Pi Reference ni Fan ko fare Babyor ni Pi N’en ni Ma Rin’ e Piin Kristiano nge Machib ni Yad Ma Tay
December 4-10
BOCH E THIN NIB GA’ FAN KO THIN ROK GOT | ZEFANIAH 1–HAGGAI 2
“Mu Gay Jehovah u M’on ni Nge Taw e Rran ko Damumuw Rok”
Mu Gaweg Jehovah U M’on Ni Ra Yib Rofen Ni Dumumuw Rok
5 Sana rayog ni nge lungum: “Kug ognageg ngak Got kug un ko taufe ni gag reb e Mich Rok. Ere gur, gathi be yip’ fan e re n’ey ni ke bung rogog ni nggu rin’ e tin nib m’agan’ ngay?” Bin riyul’ riy e gathi kemus ni ngad ognaged gadad ngak Jehovah. Ya mus ngak piyu Israel ni yad ba nam ni kar ognaged yad ngak Jehovah, machane de yag ni ngar ted u gil’ e n’en ni kar micheged ngak u nap’an Zefaniah. Ma bochan e re n’em ma aram fan ni kan n’ag fare nam nu Israel. Ere, faanra nge ‘gay’ be’ Jehovah mab t’uf ni nge ayuweg e tha’ u thilrow ni nge par nib fel’, ma ngki un ko ulung rok u roy u fayleng. Re n’ey e be yip’ fan ni ngad gayed rogon ni ngad nanged rogon ni ma lemnag Jehovah boch ban’en ma gad fol riy. Ku reb e kanawo’ ni ngad gayed Jehovah riy e aram e ngad fal’eged i fil e Thin Rok, ma gad fal’eg i lemnag, ma gad fol riy. Nap’an ni gad ra meybil ngak Jehovah ni nge pow’iydad, ma gad fol u rogon ni be pow’iydad gelngin nib thothup, ma aram e ra chugur e tha’ u thildad. Re n’ey e ra k’aringdad ni ngad adaged ni ngad pigpiggad ngak u ‘polo’ i gum’ircha’dad ngu polo’ i lanin’dad, ngu polo’ i gelngidad.’—Deuteronomy 6:5; Galatia 5:22-25; Filippi 4:6, 7; Revelation 4:11.
6 Bin l’agruw e ban’en ni be yog e Zefaniah 2:3 (NW) ni thingar da rin’ed e aram e “ngad gayed e tin nib mat’aw ban’en.” Yooren i gadad e kad thilyeged e ngongol rodad ya nge yag ni ngad uned ko taufe. Machane, thingar da ululgad ni ngad folgad ko pi motochiyel rok Got nib mat’aw u n’umngin nap’an e yafos rodad. Bay boch e girdi’ ni tomuren ni kar uned ko taufe ma yad be fol ko pi motochiyel rok Jehovah, machane me munmun mar paged boch ban’en ko re fayleng ney ni nge kirebnag e ngongol rorad. Riyul’ nde mom ni ngaun fol ko pi motochiyel rok Jehovah nib mat’aw ni gubin ngiyal’ ni bochan e gad be par u fithik’ e girdi’ ni yad ma lemnag ndariy ban’en nib kireb ko ngongol ndarngal, nge malulfith, nge yugu boch e denen. Machane faanra riyul’ ni gad baadag ni ngad fel’gad u wan’ Jehovah, ma re n’ey e rayog ni nge ayuwegdad ni ngad siyeged ni ngad rin’ed e tin ni be rin’ e girdi’ ko re fayleng ney. Nap’an ni un yu Judah ko ngongol rok e pi nam nib liyegrad ma aram e ngiyal’ ndakurur fel’gad u wan’ Got. Ere ngad ‘folwokgad rok Got’ ni aram e nga ‘don’ed nga dakendad e bin nib beech i gadad’ ni aram e n’en nib m’agan’ Got ngay ni be “gagiyel u daken e bin riyul’ e wok nib yal’uw ma mmat’aw” ko bin ni ngad folwokgad ko pi n’en ni be rin’ e girdi’ ko re fayleng ney.—Efesus 4:24; 5:1.
