Pi Reference ni Fan ko fare Babyor ni Pi N’en ni Ma Rin’ e Piin Kristiano nge Machib ni Yad Ma Tay
April 2-8
BOCH E THIN NIB GA’ FAN KO THIN ROK GOT | MATTHEW 26
“Boch Ban’en nib Thil u Thilin e Madnom ko Paluk’af nge Puguran nge Boch Ban’en ni Taareb Rogon Riy”
nwtsty-E media
Fare Madnom ko Paluk’af
Nap’an fare madnom ko Paluk’af ma pi n’en nib ga’ ni un kay e aram e saf ni kan urfiy (ndariy reb e yil u dow ni kan t’ar) nge (1); flowa ndariy e is riy nge (2); herb nib mooy (3). (Ex 12:5, 8; Nu 9:11) Rogon ni be yog fare babyor ni ka nog e Mishnah ngay e pi herb nib mooy ney e rayog nib muun ngay e lettuce, ara chicory, ara pepperwort, ara endive, ara dandelion. Fan ni i kay piyu Israel e pi herb ney e bochan ni nge puguran ngorad ni ur med ba ngiyal’ ni yad e sib u Egypt. Nap’an ni madnomnag Jesus nge pi apostal rok fare Paluk’af me fanay fare flowa ndariy e is riy ni be yip’ fan downgin nib flont. (Mt 26:26) Ki yog apostal Paul ni Jesus e ir fare “saf rodad ko Paluk’af.” (1Ko 5:7) Nap’an e bin som’on e chibog ma aram e kun fanay e wain (4) u nap’an fare Paluk’af. Fare wain ni fanay Jesus e be yip’ fan rachaen nra map’ nga but’ u nap’an nra pi’ e yafos rok ni maligach.—Mt 26:27, 28.
nwtsty-E study note ko Mt 26:26
ya ireray: Fan fare bugithin ni e·stinʹ ni thin nu Greek e ban’en ni be “yip’ fan” yugu boch ban’en. Nap’an ni weliy Jesus e re thin ney ma rayog ni nge nang e pi apostal rok e n’en ni be yip’ Jesus fan. Ya immoy Jesus rorad e re ngiyal’ i n’em ni ir be’ nib flont maku arrogon fare flowa ndariy e is riy ni bay u p’eowcherad ni aram e n’en ni yad ra kay u nap’an fare madnom. Ere dabiyog ni nge yan i aw ni fare flowa e aram downgin Jesus. Ku ireray e re thin nu Greek ni un fanay ko Mt 12:7 ma kan pilyeg u lan yu ken e Bible ni “fan.”
nwtsty-E study note ko Mt 26:28
rachaen Jesus ni micheg fare m’ag u thilin Got nge girdi’: Fare maligach ni pi’ Jesus e aram e n’en ni micheg fare m’ag nib beech u thilin Jehovah nge pi Kristiano ni kan dugliyrad. (Heb 8:10) N’en ni yog Jesus e taareb rogon ko n’en ni yog Moses u nap’an ni tababnag fare m’ag ko Motochiyel nni ngongliy u thilin Got nge piyu Israel u nap’an ni ur med ko fare Burey nu Sinai ni bochan e ir e tamaaf ko re m’ag nem. (Ex 24:8; Heb 9:19-21) Rachaen e garbaw nge kaming e aram e n’en ni micheg fare m’ag ko Motochiyel nni ngongliy u thilin Got nge fare nam nu Israel. Ere ku arrogon rachaen Jesus ni ireray e n’en nra micheg fare m’ag nib beech ni ngongliy Jehovah u thilrad fare Israel rok Got. Re m’ag nem e tabab ko Pentekost 33 C.E.—Heb 9:14, 15.
