“Gimed e Tafager Rog”
“Gimed e pi tafager rog, ni faan gimed ra rin’ e tin ni kug ning chilen ngomed.”—JOHN 15:14.
1, 2. (a) Mang e i rin’ e pi tafager rok Jesus? (b) Mang nib ga’ fan ni ngad fagergad ngak Jesus?
FAPI pumoon ni ur moyed rok Jesus u lan reb e singgil ko thal ni nga lang e naun e ba thilthil e n’en ni ur rin’ed. Fa gal walag ni Peter nge Andrew e ur moyew ni yow e tafita’. Matthew e immoy ni ba ta mukun tax ni aram reb e maruwel ni dabun piyu Jew. James nge John, e manangrow Jesus u nap’an ni ka yow ba pagal. Nathanael e sana ri in e duw ni manang Jesus. (John 1:43-50) Machane yad gubin ni yad ba’ ko fare nep’ ko Paluk’af u Jerusalem e kar nanged ni Jesus e ir fare Messiah, ni fak Got. (John 6:68, 69) Rib mutrug ni kar felfelan’gad u nap’an ni gaar ngorad: “Machane nggog ni gimed e tafager rog, ni bochan e kug weliy ngomed urngin e tin ni kug rung’ag rok e Chitamag.”—John 15:15.
2 Pi thin nem ni yog ngak e pi apostal rok e bay fan ngak e piin ni Kristiano ni kan dugliyrad e ngiyal’ ney, ma kub muun “yugu boch e saf” ngay. (John 10:16) Demtrug ko mang e ud rin’ed, ma rayog ni ngad manged pi fager rok Jesus. Faanra da manged fager rok ma rib ga’ fan ni bochan e ku rayog ni ngad manged fager rok Jehovah. Riyul’ ni dabiyog ni ngad chugurgad ngak Jehovah ni faanra daworda chugurgad ngak Kristus. (Mu beeg e John 14:6, 21.) Mang e thingarda rin’ed ni ngad pired ni gad e fager rok Jesus? U m’on ni ngad weliyed e re n’ey, ma som’on e ngad guyed e kanawo’ ni ke dag Jesus ni ir reb e fager nib fel’ ma gad guy ko mang e gad ra fil u rogon ni ke fol pi gachalpen rok.
Rogon ni Ke Dag Jesus ni Ir e Fager nib Fel’
3. Mang e kan nang Jesus riy?
3 Ke gaar Solomon ni Pilung, “Be’ nib yoor ban’en rok e ba yoor e fager rok.” (Prov. 14:20, BT) Ireray e n’en ni ma rin’ e girdi’ ni dawor flontgad, yad ma m’ag fager ni bochan e ngan pi’ ban’en ngorad ma gathi ngar pied ban’en. Gathi aram rogon e ngongol rok Jesus. De fager ngak be’ ni boor ban’en rok fa ba fel’ rogon. Riyul’ ya ke dag e t’ufeg ngak be’ nib moon ni boor ban’en rok me pining ni nge mang reb i gachalpen. Ke yog Jesus ngak ni nge pi’ urngin ban’en rok ni chuway’ me pi’ e salpiy riy ngak e piin ni gafgow. (Mark 10:17-22; Luke 18:18, 23) Kan nang Jesus ni gathi bochan e i chag ngak e girdi’ nib fel’ rogon ma boor ban’en rorad, machane bochan e i fager ngak e piin nib sobut’ ma dabuy dakenrad.—Matt. 11:19.
4. Mang fan ni rayog ni nga nog ni bay thibngin e pi fager rok Jesus?
4 Pi fager rok Jesus e bay thibngirad. Ba’ bayay ni de yog rok Peter ni nge rin’ ban’en nib m’agan’ Got ngay. (Matt. 16:21-23) James nge John e ur dagew ni yow ba tolngan’ u nap’an nra fithew Jesus ni nge pi’ tagil’row u Gil’ilungun. Ngongol rorow e ke k’aring e damumuw ngak e tin ka bay e apostal, ma aram e ka yad be ulul ko tugthin ko mini’ e arorad e nge tolang. Ke gum’an’ Jesus me guy rogon ni nge yal’uweg e n’en ni be oloboch e pi fager rok riy.—Matt. 20:20-28.
