Pi Reference ni Fan ko fare Babyor ni Pi N’en ni Ma Rin’ e Piin Kristiano nge Machib ni Yad Ma Tay
March 5-11
BOCH E THIN NIB GA’ FAN KO THIN ROK GOT | MATTHEW 20-21
“Faanra Ba Adag Bigimed ni Nge Mang Ir e Ba Tolang, Ma Ir e Thingari Mang Tapigpig Romed”
nwtsty-E media
Market
Bay boch e market ni bod rogon e re market ney ni kan dag yaan u roy ni yima tay u charen e kanawo’. Yu ngiyal’ e bochan ni ma tay e piin ni yad ma fol chuway’ e chugum ni boor u lan e kanawo’, ma aram fan ni ke mo’maw’ ni nga i yan e girdi’. Girdi’ ni yad ma par u rom e rayog ni ngar chuw’iyed boch ban’en nib t’uf u lan e tabinaw rorad, nge boch ban’en ni kan ngongliy ko but’, nge boch ban’en nib tolang puluwon ni kan ngongliy ko melor, nge ku boch e wom’engin e gek’iy nge yasay. Bochan ndariy e icebox u rom nrayog ni ngan tay e ggan ngay ni nge dabi kireb, ma aram fan nib t’uf ni nga i yan e girdi’ nga market ni gubin e rran ya ngar chuw’iyed e pi n’en nib t’uf rorad. Ere nap’an nra yan be’ e ngaram ma aram e rayog ni nge rung’ag boch ban’en ni be weliy e piin ni yad be yib ngaram ni ngar pied e chugum rorad nchuway’ nge ku boch e girdi’. Ku ireram e gin nrayog ni nge fafel e bitir riy, maku bay e piin ni yad be son ni ngan fekrad ko maruwel. Immoy ba ngiyal’ ni i golnag Jesus e girdi’ nib m’ar u rom, maku ireray e gin ni i machib Paul riy. (Ac 17:17) Machane pi tamachib ko motochiyel nge pi Farise ni yad ba tolangan’ e yad ma yan ngaram ni bochan e yad baadag ni nga i guyrad e girdi’ ma yibe non ngorad.
nwtsty-E fa gal study note ko Mt 20:20, 21
chitiningin fa gali cha’ ni fak Zebede: Ireray e chitiningin fa gal apostal ni ka nog James nge John ngorow. Rogon e thin ni yog Mark e James nge John e aram e gali cha’ nranow ni ngar nonow ngak Jesus. Ere ba tamilang ni yow e rognew ngak Salome ni chitiningirow nsana ir e walagen e chitiningin Jesus ni nge mang ir e nge yan i non ngak Jesus.—Mt 27:55, 56; Mr 15:40, 41; Joh 19:25.
bagayow nga ba’ ni mat’aw rom ma bagayow nga ba’ ni gilay’ rom: Be tamilangnag e re thin ney ni en nra par ko gal liw ney e yira tayfan mab ga’ lungun, machane en nra par ko ba’ ni mat’aw e ir e en th’abi tolang e liw rok.—Ps 110:1; Ac 7:55, 56; Ro 8:34.
nwtsty-E fa gal study note ko Mt 20:26, 28
tapigpig: Ba ga’ ni ma fanay e Bible fare bugithin nu Greek ni di·aʹko·nos ni nge yip’ fan be’ nder ma tal i rin’ boch ban’en ni fan ngak yugu boch e girdi’. Kan fanay e re bugithin ney ni ngan weliy murung’agen e n’en ni rin’ Kristus (Ro 15:8), nge pi tapigpig rok Kristus (1Ko 3:5-7; Kol 1:23), nge piin ni yad be ayuweg e ulung rok Got (Fil 1:1; 1Ti 3:8), nge piin ni yad ma pigpig u lan reb e tabinaw (Joh 2:5, 9), nge pi tayugang’ ko am (Ro 13:4).
nde yib ni ngan pigpig ngak, machane yib ni nge pigpig: Ara “nge pigpig ngak yugu boch e girdi’ ma gathi girdi’ e ngar pigpiggad ngak.”
