Rogon ni Ngad Pared ni Gad Ba Dar ko Fayleng

1. Mang e tamilangnag Jesus ko fare nep’ u m’on ni nge yim’?

FARE nep’ u m’on ni yim’ Jesus me dag nri be lemnag pi gachalpen nge tin ni bay i buch rorad boch nga m’on. Ki yibilayrad ngak e Chitamangin ni gaar: “Gathi gu be wenignag ngom ni ngam fekrad ngar chuwgad u fayleng, machane gu be wenignag ngom ni ngam ayuwegrad rok Faanem nib Kireb. Gathi yad e girdi’ nu roy u fayleng ni bod gag ni gathi gag e girdi’ nu fayleng.” (John 17:15, 16) Re meybil rok Jesus ney e ke dag riy gelngin nrib t’uf pi gachalpen rok nge feni ga’ fan fapi thin ni yog ngak boch i yad ni gaar: “Kug mel’egmed u fithik’ e girdi’ nu fayleng, ni gathi ki gimed boch i yad.” (John 15:19) Ere, ba tamilang nri baadag Jesus ni nge par pi gachalpen ni yad ba dar ko fayleng!

2. Mini’ e “girdi’ nu roy u fayleng” ni ke weliy Jesus murung’agen?

² Fapi “girdi’ nu roy u fayleng” ni ke weliy Jesus murung’agen e be yip’ fan e girdi’ ni yad be par ni yad ba dar rok Got, ma Satan nge lem rok e ir e be gagiyegnagrad. (John 14:30; Efesus 2:2; 1 John 5:19) Riyul’ ni faan gad ra ‘fager ko fayleng ma aram e kad manged toogor rok Got.’ (James 4:4) Ere, faanra gad baadag ni ngaud pared ni gad ba t’uf rok Got, ma uw rogon ni ngad pared ni gad ba dar ko fayleng ni yugu aram rogon ni gad be par riy? Gad ra weliy lal ban’en ni ngad rin’ed ni aram e: ngaud pared ni gad ba yul’yul’ ni fan nga Gil’ilungun Got u tan pa’ Kristus, ma gad be par u mathilin ngongolen e am ko re fayleng ney, ma gad siyeg e lem ko fayleng, ma nge yalen rogon e munmad rodad nge rogon yaadad, ma gad momnag e par rodad, ma don’ed nga dakendad urngin talin e cham ni ke pi’ Got ngodad.

NGAN PAR U MATHILIN NI YIB YUL’YUL’

3. (a) Uw rogon u wan’ Jesus ngongolen e am u nap’an ni immoy u fayleng? (b) Mang nrayog ni nga nog ni pi gachalpen Jesus ni kan dugliyrad e yad owchen Got? (Ba muun e footnote ngay.)

³ Nap’an ni immoy Jesus u fayleng ma da i un nga ngongolen e am, ya i tiyan’ nga i machibnag murung’agen Gil’ilungun Got ni aram e re am nra mang Pilung riy. (Daniel 7:13, 14; Luke 4:43; 17:20, 21) Aram fan ni gaar ngak Pontius Pilate ni ir e Am nu Roma: “Gin nsuwog e dariy u roy u fayleng.” (John 18:36) Pi gachalpen Jesus ni yad ba yul’yul’ e yad ma folwok ko n’en ni i rin’ ni aram e yad ma machibnag murung’agen e re Am nem ngak e girdi’ nu fayleng. (Matthew 24:14) I yoloy apostal Paul ni gaar: “Gamad owchen Got ni gamad be maruwel ni pa’ Kristus. Gamad be wenig ngomed ni pa’ Kristus ni: ‘Ngam piggad ngam manged fager rok Got.’”a​—2 Korinth 5:20, NW.

4. Uw rogon ni ke par e tin nriyul’ e Kristiano ni yad ba yul’yul’ ni fan nga Gil’ilungun Got? (Mu guy fare thin ni kenggin e “Tin Som’on e Kristiano e Ur Pared u Mathilin Ngongolen e Am.”)

