Pi Reference ni Fan ko fare Babyor ni Pi N’en ni Ma Rin’ e Piin Kristiano nge Machib ni Yad Ma Tay
March 6-12
BOCH E THIN NIB GA’ FAN KO THIN ROK GOT | JEREMIAH 1-4
“Bay Ug Un Ngom Nguug Yoror Rom”
Um Par ni Gab Od ni Bod Jeremiah
4 Ngiyal’ ni yog Jehovah ngak Jeremiah ni nge mang damit e ke chugur ko 25 e duw rok. (Jer. 1:1, 2) I lemnag ni kaygi bitir ni nge yan i non ngak e piin piilal ko fare nam nib tolang e liw rorad. (Jer. 1:6) Bay e thin ni nge weliy ngak e pi prist, nge pi profet ni googsur, nge piin ni yad ma gagiyeg ni kub muun ngay e piin ni ‘kar pied nga daken yad be rin’ e n’en ni yad baadag’ ma ‘dakuriy e sul rorad nga tomur.’ Re thin nem e murung’agen e damumuw rok Got nge pufthin ni bayi tay ko girdi’. (Jer. 6:13; 8:5, 6) Fare tempel rok Solomon nib chugur ko aningeg e chibog ni immoy ni tagil’ e liyor e yira buthug. Ma yira fek e girdi’ nu Jerusalem ngu Judah ni kalbus me yan i par ni dakuriy be’ riy. Ere ba tamilang ni fapi thin ni ka nog ngak Jeremiah ni nge weliy e rib ga’ fan.
Mini’ E Ga Ra Fol Rok—Got Fa Girdi’?
18 Ke yog Got ngak fare profet ni Jeremiah ni gaar: “Bay ug un ngom nguug yoror rom.” (Jeremiah 1:8) Uw rogon ni ra ayuwegdad Jehovah ko gafgow e ngiyal’ ney? Rayog ni nge pi’ Jehovah reb e tapuf oloboch nib fel’ laniyan’ ni bod Gamaliel. Ara reb e rayog ni nge chuweg be’ nib tolang e liw rok mab kireb me tay yugu be’ nib manigil nga lon. Machane, yu ngiyal’ e ma pag Jehovah e girdi’ rok ni ngaur gafgowgad. (2 Timothy 3:12) Yugu aram rogon ni ma pagdad Got ni ngan gafgownagdad, machane ra pi’ gelngidad nrayog ni ngad athamgilgad ko gafgow ni be yib ngodad. (1 Korinth 10:13) Demtrug e n’en nra buch machane dabi maruwaran’dad ko re n’ey: Piin ni yad ma togopuluw ngak e girdi’ rok Got e yad be togopuluw ngak Got, ere ba mutrug ndab ra gelgad.
jr-E 88 ¶14-15
“Bay Gu Pasignag Laniyan’ e Piin ni Ke Aw Porowrad”
GA RA PASIGNAG LANIYAN’ E PIIN NI KE AW POROWRAD, FA?
14 Ba ga’ fan ni ngad tedan’dad u rogon nni pi’ e athamgil nga laniyan’ Jeremiah nge rogon ni ki yag ni nge pi’ e athamgil nga laniyan’ e “piin ni ke aw porowrad.” (Jer. 31:25) Ba ga’ ni Jehovah e ir e ke pi’ e athamgil nga laniyan’ Jeremiah. Am lemnag rogon e athamgil nra yib nga lanin’um u nap’an ni ga ra rung’ag e pi thin ni baaray nra yog Jehovah ngom ni gaar: “‘Daba’ e kug gagiyegnigem ni nge yog ni ngam togopluw ngorad; bay mu bod ba binaw ni ka ni yororiy ni fan ko mahl. . . . Dabiyog rorad ni ngar gelgad ngom, ya bay gu un ngom nguug yoror rom. I gag Somol e gu be non.’” (Jer. 1:18, 19) Ba puluw fan ni yog Jeremiah ni Jehovah e aram e ‘cha’ ni ma yoror rok ma ma pi’ gelngin; maku ma ayuweg u fithik’ e gafgow.’—Jer. 16:19.