Ngan Fal’eg i Gay Boch Ban’en nib Ga’ Fan ko Thin rok Got
nwtsty-E study note ko Mt 21:9
Ke sorok Fak David! I Got e nge ayuweg: Re thin ney e be yip’ fan e “Hosanna.” Kan fek e re thin nu Greek ney ko fare thin nu Hebrew ni be yip’ fan ni “gamad be meybil ngom ni ngam ayuwegmad” ara “wenig ngom, mu ayuwegmad.” Kan fanay e re thin ney ni bochan e yibe wenig ngak Got ni nge ayuwegdad ni ngad thapgad ngak miki pi’ gelngidad ni ngad gelgad ko pi magawon ni gad ma mada’nag. Maku rayog ni ngan pilyeg e re thin ney ni “wenig ngom mu thapegmad ngom.” Munmun ma aram e un fanay e re thin ney u nap’an ni ngan meybil ara u nap’an ni ngan pining e sorok ngak Got. Re thin nu Hebrew ney e rayog ni ngan pirieg ko Ps 118:25, ni ireray bang ko fapi tang ni yima yon’ u nap’an e madnom ko Paluk’af ni yibe Pining e Sorok ngak Got. Ere aram fan ni boor e girdi’ ni ma yib ngan’rad e thin ko re tang ney u nap’an e Paluk’af. Nap’an ni faseg Got Jesus ma aram reb e kanawo’ ni fulweg Got taban e n’en ni i wenignag e girdi’ ngak ni nge ayuweg Jesus ni Fak David. Nap’an ni yog Jesus fare thin ni bay ko Mt 21:42, ma aram e be sul u daken fapi thin ni bay ko Ps 118:22, 23 me tamilangnag rogon ni lebug e re thin ney u daken fare Messiah.
Fak David: Re thin ney e be dag ko mang tabinaw e yib Jesus riy nge liw rok ni ir fare Messiah ni kan micheg.
jy-E 244 ¶4-6
Kan Fanay fare Ke Gek’iy ni Fig ni Ngan Fil Ban’en u Murung’agen e Michan’
Ere mang fan ni n’igin Jesus fare ke gek’iy ni nge mororoy? I tamilangnag fan u nap’an ni gaar: “Dab mpaged talin e re bugithin ni baaray! Faanra pagan’med nga gelngin Got nder maruwaran’med riy ma aram e rayog ni ngam rin’ed e n’en ni kug rin’ ko re ke gek’iy ney; gathi ke mus ni biney, ku rayog ni nge lungumed ko re burey ney, ‘Mpuw nga lang ngam man mu aw nga maday, me rin’ ni aram rogon.’ Faanra mmich Got u wun’med ma demturug e n’en ni gimed ra ning ngak ko meybil romed ma ra yog ngomed.” (Matthew 21:21, 22) Ere nap’an ni weliy Jesus e pi thin ney ma aram e be sul ngki weliy murung’agen rogon gelngin e michan’ nrayog ni nge mithmitheg e burey ni aram ban’en ni ke mu’ i weliy kafram boch.—Matthew 17:20.
Fan ni n’igin Jesus fare ke gek’iy ni nge mororoy, e be guy rogon ni nge fil ngak pi gachalpen u feni ga’ fan ni nge michan’rad ngak Got. Ere i yog ni gaar: “Aram fan ni gu be yog ngomed, ni ngiyal’ ni gimed ra meybil ni kam ninged ban’en ni ngan pi’ ngomed, me pagan’med ngay ni ke yog ngomed, ma aram e urngin fapi n’em ni yira pi’ ngomed.” (Mark 11:24) Ireray ban’en nrib ga’ fan nrayog ni nge fil gubin pi gachalpen Jesus ban’en riy! Ku ireray ban’en nrib t’uf ko pi apostal rok Jesus ni bochan e pi skeng ni yad ra yan u fithik’ boch nga m’on. Machane re gek’iy ni fig ney e ku bay ban’en nib l’ag rogon ngay nge rogon e michan’ ni bay rodad.