5, 6. (a) Mang fan ni ke par Jesus ni ir e fager rok fa 11 i apostal? (b) Mang fan ni daki fager Jesus ngak Judas?
5 Ke fager Jesus ngorad ni gathi bochan e ba fel’ u wan’ e kireb ni ur rin’ed fa de guy e kireb rorad. Machane ke dugliy ni nge fager ngorad ni bochan e manang ni ba fel’ gum’ircha’rad ma bay fel’ngirad. Bod rogon Peter, James, nge John ni de yog ni ngar pired ni yad ba od ni ngar ayuweged u nap’an ni kari kireban’. De fel’ u wan’ Jesus e n’en ni kar rin’ed. Machane, ke guy ni be athamgil lanin’rad ni ngar ayuweged, ere ke gaar: “Lanin’uy e ba adag, ma dowef e mmeewar.”—Matt. 26:41.
6 Daki fager Jesus ngak Judas Iskariot. Ya ke nang Jesus ni ke pag Judas gum’irchaen ni nge kirebnag laniyan’. Ere bochan ni ke fager Judas ko girdi’ nu fayleng, ma aram e ke tay ir ni toogor rok Got. (Jas. 4:4) Tomuren ni chuw Judas rorad ma aram me micheg Jesus ngak fa 11 i apostal ni yad e fager rok.—John 13:21-35.
7, 8. Uw rogon ni ke dag Jesus e t’ufeg ngak e pi tafager rok?
7 De sap Jesus ko kireb ni rin’ e pi fager rok ya i guy rogon ni nge ayuwegrad ya manang ni ba t’uf e ayuw rorad. Ke meybil ngak e Chitamangin ni nge ayuwegrad ko skeng ni bay i yib ngorad. (Mu beeg e John 17:11.) Ke dag Jesus ni ma lemnag e tin ba t’uf rok pi gachalpen. (Mark 6:30-32) Gathi kemus ni baadag ni nge yog ngorad ko mang e be lemnag machane baadag ni nge motoyil me nang rarogorad.—Matt. 16:13-16; 17:24-26.
8 Ke pi’ Jesus e yafas rok ni nge yib angin ko pi fager rok. Riyul’ ni manang ni thingari pi’ e yafas rok ni aram ban’en ni ke dugliy e Chitamangin ni nge rin’. (Matt. 26:27, 28; Heb. 9:22, 28) Machane yafas rok ni ke pi’ e dag e t’ufeg rok. Ke gaar Jesus, “Rogon nib th’abi t’uf rok be’ e pi tafager rok e nge pi’ e pogofan rok ni fan ngorad.”—John 15:13.
Mang e Ke Rin’ e Pi Gachalpen ko N’en ni Rin’ Jesus Ngorad?
9, 10. Mang e ke rin’ e girdi’ u nap’an ni i gol Jesus ngorad?
9 Ba gol Jesus ya i pi’ e tayim rok ma i t’ufeg e girdi’ ma ki pi’ e tin nib t’uf ko girdi’. Ere boor e girdi’ ni kar bad ngak ni ngar ayuweged. (Luke 8:1-3) Ere bod rogon e n’en ni i rin’ ma aram e ke gaar: “Mu golgad ngak e girdi’ me gol e girdi’ ngomed: yad ra pi’ ngomed nge yan i mus nga rogon e fol riy, nra map’ nga pa’med ni pire’ nge sugsug pa’med riy. Ya re fol ni gimed ra pi’ ngorad e ereram e re fol ni yad ra pi’ ngomed.”—Luke 6:38, NW.
