Mu Sak’iygad Ni Dabmu Mithmithgad Mi Gimed Guy E Ayuw Rok Jehovah!

“Mu pared u tagil’med, ma mu sak’iygad ni dabmu mithmithgad mi gimed guy e ayuw rok Jehovah ni fan ngomed.”​—2 CHRONICLES 20:17, NW.

1, 2. Mang fan ni fare cham ni be yib ni bayi tay “Gog ko binaw nu Magog” e kab gel e riya’ riy ko tin ma rin’ e piin terrorist u ga’ngin yang e fayleng?

BOCH e girdi’ e kar weliyed murung’agen e terrorism ni ba cham ngak e girdi’ nu fayleng, ma kub muun ngay e tamilangan’ ko girdi’. Ba tamilang, ni rib t’uf ni ngan rin’ ban’en ko re magawon nem. Ma ku reb, ni ri kub gel e magawon e reb e cham nib thil ni yira ta’, nib gel e riya’ riy ni girdi’ nu fayleng e gathi ri yad ma lemnag ara dara ma lemniged. Mang e re n’ey?

² Ireray e cham ni bayi ta’ “Gog ko binaw nu Magog,” ni fare Bible e be weliy murung’agen u Ezekiel guruy ni 38. Gur kan ga’nag i yog ni re cham ney e kab gel e riya’ riy ko magawon ni ra yibnag e tin ma rin’ e terrorist u ga’ngin yang e fayleng? Ri danga’, ya cham ni ra ta’ Gog e ra yan nga wuru’ e cham ngak e am ko girdi’. Ra cham ngak e am rok Got u tharmiy! Machane, de taareb rogon ko girdi’, ni kemus ni buchuw angin ni keb ngorad u rogon ni yad be ayuwegrad ko cham ni yima ta’ ni fan ngorad, ma en Tasunmiy e ri rayog rok ni nge taleg e cham ni bayi ta’ Gog ni kab gel e kireb riy.

Ba Cham Ngak fare Am Rok Got

3. Ka nap’an e duw ni 1914 ma mang e kan pining e pi pilung nu fayleng ni ngar rin’ed, ma uw rogon u wan’rad?

³ Fare mahl u thilin e Pilung rok Got ni be gagiyeg e chiney nge fare m’ag nib kireb rok Satan e be ulul i yan ni ka nap’an ni sunmiy Gil’ilungun Got u tharmiy ko duw ni 1914. Ngiyal’ nem, ma fapi pilung ko girdi’ e ka nog ngorad ni ngar pared u tan pa’ e Pilung ni Got e ke mel’eg. Machane kar dabuyed ni ngar pared u tanggin, nrogon e thin ni kan yiinag ni gaar: “Pi pilung nu fayleng e kar fal’ged rogorad ma piin nib tolang e liw rorad e ke taareban’rad ni bod ni kar taarebgad ngar togopuluwgad ngak Jehovah u taabang nge ngak e en ni ke dugliy, be lungurad: ‘Ngada th’abed e gaf rorad nge math ma ngad n’aged nga palog rodad!’” (Psalm 2:1-3, NW) Fare togopuluw ni yibe ta’ ni fan ko Gil’ilungun e ba tamilang ni ra mus feni gel u nap’an nra cham Gog nu Magog.

4, 5. Uw rogon ni nge cham e girdi’ ko am rok Got u tharmiy ni dabiyog ni ngan guy nga owchey?