7 Bin dalip e ban’en ni be tamilangnag e Zefaniah 2:3 e faanra ayuwegdad Jehovah ni ngad mageygad ni gad ba fos ko rofen nra dag e damumuw rok, mab t’uf ni ngad guyed rogon ni ngad ‘sobut’naged’ lanin’dad. Gubin e rran ni gad ma mada’nag e piin ni dubrad ni ngar sobut’naged lanin’rad, ya yad ma lemnag ni piin nib sobut’an’ e yad ba meewar. Mus ngak be’ ni ma fol rok yugu boch e girdi’ ma yima lemnag ni ir be’ nib meewar. Pi girdi’ ney e yad baadag ni nga rogned e n’en ni ngan rin’, ma yad ba chogow, ma boor ban’en ni yad ma weliy u murung’agen boch ban’en, ma yad be lemnag ni “tirorad ban’en” nge tin ni yad baadag e aram tin ni nge m’on. Ba gel e kireban’ riy ni faan gad ra pag e miti ney e lem ni nge af ngodad! Ere ireray e ngiyal’ ni ngad ‘sobut’naged’ lanin’dad. Ni uw rogon? Ngad folgad rok Got ma gad pag ni nge yal’uwegdad ma ngad rin’ed e tin nib m’agan’ ngay.
Ngan Fal’eg i Gay Boch Ban’en nib Ga’ Fan ko Thin rok Got
Tin nib Ga’ Fan ko Babyor rok Nahum nge Habakkuk nge Zefaniah
1:8, BT. Bay boch e girdi’ u nap’an Zefaniah ni “ur folgad u yalen boch e nam” ni bochan e ngar fel’gad u wan’ e girdi’ ko pi nam nem. Rib gel e oloboch riy ni faanra gay e pi tapigpig rok Jehovah rogon ni ngkur fel’gad u wan’ e girdi’ ko re fayleng ney!
Tin nib Ga’ Fan ko Babyor rok Haggai nge Zekariah
2:9, BT—Mang boch e kanawo’ nib “gel feni” fel’ fare tempel rok Zerubbabel riy ko fare tempel rok Solomon? Bay dalip e kanawo’ nib fel’ boch fare tempel rok Zerubbabel riy ko fare tempel rok Solomon: Pi n’ey e aram e urngin e duw ni i par e gal tempel ney riy, nge en ni i fil ban’en ko girdi’ u rom, nge urngin e piin ni u ranod ngaram ni ngar liyorgad ngak Jehovah. Yugu aram rogon ni fare tempel rok Solomon e par u lan 420 e duw ni tabab ko duw ni 1027 B.C.E. nge mada’ ko duw ni 607 B.C.E., machane fa “bin nib beech” e tempel e par nib pag 580 e duw. I tabab e re 580 i duw nem ko duw ni 515 B.C.E. u nap’an ni kan mu’ i toy e re tempel nem nge yan i taw ko ngiyal’ nni kirebnag ko duw ni 70 C.E. Maku reb e, Jesus Kristus ni ir fare Messiah e fil boch ban’en ngak e girdi’ u lan e “bin nib beech” e tempel ma boor e girdi’ ni u ranod ngaram ni ngar liyorgad ngak Got ko urngin e girdi’ ni u ranod ko “bin ni kafram” e tempel.—Acts 2:1-11.