Ngan Fal’eg i Gay Boch Ban’en nib Ga’ Fan ko Thin rok Got
nwtsty-E study note ko Mt 26:17
Faani taw ko chirofen ni som’on ko madnom ni ngan kay e flowa nda ntay e n’en ni ma thownag e flowa ngay: Fare Madnom ni Ngan Kay e Flowa Ndariy e Is Riy e tabab ko Nisan 15, nreb e rran u tomuren fare madnom ko Paluk’af (Nisan 14), ma yima tay e re madnom ney ni medlip e rran n’umngin nap’an. (Mu guy e App. B15.) Machane nap’an ni immoy Jesus u fayleng, ma aram e un madnomnag fare madnom ko Paluk’af nge fare madnom ni ngan kay e flowa ndariy e is riy u taabang u lan meruk e rran nib muun e Nisan 14 ngay, maku yima yog ni ireray fare “madnom ni yira kay e flowa riy nda ntay e n’en ni ma thownag e flowa ngay.” (Lu 22:1) Ere bochan e re n’ey, ma aram fan nre thin nem ni “faani taw ko chirofen ni som’on” e ku rayog ni nga nog ni aram e “reb e rran u m’on riy.” (Mu taareb rogonnag ko n’en ni bay ko Joh 1:15, 30, ni un fanay fare thin nu Greek riy ni [proʹtos] ni kan pilyeg ni “som’on” nrayog ni nga nog ni “u m’on riy” ara “ir e immoy ko ngiyal’ ndawor ni gargelnigeg riy.”) Ere rogon ni kan tamilangnag fan e re thin ney ko thin nu Greek, nge rogon ni i madnomnag e pi Jew e re madnom ney e be tamilangnag ni ngiyal’ ni i fith pi gachalpen Jesus fare deer ngak e aram e Nisan 13. Nap’an e Nisan 13 ni kakadbul ma aram me fal’eg e pi apostal rogon e gin ni ngar madnomnaged fare Paluk’af riy. Ma nap’an ni “aw e lumor” ni aram e ke taw ko Nisan 14, ma aram e rofen ni ur madnomnaged Jesus fare Paluk’af u taabang.—Mr 14:16, 17.
nwtsty-E study note ko Mt 26:39
ma ga fek e re kap ney ngam chuweg rog: Rogon ni bay u Bible e fare bugithin ni “kap” e ba ga’ ni be yip’ fan e n’en nib m’agan’ Got ngay, ara “ban’en nib milfan” ku be’ ni nge rin’. Ere dariy e maruwar riy ni magafan’ Jesus ni bochan e be t’ar e girdi’ e thin nga daken ni yad be yog ni be yog boch ban’en nib togopuluw ngak Got, ma ra yan i aw nrogon ni ke yim’ e ke darifannag fithingan Got. Ere aram fan ni yibilay ngak Got ni nge chuweg e re “kap” nem rok.
April 9-15
BOCH E THIN NIB GA’ FAN KO THIN ROK GOT | MATTHEW 27-28
“Mang Fan ni Nga Darod ni Ngad Pingeged e Girdi’ Ngar Manged Pi Gachalpen Jesus, nge Uw e Gin ni Ngan Machib Riy, nge Uw Rogon ni Ngan Machib?”
‘Marod Ngak Girdien E Pi Nam Ngam Pingeged Yad Ngar Manged Pi Gachalpeg’
4 Jesus e ir e be gagiyegnag e ulung rok Got, ma ka nap’an e duw ni 1914 min pi’ mat’awun ni nge gagiyegnag Gil’ilungun Got. (Kolose 1:13; Revelation 11:15) Bochan ni ir pilungen e engel ere ir e ma gagiyegnag bokum milyon e engel u tharmiy. (1 Thessalonika 4:16; 1 Peter 3:22; Revelation 19:14-16) Ki pi’ e Chitamangin Jesus mat’awun ni nge thang “urngin e pi kan ni be gagiyeg, nge piin ni yad be tay murung’agen ban’en, nge piin ni yad be yog e thin” ni bochan ni yad be togopuluw ko pi kenggin e motochiyel rok Got nib mat’aw. (1 Korinth 15:24-26; Efesus 1:20-23) Gathi yigoo piin ni yad ba fos e bay mat’awun ni nge gagiyegnagrad, ya ku ir e ra “pufthinnag e piin ni kab fos nge piin ni kar m’ad” ma ke pi’ Got gelngin ni nge faseg e piin ni kar m’ad. (Acts 10:42; John 5:26-28) Bochan ni kan pag fan urngin e pi n’ey ngak ma aram fan ni nge ga’ fan u wan’dad e n’en ni ke tay chilen ngodad ni ngad rin’ed. Ere aram fan nthingar da ted fan me m’agan’dad ngay ni ngad folgad ko n’en ni ke tay chilen ni ngad rin’ed ni aram e nga darod ngak girdien e pi nam ngad ‘pingeged yad ngar manged pi gachalpen.’