15 Ba ga’ fan ni ngan lemnag fare thin ni yog Jehovah ngak Jeremiah ni gaar: “Bay gu un ngom nguug yoror rom.” Faan ga ra fal’eg i beeg e re thin ney, ma gur, rayog ni ngam nang e n’en nrayog ni ngam rin’ u nap’an nra t’uf e ayuw rok be’, fa? Ba fel’ ni ngam nang ni bay reb e walag ni Kristiano ara reb e girdi’ rom nrayog ni nge ayuwegem u nap’an nra t’uf e ayuw rom. Machane, n’en nib ga’ fan e nap’an nra t’uf e ayuw rom, ma riyul’ nra ayuwegem facha’, fa danga’. Yugu demtrug e magawon, machane n’en nth’abi ga’ fan riy e ngam rin’ e n’en ni rin’ Got ngak Jeremiah u nap’an ni ke mada’nag e magawon, ni aram e ngam tay e tayim ni fan ngak faen ni ke magawon laniyan’. Ma ra munmun ma rayog ni nga mog boch ban’en nra pi’ e athamgil nga laniyan’, machane de t’uf ni nga mog boor ban’en. Yu ngiyal’ e yugu aram rogon ni buchuuw e n’en ni ka mog, machane faanra thin ni ka mog e ban’en nrayog ni nge pi’ e athamgil nga laniyan’ faen ni ke mulan’, mab ga’ angin nra yib ngak. Dariy fan ni nga mog boch e thin ni bod rogon be’ ni ma non nib fel’ nifingin l’ugun ko welthin. Ya rayog ni kemus ni nga mog boch ban’en ni be m’ug riy nib ga’ fan u wan’um rarogon facha’ maku be m’ug riy e t’ufeg ni bay u thilin e piin Kristiano. Yu bugithin ni aray rogon e ba mudugil nra yib angin ngak faen ni yibe yog ngak.—Mu beeg e Proverbs 25:11.
Ngan Fal’eg i Gay Boch Ban’en nib Ga’ Fan ko Thin rok Got
Tin nib Ga’ Fan ko Babyor rok Jeremiah
2:13, 18. L’agruw i ban’en nib kireb e ke rin’ e girdi’ nu Israel ndar yul’yul’gad. Kar paged Jehovah ni aram e en ni ma tow’athnagrad, ma ma pow’iyrad, maku ma yoror rorad. Ma kar kered boch e luwed ni fan ngorad ni pi luwed nem e be yip’ fan ni kar guyed rogon ni ngar manged ngak e pi salthaw nu Egypt nge Assyria. Ere ku arrogon e ngiyal’ ney ni faanra kad paged e bin riyul’ e Got ni ir “fare alublub nib machalbog e ran riy” ni bochan e ba fel’ u wan’dad e llowan’ ko girdi’ nge boch e ngongol ko am, ma aram e bod ni kad “kired boch e low, ni low ni ke yabaal e but’ u yu yang riy.”
Tin nib Ga’ Fan ko Babyor rok Jeremiah
4:10, BT; 15:18—Uw rogon ni ke m’ug ni gowa ke “bannag” Jehovah e girdi’ rok? U nap’an Jeremiah ma immoy boch e “profet” ni yad ma lifith lʼugunrad. (Jeremiah 5:31, BT; 20:6; 23:16, 17, 25-28, 32) Machane, de talegrad Jehovah ni nge dab ra machibnaged e pi thin nem nde riyul’ ngak e girdi’.
