Guruy ni 2

Mini’ Got?

Mini’ e bin riyul’ e Got me mini’ fithingan? (1, 2)

Miti mang dowef e bay rok? (3)

Mang boch e pi felngin nib lingagil? (4)

Susun ni ngad fanayed e liyos nge boch ban’en ko liyor rodad ngak fa? (5)

Mang l’agruw e kanawo’ ni rayog ni ngad filed morngaagen Got riy? (6)

1. Boor ban’en ni ma liyor e girdi’ ngay. Machane ma yog e Bible ngodad ni kari mus nri taareb e Got ni RIYUL’ ni bay. Ir e ke sunumiy urngin ban’en u tharmiy ngu fayleng. Ma bochan ni ke pi’ e yafas ngodad ma susun ni kari mus ni goo Ir e nga uda liyorgad ngak.​—1 Korinth 8:5, 6; Revelation 4:11.

2. Bay boor e liw rok Got machane ri taareb e ngochol rok. Re ngochol nem e JEHOVAH. Ma boor ken e Bible e kan chuweg fithingan Got riy ma kan tay e liw rok ni SOMOL ara GOT nga lon. Machane nap’an ni kan yoloy e Bible ma fare ngochol ni Jehovah e immoy riy ni gonapan 7,000 yay!—Exodus 3:15; Psalm 83:18.

3. Bay downgin Jehovah machane ba thil ko tirodad. Begaar e Bible: “Got e Kan.” (John 4:24) Kan e yugub mit e yafas ni kab tolang ko tirodad. Dariy be’ ni kaa guy Got biid. Jehovah ma par u tharmiy, machane rayog ni nge guy urngin ban’en. (Psalm 11:4, 5; John 1:18) Me ere mang fare kan ni thothup? Gathi be’ ni bod Got. Ya aram gelngin Got ni ma mithmith.​—Psalm 104:30.

4. Ma tamilangnag e Bible ngodad rarogon Jehovah. Ma dag pi felngin nib lingagil ni aram e t’ufeg, nge mat’aw nge gonop nge gelngin nib gel. (Deuteronomy 32:4; Job 12:13; Isaiah 40:26; 1 John 4:8) Ku ma yog e Bible ni ba sumunguy mab gol mab ta n’ag fan e kireb mab wurengan’ mab k’adan’. Ere susun ngad folwokgad rok ni bod e bitir ni yad ba llowan’.​—Efesus 5:1, 2.

5. Susun ngada siro’gad ara nga uda meybilgad ko liyos ara fon fa yaan ban’en ni ngad faned ko liyor rodad fa? Danga’! (Exodus 20:4, 5) Ke yog Jehovah ni kari mus ni goo ir e nga uda liyorgad ngak. Dabi pi’ boch e rir rok ngak be’ ara yugu boch ban’en. Liyos e dariy gelngin ni nge ayuwegdad.​—Psalm 115:4-8; Isaiah 42:8.

6. Uw rogon ma gad nang Got nib fel’ rogon? Reb e kanawo’ e ngad yaliyed e pi n’en ni ke sunumiy ma ngad fl’eged i lemnag ko mang e yad be yog ngodad. Pi n’en ke sunumiy e be dag ngodad fene gonop nge fene gel gelngin. Ku kad guyed e t’ufeg rok u fithik’ urngin e tin ke sunumiy. (Psalm 19:1-6; Roma 1:20) Ma reb e kanawo’ e rayog ni ngad filed morngaagen Got riy ni ngad filed e Bible. Ya aram e gin ra yog ngodad riy boor boch morngaagen me ir e ba miti mang Got. Ku ma yog ngodad e tin nib m’agan’ ngay nge mang e ba adag ni ngad rin’ed.​—Amos 3:7; 2 Timothy 3:16, 17.

[Sasing ko page 5]

Gad ma fil morngaagen Got ko pi n’en ni ke sunumiy nge tin nu Bible