nwtsty-E fa gal study note ko Mt 28:19
ngam pingeged yad ngar manged pi gachalpeg: Fare bugithin ni Greek ni ma·the·teuʹo e rayog ni ngan pilyeg ni “ngan fil,” ni aram e yibe guy rogon ni ngan yognag boch pi gachalpen Jesus. (Mu taareb rogonnag nga rogon ni kan fanay e re thin ney ko Mt 13:52 ni kan pilyeg ni “kar filed.”) Fa gal bugithin ni ngam “taufenagrad” nge ngam “fil ngorad” e be dag e n’en nib muun ko n’en ni kan tay chilen ngodad ni nga darod ngak girdien e pi nam ngad ‘pingeged yad ngar manged pi gachalpen’ Jesus.
girdien e pi nam: Rogon ni un pilyeg e re thin ney e u nog ni “gubin e nam,” machane rogon ni tamilangnag e pi verse u m’on ngu tomuren e re verse ney e be dag nre thin ney e be yip’ fan e girdi’ ko pi nam. Bochan ni un fanay fare thin nu Greek ni kan pilyeg ni taufenagrad ma re thin ney e be yip’ fan e girdi’ ma gathi nam. Re n’ey ni kan tay chilen ni ngan machibnag “girdien e pi nam u gubin yang” e ba yaram nib beech. Ya u m’on ni nge tabab Jesus ko machib ma be tamilangnag e Babyor nib Thothup nrayog ni nge yib e piin ni gathi yad piyu Israel nga Israel ni faanra yad baadag ni ngar pigpiggad ngak Jehovah. (1Ki 8:41-43) Ere re n’ey ni ke tay Jesus chilen ngak pi gachalpen ni ngar machibnaged e girdi’ u yugu boch e nam ma gathi kemus ni piyu Jew, e be tamilangnag nre maruwel ni machib ney ni gad be rin’ e ban’en ni ngan rin’ u ga’ngin yang e fayleng.—Mt 10:1, 5-7; Re 7:9.
nwtsty-E study note ko Mt 28:20
mi gimed fil ngorad: Fare thin nu Greek ni kan pilyeg ni ngan “fil ngorad” e ba muun ngay ni ngan fil ngak be’ ban’en min tamilangnag fan u wan’, mu kun micheg fan e pi n’em ngak. (Mu guy e pi study note ko Mt 3:1; 4:23.) Ma re n’em ni ngan ayuweg e girdi’ ni ngar folgad u gubin e tin ni tay Jesus chilen ngodad ni ngad folgad riy e ban’en ni ngan rin’ ni bochan e ngad ayuweged e en ni gad be fil e pi n’em ngak ni ngki yognag yugu boch pi gachalpen Jesus. Faanra nge yag ni ngad rin’ed e re n’ey mab muun ngay ni ngad filed ngak facha’ e tin ni i fil Jesus, ma gad ayuweg ni nge fol riy, mu ud folwokgad rok Jesus u rogon ni rin’ e re maruwel ney.—Joh 13:17; Efe 4:21; 1Pe 2:21.
Ngan Fal’eg i Gay Boch Ban’en nib Ga’ Fan ko Thin rok Got
nwtsty-E fa gal study note ko Mt 27:51
fagi mad ni kan tining nga lang: Re ngi mad ney nib fel’ yaan e ir e ke kieg e Gin nib Thothup ko Gin Th’abi Thothup u lan e tempel. Rogon ni yog piyu Jew kakrom e re gi mad nem e ba tomal, ya 18 e meter (60 ft) n’umngin, ma 9 e meter (30 ft) radan, ma 7.4 e cm (2.9 in) dub’aggin. Nap’an ni mogchoth e re gi mad ney u lang nga but’ nge ruw yang, ma re n’ey e gathi kemus ni dag gelngin e damumuw rok Jehovah ngak e piin ni kar thanged e fan rok Fak, ya ku be dag ni ireray e ngiyal’ ni ke mab e kanawo’ ngak e piin ni bay e athap rorad ko yan nga tharmiy.—Heb 10:19, 20; mu guy e Glossary.
