LIBRARY U ONLINE ni fan ko Wulyang ko Damit
Wulyang ko Damit
LIBRARY U ONLINE
Waab
  • BIBLE
  • PI BABYOR
  • PI MUULUNG
  • w11 6/1 pp. 15-19
  • Ke Dag Got Ngodad Gelngin Feni Ri Gad Ba T’uf Rok

Dariy e video ko n'en ni kam mel'eg.

Wenig ngom, dabiyog ni nge load e re video ney.

  • Ke Dag Got Ngodad Gelngin Feni Ri Gad Ba T’uf Rok
  • Fare Wulyang ko Damit Ni Be Weliy Morngaagen Gil’ilungun Jehovah—2011
  • Pi Subheading
  • Boch Ban'en ni Ku Taareb Rogon Ngay
  • T’ufeg rok Got e Ba Togopluw ko Denen
  • N’en ni Ke Pi’ Got u Daken Jesus Kristus
  • Kan N’ag Fan e Denen u Daken e Biyul
  • Ke Dag Got e T’ufeg ngak Boch e Girdi’
  • Rayog ni Ngam Mat’aw u Wan’ Got e Chiney
  • Fare Biyul e Bin Th’abi Fel’ e Tow’ath ni Pi’ Got
    Mang e Ri Be Fil e Bible?
  • Mang e Bin Th’abi Fel’ e Tow’ath ni Kan Pi’?
    Fare Wulyang ko Damit Ni Be Weliy Morngaagen Gil’ilungun Jehovah (Fan ko Girdi’ ni Yoor)—2017
  • Biyul Ni Pi’ Kristus Kanawo’ Ni Ngan Thap Ngak Got
    Fare Wulyang Ntagil’ E Damit Ni Be Weliy Morngaagen Gil’ilungun Jehovah—1999
  • Uw Rogon Nrayog ni Nge Ayuwegdad e Yam’ ni Tay Jesus?
    Mu Par Ndariy N’umngin Nap’an ni Gab Felfelan’!—Ngan Fol Bible u Taabang
Fare Wulyang ko Damit Ni Be Weliy Morngaagen Gil’ilungun Jehovah—2011
w11 6/1 pp. 15-19

Ke Dag Got Ngodad Gelngin Feni Ri Gad Ba T’uf Rok

“Eram rogon e runguy rok Got ni be gagiyeg u daken e mat’aw ni be ta’ ngodad, be fekdad i yan ko yafos ni dariy n’umngin nap’an.”​—ROM. 5:21.

1, 2. Mang l’agruw e tow’ath nib ga’ fan u wan’ e girdi’, ma bin ngan riy e rib ga’ fan?

“I YOG reb e sensey u reb e skul nib tolang u Melbourne Australia ni fapi motochiyel ko Am nu Roma e aram reb e tow’ath nra par angin ndariy n’umngin nap’an. Machane be yog e Bible ni bay reb e tow’ath ni ke pi’ Got ngodad ni bochan e gad ba t’uf rok ma kab gel e fel’ riy ko biney. Re tow’ath ney e aram e kanawo’ ni ke bing Got ngodad ni nge yog nda mat’awgad u wan’ me yog e athap ngodad ko yafas ni manemus.

2 Rogon ni ke bing Got e kanawo’ ni nge yog e re tow’ath ney ngodad e ba muun ngay fel’ngin ni aram e mat’aw. De weliy Paul gubin ban’en ni bay ko motochiyel u Roma ko guruy ni 5, ya i tabab ko pi thin ni baaray nra pagan’uy ngay ni gaar: “Ke mat’awnagdad Got ngak u daken e michan’ rodad ngak Jesus Kristus, ere ke aw e gapas u thildad Got ni ke yog u daken e Somol rodad i Jesus Kristus.” Piin ni ke pi’ Got e re tow’ath ney ngorad e ku yad ra t’ufeg Got ni bod rogon ni ke t’ufegrad. Paul bagayad e pi girdi’ ney. I yog ni ke puog Got e ‘t’ufeg rok’ nga fithik’ i lanin’dad u daken gelngin nib thothup.​—Rom. 5:1, 5.

3. Mang boch e deer ni ke sum?

3 Ere mang fan nib t’uf e re tow’ath ney? Uw rogon ni ognag Got e re tow’ath ney u reb e kanawo’ nib mat’aw? Ma mang e thingari rin’ be’ ni faanra nge yog e re tow’ath ney ngak? Chiney e ngad weliyed e fulweg ko pi deer ney nge rogon ni be gagiyelnag e t’ufeg rok Got.

T’ufeg rok Got e Ba Togopluw ko Denen

4, 5. (a) Uw rogon ni ke dag Jehovah e t’ufeg rok ngodad? (b) Uw rogon ma gad nang fan fare thin ni bay ko Roma 5:12?