December 11-17
BOCH E THIN NIB GA’ FAN KO THIN ROK GOT | ZEKARIAH 1-8
“Yad Ra Kol e Mad rok Reb e Pumoon nib Jew”
“Chiney e Kam Manged Girdien” Got
14 I yiiynag l’agruw e profet rok Got kakrom murung’agen e girdi’ ni boor ni yad ra chagil ko girdi’ rok Jehovah ngaur liyorgad ngak e ngiyal’ ney ko tin tomuren e rran. I yiiynag Isaiah ni gaar: “Girdi’ ko pi nam nem e bayi lungurad, ‘Nga darod ko fare burey rok Somol, ko tempel rok fare Got nu Israel. Ya ngad filed e n’en ni ba adag ni ngad rin’ed; mu udarod ko yu pa’ i kanawo’ ni ke turguy ni nga darod riy.’ Machib rok Somol e yib u Jerusalem; ke par u Zion be non ngak e tirok e girdi’.” (Isa. 2:2, 3) Ki yiiynag Zekariah ni profet ni boor e “girdi’ nge boch e nam nib ga’ lungrad ni bay ra bad nga Jerusalem ni ngar liyorgad ngak Somol ni Gubin ma Rayog Rok mi yad meybil ngak ni nge fal’eg waathrad.” I yog ni yad “ragag e girdi’ nu bang,” ma yad be kol e mad ko piin ni ka nog piyu Israel u fithik’ i lanin’rad ngorad, ma be lungurad: “Gamad baadag ni nggu uned ko gin ngam man ngay, ni bochan e kug rung’aged ni bay Got rom.”—Zek. 8:20-23, BT.
“Gamad Baadag ni Nggu Uned Ngomed”
4 Ere, faanra dabiyog ni ngad nanged fithingan urngin e piin ni yad ba muun ko piin ni kan dugliyrad ni ka yad bay u fayleng e ngiyal’ ney, me ere uw rogon ni nga i ‘un’ yugu boch e saf ngorad ko gin ni yad be yan riy? Mu tay fanam i yan ko n’en ni yiiynag Zekariah u murung’agen fa ragag i pumoon. I yog ni yad ra “kol e mad rok reb e pumoon nib Jew, me lungurad, ‘Gamad baadag ni nggu uned ngomed, ya kug rung’aged ni bay Got romed.’” Yugu aram rogon ni taareb e Jew ni kan weliy murung’agen u roy, machane fa gal bugithin ni “ngomed” nge “romed” ni kan fanay u roy e be yip’ fan boor e girdi’. Faanra aray rogon, ma ere fare Jew ni kan weliy murung’agen e be yip’ fan ba ulung i girdi’, gathi taabe’! Ere, de t’uf ni nge nang yugu boch e saf fithingan urngin e piin ni yad ba muun ko re ulung nem mu ur leked yad. Manang yugu boch e saf e re n’ey, ma aram fan ni yad ma chagil ko re ulung nem ngar pigpiggad ngak Jehovah u taabang. Be yog e Bible ni Jesus e ir e En Tayog e Thin rodad, ere kemus ni yigoo ir e ngaud leked.—Matt. 23:10.
“Gin ni Be Yan fare Fak e Saf Ngay Ma Yad Be Un Ngak”
14 Ma lemnag Jesus Kristus ni ayuw ni gad ma pi’ ngak bagayad fapi cha’ ni walagen e bod ni ir e yibe ayuweg. (Mu beeg e Matthew 25:40.) Ere mang reb e kanawo’ nrayog ni nge pi’ e piin ni athap rorad e ngar pared u fayleng e ayuw ngak e pi walagen Kristus ni kan dugliyrad? Ba ga’ nrayog ni ngar ayuweged yad ko fare maruwel ni machib. (Matt. 24:14; John 14:12) Chiney e be lich i yan girdien fachi ulung, ma be yoor i yan piin ni yad yugu boch e saf. Nap’an nra un e piin ni athap rorad e ngar pared u fayleng ko fare maruwel ni machib, ma aram e yad be ayuweg e piin ni kan dugliyrad ni ngar lebguyed fare maruwel ni machib ni ngan yognag pi gachalpen Jesus. Boch i yad e ma machib u polo’ e tayim rorad ni faanra rayog rorad. (Matt. 28:19, 20) Maku reb e kanawo’ nrayog ni ngan pi’ e ayuw ko re maruwel ney e aram e ngan pi’ e salpiy ni ayuw.