tempel: Kan pilyeg e re bugithin ney ko fare thin ni Greek ni na·osʹ ni be yip’ fan bangi ban’en ni bay u lukngun e tempel ni kan singgilnag ni bang riy e yima yog e Gin nib Thothup ngay ma bang e yima yog ni aram e Gin Th’abi Thothup.
nwtsty-E study note ko Mt 28:7
marow nga mognew ngak pi gachalpen ni . . . kan faseg ko yam’: Gali ppin ney e gathi kemus ni yow e som’on nnog ngorow ni kan faseg Jesus ko yam’, ya ku nog ngorow ni nga ranow ni nga rognew ngak e tin ni ka bay pi gachalpen Jesus murung’agen e re n’ey. (Mt 28:2, 5, 7) Rogon ko yalen rok piyu Jew kakrom e dabiyog ni ngan fanay e n’en ni ma yog e piin nib pin u lan e kort. Re n’ey e ba thil ko n’en ni yog fare engel rok Jehovah, ya rogon e thin rok e be m’ug riy ni be tayfan e gali ppin nem u nap’an ni pi’ e re maruwel ney ngorow.
April 16-22
BOCH E THIN NIB GA’ FAN KO THIN ROK GOT | MARK 1-2
“Ke M’ay Fan e Denen Rom”
jy-E 67 ¶3-5
“Ke M’ay Fan e Denen Rom”
Nap’an ni be machib Jesus u lan ba naun nib sug ko girdi’ me yib aningeg i pumoon ni kar feked be’ nib moon nib mugutgut u daken e wormel i yib ngak. Yad baadag ni nge golnag Jesus e re moon nem ni fager rorad. Machane bochan nib pire’ e girdi’ ni bay ko gin’em, ma aram fan ndabiyog ni ngar ‘chugurnaged’ e re moon nem ngak Jesus. (Mark 2:4) Ere am lemnag gelngin e kireban’ nra ted. N’en nrin’ed e ranod nga daken e chigiy ko re naun nem, mar chabliyed e chigiy riy, ngemu’ mar nguchuruyed fare wormel nga but’ ni bay fare moon nib mugutgut u daken nga lan fare naun ni bay Jesus riy.
Ere gur, ke puwan’ Jesus ko re n’em ni kar rin’ed? Danga’! Ya ke gin nga gelngin e michan’ rorad, ma aram me gaar ko fare moon nib mugutgut: “Ke m’ay fan e denen rom.” (Matthew 9:2) Machane, riyul’ nrayog ni nge n’ag Jesus fan e denen, fa? De lemnag e pi tamachib ko motochiyel nge pi Farise nrayog ni nge rin’ Jesus e re n’ey, ma aram fan nra gaargad: “Mang fan ni be non e cha’nem ni aram rogon nib togopluw ngak Got? Ya dariy be’ nrayog ni nge n’ag fan e denen; ya ke mus ni Got e rayog rok!”—Mark 2:7.
Manang Jesus e n’en ni yad be lemnag, ere gaar ngorad: “Mang fan ni gimed be lem ni er rogon? Gur mmom ni nge lunguy ko re mugutgut ney, ke m’ay fan e denen rom, fa nge lunguy ngak, mu sak’iy ngam fek e wormel rom ngam man?” (Mark 2:8, 9) Arrogon, bochan ndab ki n’uw nap’an ma ra pi’ Jesus fare biyul, ma aram fan nrayog rok ni nge n’ag fan e denen ko re moon nem.
nwtsty-E study note ko Mr 2:9
Gur mmom ni nge lunguy, . . . fa nge lunguy: Ra nga mog ni ngam n’ag fan e denen rok be’, ma re n’ey e ban’en nib mom ni bochan e de t’uf ni ngam dag e mich riy nriyul’ nrayog ni ngam rin’ e re n’em. Machane ra nge yog Jesus ngak fare moon ni, Mu sak’iy . . . ngam man ma ireray ban’en nib mo’maw’. Ya ba t’uf ni nge ngongliy reb e maang’ang ni nge micheg nriyul’ ni bay mat’awun ni nge n’ag fan e denen. Re n’ey ni rin’ Jesus nge fare thin ni bay ko Isa 33:24 e be dag nib l’ag rogon e m’ar ni ma yib ngodad ko denen ni ke af ngodad.