10 Riyul’ ni immoy boch e girdi’ kakrom ni ur chaggad ngak Jesus ni bochan e kemus ni yad baadag ni nge yog boch ban’en ngorad. Machane, kar digeyed Jesus u nap’an ni kar rung’aged boch e thin ni ke yog ni dar nanged fan. Dar pagedan’rad ngak Jesus ya kar lemnaged nib kireb e n’en ni ke yog ngorad ma aram e kar pied keru’rad ngak. Machane pi apostal rok e kar pared nib yul’yul’ ngak. Boor e magawon ni ke yib ngorad nrayog ni nge kirebnag e tha’ u thilrad Kristus, machane kar athamgilgad ni ngar ayuweged ndemtrug ko bay e magawon fa dariy. (Mu beeg e John 6:26, 56, 60, 66-68.) Fare nep’ u m’on ni yim’ Jesus, me dag ni yad ba t’uf rok ya gaar: “Urngin e gafgow ni yib ngog ma mpired rog nda mpaged gag.”—Luke 22:28.
11, 12. Mang e ke yog Jesus ngak pi gachalpen, ma mang e kar rin’ed?
11 De n’uw nap’an u tomuren ni ke yog Jesus ni ke felfelan’ ngak pi gachalpen ko yul’yul’ ni ur ted, ma aram ma ra digeyed. Immoy ba ngiyal’ ni ke war e t’ufeg rorad ngak Kristus ya kar rusgad ko girdi’ machane ke n’ag fan e kireb rorad bayay. Tomuren ni kan faseg ko yam’, me m’ug ngorad me yog boch e thin ni be dag ni ka yad ba t’uf rok. Maku, ke pi’ ngorad e maruwel ni ngar pingeged “girdien e pi nam u gubin yang” ngar manged pi gachalpen ma aram e yad ra mang pi mich rok “nge yan i mada’ ko yungi n’en ni yan i mus e fayleng ngay.” (Matt. 28:19; Acts 1:8) Ere mang e ke rin’ pi gachalpen?
12 Kar athamgilgad ni ngar wereged e thin ni murung’agen Gil’ilungun Got. Ngiyal’ nem ma ke chugur ni ngar machibnaged ga’ngin yang u Jerusalem. (Acts 5:27-29) Dar talgad i pingeg e girdi’ ni ngar manged pi gachalpen Jesus ni yugu aram rogon ni bay boch e girdi’ ni be guy rogon ni ngar lied yad. In e duw u tomuren ni kar tababgad ko maruwel ni ke pi’ Jesus ngorad, me yoloy apostal Paul ni kan mu’ i machibnag fare thin nib fel’ “ngak urngin e girdi’ u fayleng.” (Kol. 1:23) Dariy e maruwar riy, ni kar daged ni ba ga’ fan e tha’ u thilrad Jesus!
13. Uw rogon ni ke yib angin e machib ni i tay Jesus ngak pi gachalpen?
13 Piin ni kar manged pi gachalpen Jesus e kar paged e thin ni i machibnag nga i gagiyegnag e yafas rorad. Re n’em e be yip’ fan nib t’uf ni ngar thilyeged e ngongol rorad. Boch i yad e ur uned ko ngongol ni darngal, chingaw, nge moro’ro’. (1 Kor. 6:9-11) Boch i yad e thingar ra thilyeged e lem rorad nge fel’ girdien yugu boch e nam u wan’rad. (Acts 10:25-28) Kar folgad rok Jesus ma kar paged e ngongol nib kireb. (Efe. 4:20-24) “Laniyan’ Kristus” e ba’ rorad ma aram e yad ma fol ko lem nge ngongol rok.—1 Kor. 2:16.