March 13-19
BOCH E THIN NIB GA’ FAN KO THIN ROK GOT | JEREMIAH 5-7
“Kar Talgad i Rin’ e Tin nib M’agan’ Got Ngay”
w88-E 4/1 11-12 ¶7-8
Be Weliy Jeremiah Murung’agen e Pufthin rok Got Ndabun e Girdi’ ni Ngar Motoyilgad Ngay
7 I yog Jehovah ngak Jeremiah ni yugu aram rogon nra togopuluw e girdi’ ngak, machane “dabiyog rorad ni ngar gelgad” ngak. (Jeremiah 1:19) Ere mang fan nra togopuluw e pi pilung nu Judah nge pi tolang rorad ngak Jeremiah? Fan ni kar togopuluwgad ngak e bochan ni thin ni be machibnag ngorad e be togopuluw nga rogon e liyor ni yad be tay ndaki m’agan’ Jehovah ngay. Machane de t’uf ni nge cham Jeremiah ngorad ya ‘yad ba gelan’ ma dubrad ni ngar motoyilgad ko thin rok; ur minmingad ko n’en ni yog Got ngak ni nge yog. Gubin e girdi’, ni piin fel’ rogon nge piin gafgow, ni yad ma guy rogon ni nge yag e salpiy ngorad u fithik’ e sasalap; mus ko profet nge prist [ni yad e ba milfan ngorad ni ngar yal’uweged e ngongol nde mat’aw ni be rin’ e girdi’ ni bochan e nge fel’ thilrad Got] ni yad ma bannag e girdi’.’—Jeremiah 6:10, 13.
8 Riyul’ ni yad be pi’ e maligach, machane kemus ni yad be rin’ ni bochan e ban’en ni yad manang nthingar ra rin’ed, ya bang ko liyor rorad ngak Got. Machane gathi yad be rin’ ni be yib u gum’ircha’rad. Ere, ba ga’ fan u wan’rad ni ngar pied e pi maligach nem ko bin ni ngar yal’uweged e ngongol rorad nib kireb. Maku reb e, be bannag e pi tayugang’ ko teliw nu Jew e girdi’ ni ngar lemnaged ni gubin ban’en mab fel’ rogon. Ere yad be yog ni, “Gubin ban’en nib fel’ rogon.” Machane bin riyul’ riy e dariy e gapas. (Jeremiah 6:14; 8:11, BT) Ere yad be bannag e girdi’ ni ngar lemnaged nib fel’ thilrad Got. Yad be lemnag ndariy ban’en ni nge magafan’rad ngay, ni bochan e yad e girdi’ rok Jehovah, ma yad be par ko fare binaw nib thothup ni aram Jerusalem ni bay fare tempel riy. Ere gur, ba fel’ e re n’ey u wan’ Jehovah?
w88-E 4/1 12 ¶9-10
Be Weliy Jeremiah Murung’agen e Pufthin rok Got Ndabun e Girdi’ ni Ngar Motoyilgad Ngay
9 Ke yog Jehovah ngak Jeremiah ni nge yan i sak’iy u langan e garog ko fare tempel me weliy ngak e girdi’ ni kar bad ni nga ranod nga tempel e thin rok Got ni gaar: “Dab ki mich u wun’med e pi thin ni baaray nde riyul’ ni ke lunguy, Ereray fare tempel rok Somol, ereray fare tempel rok Somol, ereray fare tempel rok Somol! . . . ‘Mu sapgad, ke pagan’med ko thin nde riyul’.’” Piyu Jew e be l’agan’rad nga boch ban’en nrayog ni ngar guyed ma gathi bochan e michan’ rorad, ere aram fan ni yad be uf ni bochan fare tempel. Kar paged talin fapi thin ni yog Jehovah ngorad ni gaar: “Tharmiy e tagil’ig, ma fayleng e gu ma gifeg e rifrif u eg ngay. Ere be mang e mit i naun e ngam toyed ni nggu par ngay?” Jehovah ni ir e En Th’abi Tolang u ga’ngin yang e palpalth’ib e de t’uf ni ngan toy reb e tempel ni fan ngak ni yugu demtrug feni manigil ba naun.—Jeremiah 7:1-8; Isaiah 66:1.
10 Miki ulul Jeremiah ni be tamilangnag boch e thin nrayog ni nge kirebnag laniyan’ e pi girdi’ ney ni be gaar: “Gimed be moro’ro’, ma gimed be thang e pogofan, ma gimed be par e pumoon nge ppin ni gathi mabgol romed, ma bay mmicheged nga fithingan Got ni ngam weliyed e tin riyul’ mi gimed lifith l’ugunmed, ma gimed be pi’ e gamanman ni maligach ngak Baal, ma gimed be meybil ngak yugu boch e kan ni aram e gimed be tay farad, ni bogi kan nda mu nanged murung’agen. . . . [ma be] lungumed, Dab ki buch ban’en rodad!” Be lemnag e pi Jew ni bochan ni yad e piin ni ke ‘mel’egrad Got ni ngar manged girdien,’ ma demtrug e ngongol ni ngar rin’ed mab m’agan’ Jehovah ngay, ni bochan e yad be pi’ e maligach nsusun ni ngan pi’. Machane, faanra yad be lemnag ni Jehovah e bod rogon ba matam ni ma tay feni fel’ bbitir rok ni kari maagirag rok, ma aram e bay ban’en ni yira yog ngorad ni dubrad ni ngar rung’aged.—Jeremiah 7:9, 10; Exodus 19:5, 6.
