Ke N’uf Job Fithingan Jehovah

“Nggu pining e sorok nga fithingan.”​—JOB 1:21.

1. Mini’ e yoloy fare babyor ni Job, ma wuin e yoloy?

GONAP’AN 40 e duw rok Moses me mil rok Farao u Egypt me yan i par nga Midian. (Acts 7:23) Nap’an ni immoy u rom, ma sana ke rung’ag murung’agen e skeng ni yib ngak Job ni i par u Uz. U boch e duw nga tomren, u nap’an ni be milekag Moses nge girdi’ nu Israel mar bad u tooben e nam nu Uz ma aram ma ki fil boch ban’en u murung’agen e yafas rok Job. Rogon ni ma yog piyu Jew e ke yoloy Moses fare babyor ni Job u ba ngiyal’ u tomren ni ke yim’ Job.

2. Mang boch e kanawo’ ni be pi’ fare babyor ni Job e athamgil ngak e pi tapigpig rok Jehovah ko ngiyal’ ney?

² Fare babyor ni be weliy murung’agen Job e be gelnag e michan’ ko tapigpig rok Got e ngiyal’ ney. Uw rogon? Pi thin ni bay riy e be ayuwegdad ni ngad nanged e pi n’en nib ga’ fan ni buch u tharmiy. Ma re n’ey e ra puguran ngodad murung’agen e togopuluw ni tay Satan nga mat’awun e gagiyeg rok Got. Fare thin u murung’agen Job e ku be tamilangnag lanin’dad ko uw rogon ni gad ra par ni gad ba yul’yul’, ma ku be ayuwegdad ni ngad nanged ko mang fan ni ma pag Jehovah e pi tapigpig rok ni ngar gafgowgad yu ngiyal’. Fare babyor ni Job e ku be tamilangnag ni Satan ni Moonyan’ e ir e toogor rok Got nge girdi’. Maku be dag ni rayog ko girdi’ ni tadenen ni bod Job ni ngar pared nib yul’yul’ ngak Jehovah ma ra gelgad ko skeng ni be yib ngorad. Ere ngad guyed boch ban’en ni buch rok Job.

Ke Skengnag Satan Job

3. Mang e gad manang u murung’agen Job, ma mang fan ni skengnag Satan Job?

³ Job e be’ nib fel’ rogon ma yima tay fan, ma i gagiyegnag e tabinaw rok nib fel’ rogon. Ma ir reb e tafonow nib manigil maku ma ayuweg e girdi’ ko tin nib t’uf rorad. Ma ir be’ ni bay madgun Got u wan’. Ma kun weliy ni ma “par ni ir be’ nib manigil ma be ayuw ni nge dabi rin’ ban’en nib kireb.” Ere pi’ Satan e skeng ngak ni gathi bochan e boor ban’en rok machane bochan e yul’yul’ ni be tay Job ngak Got.​—Job 1:1; 29:7-16; 31:1.

4. Mang e yul’yul’?

⁴ Tin som’on e thin ko re babyor ney ni Job e be weliy murung’agen ba muulung u tharmiy ni tay e pi engel u p’eowchen Jehovah. Maku bay Satan u fithik’rad ma aram me yog boch e thin nib togopuluw ngak Job. (Mu beeg e Job 1:6-11.) Yugu aram rogon ni yog Satan ni boor ban’en ni bay rok Job, machane ri be guy rogon ni nge togopuluw ko yul’yul’ ni be tay Job ngak Got. Fan fare bugithin ni “yul’yul’” e be’ nib yal’uw, ma dariy e kireb rok, ma ba mat’aw. Rogon ni be yog e Bible e yul’yul’ e be’ ni ke pi’ gum’irchaen nib polo’ ni nge fol rok Jehovah.