⁴ Sana gadra lemnag ko uw rogon ni nge cham e girdi’ ngak fare am nu tharmiy ni dabiyog ni ngan guy nga lan owchey. Re am ney, nrogon ni yog e Bible, e bay “raay nge aningeg i ragag nge aningeg i biyu’ e girdi’ rok ni kan biyuliyrad u fayleng,” nge fare “Fak e Saf,” i Kristus Jesus. (Revelation 14:1, 3; John 1:29) Bochan bay u tharmiy, ma fare am nib biech e yima yog ni bin nib “biech e lan e lang,” ma piin ni yad ra mang girdien u roy u fayleng e ba puluw ni ngan pining e “bin nib biech e fayleng” ngorad. (Isaiah 65:17; 2 Peter 3:13) Ma boor i yad fare 144,000 i girdi’ ni yad ra un ngak Kristus ko gagiyeg e kar m’ad nib yul’yul’. Ma aram e kar daged ni bay rogorad ni ngar uned nga reb e maruwel nib biech ni ngar pigpiggad ku Got u tharmiy.

⁵ Machane tin ni ka ba’ ko fa 144,000 e girdi’, e ka yad bay u fayleng. U fithik’ e girdi’ ni 15,000,000 oren ni kar uned ko fare madenom ni aram fare Abich ko Balayal Rok Somol ko duw ni 2002, ma karimus ni 8,760 e girdi’ e kar daged e athap rorad ni kan mel’egrad ni ngar uned ko re maruwel ney u tharmiy. Yugu cha’ ni ba’ gelngin ni nge cham ngak e piin ni ka ba’ ni yad ra mang bang ko Gil’ilungun e bin riyul’ riy e be cham ko Gil’ilungun Got.​—Revelation 12:17.

Fare Pilung e Ke Mu’nag e Maruwel Rok ni Ke Gel ko Mahl

6. Uw rogon u wan’ Jehovah nge Kristus e togopuluw ni kan tay ngak e girdi’ rok Got?

⁶ Tin ni rin’ Jehovah nbochan e togopuluw ko Gil’ilungun ni kan tay e ni yiiynag ni gaar: “I Somol e bay u tagil’ u tharmiy ni be minmin ngorad ma be moning u wan’ ngorad. Ngiyal’ nem e bayi welthin ngorad u fithik’ e damumuw rok, me k’aring e marus ngorad ko damumuw ni ke tay. Ke gaar, “Kug tay e pilung rog nga daken yu Zion, ni aram fare burey rog nib thothup.’” (Psalm 2:4-6, NW) Ke taw ko fa ngiyal’ ni ba’ Kristus, u tan pa’ Jehovah e be pow’iy, ni nge “mu’nag e maruwel rok ni nge gel ko mahl.” (Revelation 6:2, NW) Uw rogon u wan’ Jehovah e togopuluw ni yira ta’ ngak e girdi’ rok u nap’an e yay ni tomur ni kan gel ko mahl? Bod ni yibe cham ngak nge ngak e Pilung rok ni be gagiyeg e chiney. “En ni ra math ngomed e be math nga tiran owcheg,” ireray e n’en ni yog Jehovah. (Zekariah 2:8, NW) Ma kari weliy Jesus ni tin ni ke rin’ e girdi’ ara tin ni dan rin’ ngak e pi walagen ni kan dugliyrad e bod ni kan rin’ ara dan rin’ ngak.​—Matthew 25:40, 45.

7. Mang tapgin ni piin ni yad bang ko fare “ulung ni baga’,” e kan weliy ko Revelation 7:9, ni ke damumuw Gog ngorad?

⁷ Riyul’ ni, piin ni yad ba pasig i ayuweg e piin ni ka ba’ e ku ra damumuw Gog ngorad. Pi cha’ ney ni yad ra mang bang ko fa “bin nib biech e fayleng” rok Got e “reb e ulung ni baga’” ni ka nog ni yad e girdi’ “nra bad u gubin e nam, nge ganong, nge gubin mit e girdi’, nge gubin e thin.” (Revelation 7:9) Ka nog ni “kar sak’iygad u p’eowchen tagil’ Got nge fare Fak e Saf, ni ka ron’ed e mad nib wechwech.” Ma yad ba fel’ u wan’ Got nge Kristus Jesus. Ba’ “yuwan e fal’tir u pa’rad,” ni yad be n’uf Jehovah ni ri ir e Th’abi Tolang u palpalthib, ni kan dag e gagiyeg rok u daken Jesus Kristus ni Pilung, ni “fare Fak e Saf rok Got.”​—John 1:29, 36.

