Mu T’ufeg e Piin ni Yad Ba T’uf rok Got

1-3. (a) Mang ban’en nib riyul’ ni be yog e Bible? (b) Uw rogon ni ngad mel’eged e fager nra fekdad i yan ko tin nib fel’?

GIRDI’ e bod e bate, ni demtrug ban’en nib ranran ni yira lithag ngay me wanum nga fithik’. Rib mom ni nge af e ngongol rok boch e girdi’ nge rarogorad ngodad ni ki mada’ ko ngiyal’ ni gad be lemnag ndabi af, nib ga’ ni piin ni gad ma chag ngorad ni gubin ngiyal’.

² Rriyul’ e n’en ni be yog e Bible ni gaar: “Mpachegem ngak e piin ni yad ba gonop me yog e gonop ngom. Mm’agem ngak e girdi’ ni balyang ma ga kireb.” (Proverbs 13:20) Re thin nu proverbs ney e gathi kemus ni be weliy murung’agen e bin baaray ni fin munmun min chag ngak be’. Ya fare bugithin ni “mpachegem ngak” e be yip’ fan ni ngaun chagil ni gubin ngiyal’.a I yog reb e babyor ni gaar: “Gimew ra pach be’ ma be dag ni gimew ba t’uf romew.” Gathi riyul’ ni gad ma folwok ko piin nib t’uf rodad? Arrogon, ya faan gad ra pacheged gadad ngak e piin ni yad ba t’uf rodad ma rayog ni ngar feked gadad i yan ko tin nib fel’ fa tin nib kireb.

³ Ra ngaud pared ni gad ba t’uf rok Got, ma thingar ud chaggad ngak e piin ni yad ra fekdad i yan ko tin nib fel’. Uw rogon ni ngad rin’ed e re n’ey? Aram e ngad t’ufeged e piin ni yad ba t’uf rok Got, ma gad m’ag fager ko pi fager rok. Aygum lemnag, ya tin th’abi fel’ e fager e aram e piin ni bay rorad e pi fel’ngin ni ma yaliy Jehovah ko piin ni ngar manged fager rok. Ere ngad guyed ko ba miti mang girdi’ e baadag Got ni ngar manged fager rok. Faanra ba tamilang u wan’dad e n’en ni baadag Jehovah, ma rayog ni ngad mel’eged e fager nib fel’.

PIIN NI YAD BA T’UF ROK GOT

4. Mang fan ni bay mat’awun Jehovah ni nge mel’eg e piin ni ngar manged fager rok? Mang fan ni yog Jehovah e “fager rog” ngak Abraham?

⁴ Ba mudugil e piin ni ma mel’egrad Jehovah ni ngar manged fager rok. Ma bay mat’awun ni nge rin’ e re n’em. Ir e Th’abi Tolang u ga’ngin e palpalth’ib, ma yira mang fager rok ma aram ban’en nrib fel’. Ere, mini’ e piin ni ma mel’egrad ni ngar manged fager rok? Ma chugur Jehovah ngak e piin nib pagan’rad mab michan’rad ngak. Am lemnag Abraham ni ir be’ ni immoy kakrom nrib mich Got u wan’. Kan skengnag e michan’ rok u nap’an ni yog Got ngak ni nge pi’ fak ni maligach.b Yugu aram rogon me “pi’ Isak ni maligach” ya ba mich u wan’ “nrayog rok Got ni nge faseg Isak ko yam’.” (Hebrews 11:17-19) I fol Abraham rok Jehovah ni bochan e rib mich u wan’, ma aram fan ni yog Jehovah e “fager rog” ngak.​—Isaiah 41:8; James 2:21-23.

5. Uw rogon u wan’ Jehovah e piin ni yad ma fol rok u fithik’ e yul’yul’?

⁵ Rib ga’ fan u wan’ Jehovah e fol u fithik’ e yul’yul’, ma ma t’ufeg e piin ni yad ma par ni yad ba yul’yul’ ngak. (Mu beeg e 2 Samuel 22:26.) Rogon ni kad filed ko Guruy ni 1 ko re ke babyor ney e rib fel’ u wan’ Jehovah e piin ni yad ma fol rok ni bochan e ba t’uf rorad. Be yog e Proverbs 3:32, BT ni “ma fek e girdi’ nib mat’aw ngar manged tafager rok.” Piin ni yad ma fol rok Jehovah u fithik’ e yul’yul’ e be piningrad nga lan e “tempel” rok, ni aram e ke puf rogorad ni ngar pigpiggad ngak mu ur meybilgad ni demtrug e ngiyal’.​—Psalm 15:1-5.