4 Gelngin ni gad ba t’uf rok Jehovah, me pi’ Fak ni kari maagirag rok ni nge ayuweg e girdi’. Baaray rogon ni weliy Paul e re n’ey ni gaar: “Got e ke dag ngodad gelngin feni ri gadad ba t’uf rok, ya ka gadad be par ni gadad bogi tadenen me yan i yim’ Kristus ni fan ngodad!” (Rom. 5:8) Am lemnag fare thin ni ka nog u roy ni gaar: “Gadad be par ni gadad bogi tadenen.” Gubin e girdi’ nib t’uf ni ngar nanged ko mang e ke rin’ ma ke buch e re n’ey.

5 I tamilangnag Paul e re n’ey ni tabab ko pi thin ni baaray ni gaar: “Denen e yib nga fayleng u daken taabe’, ma denen ni ngongliy e fek e yam’ i yib. Wenegan ni yib e af e yam’ ngak urngin e girdi’ nu fayleng, ni bochan e urngin e girdi’ ni ngongliy e denen.” (Rom. 5:12) Rayog ni ngad nanged fan e re thin ney ni bochan e kan yoloy nga Bible rogon ni tabab e yafas ko girdi’. I sunmiy Jehovah l’agruw ni’ ni aram Adam nge Efa. Ba flont e en Tasunmiy, maku arrogon e gal ni som’on e girdi’ ni sunmiyrow. Kari mus ni taareb e motochiyel ni pi’ ngorow me yog ngorow ni faan yow ra th’ab, ma yow ra yim’. (Gen. 2:17) Machane, kar mel’egew ni ngar th’abew e re motochiyel nem ni aram e kar togopuluwgow ngak e En ni Pi’, ni ir e Th’abi Tolang.​—Deut. 32:4, 5. 

6. (a) Mang fan ni i yim’ pi fak Adam u m’on ngu tomuren ni pi’ Got fapi Motochiyel ngak Moses? (b) Denen ni ke af ngodad e rayog ni ngan susunnag ko mang?

6 Tomuren ni denen Adam e fin aram e ngiyal’ ni fakay e bitir me af e denen ngorad. Dar uned i th’ab fare motochiyel ni th’ab Adam, ere de taareb rogon e denen rorad; maku nap’an nni gargelegrad ma dawor ni pi’ e motochiyel. (Gen. 2:17) Yugu aram rogon ma ke af e denen ngak pi fak Adam. Ere denen nge yam’ e aram e n’en ni i gagiyegnagrad nge mada’ ko ngiyal’ ni pi’ Got e motochiyel ngak piyu Israel. Ma re n’ey e be tamilangnag ni yad e tadenen. (Mu beeg e Roma 5:13, 14.) Wenegan e denen e rayog ni ngan susunnag nga ba mit e m’ar ni ke af ko gallabthir rok be’ ngak. Yugu aram rogon ni bay boch e bitir u boch e tabinaw ni ma af e m’ar ko gallabthir rok ngak, machane gathi gubin e bitir u lan fare tabinaw ni bay e re m’ar nem rorad. Gad gubin ni ke af e denen rok Adam ngodad, ma bochan e re n’em, ma gad gubin ni gad ra yim’. Ere rayog ni ngad chuwgad ko re gafgow ney biid, fa?

N’en ni Ke Pi’ Got u Daken Jesus Kristus

7, 8. Uw rogon ni n’en ni rin’ Adam nge Jesus e ba thil angin ni yib?

7 Bochan e ba t’uf e girdi’ rok Jehovah ma ke pi’ ban’en nrayog ni nge chuweg e girdi’ ko denen ni ke af ngorad. I weliy Paul ni ke yog rok Got ni nge rin’ e re n’ey u daken reb pumoon ni kub flont, ni aram e bin tomur e Adam. (1 Kor. 15:45) Machane, n’en ni rin’ e gali cha’ ney ni yow ba flont e ba thil angin ni yib. Ni uw rogon?​—Mu beeg e Roma 5:15, 16.

8 I yoloy Paul ni gaar: “Fare tow’ath rok Got ngak e girdi’ ndariy puluwon e gathi bod e denen ni ngongliy Adam.” Adam e ba kireb e rok ko denen ni rin’, ma aram fan ni yim’. Machane, gathi kemus ni goo ir e yim’, ya be gaar e Bible: “Boor e girdi’ ni kar m’ad ni bochan e denen ni ngongliy e taab nem e girdi’.” Ere gubin pi fak Adam ni bay rogon ni ngar m’ad ni bochan e yad bogi tadenen ni gad ba muun ngay. Machane, gad ra felfelan’ ni faan gad ra nang ni bin tomur e pumoon nib flont ni aram Jesus e rayog ni nge rin’ ban’en nib thil angin nra yib. Mang angin nra yib riy? Bay e fulweg riy ko n’en ni yog Paul ni aram e “ke pithig urngin e girdi’ ko kireb ke pi’ e yafos ngorad.”​—Rom. 5:18.

