Guruy ni 5

Mang e Mm’agan’ Got Ngay ni Fan ko Fayleng?

Mang fan ni ke sunumiy Jehovah e fayleng? (1, 2)

Mang fan ni gathi ka ba paradis e fayleng e chiney? (3)

Mang e ra buch ko girdi’ nib kireb boch nga m’on? (4)

Mang e ra rin’ Jesus nga m’on ni fan ko piin nib m’ar? nge piin ni ke pillibthir? nge piin ni kar m’ad? (5, 6)

Mang e thingar mu rin’ ma ga un ko pi flaab ney boch nga m’on? (7)

1. Ke sunumiy Jehovah re fayleng ney ni fan ni nge par e girdi’ riy ni manemus u fithik’ e falfalan’. I m’agan’ ngay ni nge par e girdi’ nib mat’aw riy ni gubin ngiyal’ ni yad ba falfalan’. (Psalm 115:16; Isaiah 45:18) Fayleng e dabi kireb biid; ya ra par ndariy n’umngin nap’an.—Psalm 104:5; Eklesiastes 1:4.

2. U m’on ni dawori sunumiy Got e girdi’ me mel’eg bang u fayleng nib paradis ni rib fel’ yaan. Ke yog e milay’ nu Eden ngay. Aram e gin ni ke ta’ Adam nge Efa ngay ni gal ni som’on e pumoon nge ppin. Rogon nib m’agan ngay e ngar diyennagew e bitir ngar yoorgad nge sug e fayleng ko girdi’. Ra munmun ma yad ra fl’eg e re fayleng ney ni ga’ngin me mang paradis.—Genesis 1:28; 2:8, 15.

3. Ke denen Adam nge Efa ya kar th’abew e motochiyel rok Got ni lem rorow. Ere ke chuwegrow Got u Eden. Ma aram e dakuriy e paradis. (Genesis 3:1-6, 23) Machane dawori pag Jehovah talin e n’en nib m’agan’ ngay ni fan ko re fayleng ney. I micheg nra par e girdi’ riy ni manemus ni ke paradisnag. Uw rogon nra rin’ e re n’ey?—Psalm 37:29.

4. U m’on ni nge paradis e re fayleng ney ma thingar ni thang e piin ba kireb. (Psalm 37:38) Aram e n’en nra buch u nap’an e Armageddon ni fare mahl rok Got ni nge thang e tin nib kireb ban’en. Nge migid ma ran kalbusnag Satan u lan 1,000 e duw. Ere ra ni par ni dakuriy e piin nib kireb ni yad ma kirebnag e fayleng. Kari mus ni goo girdi’ rok Got e ra magay nib fas.—Revelation 16:14, 16; 20:1-3.

5. Ma aram e ra gagiyegnag Jesus Kristus ni ir e Pilung e re fayleng ney u lan 1,000 e duw. (Revelation 20:6) Ma ra munmun ma be chuweg e denen u lanin’dad ngu dowdad. Ma gad ra mang girdi’ nib flont ni bod Adam nge Efa u m’on ni kar denengow. Ma aram e ke m’ay e m’ar, nge pillibthir, nge yam’. Ra gol e piin nib m’ar ma piin ni ke pillibthir e ra pagal biyay.—Job 33:25; Isaiah 33:24; Revelation 21:3, 4.

6. Nap’an fare Gagiyeg rok Kristus ko Biyu’ e Duw ma piin ba yul’yul’ e yad ra maruwel ngar paradisnaged ga’ngin e re fayleng ney. (Luke 23:43) Maku bokum milyon e piin ni kar m’ad ni yira fasegrad ko yam’ ngar pared u fayleng. (Acts 24:15) Ma faan yad ra fol rok Got ma yad ra par nib fas ndariy n’umngin nap’an u fayleng. Ma faanra danga’ ma aram e ran thang owcherad ni manemus.—John 5:28, 29; Revelation 20:11-15.

7. Ere ra lebug e tin nib m’agan’ Got ngay ni fan ko re fayleng ney aram ko tabolngin. Ga ba adag ni ngam un ko pi flaab ney ni bay nga m’on fa? Faanra arrogon mab t’uf ni nguum fil morngaagen Jehovah ma ga fol ko pi n’en ni ke yog. N’en nra ayuwegem e ngam un ko urngin e muulung ko Pi Mich Rok Jehovah u Kingdom Hall.—Isaiah 11:9; Hebrews 10:24, 25.

[Sasing ko page 10]

Ke m’ay e Paradis

[Sasing ko page 11]

Tomren e Armageddon ma ran paradisnag e fayleng