6. Uw rogon ni nge m’ug nriyul’ nib t’uf Jesus rodad? Uw rogon u wan’ Jehovah e piin nib t’uf Fak rorad?

⁶ Ma t’ufeg Jehovah e piin nib t’uf Jesus ni Fak rorad. I gaar Jesus: “En ni gub t’uf rok e ra fol ko thin rog. Ra t’uf rok e Chitamag, ma Chitamag nge gag e gamow ra yib ngak nggu pirew rok.” (John 14:23) Uw rogon ni nge m’ug nriyul’ nib t’uf Jesus rodad? Faanra ud folgad ko pi motochiyel rok nib muun ngay e machib nge ngan pingeg e girdi’ ngar manged pi gachalpen. (Matthew 28:19,20; John 14:15, 21) Ku ma m’ug nib t’uf Jesus rodad ni faanra ud “leked luwan ay” u daken e ngongol nge thin rodad. (1 Peter 2:21) Ku ma felfelan’ Jehovah ngak e piin ni yad ma folwok rok Fak ni bochan e ba t’uf rorad.

7. Mang fan nib fel’ ni ngad m’ag fagergad ngak e pi fager rok Jehovah?

⁷ Michan’, nge yul’yul’, nge fol, nge t’ufeg rodad ngak Jesus e aram e pi fel’ngin ni ma yaliy Jehovah rok e piin ni ma mel’egrad ni ngar manged fager Rok. Ere nge bagadad me fith ir ni nge gaar: ‘Bay e pi fel’ngin ney ko piin ni gu ma chag ngorad ni gubin ngiyal’, fa? Pi tafager rok Jehovah e ku aram e piin ni fager rog, fa?’ Ba fel’ ni ngam lemnag e pi n’ey. Piin ni yad ma maruweliy ni nge yag pi fel’ngin Got ngorad ma yad ba pasig i machibnag fare thin nib fel’ ni murung’agen Gil’ilungun Got e rayog ni ngar ayuweged gadad ngaud rin’ed e tin nib m’agan’ Got ngay.​—Mu guy fare thin ni kenggin e, “Uw Rogon e Fager nib Fel’?”

GAD RA FIL BAN’EN U ROGON E FAGER KU DAVID NGE JONATHAN

8. Mang e kam guy nib fel’ ko tha’ u thilin (a) Naomi nge Ruth? (b) fa dalip i pagel ni Hebrew? (c) Paul nge Timothy?

⁸ Boor e chep u Bible ni murung’agen boch e fager nib fel’, ni bod Naomi nge Ruth ni leengin reb e pagel ni fak, nge fa dalip i pagel ni Hebrew ni faan nni fekrad nga Babylon, nge Paul nge Timothy. (Ruth 1:16; Daniel 3:17, 18; 1 Korinth 4:17; Filippi 2:20-22) Machane, chiney e ngad weliyed murung’agen e fager ku David nge Jonathan.

9, 10. Mang fan ni ke yag ni nge par nib fel’ e tha’ u thilin David nge Jonathan?

⁹ Be yog e Bible ni tomuren ni li’ David Goliath, “me ri adag Jonathan ni fak Saul daken David nge yan i par ni kari t’uf rok ni bod rogon ir nib t’uf rok.” (1 Samuel 18:1) Yugu aram rogon ni boor e duw ni bay u thilin David nge Jonathan, machane ur parew nrib fel’ e thin rorow nge yan i mada’ ko ngiyal’ ni yim’ Jonathan ko mahl.c (2 Samuel 1:26) Mang fan ni ke yag ni nge par nib fel’ e tha’ u thilin e gali cha’ ney?

