GURUY NI 2

Mini’ Got?

1. Mang fan ni ngad liyorgad ngak Got?

Bin riyul’ e Got e Ir e Sunmiy urngin ban’en. De sum ma dariy e ngiyal’ nra mus. (Psalm 90:2) Ir e Yib fare thin nib fel’ rok ni bay u lan e Bible. (1 Timothy 1:11) Bochan ni ke pi’ e yafas ngodad, ma susun yigoo ir e ngad liyorgad ngak.—Mu beeg e Revelation 4:11.

2. Uw rarogon Got?

Dariy be’ ni ke guy Got ni bochan e ir reb e Kan, ma re n’ey e be yip’ fan nib thil rarogon e yafas rok ko yafas rodad u roy u fayleng. (John 1:18; 4:24) Machane, rayog ni ngad nanged pi fel’ngin Got ko pi’ n’en ni ke sunmiy. Bod ni gad ra guy wom’engin e gek’iy nge floras nib thilthil ma gad ra nang rogon e t’ufeg nge gonop rok. Ga’ngin e palpalth’ib ni ke sunmiy e be fil ngodad feni gel gelngin.—Mu beeg e Roma 1:20.

Faan gad ra beeg e Bible ma ku boor ban’en nrayog ni ngad filed u murung’agen pi fel’ngin Got. Bod ni be yog ngodad e pi’ n’en ni baadag nge pi n’en ni dabun, nge rogon e ngongol rok ko girdi’, nge n’en ni ma rin’ u nap’an ni ke buch ban’en.—Mu beeg e Psalm 103:7-10.

3. Bay fithingan Got, fa?

God’s name, Jehovah, in different languages

I yog Jesus ni gaar: “Chitamangimad ni ga bay u tharmiy: Ngan tay fan fithingam nib thothup.” (Matthew 6:9) Yugu aram rogon ni boor e liw rok Got ma kemus ni taareb e ngachal rok. Ra reb e thin ma rogon ni yima yog fithingan Got riy. Rogon ni yima yog ni thin nu Waab e “Jehovah.” Machane, boch e girdi’ e yad ma yog ni “Yahweh.”—Mu beeg e Psalm 83:18.a

Kan chuweg fithingan Got u boor ken e Bible ma kan tay e liw rok ni Somolb ara Got nga lon. Machane, nap’an nni yoloy e Bible min tay fithingan Got ngay ni sogonap’an 7,000 yay. I weliy Jesus fithingan Got ko girdi’ u nap’an ni i machibnag murung’agen ngorad.—Mu beeg e John 17:26.

Ngan yaliy fare video ni kenggin e Bay Fithingan Got Fa Dariy?

4. Ma lemnagdad Jehovah, fa?

A father and mother caring for their sick child — Got e bod e re matam ni baaray, ya be rin’ boch ban’en nra fel’ rogodad riy e chiney i yan nga m’on

Bochan ni ke yoor mit e gafgow, ma gur, re n’ey e be yip’ fan nder runguydad Got? Ma yog boch e girdi’ ni ma pagdad Got ngaud gafgowgad ni bochan e nge skengnagdad, machane de riyul’ e re n’ey.—Mu beeg e James 1:13.

Ke pi’ Got e puf rogon ko girdi’. Ere, gad ba felfelan’ nrayog ni ngad mel’eged ni ngad pigpiggad ngak. (Joshua 24:15) Machane, boor e girdi’ ni kar mel’eged ni ngaur gafgownaged boch e girdi’, ere aram fan ni ka be ulul e kireb. Ke dabuy Jehovah ni be guy e pi kireb ney ni be buch.—Mu beeg e Genesis 6:5, 6.

Jehovah e ir reb e Got ni ma lemnagdad. Baadag ni ngad felfelan’gad ko yafas rodad. Dabki n’uw nap’an me chuweg e gafgow nge piin ni yad be k’aring e pi gafgow ney. Machane, bay fan ni ke pag e pi gafgow ney ni nge par ndabi n’uw nap’an. Guruy ni 8 e gad ra fil riy ko mang fan ni be pag e pi gafgow ney.—Mu beeg e 2 Peter 2:9; 3:7, 13.

5. Uw rogon ni ngad chugurgad ngak Got?

Be piningdad Jehovah ni ngad chugurgad ngak u daken e meybil. Ma lemnagdad ni be’ nge be’. (Psalm 65:2; 145:18) Ba m’agan’ ngay ni nge n’ag fan e denen rodad. Manang gelngin e athamgil ni gad ma tay ni ngad felfelan’naged ni yugu aram rogon ni ka gad ma oloboch yu ngiyal’. Ere, yugu aram rogon ni gad e tadenen ma rayog ni nge fel’ e tha’ u thildad Got.—Mu beeg e Psalm 103:12-14; James 4:8.

Thingari gel e t’ufeg rodad ngak Jehovah ko t’ufeg rodad ngak yugu boch e girdi’ ni bochan e ir e ke pi’ e yafas ngodad. (Mark 12:30) Ra yoor ban’en nim fil u murung’agen Got ma ga be fol ko pi n’en ni be yog ngom, ma aram e ga be dag nib t’uf rom ma be chugur e tha’ u thilmew.—Mu beeg e 1 Timothy 2:4; 1 John 5:3.

a Psalm 83:18, NW: “Nge nangem e girdi’ ni fithingam e Jehovah ni gur e Th’abi Tolang u ga’ngin yang e fayleng.”

b Ken nib beech e Bible ni thin nu Waab e kan yoloy e re bugithin ney riy nib ga’ e letra riy. Thin ni bay ko bin som’on e page e be gaar, “Fithingan Got ni Hebrew e Yahweh (YHWH) ni kan piliyeg ni SOMOL ko thin ni waab.”