Guruy ni 12

Nge M’ug e Ta’ Fan ni Bay ko Yafas nge Racha’

Susun uw rogon e yafas u wan’dad? (1) nge li’ e bitir u meyal? (1)

Uw rogon ni ma dag e pi Kristiano ni yad ma kol ayuwngin ndabi buch ban’en nib kireb? (2)

Ba kireb ni yira li’ e gamanman fa? (3)

Mang boch ban’en ni yima rin’ ni be dag ni dan ta’ fan e yafas? (4)

Mang e motochiyel ku Got ko racha’? (5)

Ba muun e racha’ ni yima kuruf nga dowey ko re n’ey fa? (6)

1. Jehovah ir Tabolngin e yafas. Urngin ban’en nib fas mab mil fan ku Got. (Psalm 36:9) Yafas e ba thothup u owchen Got. Ni mus ko yafas ko bitir u meyal mab ga’ fan u wan’ Jehovah. Yira li’ bochi reb e bitir ni fin be sum ma ba kireb u mit Got.—Exodus 21:22, 23; Psalm 127:3.

2. Tin riyul’ e Kristiano e yad ma kol ayuwngin urngin ban’en. Ba mudugil lanin’rad ko karro nge tabinaw rorad. (Deuteronomy 22:8) Pi tapigpig ku Got e dabra kirebnaged e yafas rorad ni fan ko fafel ni dariy fan. Ar fan ni darur uned ko gosgos ni yima cham riy ni yima guy rogon ni ngan maadadnag be’. Yad ma palog ko pi falfalan’ ni ma k’aring e cham.—Psalm 11:5; John 13:35.

3. Ku arrogon e yafas ko gamanman nib thothup u laniyan’ e en Tasunumiy. Rayog ni li’ e Kristiano e gamanman ni fan e ngan kay nge ngan fanay ko mad fa nge ayuwegey ko m’ar nge riya’. (Genesis 3:21; 9:3; Exodus 21:28) Machane ba kireb ni ngan li’rad ni fan e ngan gosgos ngay ara ngan falfalan’ ngay ara un gafgownagrad.—Proverbs 12:10.

4. Tamagow nge ngan yengyeng e buw nge ngan fanay e drug ni fan ko falfalan’ e de m’ag ko Kristiano. Ma pi ngongol ney e ba kireb ya (1) gad ra mang sib riy (2) ma ra gathey e dowef rodad, ma (3) ba alit. (Roma 6:19; 12:1; 2 Korinth 7:1) Dabi siy nra mo’maw ni yira pag e pi n’ey ni ke mecham. Machane thingar da rin’ed ni bochan ni ba adag Jehovah.

5. Racha’ e ba thothup u mit Got. Ke gaar Got yafas ara yaal e bay ko racha’. Ar fan nib kireb ni ngan kay e racha’. Ma kub kireb ni yira kay e ufin ko gamanman ni dan puog rachaen. Faanra yim’ reb e gamanman ni aw ko wup fa moochol k’angan’ ma dab ni ka’. Ma faanra kan boyochnag fa kan piskanag me map’ rachaen ni papey ma yira ka’.—Genesis 9:3, 4; Levitikus 17:13, 14; Acts 15:28, 29.

6. Ba kireb ni ngan kuruf e racha’ nga dowey fa? Mu lemnag ni be ta’ Jehovah chilen ngodad ni ngad pared u orel ko racha’. Fan e re n’ey e ri dab ni kuruf nga dowdad ni yug demtrug ko rachaen be’ fa racha’ rodad ni kan fek kan chaariy. (Acts 21:25) Ar fan ni tin riyul’ e Kristiano e dabi yog e ke fel’ ngay ni nge fek e racha’. Ma yugu boch e falay e rayog ni fanay e tin riyul’ e Kristiano ni ngan kuruf ngak ni nge fek luwan’ e racha’. Yad ba adag ni ngar pared ni yad ba fas, machane gathi ngar guyed rogon ni ngar ayuweged e yafas rorad mar th’abed e motochiyel rok Got.—Matthew 16:25.

[Sasing ko page 25]

Ra nge felan’ Got, ma thingar da paloggad ko racha’ ni ngan kuruf nga dowey, nge tin ke mecham nib alit, nge pi n’en ni de t’uf ni ngan rin’ ya bay e riya’ riy