jr-E 21 ¶12
Pigpig ni Tay Jeremiah ko Pi “Rran ni Bay Fini Yib”
12 Nap’an ni tabab e gagiyeg rok Jehoyakim, me yog Jehovah ngak Jeremiah ni nge yan nga tempel ni nge weliy e kireb ni be rin’ e girdi’ nu Judah. Be lemnag e pi girdi’ ney ni fare tempel e bod ba bonod nrayog ni nge ayuwegrad. Machane, faanra dab ra thilyeged e ngongol rorad ni yad be ‘moro’ro’, ma yad be thang e pogofan, ma yad be par e pumoon nge ppin ni gathi mabgol rorad, ma yad be micheg e tin riyul’ mi yad be lifith l’ugunrad, ma yad be pi’ e gamanman ni maligach ngak Baal, ma yad be meybil ngak yugu boch e kan ni aram e yad be tay farad,’ ma aram e ra n’ag Jehovah e tempel rok. Ku arrogon e n’en nra rin’ Jehovah ngak e piin ni yad be dake yad be liyor ngak u lan e fare tempel rok ni bod rogon u nap’an ni ke n’ag fare tabernacle ni bay u Shiloh u nap’an Eli ni ir e Prist nib Tolang. Ere ra yan ni aw ni fare binaw nu Judah e ra “ngal’ ni bangi daken e ted nder tugul ban’en riy.” (Jer. 7:1-15, 34; 26:1-6) Am lemnag feni rib t’uf ni nge dabi rus Jeremiah ya nge yag ni nge weliy e pi thin ney! Dabisiy ni i yan i weliy e pi thin ney u p’eowchen boch e girdi’ nib tolang e liw rorad. Ere, ku arrogodad ni bay boch i gadad nib t’uf ndabi rus ya nge yag ni nge machib u fithik’ e girdi’ ni yoor, ara nge machibnag e piin nib fel’ rogorad ara ba ga’ farad. Yugu aram rogon ma rayog ni nge pagan’dad ko re n’ey: Rib mutrug nra ayuwegdad Got ni bod rogon ni i ayuweg Jeremiah.—Heb. 10:39; 13:6.
Ngan Fal’eg i Gay Boch Ban’en nib Ga’ Fan ko Thin rok Got
Gimew Ra Yan Got U Taabang, Fa?
11 Gur, riyul’ ni gad be pag e Thin Rok Got ni nge pow’iydad, fa? Ba ga’ fan ni nge yu ngiyal’ ma gad fal’eg i yaliy rarogodad u fithik’ e yul’yul’. Mu lemnag reb e verse nrayog ni nge ayuwegdad ni ngad rin’ed e re n’ey ni gaar: “I Somol e gaar ngak e girdi’ rok, ‘Mu sak’iygad ko gin ni ma dardar e kanawo’ riy ngam sapgad; ngam fithed fa yu pa’ i kanawo’ ni kakrom, mfithed e gin ni bay fare kanawo’ riy nib fel’. Marod riy nge yog e gapas ngomed.’” (Jeremiah 6:16) Pi thin ney e rayog ni nge puguran ngodad murung’agen be’ ni be milekag me tal ko gin ni bay l’agruw pa’ i kanawo’ riy ni nge fith be’ ko uw e nge yan riy. Girdi’ rok Jehovah u Israel ni ur togopuluwgad ngak e ba t’uf ni ngar rin’ed ban’en ni aram rogon. Ba t’uf ni ngar sulod ko “fare kanawo’ ni kakrom.” Re “kanawo’” nem e aram fare kanawo’ ni yan e pi ga’ rorad nib yul’yul’ u daken, ma ireray e re wo’ ni ke malog fare nam nu Israel riy. Ba gel e kireban’ riy ya de fol piyu Israel ko puguran rok Jehovah. Miki yog e re verse ney ni gaar: “Machane ke lungurad, ‘Dab gu warod riy!’” Girdi’ rok Got e ngiyal’ ney e yad be fol ko fonow ni ma pi’ Got ngorad.
