“Ma Nge T’uf Romed e Pi Cha’ ni Gimed ni Ke Mich Got u Wan’rad”

Pi Thin ney ni Got e ke thagthagnag e nni yoloy kakrom ni ke chugur ko l’agruw e biyu’ e duw ni ke yan. (1 Pet. 2:17) Machane rib ga’ fan ni ngad folgad riy e ngiyal’ ney! Uw rogon ni ngad t’ufeged e pi walagdad u ga’ngin yang u fayleng? Bochan ni gad be par ko re fayleng ney ndariy e t’ufeg riy, ma uw rogon ni nge mudugil lanin’dad ndabi war e t’ufeg rodad? (Matt. 24:12) Mu guy ko rayog ni ngam pi’ e fulweg ko pi deer ni baaray u nap’an ni ga be yaliy fare kachido ni kenggin e Our Whole Association of Brothers.

(1) Wuin e kad manged bang ko fare ulung ko Kristiano? (2) Mang dalip e maruwel ni gadad be maruweliy e pi walagdad u ga’ngin yang e fayleng u taabang? (3) Uw rogon ni be dag e pi walag ni yad be machib u fithik’ e pasig (a) u daken e ted u Alaska, (b) u yu yang u Europe ni bay e gampek riy nib gagang’, nge (c) lan e pi binaw u Peru ni boor e gek’iy riy nib gagang’? (4) Mang fan ni thingar dab da lemnaged ni machib e yugu reb e maruwel ni gathi rib ga’ fan? (5) Mu weliy ko uw rogon ni ke yag rok e Pi Mich Rok Jehovah ni ngar fal’eged laniyan’, ma ngkur ayuweged e pi walagrad (a) u tomuren reb e durru’, (b) nge tomuren e yoko’, ngu (c) nap’an e mahl u thilin yu ulung e girdi’ u reb e nam? (6) Mang boch e kanawo’ nrayog ni ngad daged e pow ko tin riyul’ e Kristiano? (John 13:35) (7) Mang angin nra yib ngodad nfaanra ngad maruwelgad u taabang ni ngad toyed e pi Kingdom Hall rodad? (8) Uw rogon me yag rok e pi walagdad u Eastern Europe nge Russia ni ngaur pigpiggad ku Got u nap’an ni ke taleg e am e maruwel rodad? (9) Mang e ke rin’ e Pi Mich Rok Jehovah ya nge yag ni ngar uned ko pi convention ara pi muulung nib ga’, ma mang fan? (10) Uw rogon ni ke pi’ e re kachido ney e athamgil nga lanin’um (a) ni ngam uned ngak e pi walag ngam liyorgad ngak Jehovah u taabang u nap’an e muulung, nge (b) u nap’an ni ga be ayuweg boch e girdi’ ni ke yib e gafgow ngorad, nge (c) u nap’an ni ngam machib u fithik’ e yul’yul’ nyugu demtrug rogon e tayim rom nge kanawoen? (11) Uw rogon ma mingiyal’ e rayog ni ngad fanayed e re kachido ney u nap’an e machib?

Bin th’abi ga’ fan ni kad manged bang ko fare ulung ko tin riyul’ e Kristiano e bochan nib t’uf Jehovah rodad. Ere gad baadag ni ngad nanged murung’agen ma ngkud filed ngak e girdi’. Ma girdi’ ni yad ba t’uf rok Jehovah e ku yad ba t’uf rodad. Ma nap’an ni gad ra ayuwegrad ni bochan nib t’uf e ayuw rorad, ma dab lemnaged ni nge pining Jehovah e magar ngodad. Machane, gadad e susun ni ngad pininged e magar ngak Got ya ir e ke pi’ e tow’ath ngodad ni aram e kad manged bang ko ulung ko Kristiano. Chiney ni ke chugur ni nge m’ay e re fayleng ney ndariy e t’ufeg riy, ma ngad ululgad ni ngad daged e t’ufeg ngak e pi walagdad u lan e ulung!