Ngan Fal’eg i Gay Boch Ban’en nib Ga’ Fan ko Thin rok Got
nwtsty-E pi study note ko Mr 1:11
min rung’ag ba lam u tharmiy: Dalip yay ni weliy e pi Gospel murung’agen rogon ni non Jehovah ko girdi’, ma ireray e yay nsom’on riy.—Mu guy e pi study note ko Mr 9:7; Joh 12:28.
I gur Fakag: Nap’an ni immoy Jesus u tharmiy ni ir reb e kan, ma ir Fak Got. (Joh 3:16) Ma nap’an nni gargeleg ni ir reb e girdi’ maku ir “Fak Got” nib flont ni bod rogon Adam ko som’on. (Lu 1:35; 3:38) Machane n’en ni yog Got e gathi kemus ni be tamilangnag ko mini’ Jesus. Ya n’en ni yog nge n’en ni rin’ ni aram e puog gelngin nib thothup nga daken Jesus e aram rogon ni dag Got ni Jesus e ir fak nib maagirag rok ni kan “gargelnag bayay” ni bay e athap rok nra sul nga tharmiy min dugliy u daken gelngin nib thothup ni nge mang Pilung nge Prist Nth’abi Tolang.—Mu taareb rogonnag ko Joh 3:3-6; 6:51; Lu 1:31-33; Heb 2:17; 5:1, 4-10; 7:1-3.
Kari felan’ug ngom: Ku bay e re thin ney ko Mt 12:18 ni be weliy murung’agen fare Messiah ni kan micheg ara Kristus. Ma re thin ney ni bay ko Mt 12:18 e be sul u daken fare thin ni bay ko Isa 42:1. Ere nap’an ni puog Got gelngin nib thothup nga daken Jesus miki yog e re thin ney ni murung’agen Fak, ma aram e n’en nri tamilangnag ni Jesus e ir fare Messiah ni kan micheg.—Mu guy e pi study note ko Mt 3:17; 12:18.
nwtsty-E study note ko Mr 2:28
Somol ko Sabbath: Re thin ney ni yog Jesus e ba sor fan ngak (Mt 12:8; Lu 6:5), ni bochan e kan pag fan e rofen ni Sabbath ni nge rin’ e maruwel ni ke pi’ e Chitamangin u tharmiy ngak ni nge rin’. (Mu taareb rogonnag ko Joh 5:19; 10:37, 38.) I ngongliy Jesus boch e maang’ang ko rofen ni Sabbath nib manigil nib muun ngay ni golnag e piin ni yad ba m’ar. (Lu 13:10-13; Joh 5:5-9; 9:1-14) Pi n’ey ni i rin’ Jesus e be dag rogon e ayuw nra pi’ ngodad boch nga m’on u tan Gil’ilungun Got nra bod rogon e toffan ni yima tay ko rofen ni Sabbath.—Heb 10:1.
April 23-29
BOCH E THIN NIB GA’ FAN KO THIN ROK GOT | MARK 3-4
“Ngan Golnag e Girdi’ ko Rofen ni Sabbath”
jy-E 78 ¶1-2
Mang e Ba Puluw ni Ngan Rin’ ni Bay Rogon ko Motochiyel ko Sabbath?
Immoy reb e Sabbath ni yan Jesus nga lan reb e tafen e muulung nsana bay u Galile. Aram e gin ni pirieg ba moon riy nib marwoth e ba’ ni mat’aw i pa’. (Luke 6:6) Pi tamachib ko motochiyel nge pi Farise e kar pared nri yad be fal’eg i yaliy Jesus. Mang fan ni yad be yaliy Jesus? Deer ni ur fithed e m’ug riy fan ni yad be yaliy Jesus. Ur fithed ni lungurad: “Ba togopluw ko Motochiyel rodad ni ngan golnag e liliy ko chirofen ni sabbath fa?”—Matthew 12:10.