w88-E 4/1 13 ¶15
Be Weliy Jeremiah Murung’agen e Pufthin rok Got Ndabun e Girdi’ ni Ngar Motoyilgad Ngay
Kan Gechignag Yu Judah
15 Sogonap’an 632 B.C.E., me gel piyu Babylon nge piyu Medes ngak piyu Assyria. Ma yu Egypt ni yad bay ko yimuch u Judah e ke war gelngirad. Ere piin ni yad ra k’aring e magawon nga Judah e yad ra yib u ba nam ko lel’uch. Aram fan ni thingari yog Jeremiah boch e thin nib gel e kireban’ riy ngak piyu Jew ni gaar: “Girdi’ e be yib u ba nam ni ba’ ko lel’uch . . . Ri yad ba kireb ma darir runguyed be’ . . . . Kar fal’eged rogorad ni ngar mahlgad yu Zion.” Ere, ngiyal’ nem e piyu Babylon e yad e ba gel lungurad. Ireray e re nam nra fanay Got ni nge gechignag piyu Judah ni bochan e dar yul’yul’gad ngak.—Jeremiah 6:22, 23; 25:8, 9.
March 20-26
BOCH E THIN NIB GA’ FAN KO THIN ROK GOT | JEREMIAH 8-11
“Dabiyog ni Nge Yib Angin e Pi N’en ni Gad Be Rin’ ni Faanra Dabi Pow’iydad Jehovah”
it-1-E 555
Kiyuri
Yima tay yu raba’ i malang nge yu ley i gek’iy nge ku boch ban’en nga daken e milay’ ya nge yag ni ngan tuluf e pi gamanman ni yad ra yan e ngaram. Ke taarebrogonnag Jeremiah e pi liyos ney ni “yima tay u milay’” ko kiyuri u nap’an ni weliy murung’agen fare nam nu Judah ni ur liyorgad nga boch e got ni googsur.—Jer 10:5, BT.
Chon Mini’ E Be Pining E Sorok Ngak Got E Ngiyal’ Ney?
10 Yugu demtrug ko ga ra sap nga lan e lang ara ga ra yaliy e pi n’en ni kan sunmiy u roy u fayleng ma ra tamilang ni bay e En ni Tasunmiy. (Jeremiah 10:12) Rayog ni nge taareban’dad ko n’en ni yog e pi engel u tharmiy ni be lungurad: “Somol romad ma Got romad! Ba’ rogom ni nga nog e sorok ngom, min ta’ fam, ma ba’ rogom ni nge mil suwon urngin ban’en ngom. Yi gur e mu sunumiy urngin ban’en.” (Revelation 4:11) Boor e scientist ndabiyog ni nge ‘tamilangan’rad’ ko re n’ey ni yugu aram rogon ni yad ma ngat nga rogon ni kan sunmiy e pi n’ey nrayog ni ngar guyed nga owcherad. (Efesus 1:18) Rayog ni ngad susunnaged e re n’ey ni aray rogon: Dabi puluw ni ngam yaliy ban’en ni kan sunmiy nib fel’ yaan ma gog ndariy be’ ni ke Sunmiy. Ya faan ga ra lem ni aray rogon, ma ra bod rogon be’ ni be yaliy yaan ban’en ni kan achey nrib fel’ yaan me yog ndariy be’ ni ke achey e re n’em. Ere aram fan nde puluw ni nge yog be’ nde mich Got u wan’ ndariy be’ ni ke sunmiy urngin ban’en ya bin riyul’ riy e “dariy e tawey” rodad nga bang!
w15-E 9/1 15 ¶1
Ga Be Damumuw ngak Got, Fa?