Tha’ u Thildad Kristus e Ngiyal’ N’ey
14. Mang e ke micheg Jesus ni ra rin’ u nap’an e tin “tomren” e rran?
14 Boor e Kristiano ko bin som’on e chibog ni yad manang Jesus ara kar guyed u tomren ni kan faseg ko yam’. Machane gadad e de yog ni ngad guyed Jesus. Ere, uw rogon ni rayog ni ngad fagergad ngak Kristus? Reb e ngaud folgad ko thin ni ma yog fare tapigpig nib yul’yul’ mab gonop ngodad. Yad e pi walagen Jesus ni kan dugliyrad ni ka yad bay u fayleng. I micheg Jesus ni nap’an e tin “tomren” e rran ma ra tay ni “nge mil fan urngin ban’en rok” ngorad. (Matt. 24:3, 45-47) Ngiyal’ ney, ma ba ga’ ni piin ni yad be athamgil ni ngar manged e pi fager rok Kristus e gathi yad girdien fachi ulung. Uw rogon ni ke ayuwegrad fachi ulung ni ngar fagergad ngak Kristus?
15. Mang e ra dugliy ko ga bay ko ulung ko girdi’ ni bod e saf fa ulung ko girdi’ ni bod e kaming?
15 Mu beeg Matthew 25:31-40. Ke pining Jesus girdien fare tapigpig nib yul’yul’ mab gonop ni yad walagen. U lan fare fanathin ni murung’agen rogon ni ngan kieg e pi saf ko kaming, e yog Jesus nib tamilang ni n’en ni yira rin’ ngak e pi walagen e bod ni kan rin’ ngak. Ma rayog ni ngan nang ko mini’ e piin ni yad bod e saf ara kaming u rogon e ngongol rorad ngak ‘pi walagen.’ Ere bin th’abi fel’ e kanawo’ ni nge rin’ e piin ni bay e athap rorad ni ngar pared u roy u fayleng e ngar manged pi fager rok Kristus ma ranod nga laniyan’ fare tapigpig nib yul’yul’ mab gonop.
16, 17. Uw rogon ni ngad daged ni gad be m’ag fager ngak e pi walagen Kristus?
16 Faanra ga be athapeg ni ngam par u roy u fayleng u tan Gil’ilungun Got, ma uw rogon ni ngam dag ni pi walagen Kristus e yad e pi fager rom? Ngad weliyed dalip e kanawo’. Bin som’on, e thingar da uned i wereg e machib nib mus rogodad riy. I tay Jesus chilen ngak e pi walagen ni ngar machibnaged fare thin nib fel’ u gubin yang u fayleng. (Matt. 24:14) Machane, ba mo’maw’ ni ngar mu’naged e re maruwel ney ni faanra dabi ayuwegrad yugu boch e saf. Ere gubin ngiyal’ ni ma un e piin ni yugu boch e saf ko machib, ma aram e yad be ayuweg ni nge lebguy e pi walagen Kristus e maruwel rorad. Ba felfelan’ Kristus nge pi walagen ko ayuw ni be pi’ yugu boch e saf.
17 Bin l’agruw e kanawo’ ni ngar ayuweged e pi walagen Kristus e ngar pied e salpiy ni fan ko machib. I pi’ Jesus e athamgil ngak e pi gachalpen ni ngar m’aged fager ngorow Jehovah u daken e “tin ni ma fel’ rogoy riy u fayleng.” (Luke 16:9) Gathi be yip’ fan nrayog ni ngad pied e salpiy ngak Jesus fa Jehovah ni fan ni ngad m’aged fager ngorow. Ya be yip’ fan ni faan gad ra fanay e salpiy ara chugum rodad ni fan ko Gil’ilungun, ma aram e gad be dag e t’ufeg rodad ngorow ni gathi kemus ni thin ya be “m’ug ko ngongol” rodad. (1 John 3:16-18) Gad be rin’ ni aram rogon u nap’an ni gad be un ko machib, nge nap’an ni gad be pi’ e salpiy ni fan e ngan toy boch e naun ni fan ko liyor rodad, nge nap’an ni gad be pi’ e salpiy ni fan ko machib ni yibe rin’ u ga’ngin yang u fayleng. Demtrug ko in e salpiy e ngad pied ma ra felfelan’ Jehovah nge Jesus ya gad be pi’ u fithik’ e felfelan’.—2 Kor. 9:7.
