Fare Abich ni Blayal’ rok Somol e Ba Madnom ni Yibe N’uf Got Riy

KAN tay chilen ngak e pi Kristiano ni ngar madnomnaged e Puguran ko yam’ ni tay Kristus. Re madnom nem e ku yima yog e “abich ni blayal’ rok Somol” ngay. (1 Korinth 11:20) Mang nrib ga’ fan e re madnom nem? Ma wuin e ngaun madnomnag, ma uw rogon?

I tababnag Jesus Kristus e re madnom nem ko duw ni 33 C.E. u nap’an e Paluk’af rok piyu Jew. Fare Paluk’af e ba madnom ni ma tay piyu Israel kakrom ni taab yay u reb e duw, ko rofen ni 14 fen e pul ko Nisan. Ma tabab e pul ni Nisan u nap’an nra m’ug e pul u ngal u bang ko bin som’on e wik ko March. Nap’an nra tabab e pul ni Nisan ma aram me theeg piyu Jew e rran nge yan i gaman e 13, ma aram mar tayed fare madnom ko Paluk’af u tomuren ni ke aw e yal’ ko bin 13 e rran.

I madnomnag Jesus nge pi apostal rok e Paluk’af u taabang, me chuw Judas Iskariot, ma aram me tababnag Jesus fare Abich ni Blayal’ rok Somol. Aram e re madnom ni yan nga lon fare madnom ko Paluk’af ni ma tay piyu Jew. Ere, thingar ni tay ni taab yay u reb e duw.

Be gaar e babyor rok Matthew: “Me fek Jesus e flowa, me pining e magar riy ngak Got, me t’et’ar, me pi’ ngak pi gachalpen me gaar, ‘Mfeked ngam ked; ya ireray dowag.’ Me fek fare kap, me pining e magar riy ngak Got, nge mu’ me pi’ ngorad me gaar, ‘Mu unumed ni gimed gubin, ya ereray rachaeg ni ir e bayi micheg e m’ag u thilin Got nge girdi’, ni rachaeg ni bay map’ nga but’ ni fan ngak boor e girdi’ ni fan e nge n’ag Got fan e denen.’”​—Matthew 26:26-28.

Boch e girdi’ e yad ma lemnag ni pilyeg Jesus fare flowa nge ngal’ ni downgin me pilyeg fare kap i wain nge ngal’ ni rachaen. Machane, bin riyul’ riy, e nap’an ni pi’ Jesus fare flowa ngak e pi apostal rok ma ka chi rogon downgin. Gur, riyul’ ni kay e pi apostal rok Jesus e ufin u downgin mar unumed rachaen? Danga’, ya faanra aram rogon ma kar th’abed e motochiyel rok Got ni be yog ndab ni kay e ufin ni bay e racha’ u fithik’. (Genesis 9:3, 4; Levitikus 17:10) Rogon ni yog Jesus ko Luke 22:20 e gaar: “Re kap ney e bin nib beech e m’ag u thilin Got nge girdi’ ni rachaeg ni bay map’ nga but’ ni fan ngomed e ir e bayi micheg.” Ere gur, i ngal’ fare kap ni “bin nib beech e m’ag u thilin Got nge girdi’?” Danga’, ya yima ngongliy e m’ag u thiliy ko thin, ma gathi ban’en.

Ere, fare flowa nge fare wain e be yip’ fan ban’en. Fare flowa e be yip’ fan downgin Kristus nib flont. I fanay Jesus e flowa ni ke magey u tomuren e madnom ko Paluk’af nra tayed e pi apostal rok. Fare flowa e ni ngongliy nda ni tay e n’en ni ma thownag e flowa ngay ara is. (Exodus 12:8) Ba ga’ ni ma fanay e Bible fare bugithin ni is ni nge yip’ fan e denen. Ere, fare flowa e be yip’ fan downgin Jesus nib flont ni ke pi’ ni maligach.​—Matthew 16:11, 12; 1 Korinth 5:6, 7; 1 Peter 2:22; 1 John 2:1, 2.

Fare wain nib rowrow e be yip’ fan rachaen Jesus ni aram e n’en ni ke micheg fare m’ag nib beech u thilin Got nge girdi’. I yog Jesus ni kan puog rachaen ni “fan e nge n’ag Got fan e denen.” Aram e n’en nra beechnag e girdi’ u mit Jehovah me yag nra uned nga tan fare m’ag nib beech u thilin Got nge girdi’. (Hebrews 9:14; 10:16, 17) Re m’ag ney e ir e ke bing e kanawo’ ngak fare 144,000 e Kristiano nib yul’yul’ ni nga ranod nga tharmiy ngar pigpiggad u rom ni yad e pilung nge prist mar flaabnaged e girdi’.​—Genesis 22:18; Jeremiah 31:31-33; 1 Peter 2:9; Revelation 20:6; 14:1-3.

Ere, mini’ e susun ni nge kay fare flowa me unum fare wain u nap’an e Puguran? Ba tamilang ni goo piin ni kan micheg fare m’ag nib beech ngorad ni aram e piin ni yad ra yan nga tharmiy. Gelngin Got nib thothup e ir e ra micheg nga laniyan’ e pi girdi’ ney ni kan mel’egrad ni ngar manged boch e pilung u tharmiy. (Roma 8:16) Ku bay e m’ag u thilin e pi girdi’ ney nge Jesus ni fan nga Gil’ilungun Got.​—Luke 22:29.

Ere, uw rogon e piin ni yad be athapeg e yafas ni manemus u Paradis u fayleng? Ku yad ma fol ko motochiyel rok Jesus ni ngar uned i madnomnag fare Abich ni Blayal’ rok Somol, machane dab ra uned i kay e flowa mar unumed e wain. Pi Mich Rok Jehovah e yad ma madnomnag fare Abich ni Blayal’ rok Somol ni taab yay u reb e duw ko rofen ni Nisan 14 u tomuren ni ke aw e yal’. Yugu aram rogon ni kemus ni in biyu’ e girdi’ e yad ra yan nga tharmiy, machane rib ga’ fan e re madnom ney u wan’ gubin e Kristiano ya aram e ngiyal’ nrayog ni ngan lemnag gelngin e t’ufeg rok Jehovah Got nge Jesus Kristus ngak e girdi’.​—John 3:16.