Ireray e Ngiyal’ ni Ngam Dugliy Ban’en

“Ara’ rogon ni sunumeg Got e girdi’; girdi’ e ni ngongliy ni bod yaan Got.”​—Genesis 1:27.

PI THIN nem e aram boch ko tin som’on e thin u Bible ni be weliy murung’agen e pi n’en nrib manigil ni ke sunmiy Got ni “ra taw nga ngal’an mab fel’ yaan” ni bod e gal nsom’on e girdi’ ni sunmiyrow ni yow ba flont ni aram Adam nge Efa. (Eklesiastes 3:11, NW) I gaar Jehovah Got ngorow: “Mu diyengow nge yoor pi fakmew, nge wer e piin ni owchemew nga gubin yang u fayleng ngar pired riy mi yad suwey. Nggu ta’mew ni gimew e ngam suweyew e nig, nge arche’, nge urngin e gamanman ni maloboch, ni tin ni ba ga’ nge tin ni ba achig.”​—Genesis 1:28.

Pi thin nem ni yog Got ngak e gal nsom’on e girdi’ e be dag e n’en nib m’agan’ Got ngay ni ngar rin’ew, ni aram e ngar diyengow nge yoor pi fakrow mi yow fal’eg e fayleng nge mang paradis ni fan ngorow nge pi fakrow. De dugliy Got ba ngiyal’ nra taw ngay mar m’ow. Ya micheg Got ban’en nrib manigil ni fan ngorow ni aram e faan yow ra dugliy ni ngar rin’ew e tin nib mat’aw mi yow fol rok Got, ma aram e rayog ni ngar pirew ni yow ba flont ni manemus u fithik’ e gapas nge felfelan’.

Machane, bochan nder folgow ma angin ni ke yib riy e gubin e girdi’ ni yad ma pilibthir mar m’ad. Rogon ni yog Job e: “Gadad gubin nni gargelegdad ni gadad meewar ma dariy gelngidad. Yafos rodad e ba ngoch ma ba sug ko oloboch.” (Job 14:1) Mang fan ni arrogon?

Be weliy e Bible fan ni gaar: “Denen e yib nga fayleng u daken taabe’, ma denen ni ngongliy e fek e yam’ i yib. Wenegan ni yib e af e yam’ ngak urngin e girdi’ nu fayleng, ni bochan e urngin e girdi’ ni ngongliy e denen.” (Roma 5:12) “Taabe’” ni aram Adam e ir e mel’eg ni nge th’ab e motochiyel rok Got. (Genesis 2:17) Bochan e n’en ni mel’eg Adam ni nge rin’ ma aram e daki yog ni nge par ni manemus u paradis u fayleng. Maku arrogon pi fak ni ki mul u pa’rad e re tow’ath nem ya ke af e denen nge yam’ ngorad. Ere gowa ke mul u pa’rad urngin ban’en. Gur, ka bay e athap nga bang?

Ngiyal’ Nra Beech Urngin Ban’en Bayay

Bokum biyu’ e duw nga tomren, min thagthag nga laniyan’ e en ni yoloy e psalm ni nge yoloy e pi thin ni baaray ni gaar: “Piin ni yad mmat’aw e bay ra pired u daken e binaw u fithik’ e gapas, me par ni taferad ni dariy n’umngin nap’an.” (Psalm 37:29) Mich riy nra lebug e tin ni micheg Got u Eden e kan weliy rogon ko Thin Rok Got ni gaar: “Bayi n’ag urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith. Ya tin kakrom ban’en e ke chuw.” Miki yog Got ni gaar: “Chiney e nggu thiliyeg urngin ban’en nge beech!”​—Revelation 21:4, 5.

Bochan ni gubin ban’en ma bay ngal’an, ma ke sum e re deer ni baaray: Wuin e ra beech urngin ban’en bayay ni nge micheg nriyul’ e n’en ni ke yog Got nra rin’? Pi Mich Rok Jehovah ni aram e piin ni kar ngongliyed e re ke babyor ney e ri yad be athamgil ni ngar ayuweged e girdi’ ngar nanged ni gad be par ko “tin tomren e rran,” ma kari chugur e ngiyal’ ni ke yog Got nra ‘beechnag urngin ban’en.’ (2 Timothy 3:1) Gamad be pi’ e athamgil nga lanin’um ni ngam fal’eg i fil e Bible nge yog nim nang e pi tow’ath n’em ni kan micheg nrayog ni ngki yog ngom. Ka gamad be pi’ e athamgil nga lanin’um ni ngam fol ko re thin ni baaray ni gaar: “Mu chelgad ngak Somol nguum meybilgad ngak e chiney ni ba’ ni kab chugur ngomed.” (Isaiah 55:6) Rogon nra yan i par e yafas rom gabul nge langlath e gur e ba milfan ngom, ma gathi be yan u rogon e wol rom!

[Blurb on page 8]

“Chiney e nggu thiliyeg urngin ban’en nge beech!”