5. Mang e yog Satan u murung’agen Job?

⁵ Ke yog Satan ni be liyor Job ngak Got ni gathi bochan e ba yul’yul’, ya bochan e pi n’en ni be pi’ Got ngak. Ke yog Satan nra par Job nib yul’yul’ ngak Jehovah ni faanra kemus ni be pi’ Got e ayuw ma be tow’athnag. Ra pag Jehovah ni nge skengnag Satan e yul’yul’ rok Job ya nge tamilang ni de mat’aw e thin ni be yog Satan. Ere reb e rran me nang Job ni kan iring e gamanman rok, ma kan li’ e pi tapigpig rok, ma ke yim’ fa ragag i bitir rok. (Job 1:13-19) Ere yog rok Satan ni nge kirebnag e yul’yul’ rok Job, fa? Bochan e pi n’en nib kireb ni buch rok Job ma aram me gaar: “I Somol e ke pi’ e tin ni immoy rog, me ir e ke fek rog e chiney. Nggu pining e sorok nga fithingan.”​—Job 1:21.

6. (a) Mang e buch ko yay ni migid e muulung ni tay u tharmiy? (b) Mini’ e piin ni ke uneg Satan ko fare thin ni yog nib togopuluw ko yul’yul’ ni tay Job ngak Jehovah?

⁶ Boch nga tomren ma kun tay reb e muulung u tharmiy. Ma ki non Satan ni gaar: “Be’ nib girdi’ e ra pag urngin ban’en ni fan e nge ayuweg e pogofan rok. Machane ga ra gad paam ngak nge amith downgin, ma ra yog nga owchem e thin nib togopuluw ngom.” Re thin ney e be dag ni ki uneg Satan boch e girdi’ ngay. Fare thin ni yog ni gaar, “Be’ nib girdi’ e ra pag urngin ban’en ni fan e nge ayuweg e pogofan rok,” e gathi kemus ni fan ko yul’yul’ ni i tay Job ya demtrug “be’” ni be liyor ngak Jehovah. Ma aram me pag Got Satan ni nge k’aring mit e malad nga dow Job nib gel e amith riy. (Job 2:1-8) Machane gathi kemus e skeng ni pi’ Satan ngak Job.

Mang e Gad Ra Fil ko N’en ni Rin’ Job

7. Uw rogon ni ke magawonnag e ppin rok Job nge fa dalip i pumoon e yul’yul’ rok Job?

⁷ Pi gafgow ni yib ngak Job e ki gafgow e ppin rok riy. Yam’ ni tay e bitir rorow nge pi n’en ni ba fel’ rogorow riy ni m’ay e k’aring e kireban’ ko ppin rok Job. Sana kari kireban’ ko gafgow ko m’ar ni ke tay e pumoon rok. Me tolul ngak Job ni gaar: “Mog, ka ga be par ni gab yul’yul’ ngak Got ni bod ka faram i yib? Mang ndab mog e thin nib kireb ngak Got nge mu’ ma ga yim’?” Ma aram me yib Eliphaz, Bildad, nge Zophar ni ba dake ngar pied e athamgil ngak Job. Machane, yad be yog boch e thin ni be ‘gafgownag’ Job. Yog Bildad ni ke yim’ e pi bitir rok Job ni bochan e kireb ni ur rin’ed. Ma ki yog Eliphaz ni gafgow ni be tay Job e aram e gechig ko denen ni rin’ kafram. Ma ki fith ko rayog rok Got ni nge ayuweg be’ nib yul’yul’ ngak, fa. (Job 2:9, 11; 4:8; 8:4; 16:2; 22:2, 3) Kari magawon laniyan’ Job, machane ke par nib yul’yul’. Riyul’ ni sana ba kireb Job ni ‘bochan e yog ni ir e ba fel’ ma be tay e kireb nga daken Got.’ (Job 32:2) Machane ke par nib yul’yul’ u nap’an e togopuluw.