Ngan Fal’eg i Gay Boch Ban’en nib Ga’ Fan ko Thin rok Got
Pi N’en ni Guy Zekariah u Nap’an Nni Pilyeg e Changar Rok nge Rogon nib Gab L’ag Ngay
18 Machane, re n’ey ni guy Zekariah e ku be puguran ngak e pi Jew nib milfan ngorad ni ngar guyed rogon ni nge par e liyor rorad nib beech. Girdi’ rok Jehovah e dabiyog ni ngar paged e kireb ni nga i par u fithik’rad, maku ban’en nthingar dab ra rin’ed. Tomuren ni ke fekdad Jehovah nga lan e ulung rok nib beech ko gin ni bay e ayuw nge t’ufeg rok riy, ma aram e ra bagadad mab milfan ngak ni nge ayuweg e ulung rok ni nga i par nib beech. Gubin mit e kireb ndabiyog ni nge par u lan e ulung rok Got.
Ra Ayuwegem Fapi Karrow ni Be Girngiy e Os nge Fare Teeliyaw
7 Rogon ni bay u Bible e burey e rayog ni nge yip’ fan e gagiyeg ara am. Fa gal burey nni weliy murung’agen ko babyor rok Zekariah e taareb rogon ko fa gal burey ni weliy Daniel ko yiiy rok. Reb e gal burey nem e be yip’ fan e gagiyeg ni be tay Jehovah u ga’ngin e palpalth’ib nra par ndariy n’umngin nap’an. Ma reb e be yip’ fan Gil’ilungun fare Messiah ni Jesus e ir e be gagiyegnag. (Dan. 2:35, 45) Ka nap’an ni pilung Jesus ko October ko duw ni 1914, ma aram e ngiyal’ ni sum e gal burey nem, ma ke par ke mada’ ko ngiyal’ ney. Maku reb e, gal burey nem e kab kafram i yib ni bay e maruwel nib ga’ fan ni be lebguy nib l’ag nga rogon ni be lebug e n’en nib m’agan’ Got ngay u fayleng.
8 Mang fan ni kan ngongliy e gal burey nem ko bronze? Bronze e ba mit e wasey nib ga’ fan ni bod rogon e gol. I yog Jehovah ni ireray e re miti wasey ni ngan fanay u nap’an ni ngan toy e tabernacle, ma boch nga tomuren mu kun fanay ni ngan ngongliy fare tempel u Jerusalem. (Ex. 27:1-3; 1 Ki. 7:13-16) Ere, fa gal burey ni kan ngongliy ko bronze e be puguran ngodad feni manigil mat’awun Jehovah ni nge gagiyegnag e palpalth’ib nge rogon feni manigil Gil’ilungun fare Messiah, ma re n’ey e ra pi’ e pagan’ ngak urngin e girdi’ me tow’athnagrad.
December 18-24
BOCH E THIN NIB GA’ FAN KO THIN ROK GOT | ZEKARIAH 9-14
“Mu Par u Lan fare ‘Loway’ rok Jehovah ni Bay e Ayuw Riy”
Mu Par u Lan fare Loway rok Jehovah ni Bay e Ayuw Riy
10 Rogon ni be weliy fare yiiy e ra ruw raba’ fare Burey ni Olive, ma barba’ fare burey e ra kan ko lel’uch, ma bay barba’ nra kan ko yimuch, ma l’agruw ra ba’ i ay Jehovah e ra tay nga daken e gal burey nem. Ma re n’ey ni kan ruw raba’nag fa gal burey e ka yan i aw “ba loway nib ga” u thilin. Ere, mang e re loway ney? Be yip’ fan e ayuw ni ma yib rok Jehovah. Bod rogon nrayog ni nge pirieg e girdi’ e gin ni ngar nabgad ngay u lan reb e loway u thilin e burey, maku rayog rok e pi tapigpig rok Jehovah ni ngar pirieged e ayuw u tan e gagiyeg rok nge gagiyeg rok Jesus ni Fak. Ya dabi pag Jehovah ni nge taleg boch e girdi’ e bin riyul’ e liyor. Ere, mingiyal’ e kan ruw raba’nag fare Burey ni Olive? Re n’ey e ke buch ko duw ni 1914 u nap’an ni tabab Jesus ni nge gagiyeg u tharmiy. Maku be yog fare yiiy nra mil e girdi’ rok Got ngar thapgad ko gin ni bay e ayuw riy u lan e re “loway nib ga” ney. Ere, mingiyal’ e tabab e re n’ey riy?
