay e walag e be magafan’rad ngay. Faanra ba magawon boch e walag ko salpiy ara ke yib e riya’ ngorad ara cham ma tin ni ka bay e walag e be guy rogon ni ngar pied e ayuw ngorad ko salpiy nge tirok Got ban’en.​—2 Kor. 1:8-11.

Gad gubin ma susun ni ngad yibilayed e pi walagdad u gubin e rran. Bay boch e walag ni be athamgil ndab ra uned ko tin kireb ban’en. Bay boch e walag ni goo yimanang ni yad ba gafgow, machane gathi ba lingagil boch e walag ni yad be magawon ko girdi’ u tabon e maruwel rorad fa girdi’ u tabinaw rorad. (Matt. 10:35, 36; 1 Thess. 2:14) Aram ban’en ni bay fan ngodad ya gad bang i ulung u ga’ngin e fayleng. (1 Pet. 5:9) Maku boor e walag ni yad be maruwel nib elmirin ko pigpig ku Jehovah ni machib nge ulung. Ma boch i yad e kan dugliyrad ngar ayuweged e maruwel ko machib u ga’ngin yang e fayleng. Yad gubin ma ba t’uf ni ngan yibilayrad ma daken e meybil ni gad ma tay e gad be dag nib t’uf rodad e pi walagdad ni mus ni dakuriy ban’en nrayog ni ngad rin’ed ni fan ngorad.​—Efe. 1:16; 1 Thess. 1:2, 3; 5:25.

Ba t’uf ko pi Kristiano ni Pi Mich Rok Jehovah ni ngar fl’eged rogorad ni ngar ayuweged e pi walagrad ya ke yoor e magawon ko tin tomren e rran ni durru’ nge ran ni tharey e binaw. Yu ngiyal’ ma ba t’uf ni ngan yarmiy ni ngan pi’ e ayuw nib ga’. I tay e tin som’on e Kristiano e kanawo’ ko re n’ey. Pi gachalpen Jesus u yugu boch e binaw e dar paged talin e fonow ni pi’ Jesus me ere kar pied e ayuw ko pi walag u Judea nap’an ni yib e uyungol ngorad. (John 13:34, 35; Acts 11:27-30; 20:35) I yarmiy apostal Paul ni ngan pi’ e ayuw uw rogon nib yaram. (Acts 11:29; 2 Kor. 9:1-15) Ngiyal’ ney ma nap’an ni yib e gafgow ko pi walagdad ma fare ulung nge pi Kristiano e gadad ma pi’ e ayuw ngorad nib papey.

KAN DUGLIYDAD NI NGAD RIN’ED E TIN NIB M’AGAN’ JEHOVAH NGAY

Fare ulung i walag u ga’ngin e fayleng e kan yarmiy ni ngad rin’ed e tin nib m’agan’ Jehovah ngay. Ngiyal’ ney mab m’agan’ Got ngay ni ngan wereg fare thin nib fel’ u gubin yang u fayleng. (Matt. 24:14) Nap’an ni gad be rin’ e re maruwel ney ma ba m’agan’ Jehovah ngay ni ngad ngongolgad nib puluw ko pi motochiyel rok. (1 Pet. 1:14-16) Ra nge yog ni ngan rin’ e maruwel rok Jehovah ma susun ni nge bagadad ma nge fol rok bagadad ma ngad maruwelgad ni nge mon’og i yan fare thin nib fel’. (Efe. 5:21) Gathi ereray e ngiyal’ ni ngad m’oneged e tin ni gad ba adag, ya ereray e ngiyal’ ni ngad m’oneged Gil’ilungun Got. (Matt. 6:33) Nguud lemnaged e re n’ey ma nguud maruwelgad u taabang ni fan ko fare thin nib fel’ ma gad ra falfalan’ e chiney ma rayog e flaab ni dariy n’umngin nap’an ngodad.

Ri gad ba lingagil ya gad e Pi Mich Rok Jehovah ma gathi gad bang ko fayleng ma gad e girdi’ nib klin, ma gad ba pasig ko pigpig ku Got. (Titus 2:14) Gathi gad ba lingagil ya gad ba adag ni ngan guydad. Ya gad ba lingagil ni bochan e liyor rodad ku Jehovah. Gad ma maruwel u taabang e pi walagdad u ga’ngin e fayleng ma taareb e thin rodad ni thin nriyul’ ma gad ma ngongol nib puluw ko thin nriyul’. Aram e n’en ni yiiynag Jehovah u daken Zefaniah ni profet ni gaar: “Gu ra pi’ ko girdi’ e thin nib machalbog ya ngar pininged fithingan Jehovah ni ngar pigpiggad ngak u taabang.”​—Zef. 3:9.

Ma aram me thagthagnag Jehovah nga laniyan’ Zefaniah ni nge weliy u murung’agen ba ulung i walag nib klin u ga’ngin e fayleng me lebug ko ngiyal’ ney: “Tin ni ka bay e girdi’ nu Israel e dab ra rin’ed ban’en nde mat’aw ma dab ra lifithed l’ugunrad ma dab ra sasalapgad; ya yad ra abich ma yad ra par nga but’ nib kiy ma dariy be’ nra n’igin ngar da’da’gad.” (Zef. 3:13) Ke tamilang u wan’ e Pi Mich Rok Jehovah e Thin Rok Jehovah ni thin riyul’ ma kar piliyeged lanin’rad mar puluwnaged e yafos rorad ko pi motochiyel rok Jehovah ma aram ma rayog ni ngar maruwelgad u taabang. Yad ma rin’ e n’en ni ma lemnag e yugu girdi’ ndabiyog ni ngan rin’. Arrogon, fare ulung ko Kristiano u ga’ngin yang e fayleng e aram ba ulung i girdi’ nib lingagil ya yad girdien Got ma yad ma pining e sorok ngak u polo’ u fayleng.​—Mik. 2:12.

Fare ulung ko Pi Mich Rok Jehovah u ga’ngin e fayleng e ma tamilangnag e n’en ni tay Jesus chilen me yog ni aram e pow ko tin riyul’ i gachalpen. I gaar Jesus: “Nggu pi’ reb e motochiyel nib beech ngomed, nge bigimed me t’uf bigimed rok. Rogon ni um pired ni gimed ba t’uf rog, e aram rogon nthingar um pired nra bigimed ma ba t’uf rok bigimed. Faanra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.” (John 13:34, 35) Aram e mich riy ko piin ni be gayiy rogon ni ngar nanged Jehovah ya yad be guy ko uw rogon girdien Got. Ri gad ba falfalan’ ya gad bang ko ulung rok Jehovah nib yaram ma gad ba taw’ath ya rayog ni ngad uned ko machib ko ngiyal’ ney ni tin tomren e rran! Nguud don’ed nga dakendad e t’ufeg ni aram e pow rodad, ma rayog ni nge mudugilan’dad ni gad ra pigpig u fithik’ e falfalan’ u taabang ko pi walagdad u ga’ngin yang e fayleng.