Rarogon e fayleng e ngiyal’ ney ni ke gel e kireb riy e be tamilangnag ndabiyog ko girdi’ ni ngar gagiyeggad. Ya gathi kemus nder yag ko pi am ni ngar feked e gapas i yib, mar ayuweged e girdi’ ni nge dabi buch boch ban’en rorad nib kireb, maku der yag ni ngar ayuweged e girdi’ ni ngar pirieged e felfelan’. Ya bin riyul’ riy e, kar gelnaged e magawon ni be buch u roy u fayleng. Re n’ey e ba puluw ko n’en ni be yog e Bible u nap’an ni gaar: “Dariy bagamad ni ir e ga’ ko gin nge sor e yafos rok ngay; dariy be’ ni bay gafan e yafos rok u pa’.” (Jeremiah 10:23, BT) Ere, kemus ni gagiyeg rok Got e ra yibnag e bin riyul’ e gapas, nge felfelan’, me gaman e tin nsusun ni nge yag ko girdi’, ma ireray e n’en nib m’agan’ Got ngay.—Isaiah 45:18.
Ngan Fal’eg i Gay Boch Ban’en nib Ga’ Fan ko Thin rok Got
Ngaum Chugur ngak Jehovah
16 Thingar da ufgad ni gadad e Pi Mich Rok Jehovah. (Jer. 9:24) Bochan e re n’ey ma ngad guyed rogon ni ngad dugliyed boch ban’en nib fel’ rogon, ma ngad folgad ko motochiyel rok Got. Machane, thingar da kol ayuwgad ndabi tolang e lem rodad ngad lemnaged ni gad ba salap ngak Jehovah, ya ireray e re n’en nra palognagdad rok Jehovah.—Ps. 138:6; Rom. 12:3.
Tin nib Ga’ Fan ko Babyor rok Jeremiah
3:11-22; 11:10-12, 17—Mang fan ni ke uneg Jeremiah fa ragag i ganong ko lel’uch ko pufthin rok, ni yugu aram rogon ni kan gothey yu Samaria ko duw ni 740 B.C.E.? Fan ni ke uneg Jeremiah fa ragag i ganong ko lel’uch ko re pufthin ney e bochan ni fare magothgoth ni ke aw nga Jerusalem ko duw ni 607 B.C.E., e aram e pufthin rok Jehovah ni fan ko fare nam nu Israel ni ga’ngin, ma gathi kemus ni fan ko fare ganong nu Judah. (Ezekiel 9:9, 10) Ma tomuren ni kan gothey yu Jerusalem ma nap’an nra yib e thin rok Got ngak e pi profet maku yima gay rogon ni ngki thap e re thin nem ngak fa ragag i ganong ni bochan e yad gubin ni yad e girdi’ nu Israel.
March 27–April 2
BOCH E THIN NIB GA’ FAN KO THIN ROK GOT | JEREMIAH 12-16
“Ke Pagtalin Piyu Israel Jehovah”
jr-E 51 ¶17
Mu Kol Ayuw Ya Gum’irchaey e Ba Sasaliyeb
17 Ra nge yag ni nge rin’ Jeremiah e maruwel ni kan pi’ ngak mab t’uf ni nge fol u rogon ni be pow’iy Got. Faanra gur Jeremiah, ma ga ra fol ko pi n’en ni ke yog Jehovah ngom ni ngam rin’, fa? Bay ba ngiyal’ ni yog Jehovah ngak Jeremiah ni nge chuw’iy bangi leed nge m’ag nga lukngun. Ma aram me yog Got ngak ni nge milekag nga Eufrates. Faan ga ra yaliy e map ma ga ra guy nre milekag nem ni tay e sogonap’an 300 e mayel palofngin. Nap’an ni taw Jeremiah ngaram ma aram me mithag fagi leed ko maguf ko war miki sul nga Jerusalem. Ma aram miki yog Got ngak ni nge sul nge fek fagi leed. (Mu beeg e Jeremiah 13:1-9, NW.) Ere faanra nge yan Jeremiah u Jerusalem nge yan i taw ko fare lul’ ni Eufrates miki sul nga Jerusalem, ni l’agruw yay ni nge rin’ e re n’em, ma sogonap’an 1,200 e mayel ni nge yan riy. Boch e girdi’ ni yad ma weliy rogon e lem rorad u murung’agen boch ban’en u Bible e der mich u wan’rad nra milekag Jeremiah ni aram palofngin u lan bokum e pul. (Ezra 7:9) Machane, ireram e n’en ni yog Got ni nge rin’ Jeremiah ma aram e n’en ni rin’.