Mu Par u Lan fare Loway rok Jehovah ni Bay e Ayuw Riy
13 Faan gad ra ulul ni ngad pared ni gad ba yul’yul’ ngak Jehovah, ma aram e gad be par ko loway rok ni bay e ayuw riy. Jehovah nge Jesus ni Fak e dab ra pagew be’ ara ban’en ni nge taleg e ayuw ni yow be pi’ ngodad. (John 10:28, 29) Be pi’ Jehovah gubin e ayuw nib t’uf rodad ni nge yag ni ngad yul’yul’gad ko gagiyeg ni yow be tay Fak. Ma nap’an fare gafgow nib ga’ ni bay yib, ma aram e ngiyal’ nrib t’uf e ayuw rodad. Ere, aram fan ni ireray e ngiyal’ nrib t’uf ni ngad pared ko fare loway rok Jehovah ni bay e ayuw riy.
Mu Par u Lan fare Loway rok Jehovah ni Bay e Ayuw Riy
15 Mang e ra buch rok e piin ni dariy e ayuw rok Jehovah rorad ko rorran nra cham ngak e pi toogor rok? Rogon i yog fare yiiy ko Zekariah 14:6 (NW) e gaar: “Rorran nem e dabki yib e tamilang ma gubin ban’en ma ra el ni bod rogon e ayis.” Ere, rogon ni be yog fare yiiy e “dabki yib e tamilang” ngorad. Ma re n’ey e be yip’ fan ni dab kur fel’gad u wan’ Got. Me ulul fare yiiy ni gaar: “Bay ba liliy ni ubchiya’ ni bay yib ngak e pi os, nge mule, nge kamel, nge donkey nge nga daken gubin e gamanman u lan e gin ma par e pi toogor riy.” Re n’ey e be yip’ fan ni yira taleg gubin talin e cham ni yima fanay u nap’an e mahl, ma ra yan ni aw e pi n’ey ni dariy fan. Ya i yog Zekariah nra gechignag Jehovah e pi toogor rok u daken ba “liliy ni ubchiya’.” Mus nga lan owchey nge bolowthey ma “ra malad nge chuw.” Dawor da nanged ko mang e be yip’ fan e re n’ey. Machane, ba mudugil u wan’dad ni dabiyog rorad ni ngar rogned ban’en nib togopuluw ngak Got ara ngar magawonnaged gadad. (Zek. 14:6, 7, 12, 15, BT.) Gubin e “pi pilung nu fayleng nge pi salthaw rorad ni kar muulunggad” e yad ra mang ko ba’ rok Satan. Machane, demtrug e gin ni yad bay riy u roy u fayleng ma yira thangrad. (Rev. 19:19-21) Ma wenegan nra yib e “ra yan i rofen nem ma downgin e piin ni ke li’rad Somol e ba wer u daken e fayleng ni tabab u baley nge mus nga baley.”—Jer. 25:32, 33, BT.