¹⁰ Bochan nrib t’uf Got rok David nge Jonathan ma yow baadag ni ngaur parew ni yow ba yul’yul’ ngak, ma aram fan ni i par nib fel’ e fager rorow. Ra bagayow ma bay fel’ngin ni ir e ke m’agrow nga taabang. Dariy e maruwar riy ni ke gin Jonathan nga feni pasig David nge gelngin nder rus ni nge rin’ ban’en ni aram rogon ni fan nga fithingan Jehovah. Maku dariy e maruwar riy ni i tay David fan Jonathan ni bochan e i fol ko yaram rok Jehovah ma i m’oneg e tin nib t’uf rok David me tomurnag e tirok. Am lemnag e n’en ni buch u nap’an ni be mil David rok Saul ni Pilung ni chitamangin Jonathan. Ke m’ug gelngin nrib yul’yul’ Jonathan u nap’an ni yan i guy David “ngi i pi’ e athamgil nga laniyan’ ma be puguran e ayuw rok Got ngak.” (1 Samuel 23:16, BT) Am lemnag e n’en ni ke thamiy David u nap’an ni pi’ e fager rok e athamgil nga laniyan’!d

11. Mang e kam fil ko n’en ni rin’ Jonathan nge David?

¹¹ Mang e kad filed ko n’en ni rin’ Jonathan nge David? Kad filed riy ni n’en th’abi ga’ fan ni nge taareban’ e fager ngay, e pi n’en ni bay rogon ko tha’ u thilrad Got. Faan gad ra m’ag fager ngak e piin nib taareb e michan’ rodad, nge lanin’dad ko tin nib fel’ nge tin nib kireb, ma gad baadag ni ngad pared ni gadad ba yul’yul’ ngak Got, ma aram e rayog ni nge gubin ban’en mu ud pied e athamgil riy nga lanin’dad. (Mu beeg e Roma 1:11, 12.) Rayog ni ngad pirieged e fager ni aray rogon u fithik’ e piin taareb e michan’ rodad. Machane, re n’ey e be yip’ fan ni gubin e girdi’ ni ma yib ko muulung nga Kingdom Hall e ba fel’ ni ngaun chag ngorad, fa? Danga’.

ROGON NI NGAD PIRIEGED E FAGER NIB FEL’

12, 13. (a) Mang fan ni ngaud mel’eged e piin ni gad ma chag ngorad nib muun e piin Kristiano ngay? (b) Mang boch e magawon ni immoy u boch e ulung ko Kristiano kakrom, ma mang fonow e pi’ Paul u murung’agen e re n’ey?

¹² Mus nga lan e ulung ma thingar kud mel’eged e piin ni gad ma chag ngorad ni faanra gad baadag ni ngad mon’oggad ma gad par ni gad ba gel ko tirok Got ban’en. Dab da gingad ko re n’ey, ya boch e Kristiano u lan e ulung e ba n’uw nap’an mfin ra mon’oggad ko tirok Got, ni bod boch e wom’engin e gek’iy nib n’uw nap’an mfini lol. Ra reb e ulung mab thilthil rogon e mon’og ni ke tay e pi Kristiano riy. (Hebrews 5:12–6:3) Yugu aram rogon ma gad ma athamgil ni ngaud gum’an’gad ma gad be t’ufeg e piin ni ka yad ba beech, nge piin ni kar meewargad, ya gad baadag ni ngad ayuweged yad ngar mon’oggad ko tirok Got ban’en.​—Roma 14:1; 15:1.

¹³ Bay yu ngiyal’ ni ma buch boch ban’en u lan e ulung ni be dag nthingar da kol ayuwgad ko piin ni gad be chag ngorad. Sana bay boch e girdi’ ni yad be rin’ boch e ngongol nib kireb, ma boch e yugu be gun’gun’. Ireray boch ban’en ni i buch u boch e ulung ko tin som’on e Kristiano. Yugu aram rogon ni bay boch e girdi’ ko pi ulung nem ni yad ba yul’yul’, machane immoy boch i yad ni i rin’ e ngongol nib kireb. I fonownag apostal Paul e ulung nu Korinth ni bochan e immoy boch e girdi’ riy nda ur folgad u boch e machib ko Kristiano. Ere, yog ni gaar: “Dab mpaged gimed nga ni bannagmed, ya ra yan i bod ni ke lunguy: ‘Nchag ngak e girdi’ nib kireb me kireb pangiy nib fel’.’” (1 Korinth 15:12, 33) Ki yog Paul ngak Timothy ni mus ko piin Kristiano ma bay boch i yad nib kireb e ngongol rok, ere thingar dab un chag ko pi girdi’ nem.​—Mu beeg e 2 Timothy 2:20-22.