jr-E 52 ¶18
Mu Kol Ayuw Ya Gum’irchaey e Ba Sasaliyeb
18 Am susunnag yaan fare profet ni be yan u thilthilin e pi burey u Judah. Yugu demtrug e re pa’ i kanawo’ ni ke dugliy ni nge yan riy ma ra fek i yan ko fare ted ni be sor i yan ko fare lul’ ni Eufrates. I yan ngaram ni kemus ni nge mithag bangi leed! Bochan e re milekag nem ni tay nib n’uw nap’an ma dabisiy ni ke lemnag e piin buguli yoror rok ko mang e ke buch rok. Nap’an ni sul ma dariy fagi leed rok. Ma aram miki yog Got ngak ni ngki sul nge yan i fek e fagi leed bayay, machane nap’an ni taw ngaram me pirieg ni ke kireb ni “dabki fel’.” Rayog ni nge lemnag Jeremiah ko: ‘Mang fan ni kan pi’ reb e maruwel ngog ni aram feni mo’maw’, ya bod ndariy fan ni nggu rin’.’ Yugu aram rogon, ma de lemnag Jeremiah ban’en ni aram rogon ni bochan e ke pag Got ni nge yal’uweg. Ere, aram fan ni rin’ e re n’em nrogon ni ka nog ngak ma de gun’gun’!
jr-E 52 ¶19-20
Mu Kol Ayuw Ya Gum’irchaey e Ba Sasaliyeb
19 Tomuren ni mu’ Jeremiah i rin’ e n’en ni yog Got ngak ni nge rin’, ma aram me tamilangnag Got ngak fan ni ke rin’ e re n’em. Machane n’en ni rin’ Jeremiah e bay rogon ko fare thin nib ga’ fan ni yog Got. I gaar Got: “Pi girdi’ ni kireb ney e dubrad ni ngar folgad rog. Ri taareb farad gelan’ nge farad kireb, ma yad be tayfan ma yad be pigpig nga yugu boch e got. Ere aram fan ni bay ra boded fagi leed ndab ki fel’.” (Jer. 13:10, NW) Ere riyul’ ni yira ngat nga rogon ni be fil Jehovah ban’en ngak e girdi’ rok! Bochan ni ke rin’ Jeremiah gubin ban’en ni ke yog Jehovah ngak ni nge rin’ ni yugu aram rogon nsana be lemnag Jeremiah ni gowa ban’en nde ga’ fan, machane aram e n’en ni ke ayuweg Jehovah u nap’an ni be gay rogon ni nge taw e thin rok nga gum’irchaen e girdi’ rok.—Jer. 13:11.
20 Der yog Got ngak e piin Kristiano e ngiyal’ ney ni ngar milekaggad ni bokum e mayel. Machane, rayog ni be lemnag e piin buguli yoror rom, nge piin ni gimed nga maruwel ko mang fan nib thil e ngongol rom ni gur reb e Kristiano, ara reb e yibe moningnagem ni bochan e re n’ey. Ere rayog ni yad ra lemnag ko mang fan nib thil rogon e munmad rom nge rogon ni ga ma fal’eg yaam, ara rogon e skul ni kam mel’eg, nge rogon e maruwel ni ga be un ngay, nge rogon e lem rom u murung’agen e alkul. Ere gur, ga ra dugliy u wan’um ni ngam fol ko pi motochiyel rok Got u murung’agen e pi n’ey ni bod e n’en ni rin’ Jeremiah, fa? Pi n’en ni ga ra mel’eg ni ngam rin’ e be yan u rogon ko ga ra pag Got ni nge mang ir e nge yal’uwegem mag pining e sorok nga fithingan. Demtrug rogon ma faan ga ra fol u rogon ni be pow’iyem Jehovah u daken e Thin rok mag fol u rogon ni be pow’iydad fare tapigpig nib yul’yul’ mab gonop, mab mutrug nra yib angin ngom. Ma faan ga ra rin’ ni aray rogon, ma aram e ga be folwok rok Jeremiah ko bin ni ngam pag gum’irchaem ni nge pow’iyem. Ere ba fel’ ni ngam dugliy u lanin’um ni ngam pag Got ni nge yal’uwegem, ya nge yag ni ngam rin’ boch e maruwel nib ga’ fan ni fan ngak.