8. Mang e kanawo’ ni ke pi’ Elihu ko piin ni ma fonownigey e ngiyal’ ney?

⁸ Gad ra guy ko mang e yog Elihu ngak Job. Ke motoyil Elihu u nap’an ni i tugthin fa dalip i pumoon nge Job. Yugu aram rogon nib bitir ngak Job nge fa dalip i pumoon, ma ke dag nib gonop. Ke tabab ni nge non ni be tayfan Job. Ke yog e pi n’en nib mat’aw ni rin’ Job. Machane ki yog ni yugu be guy Job rogon ni nge micheg ni dariy e kireb rok. Ma aram me micheg ngak Job ni yul’yul’ ni be tay ngak Got e rib ga’ fan. (Mu beeg e Job 36:1, 11.) Rib fel’ e re kanawo’ ney ni ke dag Elihu ya rayog ni nge fol e piin ma pow’iyey e ngiyal’ ney! Ke k’adan’, me motoyil nib fel’ rogon, me yog fel’ngin, me ki yog e thin ni be fonownigey.​—Job 32:6; 33:32.

9. Uw rogon ni ayuweg Jehovah Job?

⁹ Ma aram ma ri fel’ laniyan’ Job u nap’an ni non Jehovah ngak. Be gaar e Bible: “Me welthin Somol u fithik’ ba nanyor nge yib laman ngak Job.” Boor e deer ni ayuweg Jehovah Job riy ni nge nang fan me fonownag. Ere ke fol Job ko thin rok Jehovah me yog ni gaar: “Kug tamra’ nga urngin e tin ni kug weliy ma kug kolngan’ug u roy u fithik’ e fiyath nge awat.” Ma aram me yog Jehovah e thin ni ke damumuw ngak fa dalip i pumoon ni ba dake ur rogned e thin nra ayuweg Job. Thingari meybil Job ni fan ngorad. Ma aram e “tomren ni ke meybil Job ni fan ngak fa dalip i tafager rok, me gagiyegnag Somol Job nge yoor ban’en rok bayay, me gagiyegnag nge sul ngak Job urngin ban’en ni immoy rok ni ruw yay e ke mun ngay.”​—Job 38:1; 40:4; 42:6-10.

Uw Feni T’uf Jehovah Rodad?

10. Mang fan ni de thang Jehovah Satan ara fek owchen rok?

¹⁰ Jehovah e ir e Sunmiy gubin ban’en u tharmiy nge fayleng. Mang fan ni de fek owchen ko togopuluw ni tay Moonyan’ ngak? Manang Got ni faanra thang Satan fa fek owchen rok ma dabiyog ni nge tamilang e togopuluw ni tay Moonyan’. Yog Moonyan’ ni yugu aram rogon nib yul’yul’ Job ngak Jehovah ma dabiyog ni nge par nib yul’yul’ ni faanra par ni dariy ban’en rok. Me par Job nib yul’yul’ u nap’an fare skeng. Ma aram me yog Satan ni dariy be’ ni rayog ni nge par nib yul’yul’ ngak Got ni faanra yib e gafgow ngak. Ere i gafgow Job ni yugu aram rogon ni dawori flont machane i par nib yul’yul’ ngak Got ma ke micheg nib malulfith Satan. Ere uw rogon boch e pi tapigpig rok Got?

11. Uw rogon ni tamilangnag Jesus ni de riyul’ e thin ni togopuluwnag Satan?

¹¹ Ere, ra reb e tapigpig rok Got ma be par nib yul’yul’ ni demtrug ko mang togopuluw e be yib ngak ma ra dag ni de riyul’ e n’en ni yog Satan. Nap’an ni yib Jesus nga fayleng me micheg ni de riyul’ e thin ni togopuluwnag Satan ngak Got. Jesus e ba flont ni bod Adam ni chitamangidad. Yul’yul’ ni tay Jesus nge mada’ ko yam’ e ke micheg ni Satan e ba malulfith ma thin ni togopuluwnag e de riyul’.​—Rev. 12:10.