Rogon ni be lemnag e pi tayugang’ ko teliw rok piyu Jew e ba puluw ko motochiyel ko Sabbath ni ngan ayuweg be’ nib m’ar, ni faanra ke par e yafos rok u thatharen e riya’. Ere faanra ke thil e yil u bang u dow be’ ara ke murup bang u dow, ma rogon ko motochiyel rorad ni fan ko Sabbath e dabiyog ni ngan ayuweg, ya bochan ni ku rayog ni ngki mun nga reb e rran. Re n’ey e be tamilangnag ni pi tayugang’ ko teliw e darur lemnaged rogon ni ngan ayuweg fare moon nib marwoth barba’ i pa’. Ya yad be gay tapgin nrayog ni nga rogned nib kireb e n’en ni be rin’ Jesus.
jy-E 78 ¶3
Mang e Ba Puluw ni Ngan Rin’ ni Bay Rogon ko Motochiyel ko Sabbath?
Machane manang Jesus e n’en ni yad be lemnag. Manang ni kaygi pag rogon ni be lemnag e pi tayugang’ ko Jew fare motochiyel ko Sabbath ma daki puluw e re n’ey ko n’en nib m’agan’ Got ngay. (Exodus 20:8-10) Ya kur gathibthibnaged rogon e maruwel ni i rin’ ni yugu aram rogon ni pi maruwel nem e boch e maruwel nib fel’. Aram fan ni gaar Jesus ko fare moon nib marwoth barba’ i pa’, “Moy ira’ nga m’on,” ya baadag ni nge bing e kanawo’ ngorad ni nga rogned e n’en ni yad be lemnag. —Mark 3:3.
nwtsty-E study note ko Mr 3:5
ke puwan’ ma ke kireban’: Kemus nu lan e babyor rok Mark e bay riy murung’agen rogon laniyan’ Jesus ko re ngiyal’ i n’em u nap’an ni guy feni ba gelan’ fapi tayugang’ ko teliw. (Mt 12:13; Lu 6:10) Rayog nrogon ni nang Mark murung’agen e re n’ey e sana i weliy Peter ngak ni ir be’ nib mom ni ma dag rogon laniyan’.—Mu guy e “Introduction to Mark.”
Ngan Fal’eg i Gay Boch Ban’en nib Ga’ Fan ko Thin rok Got
nwtsty-E fa gal study note ko Mr 3:29
ra yog be’ e tin nib kireb nib togopuluw nga gelngin Got nib thothup: Re n’ey e be yip’ fan e thin nib kireb ni yima yog nib togopuluw ngak Got ara pi n’en ni bay rogon ko tirok ban’en. Bochan ni gelngin Got nib thothup e ke yib rok Got, ma aram fan ni faan ra yog be’ boch e thin nib togopuluw ku Got ni lem rok, ara be siyeg rogon ni be maruwel gelngin nib thothup, ma aram e be togopuluw ngak Got. Rogon ni be tamilangnag fapi thin ni bay ko Mt 12:24, 28 nge Mr 3:22, e fapi tayugang’ ko teliw rok piyu Jew e kar guyed rogon ni maruwel gelngin Got nib thothup u nap’an ni ngongliy Jesus e maang’ang. Machane u rogned ni Satan ni Moonyan’ e ir e ke pi’ gelngin ni nge rin’ e pi n’em.
ke rin’ reb e denen ndabi m’ay machan biid: Re n’ey e be weliy murung’agen be’ ni ke denen nni lem rok ma aram e ra par wenegan e denen rok ni manemus. Miti ney e denen e dariy reb e maligach nrayog ni nge upunguy.—Mu guy e study note ni be weliy murung’agen be’ nra yog e tin nib kireb nib togopuluw nga gelngin Got nib thothup ni bay ko re verse ney nge study note ko Mt 12:31 ni ki weliy murung’agen e re n’ey.
Ga Be ‘Nang Fan’ Fa Danga’?