it-1-E 1121 ¶2
Luknguy
Ke taarebrogonnag Jehovah e pi tabinaw nu Israel nge Judah nga bangi leed ni ke m’ag nga lukngun. Re leed ney ni kan m’ag nga luknguy be dag rogon nib chugur e tha’ u thilrad ma rayog ni ngar pininged e sorok ngak mar fel’gad u wan’. (Jer 13:11) Kan yiiynag ni ke m’ag Jesus Kristus bangi leed nga lukngun. Ma re n’ey e be yip’ fan nra gagiyegnag Jesus e girdi’ rok Got nib mat’aw mab yal’uw. Ku be yip’ fan e re n’ey ni gubin ngiyal’ mab mat’aw mab yal’uw rogon nra fanay Jesus Kristus gelngin. Re fel’ngin ney e aram e n’en nra ayuweg Jesus u nap’an nra mang Tapuf Oloboch rok Jehovah ni bod rogon fagi leed ni kan chichiiy nga luknguy.—Isa 11:1, 5.
Ngan Fal’eg i Gay Boch Ban’en nib Ga’ Fan ko Thin rok Got
jr-E 118 ¶11
Gur, Gubin Ngiyal’ ni Ga Ma Fith ko, “Ba Uw” Jehovah?
11 Nap’an ni fal’eg i yaliy Jeremiah e piin nib kireb ni yad be mon’og i yan, ma bay reb e deer ni sum u laniyan’ ni baadag ni nge fith ngak Jehovah. (Mu beeg e Jeremiah 12:1, 3, BT.) Yugu aram rogon nder maruwar u wan’ ko ba mat’aw e n’en ni be rin’ Jehovah fa danga’, machane bay ba “oloboch” ni baadag Jeremiah ni nge pithig Jehovah. Fan nder rus Jeremiah ni nge fith e re n’em ngak Jehovah e bochan nrib chugur e tha’ u thilrow ni bod rogon e tha’ u thilin ba matam nga ba bitir ni fak. Ma der nang Jeremiah fan ni boor e girdi’ nu Jew ni yad be mon’og e ngiyal’ nem ni yugu aram rogon nib kireb e ngongol rorad. Ere gur, ke yag ni ngan pi’ e fulweg ko deer ni fith Jeremiah ngak Jehovah? Ke micheg Jehovah ngak Jeremiah ni dabki n’uw nap’an ma ra chuweg e pi girdi’ nem. (Jer. 12:14) Nap’an ni guy Jeremiah rogon ni ke fulweg Jehovah taban e meybil rok, ma dabisiy ni ke gel boch e pagan’ rok ngak nge rogon ni ma pufthinnag e girdi’. Ma bochan e re n’ey mab mudugil ni ke ulul Jeremiah ni nge meybil ngak Jehovah ni Chitamangin ni be weliy laniyan’ ngak.
Dabmu Rus Ni Bod Jeremiah
Ngad Kol Ayuwgad ko Piin Gad Ma Chag
16 Maku ke weliy Jeremiah murung’agen ban’en ni i ayuweg ni nge dabi rus. I yog ni gaar: “Da ug un ngak e girdi’ ko minmin nge mur ni yad be tay ni yad be felfelan’, ni bochan e maruwel ni mpi’ ngog mu gu par rog ni gu be damumuw.” (Jeremiah 15:17) Baadag Jeremiah ni nge par ni yigoo ir ko bin nge kireb pangin ni bochan e be chag ko girdi’ nib kireb. Ngiyal’ ney e susun e ngad lemgad ni aray rogon. Dab da paged talin fare ginang ni pi’ apostal Paul ni gaar, “Nchag ngak e girdi’ nib kireb me kireb pangiy nib fel’.” Re n’ey e rayog ni nge buch rodad ni yugu aram rogon ni ud moyed nib fel’ pangidad.—1 Korinth 15:33.