8. Cham ni bayi tay Gog e ra k’aring Kristus ni nge rin’ e mang, ma mang angin?

⁸ Cham ni tay Gog e ra k’aring e Pilung rok Got ni nge tababnag fare mahl ni Armageddon. (Revelation 16:14, 16) Piin ni be par ni dariy fan e gagiyeg rok Jehovah ni th’abi tolang u wan’rad e yira thang owcherad. Ma piin ni kar uned ko gafgow ya bochan kar pared nib yul’yul’ ko Gil’ilungun Got, e ba reb ya yad chuw ko gafgow ngar pogofan ni dariy n’umngin nap’an. Murung’agen e re n’ey, i yoloy Paul ni apostal ni gaar: “Ereray e mich riy nga rogon feni mat’aw ni ma gonopiy Got urngin ban’en ya wenegan nra yib e ra fal’eg rogomed nge yib mat’awmed ni ngam marod ko gin nsuwon, ni ir e gimed be gafgow ni bochan. Yi Got e bay rin’ e tin nib mat’aw: ni bayi fek e gafgow romed nga daken e piin ni yad be gafgownagmed, ma bayi chuweg e gafgow romed e piin ni gimed be gafgow ngam pogofangad, ma ku er rogon ni bay rin’ ngomad. Ra rin’ e re n’ey ko ngiyal’ nra m’ug Somol Jesus u lan e lang ni ke yib u tharmiy ni yad e pi engel rok nib yargel, nge nifiy ni be daramram, ni nge gechignag e piin nde t’uf rorad ni ngar nanged murung’agen Got nge piin ndarir folgad ko Thin Nib Fel’ ni yib rok Got ni murung’agen e Somol rodad i Jesus.”​—2 Thessalonika 1:5-8.

9, 10. (a) Uw rogon ni ke gagiyegnag Jehovah ni nge gel Judah ko toogor rok ni rib gel? (b) Pi Kristiano ko ngiyal’ ney e thingara ululgad i rin’ e mang?

⁹ Nap’an e gafgow ni baga’ ni be yib, ni ra m’ay ko Armageddon, ma ra cham Kristus ngak urngin e tin nib kireb. Machane pi gachalpen e de t’uf ni ngar uned ko cham, ni bod rogon e piin i par u Judah ni immoy l’agruw e ganong riy ni de t’uf ni ngar uned ko fa binem e cham ni bokum biyu’ e duw kakrom. Fare mahl e mahl rok Jehovah, me gagiyegnag ni ngar gelgad. Thin ni kan yoloy e be yog ni gaar: “Ke tay Jehovah boch e girdi’ nga bang ni ngar chamgad ngak pi fak Ammon, u Moab ngu Seir ni boor e burey riy ni pi cha’ nem e ka ranod nga Judah, ma ra bagayad me li’ bagayad ngem’. Ma pi fak Ammon nge Moab e ka ra ululgad ngar chamgad ngak e piin ma par u Seir ni bay boor e burey riy ma kar thanged owcherad; ma ngiyal’ ni lied urngin e girdi’ ni ma par u Seir kar m’ad, ma ra bagayad me li’ bagayad ngem’. Machane rogon yu Judah, ke mang wulyang ni tagil’ e damit u daken e ted ndariy ban’en ni ma tugul riy. Nap’an ni kar sapgad ko fare ulung, mog, yad bay u rom, ni goo downgirad e bay u but’ ndariy bagayad ni thay.”​—2 Chronicles 20:22-24, NW.