14. Uw rogon ni ngad folgad ko fonow ni pi’ Paul u murung’agen e piin ni yima chag ngorad?

¹⁴ Uw rogon ni ngad folgad ko fonow ni pi’ Paul? Thingar dab da chaggad ngak be’, ndemtrug ko be’ u lan e ulung fa be’ u wuru’ e ulung nrayog ni nge fekdad i yan ko ngongol nib kireb. (2 Thessalonika 3:6, 7, 14) Thingar da ayuweged e tha’ u thildad Jehovah. Ma dab da paged talin ni gad bod e bate ni gad ma folwok ko n’en ni ma rin’ e pi tafager rodad. Dabiyog ni ngan lithag e bate nga fithik’ e ran me wanumiy e wain. Ere, ku er rogon ndabiyog ni ngaud chaggad ko piin nib kireb e ngongol rorad mu ud rin’ed e tin nib fel’.​—1 Korinth 5:6.

15. Uw rogon ni ngam pirieg e fager nib fel’ u lan e ulung?

¹⁵ Gad ba felfelan’, ya lan e ulung e aram e gin nrayog ni ngad pirieged e fager nib fel’ riy. (Psalm 133:1) Uw rogon? Faan ga ra maruweliy ni nga i m’ug fel’ngin Got rom ma ga be ngongol nrogon nib m’agan’ ngay, ma piin ni ku er rogorad e dabisiy ni yad ra adag ni ngar manged fager rom. Machane faanra nge yag boch e fager ngom nib beech ma bay boch ban’en nthingar kum rin’. (Mu guy fare thin ni kenggin e, “Rogon ni Ke Yag e Fager nib Fel’ Ngomow.”) Mu gay e piin ni bay fel’ngin Got rorad ni ga baadag ni nge yag ngom. Ma ga fol ko fare fonow nu Bible ni be yog ni ‘dab da mitheged lanin’dad.’ Mag gay e fager u fithik’ e piin nib taareb e michan’ rodad ni yugu aram rogon nib thil e nam, ara thin, ara yalen rodad. (2 Korinth 6:13; mu beeg e 1 Peter 2:17.) Maku gathi yigoo pi taab yangar rom e ngam m’ag fager ngorad. Dab mu pagtalin ni David e rib bitir ngak Jonathan. Boor e walag ni yad ba ilal nib fel’ ni ngan m’ag fager ngorad, ya boor ban’en ni yira fil rorad, maku yad ba gonop.

NAP’AN NI KE SUM E MAGAWON

16, 17. Faanra rin’ reb e walag ban’en ni dubdad, ma mang fan ndab da chuwgad ko ulung?

¹⁶ Rayog ni nge sum e magawon u lan e ulung ni bochan e ba thilthil rarogon e girdi’. Rayog ni nge yog ara rin’ reb e walag ban’en ni dubdad. (Proverbs 12:18) Yu ngiyal’ e ma sum e pi magawon ney ni bochan e ba thilthil rarogon e girdi’, fa de yag ni ngan nang fan ban’en nib fel’ rogon, fa reb e de taareban’uy nga ban’en. Ere, gur ngar da paged e pi n’ey nge magawonnag lanin’dad ma gad chuw ko ulung? Faanra riyul’ nib t’uf Jehovah rodad nge piin ni yad ba t’uf rok, ma dabiyog ni ngad rin’ed ban’en ni aray rogon.

¹⁷ Bay rogon ni nge t’uf Jehovah rodad ma gad fol rok u gubin ban’en ni bochan e ir e ke Sunmiydad ma ir e Taayuw rodad. (Revelation 4:11) Maku reb, e ba milfan ngodad ni ngad ayuweged e ulung rok. (Hebrews 13:17) Faanra ke rin’ reb e walag ban’en ni dubdad fa ke k’aring e damumuw ngodad, ma dab da chuwgad ko ulung ni bochan. De mat’aw ni ngad rin’ed ban’en ni aray rogon ni bochan e gathi Jehovah e ke rin’ ban’en ni dubdad. Ya faanra riyul’ nib t’uf Jehovah rodad ma dabiyog ni ngad rin’ed ban’en ni aray rogon!​—Mu beeg e Psalm 119:165.

18. (a) Uw rogon ni nge par e ulung ni bay e gapas riy? (b) Mang angin nra yib ni faan gad ra n’ag fan e kireb ku be’?