⁴ Piin ni yad ma maruwel u reb e nam ni owchen e nam rorad e darur uned nga lungun fare nam ni yad be maruwel riy. Machane, birorad e am e yad ma tayfan nge tin ni yad be rin’. Ere, ku er rogon pi gachalpen Kristus ni kan dugliyrad ni yad “girdien yu tharmiy.” (Filippi 3:20) Bochan ni yad ba pasig i machibnag murung’agen Gil’ilungun Got, ma kar ayuweged bokum milyon “yugu boch e saf” rok Kristus kar “manged fager rok Got.” (John 10:16; Matthew 25:31-40) Pi girdi’ ney e yad e pi tamol’og rok Kristus ma yad ma ayuweg pi walagen ni kan dugliyrad. Gal ulung ney e yad ma ayuweg Gil’ilungun fare Messiah nib taareban’rad, ma aram fan ni yad ma par u mathilin ngongolen e am ko re fayleng ney.​—Mu beeg e Isaiah 2:2-4.

5. Uw rogon nib thil e ulung ni Kristiano e ngiyal’ ney ngak piyu Israel kakrom, ma mang e be dag nriyul’ ni aram rogon?

⁵ Tin riyul’ e Kristiano e yad ma par u mathilin ngongolen e am ni gathi kemus ni bochan e yad ba yul’yul’ ngak Kristus. Gathi gad bod piyu Israel kakrom ni pi’ Got reb e nam ngorad, ya gadad bang u ba ulung i walag ni bay u ga’ngin yang e fayleng. (Matthew 28:19; 1 Peter 2:9) Ere, faanra ngad taarebgad e pi am nu fayleng, ma aram e dabkiyog ni ngad wereged murung’agen Gil’ilungun Got nib puf rogodad, maku dab ki taareban’dad. (1 Korinth 1:10) Ma nap’an ni yira mahl mu ud lied pi walagdad ni kan tay chilen ngodad ni ngad t’ufeged yad. (John 13:34, 35; 1 John 3:10-12) Ere, aram fan ni yog Jesus ngak pi gachalpen ni ngar sulweged e sayden rorad nga tafen. Miki yog ngorad ni ngaur t’ufeged e pi toogor rorad.​—Matthew 5:44; 26:52; mu guy fare thin ni kenggin e, “Gu Ma Par u Mathilin Ngongolen e Am, Fa?”

6. Bochan ni kam ognagem ngak Got, ma uw rogon thilmew e am?

⁶ Gadad e tin nriyul’ e Kristiano e gathi girdi’, fa ulung rorad, fa reb e nam e kad ognaged gadad ngak, ya Got. Be gaar e 1 Korinth 6:19, 20: “Gathi gimed e mmil famed ngomed, yi Got e mmil famed ngak; ke chuw’iymed nib tolang puluwmed ni pi’.” Ere, yugu aram rogon ni ma pi’ e piin ni yad ma folwok rok Jesus e tax, ma yad ma tayfan e “pilung” ni be yip’ fan e pi am, machane ku yad ma “pi’ ngak Got e tirok Got ban’en.” (Mark 12:17; Roma 13:1-7) Re n’ey e ba muun ngay e liyor, nge t’ufeg, nge fol u fithik’ e yul’yul’ ngak Got. Maku yad ma pag farad ni fan ngak Got.​—Luke 4:8; 10:27; mu beeg e Acts 5:29; Roma 14:8.

NGAN SIYEG E “LEM KO GIRDI’ NU FAYLENG”

7, 8. Mang fare “lem ko girdi’ nu fayleng,” ma uw rogon ni be “gagiyegnag” e girdi’ e ngiyal’ ney?

⁷ Ku reb i fan ni piin Kristiano e gathi ka yad e girdi’ nu fayleng, e bochan ni yad ma siyeg rogon e lem nib kireb ko girdi’ nu fayleng. I yoloy Paul ni gaar: “Gadad e gathi rogon e lem ko girdi’ nu fayleng e ir e ke yog ngodad; ya rogon e lem ni yib rok Got e ir e ke yog ngodad.” (1 Korinth 2:12, NW) Miki yog ngak piyu Efesus ni gaar: “Re ngiyal’ i n’em e um marod u kanawoen e . . . fayleng; um folgad rok e en ni ir e be pi’ gelngin fare lem ni be gagiyegnag e piin ndarir folgad rok Got.”​—Efesus 2:2, 3, NW.