¹⁰ Rib puluw e re n’em ko thin ni yog Jehovah ni gaar: “De t’uf ni ngam uned ko cham.” (2 Chronicles 20:17, NW) Ireray e n’en ni piin Kristiano e ngar folgad riy u nap’an ni be n’en Jesus Kristus ni nge “mu’nag e maruwel rok ni nge gel ko mahl.” Chiney, e yad be ulul nguur chamgad ngak e tin nib kireb, ni darur ma fanayed e talin e cham ko girdi’, ya talin e cham nib spiritual. Ma aram myad “ma ngongliy e ngongol nib fel’ nguur gelgad ngak e kireb.”​—Roma 6:13; 12:17-21; 13:12; 2 Korinth 10:3-5.

Mini’ e Ra Pow’iy e Cham Rok Gog?

11. (a) Mang e pi ulung ni ra fanay Gog ni nge lebuguy e cham ni bayi tay? (b) Mang e ba muun ngay ni ngan par nib od ko tirok Got?

¹¹ Gog nu Magog e kan nang ni ir Satan ni fare Moonyan’ ni kan sobut’nag e liw rok ni ka nap’an 1914. Bochan ir reb e kan, ma aram dabiyog ni ir e nge cham ngak e girdi’, machane ra fanay yu ulung i girdi’ ni ngar rin’ed e maruwel rok. Mini’ e yu ulung i girdi’ ney? Fare Bible e de yog ngodad ni reb nge reb, machane ke pi’ ngodad boch e pow ni ra ayuwegdad ni ngad poyed ko yad mini’. Nap’an ni gad ra guy e n’en ni be buch u fayleng nra lebuguy e pi yiiy u Bible, ma rayog ni ngad nanged fan buchuw ma buchuw. Girdi’ rok Jehovah e dabra susunnaged ban’en machane yad ra par ni yad be od ko tirok Got, ni ri yad manang e tin be buch ko politics nge teliw nra m’ug riy ni ke lebug e yiiy u Bible.

12, 13. Uw rogon ni ke yiiynag Daniel ni profet e bin tomur e cham ni bayi tay ngak e girdi’ rok Got?

¹² Daniel ni profet e ke weliy boch ban’en u murung’agen e bin tomur e cham ni yira tay ngak e girdi’ rok Got, me yoloy ni gaar: “Facha’ [fare pilung nu lel’uch] e ra yan ni kari damumuw ni fan ni nge gothey ma ra gagiyegnag ni nge yim’ bokum e girdi’. Ma ra n’uf e tent rok ni bod tafen e pilung nga bangi n’en ni bay u thilin e day nib ga’ nge fare burey ko Nunuw mab thothup.”​—Daniel 11:44, 45, NW.

¹³ U nap’an e Bible, ma “fare gi day nib ga’” e aram fare Great Sea, ara fare Mediterranean, ma “fare burey nib thothup” e aram e Zion, ni ke yog Jehovah murung’agen ni gaar: “Kug tay e pilung rog nga daken yu Zion, ni aram fare burey rog nib thothup.” (Psalm 2:6; Joshua 1:4, NW) Ma aram, e fan nib spiritual, e fare ngi but’ ni bay “u thilin fare gi day nib ga’ nge fare burey nib thothup” e be yip’ fan e maruwel nib spiritual rok e pi Kristiano ni kan dugliyrad ni be mon’og i yan. Da kun weliy ni ka yad ba chag ngak fare day ni aram e girdi’ nib dar rok Got, ya ma yad be sap nga m’on ni ngar uned ngak Kristus Jesus ko gagiyeg ko Gil’ilungun u tharmiy. Ere ba tamilang ni, pi tapigpig rok Got ni kan dugliyrad, nge piin nib yul’yul’ nib chag ngorad ni fare ulung ni baga’, e yad e girdi’ ni bayi fek fare pilung nu lel’uch e cham i yib ngorad u nap’an ni ra tabab e cham ni nge lebuguy e yiiy rok Daniel.​—Isaiah 57:20; Hebrews 12:22; Revelation 14:1.

Mang e Ra Rin’ e Pi Tapigpig Rok Got?