6 Mang e gad ra fil ko re fanathin ney? Bin som’on e, ba t’uf ni ngad nanged ndabiyog ni ngad gagiyegniged rogon ni be mon’og be’ ni gad be fil e Bible ngak ko tirok Got ban’en. Faanra gad manang e gin ni ngad musgad riy, ma aram e dab da towasariyed facha’ ni nge un ko taufe. Gad ra athamgil u rogon nrayog rodad ni ngad ayuweged, machane thingar da nanged ni ir e ba milfan ngak ni nge dugliy ni nge ognag ir ngak Got. Ya faanra ke ognaged be’ ir ngak Jehovah ni bochan e riyul’ nib t’uf Jehovah rok, ma aram e ra m’agan’ Jehovah ko n’en ni ke dugliy facha’ ni nge rin’.—Ps. 51:12; 54:6; 110:3.
7 Bin migid e, faanra tamilang u wan’dad fan e re fanathin ney, ma ra ayuwegdad ni nge dabi mulan’dad ni faanra darud guyed angin e maruwel ni gad be tay ko som’on. Ba t’uf ni ngaud gum’an’niged gadad. (Jas. 5:7, 8) Mus ni faanra der ilal awochngin e tin riyul’ ni kad yunged nga laniyan’ be ni yugu aram rogon ni gad be athamgil u rogon nrayog rodad ni ngad ayuweged facha’, ma aram e gathi be yip’ fan nde fel’ rogon ni gad ma fil ban’en ngak be’. Ya kemus ni yigoo piin nib sobut’an’rad ma yad baadag ni ngar thilgad e ra pag Jehovah awochngin e tin riyul’ ni nge ilal u gum’ircha’rad. (Matt. 13:23) Ere, susun ndab ud lemnaged angin e machib ni gad ma tay ni be yan u rogon urngin e girdi’ ni kad ayuweged ni nge un ko taufe. Ya Jehovah e der ma yaliy angin e machib ni gad ma tay ni be yan u rogon ni be adag e girdi’ e machib. Ya athamgil ni gad ma tay u fithik’ e yul’yul’ e aram e n’en ni ma sap Jehovah ngay.—Mu beeg e Luke 10:17-20; 1 Korinth 3:8.
8 Bin dalip e, gathi gubin ngiyal’ ni gad ma guy rogon ni ma thilyeg e tin riyul’ laniyan’ be’. Bod ni immoy ba wu’ i mabgol ni i fil reb e walag nib missionary e Bible ngorow nrognew ko re walag nem ni yow baadag ni ngar unew ko publisher. Ere, puguran fare walag ngorow ni u m’on ni ngar unew ko publisher, mab t’uf ni ngar talgow ko tamagow. Machane, ma rognew ngak ni ke yan in e pul ni kar talgow ko tamagow. Kari gin fare walag ko n’en ni ka rognew ngak. Mang fan ni kar talgow ko tamagow? Kar nangew ni faan yow ra tamagow ma rayog ni nge guyrow Jehovah, ma ma fanenikay Jehovah e piin ni yad ma dake yad be liyor ngak machane bin riyul’ riy e ba kireb e ngongol rorad. Ere, kar turguyew u wan’row nreb e ngar ululgow ko tamagow ndab kur mithagew ko fare walag, ma reb e ngar talgow. T’ufeg rorow ngak Jehovah e ir e ayuwegrow ni ngar mel’egew e n’en nib fel’ ni ngar rin’ew. Ere, bin riyul’ riy e kar mon’oggow ko tirok Got ban’en ni yugu aram rogon nde nang fare walag.
April 30–May 6
BOCH E THIN NIB GA’ FAN KO THIN ROK GOT | MARK 5-6
“Bay Gelngin Jesus ni Nge Faseg e Piin nib T’uf Rodad ni Kar M’ad”
nwtsty-E study note ko Mr 5:39
dawori aw e fan rok ya be mol: U lan e Bible e yu ngiyal’ e yima taarebrogonnag be’ ni ke yim’ ngak be’ ni be mol. (Ps 13:3; Joh 11:11-14; Ac 7:60; 1Ko 7:39; 15:51; 1Th 4:13) Be n’en Jesus ni nge faseg fachi pin ni ke yim’, ere sana ke yog e re thin ney ni nge dag rogon nib mom rok ni nge faseg be’ ni ke yim’ ni bod rogon nib mom ni ngan pug be’ ni be mol. Jehovah e ir e pi’ gelngin Jesus ni nge faseg fachi pin ya ir e en ni “ma faseg e yam’ ma ra non me sum e tin nda immoy ban’en.”—Ro 4:17.
jy-E 118 ¶6
Ke Fos Fachi Pin!