⁸ Rogon e “lem” ko girdi’ nu fayleng ni dabiyog ni ngan guy e ma k’aring e girdi’ ni ngar togopuluwgad ngak Got, mar adaged e “tin nib tagan ban’en ni yima ar’arnag, ni tin nra guy e girdi’ ma yad ba adag ni nge yog ngorad.” (1 John 2:16; 1 Timothy 6:9, 10) “Gelngin” e lem ko girdi’ nu fayleng e ma m’ug ko dowef ni tadenen, mab sabanban, ma der tal ni bod e nifeng ni gubin yang ma bay riy. Maku re lem ney ni be “gagiyegnag” e girdi’ e ma k’aringrad ni ngar rin’ed boch ban’en nde m’agan’ Got ngay ni bod e lem ni fel’ ngak, nge tolangan’, nge chogow, ma dubrad ni nge yog be’ e n’en ni ngar rin’ed, ma yad ma togopuluw ngak e piin ni yad ma yog e thin. Ere, lem ko girdi’ nu fayleng e ma suguy laniyan’ e girdi’ ko kireb.​—John 8:44; Acts 13:10; 1 John 3:8, 10.

9. Uw rogon nrayog ni nge suguy e lem ko girdi’ nu fayleng lanin’dad?

⁹ Rayog ni nge suguy e lem ko girdi’ nu fayleng lanin’um, fa? Rayog ni faanra dab mu kol ayuw u rogon ni ga ma lem. (Mu beeg e Proverbs 4:23.) Piin ni gad ma chag ni gowa yad e girdi’ nib fel’, machane de t’uf Jehovah rorad, e rayog ni ngar afweged e re lem ney ngodad. (Proverbs 13:20; 1 Korinth 15:33) Ku rayog ni nge af e biney e lem ngodad u daken boch e babyor nib kireb, nge yu yang ko Internet ni yima dag yaan e puwlag riy, nge machib ko piin ni kar digeyed e bin riyul’ e liyor ma kar chelgad kar togopuluwgad ngay, nge boch ban’en ni yima chuweg e chalban ngay nib kireb, nge gosgos ni yima tagenging riy.

10. Uw rogon ni ngad siyeged e lem ko girdi’ nu fayleng?

¹⁰ Uw rogon ni ngad siyeged e lem ko girdi’ nu fayleng mu ud pared ni gad ba t’uf rok Got? Thingar ud maruwelgad ko pi n’en ni ke pi’ Jehovah ni nge ayuweg e michan’ rodad, ma gad be ning gelngin nib thothup ni nge ayuwegdad. Ba gel Jehovah ngak Moonyan’ nge re fayleng ney ni be gagiyegnag. (1 John 4:4) Ere, rib ga’ fan ni ngaud meybilgad ni gubin ngiyal’, ya nge yag nda pared ni gad ba chugur ngak Jehovah!

NGE YALEN E MUNMAD RODAD NGE YAADAD

11. Mang e ke rin’ e lem ko girdi’ nu fayleng nga rogon e munmad?

¹¹ Re lem ney e ku ma gagiyel u rogon e munmad ku be’, nge rogon ni ma fal’eg yaan, nge rogon ni nge par nib beech. Boor e nam ni dakuriy yalen e munmad riy. I yog reb e pumoon ni ku ma weliy boch ban’en u TV ni bayi munmun me yan e piin ni ppin ni yad ma pied yad nchuway’ ndakuriy e mad u dakenrad. Mus ko piin buliyel ni ki af e biney e ngongol ngorad. I yog reb e shimbung ni gaar, “Ke yoor yang u dowey ni be m’ug, ya dakuriy yalen e munmad.” Ku bay ba mit e munmad ni ma tay boch e girdi’ ni dariy yaramen ni be dag ni yibe togopuluw ma dakuriy fay u wan’uy.

12, 13. Mang boch kenggin e motochiyel u Bible ni nge gagiyegnag rogon e munmad rodad nge rogon ni gad ma fal’eg yaadad?

¹² Bochan ni gadad e pi tapigpig rok Jehovah, ma susun ni gubin ngiyal’ ni nge yalen e munmad rodad. Gubin ngiyal’ nthingar u don’ed e mad “nrogon yalen e munmad” ni ma tay e pumoon nge ppin nib chag e “ngongol nib fel’” ngay ni be dag ni gad “girdien Got.” Machane, n’en ni ngad lemnaged e dab da faled owchen e girdi’ ngodad, ya ngad “pired ni [gadad] ba t’uf rok Got.” (1 Timothy 2:9, 10; Jude 21) Gad baadag ni nge par lanin’dad nib pidorang, “ni aram e pidorang ndabi m’ay . . . , ni ir e ba ga’ fan u mit Got.”​—1 Peter 3:3, 4. 