12. Mang e ba mil fan ni nge rin’ reb e tapigpig rok Jehovah?

¹² Yugu aram rogon, der tal Satan i skengnag e piin ni ma liyor ngak Jehovah. Ra bagadad ma ba puf rogon ma ba mil fan ngak ni nge dag nib yul’yul’ ngak Jehovah ni bochan e ba t’uf rodad ma gathi bochan e pi n’en ni be pi’ ngodad. Uw rogon u wan’dad e n’en nib mil fan ngodad? Thingar da nanged ni rib ga’ fan ni ngan liyor ku Jehovah ma ni par ni yiba yul’yul’ ngak. Gad manang ni ma pi’ Jehovah e athamgil ngodad ma ku ma gelnagdad ni ngad k’adan’dad ni bod rogon Job, ya manang ni dabi pi’ e skeng ngodad nge pag rogon.​—1 Kor. 10:13.

Satan​—En ni Toogor nge Tatogopluw

13. Mang e pi n’en ni bay ko babyor rok Job ni be tamilangnag murung’agen Satan?

¹³ Gin som’on ko Bible ni yoloy ni Hebrew e be tamilangnag murung’agen Satan ni togopuluw mat’awun Jehovah me bannag e girdi’ ni gubin. Ma gin tomur e thin ko Bible ni yoloy ni thin nu Greek, e gad ra pirieg boor e thin u murung’agen e togopuluw ni tay Satan ngak Jehovah. U lan fare babyor ni Revelation e gad be fil ni ke tamilang ni bay mat’awun Jehovah ni nge gagiyeg ma ra thang Satan. Fare babyor ni Job e be ayuwegdad ni nge tamilangan’dad ko togopuluw ni tay Satan. Nap’an ni un Satan ko muulung u tharmiy, ma de lemnag ni nge yog e sorok ngak Jehovah. Ya ba kireb e lem rok ma be finey ni nge rin’ ban’en nib kireb. Tomren ni yog e thin ni be kirebnag Job ma ke pi’ Got mat’awun ni nge skengnag, ma aram me “chuw moonyan’ u p’eowchen Somol.”​—Job 1:12; 2:7.

14. Uw rogon e ngongol rok Satan ngak Job?

¹⁴ Fare babyor ni Job e be tamilangnag ni Satan e ir e toogor ni der ma runguy e girdi’. Dan tamilangnag n’umngin nap’an ni skengnag Satan Job u thilin fa gal muulung ni tay e pi engel u p’eowchen Jehovah ni bay u Job 1:6 nge Job 2:1. Yul’yul’ ni tay Job ma aram me yog Jehovah ngak Satan ni gaar, “Mu towasariyeg ni nggu pagem ngam gad paam ngak ndariy tapgin, machane Job e ka be par nib yul’yul’ ngog ni bod ka faram i yib.” Machane de yog Satan ni thin ni yog nib togopuluw ngak Job e de riyul’. Ya ki yog ni ngkun skengnag Job bayay. Ere ke skengnag Moonyan’ Job u nap’an nib fel’ rogon nge ngiyal’ ni kari gafgow. Ma fanenikay Satan e girdi’ nib yul’yul’ ngak Got. (Job 2:3-5) Yul’yul’ ni ke tay Job e ke micheg ni Satan e ba malulfith.

15. Mang e ma rin’ e girdi’ ni ma togopuluw ko thin rok Got e ngiyal’ ney ni taareb rogon ngak Satan?

¹⁵ Satan e bin som’on e engel ni togopuluw ngak Got. Girdi’ ni ma togopuluw ko thin rok Got e yad bod e n’en ni rin’ Moonyan’. Ke kireb e lem rorad ya gubin ngiyal’ ma yad be yaliy thibngin be’ u lan e ulung nge piin piilal, nge fare Governing Body ara fare ulung ni ma pow’iy e ulung rok Got u fayleng. Boch e pi girdi’ ney ni ma togopuluw e dubrad ni ngar fanayed fithingan Jehovah. Dubrad ni ngar filed murung’agen Jehovah fa ra pigpiggad ngak. Yad bod e chitamangirad ni Satan ni ma guy rogon ni nge togopuluw ko girdi’ nib yul’yul’ ngak Got. (John 8:44) Aram fan ni der ma chag e pi tapigpig rok Jehovah ngorad!​—2 John 10, 11.