Fare nam nu Israel e yad bod e re ke gek’iy ni fig ney. Ya bay ba m’ag ni kan ngongliy u thilrad Got, ma rayog nsana yad ma dake yad be fol ko pi Motochiyel rok. Machane yooren i yad e dakur yul’yul’gad ma ke war e michan’ rorad, ma daki yib wom’engirad nib fel’. Mus ngak Jesus ni Fak Got ma daki riyul’ u wan’rad! Ere nap’an ni n’igin Jesus fare ke gek’iy ni fig ni nge mororoy, ma aram e be dag e n’en nra buch rok fare nam nu Israel ndakur yul’yul’gad.
March 12-18
BOCH E THIN NIB GA’ FAN KO THIN ROK GOT | MATTHEW 22-23
“Ngam Fol ko Fa Gali Motochiyel Nth’abi Ga’ Fan”
nwtsty-E pi study note ko Mt 22:37
gum’irchaem: Nap’an ni yira fanay e re bugithin ney nib fanathin, mab ga’ ni be yip’ fan rarogon be’. Ma nap’an ni yira fanay e re bugithin ney ni gum’irchaem, nge “lanin’um” nge “lem rom” u taabang, ma aram e be yip’ fan rogon lanin’dad nge pi n’en ni gad baadag. Ere nap’an ni yira fanay e pi thin ney (ni gum’irchaey, nge lanin’uy, nge lem) u taabang ma aram e be dag rogon gelngin e t’ufeg nsusun ni ngad daged ngak Jehovah.
lanin’um: Ara “gadad nib polo’.”
lem rom: Re n’ey e be yip’ fan rogon ni gad ma lemnag ban’en. Ra be’ ma thingari maruwel ko lem rok ni nge yag ni nge nang rarogon Got miki gelnag e t’ufeg rok ngak. (Joh 17:3) Nap’an ni yibe sul u daken fare thin ni bay ko De 6:5 ma aram e yibe fanay fa dalip bugithin ni ‘gum’irchaey, nge lanin’uy, nge gelngiy’ nrogon ni bay ko thin nu Hebrew kakrom. Machane ke fanay Matthew fare bugithin ni “lem rom” ma gathi “gelngim” nrogon ni bay ko thin nu Greek. Sana bay boch i fan nib thil rogon ni kan fanay e yu bugithin ney. Bin som’on e, yugu aram rogon ndariy yu bugithin ni Hebrew kakrom ni taareb rogon fan ko fare bugithin ni “lem,” machane nap’an ni yira weliy fare bugithin ni “gum’irchaem” ko thin nu Hebrew, mab muun e lem ngay. Ere nap’an ni yira fanay e re bugithin ney ni gum’irchaey nib fanathin, ma be yip’ fan rarogon be’ nre n’ey e muun ngay rogon ni ma lem, nge rogon ni ma ngongol, nge fan ni ma rin’ boch ban’en. (De 29:4; Ps 26:2; 64:6; mu guy e study note ko gum’irchaem ko re thin nu Bible ney.) Aram fan nnap’an ni un fanay fare bugithin ni “gum’irchaem” ko pi thin nu Bible nni yoloy ko thin ni Hebrew, ma fare ke Bible ni Greek Septuagint e i fanay fare bugithin ni “lem.” Ma gal bugithin ney e taareb fan. (Ge 8:21; 17:17; Pr 2:10; Isa 14:13) Ku reb i fan nsana i fanay Matthew fare bugithin ni “lem” ko thin nu Greek ma de fanay e “gelngimed” u nap’an ni be sul u daken fapi thin ni bay ko De 6:5 e bochan nre bugithin nem ni kan pilyeg ni “gelngimed” ko thin nu Hebrew e rayog ni nge yip’ fan gelngidad, nge gelngin e lem rodad. Ere bochan nib chugur fan e gal bugithin ney ko thin nu Hebrew nge Greek, ma aram fan nnap’an nni yoloy Matthew nge Luke e Gospel rorow, mab thil fare bugithin ni ur fanayew u nap’an nra sulow u daken fapi thin ni bay ko Deuteronomy.