¹³ Ku dab mu pagtalin ni rogon e munmad rodad nge rogon yaadad ni gad ma fal’eg e rayog ni nge k’aring e girdi’ ni ngar adaged fa ra dabuyed e bin nriyul’ e liyor. Fare bugithin ni Greek ni kan pilyeg ni “yalen” e faanra ngan fanay ko ngongol ma be yip’ fan ni ngan tayfan e girdi’ nge n’en ni yad be lemnag. Ere, ba ga’ fan ni nga u darod nga laniyan’ boch e girdi’, ma gathi gadad. Ma bin th’abi ga’ fan e ngaud ted fan Jehovah nge girdi’ rok, mu ud daged nriyul’ ni gadad e pi tapigpig rok ni aram e ngaud rin’ed urngin ban’en ni fan e “nga nog e sorok riy ngak.”​—1 Korinth 4:9; 10:31; 2 Korinth 6:3, 4; 7:1.

14. Mang boch e deer ni ngad fithed gadad riy ni bay rogon nga yaadad nge rogon ni gadad ma ayuweg dowdad?

¹⁴ Ri kub ga’ fan ni nge yalen e munmad rodad, nge rogon yaadad, ma ngad beechgad u nap’an ni gad be un ko machib nge muulung. Ere, ngam fithem ni nge lungum: ‘Gu ma fal mit e girdi’ ngog ni bochan yaag nge rogon ni gu ma ayuweg dowag, fa? Gu ma k’aring e tamra’ ngak boch e girdi’ ni bochan yaag, fa? Gu ma lemnag ni kab ga’ fan ni nggu rin’ e tin ni gu baadag ko bin ni nge yag boch e maruwel ngog u lan e ulung, fa?’​—Psalm 68:6; Filippi 4:5; 1 Peter 5:6.

15. Mang fan ni gathi gubin ban’en u rogon e munmad ko Kristiano, nge rogon yaarad, nge rogon ni yad ma ayuweg dowrad ni bay e motochiyel riy u Bible?

¹⁵ Gathi gubin ban’en u rogon e munmad ko Kristiano, nge rogon yaarad, nge rogon ni yad ma ayuweg dowrad ni bay e motochiyel riy u Bible. Der lemnag Jehovah ni nge gagiyegnagdad u gubin ban’en nib muun ngay e tin ni gad ma mel’eg nge rogon ni gad ma lem. Ya baadag ni nge ilal e lem rodad ma gad bod e piin ni yad ma fol ko pi kenggin e motochiyel nu Bible ma “kar filed rogon ni ngar nanged e tin nib fel’ ko tin nib kireb.” (Hebrews 5:14) N’en th’abi ga’ fan e baadag ni ngad rin’ed gubin ban’en u fithik’ e t’ufeg rodad ngak nge girdi’. (Mu beeg e Mark 12:30, 31.) Yugu aram rogon, ma boor mit e mad nrayog ni ngad chuwgad ngay nge rogon ni ngad fal’eged yaadad nrogon nib puluw ko thin nu Bible. Rayog ni ngan guy nriyul’ e re n’ey ni bochan e ra muulung e girdi’ rok Jehovah nga taabang ni kar bad u boor e nam, ma boor mit e mad ni kar chuwgad ngay nge raen.

NGE MOM E PAR RODAD

16. Uw rogon nib togopuluw e lem ko girdi’ nu fayleng ko n’en ni i machibnag Jesus? Mang boch e deer ni ngad fithed gadad riy?

¹⁶ Lem ko girdi’ nu fayleng e rayog ni nge bannagey, ma bokum milyon e girdi’ ni be waliyrad ni ngar nameged e salpiy nge chugum ni boor, ya ngar felfelan’gad. Machane, i gaar Jesus: “Bin riyul’ e yafos ku be’ e gathi ni ngongliy ko pi n’en ni ir e mmil suwon ngak faanem, ndemtrug rogon feni yoor ban’en rok.” (Luke 12:15) Gathi be yog Jesus ni nge par be’ nri dakuriy ban’en rok. Ya be yog nra yag e yafas nge felfelan’ ngak e piin ni “kar pirieged u lanin’rad ni kar gafgowgad ndabisiy ni nge yog Got ngorad” nge piin ni kar momnaged e par rorad, ara kar pared ni tirok Got ban’en e yad be m’oneg u lan e yafos rorad. (Matthew 5:3; 6:22) Ere, ngam fithem ni nge lungum: ‘Kari mich u wan’ug e n’en ni yog Jesus, fa kug par ni en ni “chitamangin urngin e malulifith” e ir e be gagiyegnigeg? (John 8:44) Mang e be m’ug ko thin rog, nge n’en ni gu be nameg, nge n’en nib m’on u wan’ug, nge rogon kanawoen e yafas rog?’​—Luke 6:45; 21:34-36; 2 John 6.