Ngan Fal’eg i Gay Boch Ban’en nib Ga’ Fan ko Thin rok Got
Dariy ba Talin e Cham nni Ngongliy nra Maad’ad Ngomed
9 Fare yiiy rok Zekariah e be tamilangnag fan ni ke togopuluw fapi nam ngak e tin nriyul’ e Kristiano. Baaray e n’en ni yog Zekariah 12:3 (BT): “Ra taw ko rofen nem, ma bay gu tay yu Jerusalem ni bod ba malang nib tomal.” Bin ngan e Jerusalem e be weliy e re yiiy ney murung’agen? N’en ni weliy Zekariah u murung’agen yu Jerusalem e be weliy murung’agen fare Gagiyeg nu tharmiy ara fare “Jerusalem nu tharmiy” ni pi Kristiano ni kan dugliyrad e yad e ngar gagiyegnaged. (Hebrews 12:22) Chiney e ke lich e piin ni yad bang ko fare Gil’ilungun fare Messiah ni yad bay u roy u fayleng. Be pi’ fachi ulung nge piin ni yad bang ko fare “yugu boch e saf” e athamgil nga laniyan’ e girdi’ ni ngar rin’ed e tin nib m’agan’ Got ngay ya nge yag ni ngar pared nga tan Gil’ilungun Got e chiney ni ka bay e tayim riy. (John 10:16; Revelation 11:15) Uw rogon e re n’ey u wan’ e pi nam? Uw rogon ni be ayuweg Jehovah e tin riyul’ e tapigpig rok e ngiyal’ ney? Ngad weliyed e n’en ni bay ko Zekariah ko guruy ni 12 ya nge tamilang e fulweg ko gal deer ney. Faan gad ra rin’ e re n’ey, ma rayog ni nge mudugil u wan’dad nriyul’ ni “dariy ba talin e cham nni ngongliy” nra gel ngak e piin ni kan dugliyrad nge piin ni yad be ayuweged yad.
10 Fare thin ko Zekariah 12:3 (BT) e be dag nra “maad’ad” e girdi’ ko fapi nam. Uw rogon ni ke buch e re n’ey? Ke tay Got chilen ni ngan machibnag fare thin nib fel’ ni murung’agen Gil’ilungun. Fare maruwel ni machib e ban’en nrib ga’ fan u wan’ e Pi Mich Rok Jehovah. Machane, re n’em ni gad be machibnag ni Gil’ilungun Got e aram e re am nra pithig e magawon rodad e ke mang ba “malang nib tomal” ngak girdien e pi nam. Ere, yad ma guy rogon ni ngar taleged e machib ni gad ma tay. Machane nap’an ni yad ra togopuluw ko machib ni gad be tay ma aram e ra sul wenegan ngorad ngar ‘maad’adgad.’ Mus ko pi n’en ni yad be gay rogon ni ngar rin’ed e der yib angin, ya n’en ni be buch e be kireb murung’agrad. Ere, dabiyog ni ngar taleged e machib ni be rin’ e pi tapigpig rok Got ni bochan e ba ga’ fan u wan’rad ni ngar machibnaged fare thin nib fel’ “ndabi math biid” ni murung’agen Gil’ilungun fare Messiah u m’on ni nge mus e re m’ag nib kireb ney. (Revelation 14:6) Nap’an ni guy reb e matanag ko kalbus u Africa rogon ni yibe gafgownag e pi tapigpig rok Jehovah me yog ni gaar: ‘Yugu aram rogon ni gimed be gafgownagrad machane dabi yib angin. Ya yad ra par ni yad ba yul’yul’ ngak Jehovah ni gubin ngiyal’ ma yad be yoor i yan.’
Dariy ba Talin e Cham nni Ngongliy nra Maad’ad Ngomed
13 Mu beeg e Zekariah 12:7, 8, NW. Piyu Israel kakrom e ba ga’ ni yad ma par u lan e tent. Yu ngiyal’ ma piin ni ma gafaliy e saf nge pi ta milay’ e yad e yad ma par u lan e tent. Ere faanra yib e toogor rorad ni ngar chamgad ngak yu Jerusalem ma pi cha’nem e yad e som’on ni yira cham ngorad. Aram fan nib t’uf ni ngan ayuwegrad. Fare thin ni fapi “tent nu Judah” e dag ni pi Kristiano ni kan dugliyrad e ngiyal’ ney e bod ni yad bay u lan e tamilang ndar med u lan e mach ni bay e yoror riy. Ireray e gin ni yad be par riy ni yad be ayuweg e pi n’en ni bay rogon nga Gil’ilungun fare Messiah ndarur rusgad. Ere, ra ayuweg Jehovah fapi “tent nu Judah” ara piin ni kan dugliyrad ko som’on ni bochan e nap’an nra cham Satan ngodad ma yad e som’on ni ma cham ngorad.