nwtsty-E fa gal study note ko Mt 22:39
bin migid ngay: Rogon e fulweg ni pi’ Jesus ko fare deer ni fith fare Farise ngak e bay ko Mt 22:37. Machane gathi kemus ni pi’ e fulweg ko deer nni fith ngak, ya ki sul u daken fapi thin ni bay ko bin l’agruw e motochiyel. (Le 19:18) Re n’ey ni weliy Jesus murung’agen e be tamilangnag ni gal motochiyel ney e ba l’ag reb nga reb, ma urngin e pi n’en ni bay ko Motochiyel rok Moses nge tin ni be fil e pi Profet e be tor nga daken e gali motochiyel ney.—Mt 22:40.
en ni ir e mmigid ngom: Re bugithin ney ko thin nu Greek e gathi kemus ni be yip’ fan e piin buguli yoror rom. Ya ku rayog ni nge yip’ fan be’ ni kam mada’nag.—Lu 10:29-37; Ro 13:8-10.
nwtsty-E fa gal study note ko Mt 22:40
Motochiyel rok Moses nge tin i fil e pi profet: Fare “Motochiyel rok Moses” e be yip’ fan e pi babyor ko Bible ni tabab ko Genesis nge mada’ ko Deuteronomy. Ma “tin i fil e pi profet” e be yip’ fan e pi babyor ni yoloy e pi profet ni bay ko Pi Babyor ko Bible nni Yoloy Nsom’on ni Thin ni Hebrew. Machane nap’an ni yira weliy murung’agen e Motochiyel rok Moses nge tin i fil e pi profet u taabang, ma aram e be yip’ fan gubin e Pi Babyor ko Bible nni Yoloy Nsom’on ni Thin ni Hebrew.—Mt 7:12; 22:40; Lu 16:16.
be tor: Re bugithin nu Greek ney e be yip’ fan “ni ngan kol ban’en ndabi mul.” Ma yibe fanay u roy nib fanathin ni nge yip’ fan ni “nge tor nga daken.” Ere be tamilangnag Jesus ni gathi kemus ni fare Motochiyel rok Moses ni bay fa Ragag i Motochiyel riy e be tor nga daken e t’ufeg, ya gubin e Pi Babyor ko Bible nni Yoloy Nsom’on ni Thin ni Hebrew e ku be tor ko t’ufeg.—Ro 13:9.
Ngan Fal’eg i Gay Boch Ban’en nib Ga’ Fan ko Thin rok Got
nwtsty-E fa gal study note ko Mt 22:21
mpied ngak e pilung nu Roma e tirok ban’en: Fulweg ni pi’ Jesus nrogon ni bay ko re thin ney nge fa gal thin ni bay ko Mr 12:17 nge Lu 20:25 e kemus e pi thin nu Bible ni weliy Jesus murung’agen fare pilung nu Roma. Pi n’en nib milfan ngak fare “pilung nu Roma” nthingar da pied ngak e ba muun ngay e pi n’en ni gad ma pi’ ni puluwon e maruwel ni be rin’ girdien e am nge rogon ni ngad ted farad. Re n’ey e kub muun ngay e pi motochiyel ni kar ngongliyed ni gad ma fol riy ni faanra dabi togopuluw ko n’en nib m’agan’ Jehovah ngay.—Ro 13:1-7.
pi’ ngak Got e tirok ban’en: Re n’ey e ba muun ngay e liyor ni gad ma tay ngak Jehovah u fithik’ e yul’yul’, nge t’ufeg, nge fol ni gad ma tay u fithik’ e yul’yul’.—Mt 4:10; 22:37, 38; Ac 5:29; Ro 14:8.
nwtsty-E study note ko Mt 23:24
gimed be puog e n’en ni ngam unumed nga lan bangi mad nge lul’ nga lan ban’en ni ir e ngam unumed riy ni bochan taab lal, machane mi gimed ful’ ba kamel ni ka reb: Fare lal nri ba achichig nge fare kamel ni ba mit e gamanman nrib ga’ e aram l’agruw ban’en nib alit u wan’ piyu Israel kakrom. (Le 11:4, 21-24) Ke fanay Jesus e fanathin u lan e re thin ney ni murung’agen l’agruw ban’en nrib thil ni nge tamilangnag e n’en ni ma rin’ e pi tayugang’ ko teliw ni yad ma puog e n’en ni ngar unumed nga lan bangi mad ya nge dab ra taaygad ni faan ra mul reb e lal ngay. Machane n’en ni yad be rin’ e yad be darifannag e tin nib ga’ fan ko fare Motochiyel, nre n’ey e taareb rogon ko bin baaray ni yibe ful’ ba kamel ni ka reb.