18. Mang fan ni thingar da folgad ko thin nib puluw ni bay u Bible ni ma yog e piin piilal ngodad?
18 Bin dalip e kanawo’ nrayog ni ngad daged ni gadad e fager rok Kristus e ngaud folgad ko thin ni ma yog e piin piilal u lan e ulung. Kristus e ke pow’iy gelngin Got nib thothup ni nge dugliyrad. (Efe. 5:23) I yoloy apostal Paul ni gaar: “Mu folgad ko thin rok e piin ni yad be yog e thin romed.” (Heb. 13:17) Yu ngiyal’, e sana mo’maw’ ni ngad folgad ko thin nib puluw ko thin nu Bible ni be yog e piin piilal ngodad. Sana gad manang thibngirad, ma rayog ni nge mo’maw’nag e re n’ey ni ngad folgad ko fonow ni ngar pied ngodad. Machane, Kristus ni ir lolugen e ulung, e ba felfelan’ ni nge fanayrad. Ere, rogon ni gad be sap nga mat’awun ni kan pi’ ngorad u lan e ulung e rayog ni nge kirebnag ara gelnag e tha’ u thildad Kristus. Gathi ngad sapgad ko oloboch rorad machane ngad folgad ko thin rorad, ma aram e gad be dag nib t’uf Kristus rodad.
U Uw e Rayog ni Ngad Pirieged e Fager nib Fel’ Riy
19, 20. (a) Mang e gad ra pirieg u lan e ulung? (b) Mang e gad ra weliy ko bin migid e thin?
19 Gathi kemus ni be ayuwegdad Jesus u daken e piin piilal ya ku bay e girdi’ u lan e ulung ni yad pi chitiningidad nge pi walagdad. (Mu beeg e Mark 10:29, 30.) Mang e ke rin’ e girdi’ rom u nap’an ni kam tabab ni ngam chag ngak girdien e ulung rok Jehovah? Gadad be athapeg ni ur pied e ayuw ngom ni nge fel’ thilmed Got nge Kristus. Machane i yog Jesus ni “pi toogor rok be’ nth’abi ga’ e ra yan i aw ni girdi’ nu lan e tabinaw rok.” (Matt. 10:36) Ke felfelan’dad ni kad nanged ni bay e pi walagdad u lan e ulung nra par nib yul’yul’ ngodad!—Prov. 18:24.
20 Tin tomren e thin ni yog Paul ko babyor ni pi’ ngak fare ulung nu Roma e be dag ni ke m’ag fager ngak boor e girdi’. (Rom. 16:8-16) Tin tomur e thin ni yog apostal John ko bin dalip e babyor e gaar: “Mog ngak e pi fager rog e t’ufeg rog ngorad ma ngam mog fithingrad ni be’ nge be’.” (3 John 14, NW) Ba tamilang ni ke m’ag fager ngak boor e girdi’. Uw rogon ni ngad folwokgad rok Jesus nge pi gachalpen kakrom u rogon ni ngad m’aged fager ngak e pi walagdad u lan e ulung? Bin migid e thin e ra fulweg e re deer ney.
Uw Rogon ni Ga Ra Fulweg?
• Uw rogon ni ke dag Jesus ni ir e fager nib fel’?
• Mang e rin’ e pi gachalpen Jesus u nap’an ni i gol ngorad?
• Uw rogon ni ngad daged ni gadad e fager rok Kristus?
[Picture on page 20]
Ba ga’ fan u wan’ Jesus e n’en ni be lemnag e pi fager rok
[Pictures on page 22]
Uw rogon ni ngad daged ni gad ba adag ni ngad fagergad ngak Kristus?