December 25-31
BOCH E THIN NIB GA’ FAN KO THIN ROK GOT | MALAKI 1-4
“Ba Fel’ u Wan’ Jehovah e Mabgol Rom, Fa?”
jd-E 125-126 ¶4-5
Mu Ayuweg e Mabgol Rom ni Nge Fel’ u Wan’ Got
4 Nap’an e bin lal e chibog B.C.E. u nap’an Malaki mab ga’ ni be wer e mabgol rok piyu Jew. Aram fan ni yog Malaki ngorad ni manang Jehovah e n’en ni yad be rin’. I gaar: “Manang ni kam thilyeg e tin ni mmicheg ngak e re pin ni mu leay ni ka gab pagel.” Ere bochan nib kireb rogon e ngongol rok e piin figirngiy ngak pi leengirad, ma aram fan ni pi ppin ni kan chuw rorad e kar garda’naged daken e altar rok Jehovah ko lu’ rorad ni bochan e ‘meyor nge dolo’loy’ ni yad be tay. Ma mus ngak e pi prist ni yad be pag ni nga un rin’ e miti ney e ngongol!—Malaki 2:13, 14.
5 Ere uw rogon u wan’ Jehovah e ngongol ni be tay e pi girdi’ nem ngak e en mabgol rorad u nap’an Malaki? I weliy Malaki rogon e lem rok Jehovah u nap’an ni gaar: “I Somol ni ir e Got rok piyu Israel e be gaar, ‘Kug dabuy e mabgol ni be wer.’” Miki micheg ni der ma “thil” Jehovah. (Malaki 2:16; 3:6) Ere gur, ke tamilang u wan’um e re n’ey, fa? Ka aram ko som’on ma dabun Jehovah e mabgol ni nge wer. (Genesis 2:18, 24) Ireray e n’en ni tamilangnag u nap’an Malaki maku arrogon e ngiyal’ ney. Bay boch e girdi’ ni yad ma dugliy ni ngar chuwgad ko en mabgol rorad ni bochan e daki m’ag u wan’rad e tin ni be rin’ e en mabgol rorad. Demtrug u feni sasalap gum’irchaey machane ma fal’eg i yaliy Jehovah lanin’dad. (Jeremiah 17:9, 10) Ere manang urngin e sasalap ni be tay be’ ndemtrug rogon nra gay e tawey rok ni nge chuw. “Ya urngin ban’en ni ke m’ay i sunumeg rok e be par u p’eowchen ndariy e upong u daken; mi ir e ri gadad ra weliy e pi n’en ni ud rin’ed ngak.”—Hebrews 4:13.
Ma Fanenikay Jehovah E Ngongol Ni Sasalap
19 Yugu aram rogon ma i dag Malaki ni bay boch e piin figirngiy ni ur pared ni yad ba yul’yul’ ngak pi leengirad ni bochan e ‘bay gelngin Got nib thothup rorad.’ (Verse 15) Ri gad ba felfelan’ ni bochan e boor e piin figirngiy u lan e ulung rok Got e ngiyal’ ney ni yad ma ‘tay fan’ pi leengirad. (1 Peter 3:7) Darur ma lied e ppin rorad, ara rogned boch e thin nra kirebnag lanin’rad, ma darur ma towasariyed yad ni ngar pared u boch e kanawo’ nde yalen. Ku yad ma tayfan e ppin rorad ni aram e darur nonad ara ur ngongolgad ngak yugu reb e ppin nra m’ug riy ni kemus ni yad baadag ni ngar pared maku darur yaliyed yaan e puwlag. Boor e piin leengiy u lan e ulung rok Jehovah ni yad ba yul’yul’ ngak ma yad be fol ko pi motochiyel rok. Gubin e pi Kristiano ney e yad manang e tin ni be fanenikay Got, ma yad ma puluwnag e lem rorad nge ngongol rodad ko tin nib m’agan’ ngay. Ere mu ulul ni ngam folwok rorad ni aram e ngam ‘fol rok Got’ ma ra tow’athnagem nga gelngin nib thothup.—Acts 5:29.