Fapi maang’ang ni ngongliy Jesus u m’on ko re ngiyal’ nem e yog ngak e piin ni ayuwegrad ndab rogned ko girdi’ ni yoor e n’en ni rin’ ni fan ngorad. Ku ireray e n’en ni yog ngak fa gallabthir ko fachi pin ni ka fini faseg ko yam’. Yugu aram rogon ma bochan ni kari felfelan’ e gallabthir ko fachi pin nge ku boch e girdi’, ma aram fan ni ur wereged murung’agen e re n’ey “u gubin yang” ko re nug nem. (Matthew 9:26) Ere gur, faanra kam guy be’ nib t’uf rom ni kan faseg ko yam’, ma gathi kag ra weliy murung’agen u fithik’ e felfelan’, fa? Ireray e yay ni l’agruw ni faseg Jesus be’ ni ke yim’ ni kan yoloy murung’agen.
Ngan Fal’eg i Gay Boch Ban’en nib Ga’ Fan ko Thin rok Got
nwtsty-E study note ko Mr 5:19
ngam weliy ngorad: I yog Jesus ngak fare moon ni nge yog ngak pi girdien e n’en ni ke buch rok. (Mr 1:44; 3:12; 7:36) Re n’ey e ba thil ko n’en ni yog ngak yugu boch e girdi’ ni i ayuwegrad u nap’an ni ngongliy e tin som’on e maang’ang rok. Sana fan ni ke yog Jesus ngak fare moon e re n’em e bochan ni ka nog ngak ni nge chuw ko re binaw nem, ere dabkiyog ni nge machibnagrad. Maku reb e, faan ra weliy e re moon nem e n’en ni buch rok, ma aram e n’en nra ayuweg ni nge tamilang murung’agen e n’en ni be weliy e girdi’ ni kar puwan’gad ni bochan fa ran’ i babiy nra mulgad u taban bangi war nga lan fare lipath ngar limochgad.
nwtsty-E study note ko Mr 6:11
mi gimed rurug e rifrif u aymed nge chuw e fiyath riy: Nap’an nra rin’ pi gachalpen Jesus e re n’ey, ma be yip’ fan ni yad be dag ngak e piin dubrad ni ngar motoyilgad ngorad nde milfan ngorad e n’en nra buch rorad u nap’an nra gechignagrad Got ni bochan e dar motoyilgad. Ku nog e re thin ney ko Mt 10:14, nge Lu 9:5. Ki puthuy Mark nge Luke fapi thin ni aram e gimed be dag ngorad nib kireb e tin ni kar rin’ed ko re thin ney. Ku ireray e n’en ni rin’ Paul nge Barnabas u nap’an ni ur mew ko fare binaw ni Pisidian Antiok. (Ac 13:51) Mus nga nap’an ni yan Paul nga Korinth maku ireray e n’en ni rin’ u nap’an ni rurug e fiyath ko mad rok, me gaar: “Faan gimed ra malog, ma gimed e kireb romed! Me gag e dariy rogon ngog.” (Ac 18:6) Re n’ey e ban’en ni ku manang pi gachalpen Jesus, ya ba ga’ ni pi Jew ni yad ba m’ing ko teliw rorad ni yad ma milekag u lan e pi nam ni gathi nam rok piyu Jew e yad ma rurug e fiyath u ayrad u m’on ni ngar sulod ko nam rorad. Re n’ey ni yad ma rin’ e bochan e yad ma lemnag ni ngar chuweged e fiyath ni bay rogon ko piin ni yad be lemnag ni yad ba alit. Machane, ba tamilang nib thil e n’en ni be lemnag Jesus u nap’an ni yog ngak pi gachalpen e re n’ey ni ngar rin’ed.