Guruy ni 11

Boch e Michan’ nge Yalen Nde Felan’ Got Ngay

Mit ni ngan e michan’ nge yalen e ba kireb? (1)

Susun nge michan’ e pi Kristiano ngay ni Got e Trinitas? (2)

Mang fan ni der ma un e tin riyul’ e Kristiano ko madenom ko Christmas, nge Easter, fa birthday? (3, 4)

Rayog ko yam’ ni nge gafgownag e piin kab fas? (5)

Yim’ Jesus u daken e kuruth fa? (6)

Uw fene rib ga’ fan ni ngan falfalan’nag Got? (7)

1. Gathi urngin e michan’ nge yalen e ba kireb. Machane dabi micheg Got ni faanra yib ko pi teliw ni googsur ara ba togopuluw ko machib nu Bible.—Matthew 15:6.

2. Trinitas: Jehovah reb e Trinitas—ni dalip e person ni Got fa? Danga’! Ya Jehovah ni Chitamangiy e “kari mus ni bin riyul’ e Got.” (John 17:3; Mark 12:29) Jesus e bin nganni’ i Fak ni bay u tan pa’. (1 Korinth 11:3) Ma Chitamangin e baga’ ko Fak. (John 14:28) Ma fare kan ni thothup e gathi be’; ya aram gelngin Got ni ma mithmith​—Genesis 1:2; Acts 2:18.

3. Christmas nge Easter: Dani gargeleg Jesus ko December 25. Ya ni gargeleg u bang ko October 1, ma re ngiyal’ nem e aram ngalan’ ni ma gafaliy e pi tachugol saf e yu ran’ i saf rorad u wen ni nep’. (Luke 2:8-12) De ta’ Jesus chilen ko pi Kristiano ni nga ur madenomnaged e ngiyal’ ni kan gargelnag. Ya i yog ngak pi gachalpen ni ngar ted ngan’rad e yam’ ni tay. (Luke 22:19, 20) Ere yalen ko Christmas e yib ko pi yurba’ i teliw ni googsur ni kab kakrom. Kub taareb rogon ko yalen e madenom ni Easter ni yima fanay boch e fak e nimen nge usangi riy. Ma tin som’on e Kristiano e da ur madenomnaged e Christmas nge Easter, maku arrogon e tin riyul’ e Kristiano ko ngiyal’ ney.

4. Birthday: Kari mus ni ri l’agruw e birthday e bay u lan e Bible ni be yog ni ngongliy e piin der liyor ku Jehovah. (Genesis 40:20-22; Mark 6:21, 22, 24-27) Ma tin som’on e Kristiano da ur madenomnaged e birthday. Fare yalen ko re madenom ko birthday nem e yib ko tin kakrom e teliw ni googsur. Tin riyul’ e Kristiano e yad ma pi’ e taw’ath ma yad ma falfalan’ u taabang ni de mudugil ngalan’ u reb e duw.

5. Tamdag ko Yam’: Pi yam’ e dabkiyog nra thamiyed ara rrin’ed ban’en. Ma dabkiyog nda ayuweged yad ma ku dakuriy e n’en yad ra rin’ ngodad. (Psalm 146:4; Eklesiastes 9:5, 10) Yaal e ra yim’ dabki fas u bayang u tomren ni ke yim’. (Ezekiel 18:4) Machane ba’ yu ngiyal’ ni fapi engel ni kireb ni ka nog e demon ngorad e yad ma dake yad e yaal ko piin ni kar m’ad. Ba’ boch e yalen ni yima liyor ko yam’ ni bochan e yibe rus ngorad ni aram e tin nib kireb.—Isaiah 8:19.

6. Kuruth: De yim’ Jesus u daken e kuruth. Ke yim’ u daken baley i ren ara baley i gek’iy. Rogon ni ka nog u boor ken e Bible fare “kuruth” e fan e re thin nem ni kan piliyeg ni Greek e ta’ baley i ren. Fan fare kuruth e pow u ban’en ni yib u boch e teliw kakrom ni googsur. Ma de un e tin som’on e Kristiano i fanay ara ur ted fan. Me ere ba uw rogon u wan’um, ba mat’aw ni ngan meybil ko kuruth fa?—Deuteronomy 7:26; 1 Korinth 10:14.

7. Sana boch e pi yalen ney nge tin ke michan’uy ngay e de mom ni ngan digey. Ya boch e girdi’ rom nge pi fager rom e ra yog ni ba riyul’ ere dab mu thiliyeg e michan’ rom. Machane ri kab baga’ fan ni ngam fl’eg laniyan’ Got ko bin ngam man nga laniyan’ e girdi’.—Proverbs 29:25; Matthew 10:36, 37.

[Sasing ko page 22]

Got e gathi Trinitas

[Sasing ko page 23]

Christmas nge Easter e yib ko teliw ni googsur kakrom

[Sasing ko page 23]

Dariy rogon ni ngan liyor ko pi yam’ ara ngan rus ngorad