March 19-25
BOCH E THIN NIB GA’ FAN KO THIN ROK GOT | MATTHEW 24
“Mu Par ni Gab Od ko Tirok Got Ban’en u Nap’an e Tin Tomuren e Rran”
it-2-E 279 ¶6
T’ufeg
Rogon nib T’uf Be’ rok Be’ e Bayi Meewar. Nap’an ni be weliy Jesus Kristus ngak pi gachalpen murung’agen e pi n’en nra buch boch nga m’on, miki tamilangnag ni piin ni yad ma yog nib mich Got u wan’rad e ra munmun me war fare t’ufeg (a·gaʹpe) ni bay rorad. (Mt 24:3, 12) Ki yog apostal Paul nreb e pow nra tamilangnag ni gad bay u ba ngiyal’ ni ke mo’maw’ e par riy e aram e ba ga’ ni kemus ni salpiy e ra m’on u wan’ e girdi’. (2Ti 3:1, 2) Ere ba tamilang nrayog rok be’ ni nge thil rogon ni be fol ko pi kenggin e motochiyel u lan e Bible, ma mus nga rogon nib t’uf Got rok e rayog ni nge munmun me war. Re n’ey e be tamilangnag feni ga’ fan ni ngaud maruweliyed ni nge par e t’ufeg rodad ngak Got nib gel. Rayog ni ngad rin’ed e re n’ey ni aram e ngad fal’eged i lemnag e Thin rok Got, ma gad guy rogon ni nge puluw e pi n’en ni gad ma rin’ u lan e yafos rodad ko pi kenggin e motochiyel rok.—Ef 4:15, 22-24.
Ga Be Rin’ Urngin Ban’en Ni Kam Micheg Ku Got?
5 Ke weliy Jesus Kristus rarogon e ngiyal’ ney ni gad bay riy nra mo’maw’ rogon e par ya be yog ni gaar: “Chirofen ni bay e en ni Fak e Girdi’ e bod e n’en ni rin’ ko fa ngiyal’ i n’em nnap’an Noah. Ni bod rogon fapi rran ni ba aram ni immoy nga m’on ko fa ngiyal’ i n’em ni yib e ran nge tharey e binaw, un abich ma yibe garbod, ma be mabgol e pumoon nge ppin nge yan i mada’ ko rofen ni baaram ni yan Noah nga lan fare arke; machane da ur nanged e n’en ni bay yib ngorad nge yan i mada’ ko ngiyal’ ni baaram ni yib e ran nge tharey e binaw nge fekrad ni yad gubin. Ere aram rogon e ngiyal’ ni baaram ni bay yib e en ni Fak e Girdi’ riy.” (Matthew 24:37-39) Dariy ban’en nib kireb riy ni faan yira abich ma yibe garbod, ma yibe un ko mabgol, ya mabgol e ban’en ni sunmiy Got. Machane urngin e pi n’ey e dabin rin’ nib pag rogon. (Genesis 2:20-24) Machane, faanra gad be guy ni pi n’en ni gad ma rin’ u reb e rran ngu reb e ir e ke m’on u wan’dad, ma aram e thingar da meybilgad ngak Got ni nge ayuwegdad. Rayog ni nge ayuwegdad Jehovah ni ngad m’oneged Gil’ilungun, ma gad rin’ e tin nib mat’aw, ma gad rin’ e tin ni kad micheged ngak ni ngad rin’ed.—Matthew 6:33; Roma 12:12; 2 Korinth 13:7.