14. Mang dalip ban’en ni bayi rin’ e girdi’ rok Got u nap’an ni yibe cham ngorad?

¹⁴ Mang e yibe lemnag ni ra rin’ e pi tapigpig rok Got u nap’an ni ke yib e girdi’ ni ngar chamgad ngorad? Ku biyay, tin ni rin’ e nam rok Got u nap’an Jehoshaphat e ke dag rogon. Mu lemnag ni girdi’ e kan tay chilen ngorad ni ngara rin’ed dalip ban’en: (1) ngar pired u tagil’rad, (2) mar sak’iygad ni dabra mithmithgad, (3) mar guyed e ayuw rok Jehovah. Uw rogon ni nge puluwnag e girdi’ rok Got e ngongol rorad ko pi thin ney ko ngiyal’ ney?​—2 Chronicles 20:17.

15. Mangfan e bin baaray ni girdi’ rok Jehovah e ngar pared u tagil’rad?

¹⁵ Ngar pared u tagil’rad: Girdi’ rok Got e dabi maruwaran’rad nguura ululgad ko maruwel rorad ni yad be ayuweg e Gil’ilungun u fithik’ e pasig. Nguura ululgad ko par u mathilin nrogon ni ma rin’ e Kristiano. Yad ra par nib “mudugil, ma dabiyog ni ngan mithmithegrad” ko pigpig nib yul’yul’ ni yad be ta’ ni fan ku Jehovah mar ululgad i pining e sorok ngak u fithik’ e girdi’ ni yoor nbochan e t’ufeg nib yul’yul’ rok Jehovah. (1 Korinth 15:58; Psalm 118:28, 29) Dariy e mochuch e chiney ara boch nga m’on ni ra k’aringrad ngar digeyed tagil’rad nib fel’ u wan’ Got.

16. Mang e kanawo’ ni tapigpig rok Jehovah e ngar pired u tagil’rad ni dabra mithmithgad?

¹⁶ Mar sak’iygad ni dabra mithmithgad: Pi tapigpig rok Jehovah e dabra guyed rogon ni ngar ayuweged yad ya ra pagedan’rad ngak Jehovah u polo’ i lanin’rad. Ke mus ni ir e rayog ni nge ayuweg e pi tapigpig rok ko magawon ko fayleng nib wagey, ma ke micheg ni nge ayuwegrad. (Isaiah 43:10, 11; 54:15; Lamentations 3:26) Ngan pagan’ ngak Jehovah e ba muun ngay ni ngan pagan’ nga kanawoen e maruwel ni yira guy ni ba tamilang ni kii fanay ni ke bokum e duw ni nge rin’ e tin nib m’agan’ ngay. Bod ni dawori buch kafram, ni aram e tin riyul’ e Kristiano e ba t’uf ni ngara pagedan’rad ngak e pi walagrad ni ke pi’ Jehovah mat’awrad nge ngak e Pilung rok ni ngar gagiyeg gad. Pi girdi’ ney nib yul’yul’ e ngar pow’iyed e girdi’ rok Got. Ra dariyfannag be’ e thin rorad ma ra yib ngak e gafgow nib gel.​—Matthew 24:45-47; Hebrews 13:7, 17.

17. Mang fan ni pi tapigpig rok Got nib yul’yul’ e yad ra guy e ayuw rok Jehovah?

¹⁷ Mara guyed e ayuw rok Jehovah: Ayuw e aram e taw’ath ni yira pi’ ngak e piin ni ura pared ni yad ba yul’yul nrogon e Kristiano ma be pagan’rad ngak Jehovah nra ayuweg e yafas rorad. Nge ni mada’ ko bin tomur e awa​—nge rogon ni rayog rorad—​e bay ura wereged e thin u murung’agen e wub ko fare rran ko pufthin rok Jehovah. Urngin e tin kan sunmiy e thingara nanged ni Jehovah e ir e bin riyul’ e Got ma bay e tapigpig rok nib yul’yul’ u fayleng. Ngiyal’ nem ma ri daki t’uf e maluagthin nib n’uw nap’an u murung’agen feni mat’aw e gagiyeg rok Jehovah nib th’abi tolang.​—Ezekiel 33:33; 36:23.