17. Mang boch e tow’ath ni ke yag ngak e piin ni kar momnaged e par rorad?

¹⁷ I gaar Jesus: “Gonop rok Got e ke m’ug nib riyul’ ko tin kan guy ni ke yib riy.” (Matthew 11:19) Am lemnag boch e tow’ath ni ke yag ngak e piin ni kar momnaged e par rorad. Yad ba felfelan’ ko pigpig ni yad ma tay ni fan nga Gil’ilungun Got. (Matthew 11:29, 30) Ya kar siyeged boch ban’en ni ma magafan’uy ngay nde ga’ fan. (Mu beeg e 1 Timothy 6:9, 10.) Ke yoor ban’en nrayog ni ngar rin’ed e tabinaw rorad nge piin Kristiano u taabang ni bochan e ke fel’ u wan’rad e tin ni bay rorad. Maku reb e ke fel’ e chuchuw rorad. (Eklesiastes 5:12) Yad ba felfelan’ ni ngar pied ban’en ku be’, ma yad ma rin’ u rogon nrayog rorad. (Acts 20:35) Ke “yog ni i ilal e l’agan’” rorad, ma ke gapas lanin’rad, ma ke fel’ u wan’rad e tin ni bay rorad. (Roma 15:13; Matthew 6:31, 32) Ireray boch e tow’ath ndabiyog puluwon!

NGA DON’ED NGA DAKENDAD GUBIN E “TALIN E CHAM KU GOT”

18. Uw rogon ni ke weliy e Bible rogon e toogor rodad, nge pi ban rok, nge rogon ni gad be “cham” ngak?

¹⁸ Piin ni yad ba yul’yul’ ngak Got e baadag Satan ndab kur felfelan’gad ma dabi yag e yafas ni manemus ngorad. Machane bay ban’en ni be ayuwegrad ni nge dabi kirebnag Satan e michan’ rorad. (1 Peter 5:8) I yog Paul ni gaar: ‘Gadad e gathi gadad be cham ngak e girdi’, ya gadad be cham nga gelngin e kan nib kireb, ni pi kan ni yad e yad be gagiyeg, nge gelngin e kan u lan e lang ko ngiyal’ ney nib talumor.’ (Efesus 6:12) Fare bugithin ni Greek ni kan pilyeg ni “cham” e be yip’ fan e thal. Ma fapi thin ni “gelngin e kan nib kireb” nge “pi kan ni yad be gagiyeg” nge “gelngin e kan u lan e lang” e be dag ni cham ni be tay e pi kan nu lan e lang ngodad e kar yarmiyed kar ted nib fel’ rogon.

19. Mu weliy rogon fapi talin e cham ni bay ko Kristiano.

¹⁹ Yugu aram rogon ni bay boch ban’en ni gad ba meewar riy, machane rayog ni ngad gelgad ngak Satan. Uw rogon? Aram e nga don’ed nga dakendad gubin e pi “talin e cham ku Got.” (Efesus 6:13) Kan weliy u Efesus 6:14-18 murung’agen e pi talin e cham nem ni gaar: ‘Mpired ni kam fal’eged rogomed: tin riyul’ e thin e ir e nge mang leed romed ni kam chichiiyed nga lukngumed; ma tin nib mat’aw e nga mon’ed nga dakenmed, ni aram e fa gin’en ni ma ing e salthaw nga daken ngorongoren, ma rogon ni kam fal’eged rogomed ni ngam weliyed e Thin Nib Fel’ ni murung’agen e gapas e nge mang sus romed. Gubin ngiyal’ ni nguum marod ma gimed be fek e michan’ romed ngak Kristus ni ir e nge mang fa gin’en ni yima mith nga fon ko cham; yi ir e rayog ni ngam piliged ngay urngin gan e gat’ing ni be yik’ ni be pag Faanem nib Kireb ngomed. Mi gimed fek kanawoen ni ma thap e girdi’ ngak Got nge mang urwach [ara athap] romed, ma thin rok Got e nge mang sayden ni ke pi’ gelngin Got nib thothup ngomed. Mu rin’ed urngin e pi n’ey u fithik’ e meybil, nguum weniggad ngak Got nge ayuwegmed. Gubin ngiyal’ ni nguum meybilgad nrogon ni be pateg gelngin Got nib thothup nga lanin’med.’