jy-E 259 ¶5
Ke Fith e Pi Apostal ko Wuin e Ra Yib Jesus Riy
Ke weliy Jesus nib t’uf ni nge par pi gachalpen ni yad ba od ni gubin ngiyal’, ma kar fal’eged rogorad. Ki weliy reb e fanathin ni nge tamilangnag feni ga’ fan e re ginang ney ya yog ni gaar: “Mu ted fanmed i yan ko re bugithin ney; faan mang e manang e en ntafen e naun e ngiyal’ nra yib e moro’ro’ riy, ma ra i par ni be od nge dabiyog ni yan e moro’ro’ nga naun rok. Ereray fan ni ngkum pired ni gubin ngiyal’ ni kam fal’eged rogomed kam pired, ya en ni Fak e Girdi’ e ra yib u reb e awa ndamur fineyed nra yib riy.”—Matthew 24:43, 44.
Ngan Fal’eg i Gay Boch Ban’en nib Ga’ Fan ko Thin rok Got
nwtsty-E study note ko Mt 24:8
amith ni ma yib ngak be’ ni nge gargel: Re thin nu Greek ney e be yip’ fan e mochuch, nge amith, nge gafgow. Ku rayog ni ngan taareb rogonnag ko amith ni ma yib ngak be’ u nap’an ni nge gargel. Ya chiney ni gad be chugur i yan ko fare gafgow nib ga’ ni weliy Mt 24:21 murung’agen nge u m’on riy, e ra yoor e magawon ni gad ra yan u fithik’, ma ra gel e pi magawon ney i yan, ma rayog ni nge n’uw nap’an ni nga darod u fithik’.
nwtsty-E study note ko Mt 24:20
ngiyal’ nib gel e garbeb riy: Nap’an nra taw ko ngiyal’ ni keb e garbeb ma ra mo’maw’ ni ngan yan nga bang ara ngan pirieg e ggan ara gin ni ngan naf ngay ni bochan e ba ga’ ni ma aw e n’uw nib gel ma rayog ni nge tharey e ran e nam.—Ezr 10:9, 13.
chirofen ni sabbath: Bochan e motochiyel ni fan ko Sabbath ma aram fan ndabiyog ni nge yan be’ nga bang nib palog u lan e pi binaw nu Judea ara nge fek boch ban’en nib tomal. Mus ko pi garog u lan binaw ma yima ning u nap’an e Sabbath.—Mu guy e Ac 1:12 nge App. B12.
March 26–April 1
BOCH E THIN NIB GA’ FAN KO THIN ROK GOT | MATTHEW 25
“Mfal’eged Rogomed Ngam Pired”
Ngan Fal’eg i Gay Boch Ban’en nib Ga’ Fan ko Thin rok Got
Ngad Ayuweged Pi Walagen Kristus u Fithik’ e Yul’yul’
7 Chiney e ke tamilang fare fanathin ni murung’agen fapi saf nge kaming u wan’dad. Ke tamilang u wan’dad ni fa “en Fak e Girdi’” ara fare Pilung e be yip’ fan Jesus. Ma fapi cha’ ni yog fare pilung ni yad ‘pi walagen’ e be yip’ fan e pi pumoon nge ppin ni kan dugliyrad ni yad ra un ngak Kristus ko gagiyeg u tharmiy. (Rom. 8:16, 17) Ma fapi “saf” nge “kaming” e be yip’ fan girdien e pi nam. Machane, pi girdi’ ney e dabin dugliyrad nga gelngin Got nib thothup. Ma uw rogon e ngiyal’ ni yira pufthin riy? Yira rin’ e re n’ey u ba ngiyal’ u tungun fare gafgow nib ga’ ni bay yib ndab ki n’uw nap’an. Ma mang fan ni yira dugliy ni boch e girdi’ e yad bod e saf ma boch e yad bod e kaming? Yira dugliy e re n’ey ni be yan u rogon e ngongol rorad ngak pi walagen Kristus ni kan dugliyrad ni ka yad bay u fayleng. Chiney ni kari chugur nga tungun e re m’ag ney e ri gad be pining e magar ngak Jehovah ni ke ayuwegdad ni kab kafram i yib ni ngad nanged fan e re fanathin ney nge ku boch e fanathin ni bay rogon ngay ni bay ko Matthew ko guruy ni 24 nge 25!