Ngan Fal’eg i Gay Boch Ban’en nib Ga’ Fan ko Thin rok Got
Tin nib Ga’ Fan ko Babyor rok Malaki
1:10. De fel’ u wan’ Jehovah e pi maligach ni i pi’ e pi prist ni yad ba chogow. Ya yad ma ta’ puluwon nochi maruwel ni ngan rin’ u lan e tempel ni bod rogon ni ngan ning e mab ko tempel ara ngan gal’ e nifiy u altar. Ere ba ga’ fan ni nge puluw rogon e liyor ni gad ma tay ngak Jehovah nge machib ni gad ma tay. Susun nra m’ug ko ngongol rodad ni fan ni gad be rin’ e pi n’ey e bochan nriyul’ nib t’uf Got rodad nge girdi’ ma gathi bochan ni nge yag e salpiy riy ngodad!—Matthew 22:37-39; 2 Korinth 11:7.
“Dab Mpaged Talin Ni Gubin Ngiyal’ Ma Gu Ba’ Romed”
5 In e chibog u m’on ni nge weliy Jesus fare fanathin ni murung’agen e wheat nge pan, me thagthagnag Jehovah nga laniyan’ Malaki ni profet ni nge yiiynag boch ban’en nra buch ni bay rogon ko fare fanathin rok Jesus. (Mu beeg e Malaki 3:1-4.) John ni Tataufe e ir fare ta ‘mol’og ni kan l’og ni nge m’on nge bing e kanawo’.’ (Matt. 11:10, 11) Nap’an ni gagiyel e re tamol’og nem ko duw ni 29 C.E., ma ke chugur nga nap’an ni ngan pufthinnag fare nam nu Israel. Jesus e ir e bin l’agruw e ta mol’og. L’agruw yay ni beechnag fare tempel u Jerusalem. I rin’ ko yay nsom’on u tabolngin e machib ni tay miki rin’ bayay u nap’an ni ke chugur ni nge mu’nag e re maruwel rok nem. (Matt. 21:12, 13; John 2:14-17) Ere, fare maruwel ni rin’ Jesus ni aram e beechnag boch ban’en e rin’ u lan ba ngiyal’.
6 Uw rogon ni ke lebug fare yiiy rok Malaki ko yay ni migid? Nap’an e pi duw u m’on ko 1914 ngki yan nga lan e re duw nem, me rin’ C. T. Russell nge piin ni ur uned ngak reb e maruwel ni taareb rogon ko fare maruwel ni i rin’ John ni Tataufe. Re maruwel nem nrib ga’ fan e ba muun ngay ni ngan sulweg e tin riyul’ u lan e Bible nga rogon. Ke fil e Piin ni Yad Ma Fil e Bible ko girdi’ e bin riyul’ i fan fare biyul ni maligach ni pi’ Kristus, mi yad gagiyelnag fare ban u murung’agen e nifiy ndabi math biid, mu kur machibnaged ni ke chugur ni nge mus e Ngiyal’ ni Kan Dugliy ni Fan ko Pi Nam. Machane, ku immoy boch e teliw ni u rogned ni yad pi gachalpen Kristus. Ere, bay reb e deer nib t’uf ni ngan nang e fulweg riy, ni aram e: Mini’ u fithik’ e yu ulung i girdi’ nem e yad bod e wheat? I tabab Jesus ni nge fal’eg i yaliy fare tempel nib fanathin ara rarogon e liyor ni un tay e ngiyal’ nem ko duw ni 1914 ni bochan e nge tamilang e fulweg ko re deer nem. Re n’ey ni kan fal’eg i yaliy ma kan beechnag boch ban’en e tabab ko duw ni 1914 nge yan i mada’ nga tabolngin e duw ni 1919.