20. Uw rogon ni gad ba thil ko salthaw nu fayleng?

²⁰ Fapi talin e cham nib fanathin ni bay rodad e Got e ke pi’. Ere, faanra i par u dakendad ni gubin ngiyal’, ma ra ayuwegdad. Piin Kristiano e yad ba thil ko salthaw nu fayleng, ya salthaw nu fayleng e ma cham me taw nga ba ngiyal’ me toffan. Machane, piin Kristiano e yad be un nga reb e cham ndabi tal nge yan i mada’ ko ngiyal’ ni ke thang Got e re fayleng rok Satan ney me kalbusnag gubin e pi kan nib kireb. (Revelation 12:17; 20:1-3) Ere, faanra ga be athamgil ni ngam gel ko pi n’en ni gab meewar riy ara ngam siyeg boch e ar’ar nib kireb, ma dab mu tal ya gadad gubin nthingar da ‘gelnaged’ gadad ya nge yag ni ngad pared ni gad ba yul’yul’ ngak Jehovah. (1 Korinth 9:27) Machane, ngiyal’ ndarud uned ko re cham ney e aram e ngiyal’ ni ngad kol ayuwgad.

21. Uw rogon nrayog ni ngad gelgad ko cham ni gad be tay?

²¹ Dabiyog ni ngad gelgad ko re cham ney u gelngidad. Aram fan ni yog Paul ni “gubin ngiyal’ ni nguud meybilgad” ngak Jehovah nrogon ni be pateg gelngin nib thothup nga lanin’dad. Kub ga’ fan ni ngaud motoyilgad ngak Jehovah u daken e fol Bible, ma gad be chag ngak pi walagdad u lan e ulung ni ku yad boch e “salthaw” ni yad be cham nga gelngin Satan ni bod gadad! (Filemon 2; Hebrews 10:24, 25) Piin ni yad ba yul’yul’ u gubin e pi n’ey e gathi kemus ni yad ra gel ko cham ni yad be tay, ya ku rayog ni ngar ayuweged e michan’ rorad u nap’an ni keb boch e skeng ngorad.

MU FAL’EG ROGOM NI NGAM WELIY E TIN KE MICHAN’UM NGAY

22, 23. (a) Mang fan ni gubin ngiyal’ ma ngad fal’eged rogodad ni ngad weliyed e tin ke michan’dad ngay? Mang boch e deer ni ngad fithed gadad riy? (b) Mang e gad ra fil ko bin migid e guruy?

²² I yog Jesus ni gaar: “Kug mel’egmed u fithik’ e girdi’ nu fayleng, ni gathi ki gimed boch i yad; ereray fan ni ke fanenikaymed e girdi’ nu fayleng.” (John 15:19) Ere, piin Kristiano e gubin ngiyal’ ni ngar pared ni kar fal’eged rogorad ni ngar weliyed e tin ke michan’rad ngay u fithik’ e sumunguy nge tayfan. (Mu beeg e 1 Peter 3:15.) Am fithem ni nge lungum: ‘Gu manang ko mang fan ni yu ngiyal’ e ma rin’ e Pi Mich Rok Jehovah boch ban’en nib thil ko n’en ni ma lemnag e girdi’, fa? Faan gu ra mada’nag ban’en ni aray rogon, ma gur, kari mich u wan’ug nriyul’ e n’en ni be yog e Bible nge fare tapigpig nib yul’yul’ mab gonop? (Matthew 24:45; John 17:17) Faanra ke t’uf ni nggu rin’ e tin nib m’agan’ Jehovah ngay, ma gu ra rin’ fa danga’? Ma faan gu ra rin’, ma gu ra felfelan’, fa?’​—Psalm 34:2; Matthew 10:32, 33.

²³ Yugu aram rogon ni gad be gay rogon ni ngad pared ni gad ba dar ko fayleng, machane ku bay boch e skeng ni ma yib ngodad. Kad weliyed faram ni ma gay Moonyan’ rogon ni nge waliy e pi tapigpig rok Jehovah ni ngar sulod ko fayleng bayay u daken boch ban’en ni yima chuweg e chalban ngay. Ere, uw rogon ni ngad mel’eged boch ban’en nib fel’ ni nge chuweg e chalban rodad ma dabi magawonnag e nangan’ rodad? Aram e n’en ni gad ra fil ko bin migid e guruy.