“Gimed e Tafager Rog”
16 Faanra ga be athapeg ni ngam par u fayleng u tan Gil’ilungun Got, ma uw rogon ni ngam dag ni gur e fager rok pi walagen Kristus? Ngad weliyed dalip e kanawo’ nrayog ni ngad rin’ed e re n’ey riy. Bin som’on e, thingar da uned i rin’ fare maruwel ni machib u polo’ i gum’ircha’dad. Ke tay Kristus chilen ngak pi walagen ni ngar machibnaged fare thin nib fel’ u gubin yang u fayleng. (Matt. 24:14) Machane ba mo’maw’ ni nge mu’nag e tin ni ka bay pi walagen Kristus ni ka yad bay u fayleng e re maruwel ney ni faanra dabi ayuwegrad yugu boch e saf. Ere nap’an nra un reb i girdien yugu boch e saf ko machib, ma aram e be ayuweg pi walagen Kristus ni ngar lebguyed e maruwel ni ke pi’ Got ngorad. Rib fel’ u wan’ Kristus nge fare tapigpig nib yul’yul’ mab gonop rogon e ayuw ni ma pi’ yugu boch e saf ngorad.
17 Bin l’agruw e kanawo’ nrayog ni nge ayuweg yugu boch e saf pi walagen Kristus riy e, ngar pied e salpiy ni ayuw ni fan ko fare maruwel ni machib. Ke pi’ Jesus e athamgil nga laniyan’ pi gachalpen ni ngar fanayed e ‘pi flaab rorad ko re fayleng ney nde mat’aw’ ni ngar manged e fager rorow Jehovah. (Luke 16:9) Re n’ey e gathi be yip’ fan nrayog ni ngad pied e salpiy ngak Jesus ara Jehovah ya nge yag ni ngad manged fager rorow. Machane faan gad ra fanay e salpiy ara chugum rodad ni ngad mon’ognaged e pi n’en ni bay rogon nga Gil’ilungun Got, ma aram e gad be dag “ko ngongol” rodad ma gathi kemus ni u daken e thin rodad ni gadad e pi fager rorow ma yow ba t’uf rodad. (1 John 3:16-18) Rayog ni ngad pied e ayuw ngorad u nap’an ni gad ra un ko fare maruwel ni machib, nge nap’an ni gad ra pi’ e salpiy ni ayuw ni ngan toy ara ngan fal’eg e yungi n’en ni ke kireb ko pi naun ni fan ko liyor rodad, nge nap’an ni gad ra pi’ e salpiy ni ayuw ni fan ko machib ni yibe tay u ga’ngin yang e fayleng. Demtrug ko boor ara buchuuw e salpiy nrayog ni ngad pied, mab felfelan’ Jehovah nge Jesus ngay ya gad be pi’ u fithik’ e felfelan’.—2 Kor. 9:7.
18 Bin dalip e kanawo’ nrayog ni ngad daged ni gadad e pi fager rok Kristus e ngaud folgad u rogon ni be pow’iydad e piin piilal u lan e ulung. Kan dugliy e pi pumoon ney u daken gelngin Got nib thothup ni yad bay u tan pa’ Kristus. (Efe. 5:23) I yoloy apostal Paul ni gaar: “Mu folgad ko thin rok e piin ni yad be yog e thin romed.” (Heb. 13:17) Yu ngiyal’ e sana ba mo’maw’ ni ngad folgad ko fonow ni kar pied nib puluw e thin riy ko Bible. Ya sana gad manang thibngirad, ma re n’em e rayog ni nge k’aringdad ni nge mo’maw’ rogon ni ngad guyed fel’ngin e fonow ni yad be pi’ ngodad. Yugu aram rogon ma susun ni ngad folgad rorad ya be felfelan’ Kristus ni ir Lolugen e ulung ni nge fanay e pi pumoon ney ndawor ra flontgad. Ere, rogon ni gad ma tayfan mat’awrad u lan e ulung e bay rogon ko tha’ u thildad Kristus. Faanra dab da sapgad ko pi oloboch ko piin piilal ma gad fol rorad u fithik’ e felfelan’, ma aram e gad be dag nib t’uf Kristus rodad.