‘Ngan Tayfan Fithingan Got nib Thothup’
1. Mang kenggin e circuit assembly rodad ni fan ko duw ni 2012, ma uw e kan fek riy?
1 Ri gad ba tow’ath ni yi manangdad ni gadad e Pi Mich Rok Jehovah ni Ir e En Th’abi Tolang u Palpalth’ib! Got e ke pi’ e binem e ngachal ngodad, ere aram fan ni ka nap’an e duw ni 1931 min pining e Pi Mich Rok Jehovah ngodad. (Isaiah 43:10, NW) Jesus ni Fak Got ni kari maagirag rok e rib ga’ fan fithingan Got u wan’, ma ireray e n’en th’abi som’on ni yog Jesus ni ngan yibilay ko fare kenggin e meybil ni fil ngak pi gachalpen. (Matthew 6:9) Ere fare thin ni yog Jesus e ireram kenggin e circuit assembly rodad ko duw ni 2012, ni aram e “Ngan Tayfan Fithingan Got nib Thothup.”
2. Mang boch ban’en nrayog ni ngad rung’aged u nap’an e re assembly nem?
2 N’en ni Gad Ra Rung’ag: Fare welthin ni yira pi’ ko Sabado ni kenggin e, “Piin ni Yad ma Pigpig ngak Got u Polo’ e Tayim e Ngar Weliyed Fithingan Got Ngan Nang” e yira weliy riy fan nrib fel’ ni ngan pigpig ngak Got u polo’ e tayim. Ku yira pi’ reb e welthin ni kenggin e “Mu Kol Ayuw ni Dab mu Kirebnag Fithingan Jehovah.” Re welthin ney e ra ayuwegdad ni ngad siyeged aningeg mit e ban nrayog ni ngad awgad ngay. Fare welthin ni kenggin e, “Fan ni Thingar ni Thothupnag Fithingan Got,” e ra pi’ e fulweg ko gal deer ni baaray ni gaar, Mang e ra ayuwegdad ni ngaud machibgad ni gad ba pasig ni yugu aram rogon ni bay boch e girdi’ ndabun ni nge motoyil? nge Mang e ra ayuwegdad nge yog ni ngad machibgad nib fel’ rogon? Ma piin ni kafin ra uned ko re assembly nem e yad ra felfelan’ ni ngar rung’aged fare welthin ni fan ko yoor ni kenggin e, “Ra Thothupnag Got Fithingan u nap’an e Armageddon.”
3. Mang tow’ath e kan pi’ ngodad, ma uw rogon nra ayuwegdad fare assembly?
3 Ke chugur ni nge rin’ Jehovah ban’en nra thothupnag fithingan. (Ezek. 36:23) Ngiyal’ ney e kan pi’ e tow’ath ngodad ni ngad n’ufed e re ngachal rok nem nib thothup. Ba pagan’dad ni pi n’en ni yira weliy u nap’an e re circuit assembly nem ni fan ko duw ni 2012 e ra ayuwegdad nge yog ni ngad rin’ed e n’en ni ke milfan ngodad ni gadad e pi mich rok Jehovah.