18, 19. (a) Uw rogon ma fare tang ni fan ko piin ni ke gel ko mahl ni bay ko Exodus guruy ni 15 e be dag e tin ra thamiy e piin ni yad ra magay nib fas u nap’an e cham ni bayi tay Gog? (b) Mang e ba puluw ni nge rin’ e girdi’ rok Got e chiney?

¹⁸ Ke yog ngorad gelngirad ni kan biechnag, ma aram e girdi’ rok Got e yad ra yan nga lan fa bin nib biech e fayleng, ma ri yad baadag ni nga ron’ed reb e tang ni tang ko kan gel ko mahl, ni bod rogon e n’en ni i rin’ piyu Israel kakrom u tomren ni kar magaygad ni yad ba fas u nap’an nra th’abed e Red Sea. Dariy n’umngin nap’an ni nga yugu ur pininged e magar ngak Jehovah ko ayuw ni ke pi’ ngorad, ni be’ nge be’ nge yad u taabang ni yad urngin, e nga rogned fapi thin ni unog kakrom ni gaar: “Mu pag ni nggon’ u tang ni fan ku Jehovah, ya karin tolangnag. . . . Jehovah e ir reb e pumoon nib gel ko mahl. Jehovah e ngochol rok. . . . Jehovah, ba’ ni mat’aw i pa’am, e rayog ni nge madardarnag e pi toogor. Ma bochan ni gur e en th’abi tolang ma aram e rayog rom ni ngam gel ko piin ni ra togopuluw ngom; ga ra pag e damumuw rom ni be daramram, ma ra longuyrad ni bod kenggin e komey nib melik’. . . . Gur ma bochan e t’ufeg nib yul’yul’ rom ma kam pow’iy e girdi’ ni kam fulwegrad biyay; me gur nbochan gelngim ma mmutrug ni ngam pow’iyrad nga tagil’im nib thothup. . . . Ram fekrad ma ga yungrad nga daken e birom e burey, ni reb nib mudugil ni kam fal’eg rogon ni nguum par riy, Jehovah, reb e santuary, Jehovah, ni pa’am e ke toy. Ra gagiyegnag Jehovah ni reb e pilung ni de mudugil n’umngin nap’an, ma dariy n’umngin nap’an.”​—Exodus 15:1-19, NW.

¹⁹ Chiney ko fare athap ko yafas ndariy n’umngin nap’an e ke par ni kab tamilang ko kafram, ireray e tayim ko pi tapigpig rok Got ni ngar daged e yul’yul’ rorad ngak Jehovah ma ngar biechnaged e tin ni kar dugliyed u lanin’rad ni ngar pigpiggad ngak ni ir e Pilung rorad ndariy n’umngin nap’an!​—1 Chronicles 29:11-13.

Rayog ni Ngam Weliy Fan?

• Mang fan ni cham ni bayi tay Gog e nge fek’ i yib ngak e piin kan dugliyrad nge yugu boch e saf?

• Uw rogon ma girdi’ rok Got e nga ra pared u tagil’rad?

• Mang e be yip’ fan ni ngan par yib sak’iy ni dabni mithmith?

• Uw rogon ma girdi’ rok Got e ngar guyed e ayuw rok Jehovah?

[Picture on page 26]

I gagiyegnag Jehovah ni nge gel Jehoshaphat nge girdi’ rok ko mahl, ni de t’uf ni ngar uned ko cham

[Picture on page 28]

Piin ni kan dugliyrad nge yugu boch e saf e yad be n’uf e gagiyeg rok Jehovah

[Picture on page 30]

Taareb rogon ko piyu Israel kakrom, ma dabki n’uw nap’an ni girdi’ rok Got e nga ron’ed e tang ni fan ko girdi’ ni kar gelgad ko mahl