Ke Tolangnag Job Fithingan Jehovah

16. Uw rogon Jehovah u wan’ Job?

¹⁶ Ke n’uf Job e ngachal rok Jehovah. Yugu aram rogon ni rung’ag ni ke yim’ e bitir rok, ma de yog bugithin nib kireb u murung’agen Jehovah. Sana i lemnag Job nib kireb Got ni bochan e gafgow ni yib ngak, machane de kirebnag fithingan Jehovah. U lan reb e thin ni yog Job e gaar: “Ga ra gonop, ma aram e ke yib dugwen Somol u wan’um. Ra ngam llowan’ ma ngam pithigem ko kireb.”​—Job 28:28.

17. Mang e ke ayuweg Job ni nge par nib yul’yul’?

¹⁷ Mang e ke ayuweg Job ni nge par nib yul’yul’? Rib tamilang ni i par Job nib fel’ thilrow Jehovah u m’on ni yib e gafgow ngak. Yugu aram rogon ni gad manang ni dariy e mich riy ni manang Job e togopuluw ni tay Satan nga mat’awun Jehovah, i par nib yul’yul’. Ke gaar Job: “Nggu par nib yul’yul’ nge mada’ ko ngiyal’ ni ku gum’!” (Job 27:5, NW) Uw rogon ni ke fal’eg Job e tha’ u thilrow Jehovah? Dariy e maruwar riy ni ke felfelan’ ko pi thin ni ke rung’ag u rogon ni ke ayuweg Got e girdi’ rok ni bod Abraham, Isak nge Jakob. Ma ki nang Job rogon e pi fel’ngin Jehovah ko pi n’en ni ke sunmiy.​—Mu beeg e Job 12:7-9, 13, 16.

18. (a) Uw rogon ni ke yul’yul’ Job ngak Jehovah? (b) Uw rogon ni ngad folwokgad rok Job?

¹⁸ N’en ni ke fil Job e k’aring ni nge felfelan’nag Jehovah. Sana ke lemnag ni ba’ ban’en nib kireb ni ke rin’ girdien e tabinaw rok fa “kar damumuwgad ngak Got,” ma arfan ni i pi’ Job e maligach. (Job 1:5, NW) De yog Job bugithin nib kireb ngak Jehovah u nap’an ni yib e skeng ngak. (Job 10:12) Rib fel’ e kanawo’ ni ke pi’ Job ngodad! Ere thingar uda filed e thin nib puluw u murung’agen Jehovah nge pi n’en nib m’agan’ ngay. Ma ngauda folgad u kanawoen e tirok Got ban’en ni bod e fol Bible, nge muulung, nge meybil, ma ni machibnag fare thin nib fel’. Thingar ud ngongliyed urngin ban’en u gelngidad ni ngad n’ufed fithingan Got ni Jehovah. Bod rogon e yul’yul’ ni tay Job me felfelan’nag Jehovah, ere yul’yul’ ni ku ra tay e pi tapigpig rok Got e ngiyal’ ney e ku ra felfelan’nag gum’irchaen Jehovah. (Prov. 27:11) Yira weliy e re thin ney ko bin migid e thin ni gad ra fil.

Ka Ga Manang?

• Mang fan ni i skengnag Satan Job?

• Mang skeng e k’adan’ Job riy, ma mang e rin’?

• Mang e ra ayuwegdad ni ngad pared ni gad ba yul’yul’ ni bod Job?

• Mang e kad filed u murung’agen Satan ko fare babyor ni Job?

[Picture on page 10]

Fare thin ni murung’agen Job e be ayuwegdad ni ngad nanged ni Got e bay mat’awun ni nge gagiyeg

[Picture on page 12]

Uw rogon ni yira skengnag e yul’yul’ rom?