¹⁸ Faanra ud t’ufeged gadad u lan e ulung, ma ra par e ulung nib gapas. Der ma lemnag Jehovah ni nge rin’ e piin nib t’uf rok gubin ban’en ni gowa yad ba flont, ere ku aram rogon ni ngaud lemnaged. T’ufeg e ra ayuwegdad ni ngad feked owchedad u nochi oloboch nib achig ni ma rin’ pi walagdad, ya gad gubin ni gad ma oloboch ya dawor da flontgad. (Proverbs 17:9; 1 Peter 4:8) T’ufeg e ku ra ayuwegdad ni ngaud ‘n’iged fan u wan’dad e n’en ni manga ke kirebnag bagadad u laniyan’ bagadad.’ (Kolose 3:13) Gathi gubin ngiyal’ nib mom ni ngan fol ko re fonow ney, ya faanra ud pared ni gad ba damumuw ma ra mo’maw’ ni nge chuw, ya gad be lemnag ni aram e be gafgow faen ni ke k’aring e damumuw ngodad. Ma reb e kub kireb ni ngaun par ni yib damumuw. Machane faan gad ra n’ag fan u wan’dad ma ra yib angin ngodad. (Luke 17:3, 4) Ya ra gapas lanin’dad nge lan e ulung. Ma bin th’abi ga’ fan riy e ra par nib fel’ e tha’ u thildad Jehovah.​—Matthew 6:14, 15; Roma 14:19.

NGIYAL’ NDAB KUN CHAG NGAK BE’

19. Mang e ra rin’ be’ u lan e ulung ma aram e dab kun chag ngak?

¹⁹ Yu ngiyal’ e yima yog ngodad ndab kud chaggad ngak be’ ni immoy ni ir reb e walag u lan e ulung. Ma buch e re n’ey ni faanra th’ab be’ e motochiyel rok Got ma de kalngan’ ma aram min tharbog ko ulung, fa reb e ke digey e bin riyul’ e liyor nga i machibnag boch ban’en nde riyul’, fa ke yog ni ngan chuweg fithingan ko ulung. Rib tamilang ni be yog e Bible ni ‘dab ud chaggad ngak be’’ ni aram rogon.e (Mu beeg e 1 Korinth 5:11-13; 2 John 9-11) Dabisiy nra mo’maw’ ni ngad paloggad rok be’ ni aram rogon ni faanra ir reb e fager rodad fa girdi’ rodad. Machane, gad ra fol ko pi motochiyel rok Jehovah ma gad par ni gad ba yul’yul’ ngak ni demtrug ko mang e ra buch, fa? Dab mu pagtalin ni yul’yul’ nge fol e aram e n’en nib ga’ fan u wan’ Jehovah.

20, 21. (a) Mang fan ni bay e t’ufeg ko fare yaram ni yima tharbog be’ ko ulung? (b) Mang nib ga’ fan ni ngad mel’eged e piin ni ngaud chaggad ngorad?

²⁰ Yira tharbog be’ ko ulung ma aram reb e kanawo’ ni be dag Jehovah ni gad ba t’uf rok. Uw rogon? Yira tharbog be’ nde kalngan’ ko denen ni ke rin’, ma aram e yibe tayfan Jehovah nge fithingan nib thothup nge pi motochiyel rok. (1 Peter 1:15, 16) Ku yima tharbog e girdi’ ya nge par e ulung nib beech. Re n’ey e ku ra ayuweg e piin ni yad ba yul’yul’ u lan e ulung ni nge dabi af e ngongol nib kireb ngorad, mi yad ulul ko pigpig ni yad be tay ndariy ban’en nib kireb ko re fayleng ney ni be magawonnagrad. (1 Korinth 5:7; Hebrews 12:15, 16) Yira gechignag be’ nib gel ma aram e yibe t’ufeg, ma dabisiy ni aram e n’en nra ayuweg nge kalngan’ me sul ngak Jehovah.​—Hebrews 12:11.

²¹ Riyul’ ni piin ni gad ma chag ngorad e rayog ni ngar feked gadad i yan ko tin nib fel’ fa tin nib kireb. Ere rib ga’ fan ni ngad mel’eged e piin ni ngaud chaggad ngorad. Gad ra m’ag fager ngak e pi fager rok Jehovah, me t’uf rodad e piin nib t’uf rok, ma aram e ke yag e tin th’abi fel’ e fager ngodad. Ngongol rorad nra af ngodad e ra ayuwegdad ni ngad pared ni gad ba mudugil ko tin ni gad be rin’ nib m’agan’ Jehovah ngay.