9. Rogon ni bay ko Roma 5:16, 18, mang e ke rin’ Got u nap’an ni ke pithig e girdi’ ko kireb?

9 Mang e be yip’ fan fapi thin ni Greek ni “daki kireb e rok e girdi’” nge “ke pithig urngin e girdi’ ko kireb”? I yoloy be’ ni ma pilyeg e Bible ni gaar: “Re n’ey e ba fanathin ni bay rogon ko motochiyel. Be weliy murung’agen be’ ni ke thil e tha’ u thilrow Got, ni gathi bochan e ke thil e ngongol rok . . . Ya re n’ey e be dag ni ke dugliy Got ni nge ayuweg e cha’ nem ni bay ban’en nib kireb ni ke rin’. Bod ni ke pufthinnag Got ya ka nog ni ir be’ nde mat’aw. Machane, ke n’ag Got fan e kireb rok.”

10. Mang e rin’ Jesus ya nge yog nni pithig e girdi’ ko kireb?

10 Uw rogon nrayog ni nge n’ag e “Tapufthin ko fayleng ni polo’” fan e denen rok be’ nde mat’aw? (Gen. 18:25) Som’on e l’og Got Fak ni kari maagirag rok nge yib nga fayleng. Rib fel’ rogon ni rin’ Jesus e tin nib m’agan’ e Chitamangin ngay ni yugu aram rogon ni boor e skeng ni i yib ngak, ma un moningnag, ma yibe gafgownag. I par nib yul’yul’ nge mada’ ko ngiyal’ ni yim’ u daken fa ley i gek’iy. (Heb. 2:10) I pi’ Jesus e yafas rok nib flont ni nge biyuliy pi fak Adam ko denen nge yam’.​—Matt. 20:28; Rom. 5:6-8.

11. Fare biyul e taareb rogon ko mang?

11 Ku bay yu yang u Bible ni weliy Paul murung’agen Jesus riy ni gaar: “I pi’ e yafas rok ni aram e n’en ni taareb rogon ko n’en ni ke mul u pa’ e girdi’, ni fan e nge yog ni chuw’iyrad.” (1 Tim. 2:6, NW) Mang e be yip’ Paul fan u nap’an ni yog e “n’en ni taareb rogon ko n’en ni ke mul u pa’ e girdi’”? Bochan e denen ni rin’ Adam ma aram fan ni ma yim’ pi fak ma dakur flontgad. Riyul’ ni bochan e ba flont Jesus ma rayog ni nge fakay bokum bilyon e bitir ni yad ba flont. Ere un lemnag ni Jesus nge pi fak ni yad ba flont e rayog ni ngar manged ba maligach ni taareb rogon ko n’en ni ke mul u pa’ Adam nge pi fak ndar flontgad. Machane, dariy bang u Bible ni be yog ni immoy pi fak Jesus ni yad bang ko fare biyul. Ya Roma 5:15-19 e be tamilangnag ni yam’ ni tay “taareb e girdi’” e aram e n’en ni ke chuweg e girdi’ ko denen nge yam’. Arrogon, yafas rok Jesus nib flont e taareb rogon ko yafas rok Adam nib flont. Ere kemus ni goo Jesus Kristus e ir e ba t’uf ni nge sulweg e n’en ni ke mul u pa’ Adam. Ke yog ni nge yog fare tow’ath nge yafas ngak urngin e girdi’ ni bochan e “ngongol nib mat’aw” ni i rin’ Jesus nge mada’ ko yam’. (2 Kor. 5:14, 15; 1 Pet. 3:18) Uw rogon ni buch e re n’em?

Kan N’ag Fan e Denen u Daken e Biyul

12, 13. Mang fan nib t’uf ni nge runguy me t’ufeg Got e piin ni kan pithigrad ko kireb?

12 I m’agan’ Jehovah Got ko fare biyul ni maligach ni ognag Fak. (Heb. 9:24; 10:10, 12) Yugu aram rogon ma dawori flont pi gachalpen Jesus u fayleng nib muun e pi apostal rok ngay. Yad ma athamgil ni nge dab ra rin’ed e kireb, machane ka yad ma oloboch. Mang fan? Bochan e ke af e denen ngorad. (Rom. 7:18-20) Machane, rayog rok Got ma ke rin’ ban’en ko re n’ey. I m’agan’ ko “n’en ni taareb rogon ko n’en ni ke mul u pa’ e girdi’” ni aram fare biyul, miki yibnag angin ko pi tapigpig rok.

13 De milfan ngak Got ni nge yibnag angin fare biyul ngak e pi apostal nge ku boch e girdi’ ni bochan e tin nib fel’ ni ur rin’ed. Ya fan ni ke rin’ Got e re n’ey e bochan e t’ufeg nge runguy rok. Ir e ke mel’eg ni nge n’ag fan e kireb ko pi apostal nge ku boch e girdi’, me lemnagrad nde kireb e rorad ko denen ni ke af ngorad. I tamilangnag Paul e re n’ey ni gaar: “Yu daken e runguy rok Got ngodad e ir e ke thapegmed riy ngak, ni bochan e ke mich Jesus u wun’med. Gathi gimed e mmuruwliyed nge yog, ya ba tow’ath ni ke pi’ Got ngomed.”​—Efe. 2:8.

14, 15. (a) Mang tow’ath e kan tay ni fan ngak e piin ke pithigrad Got ko kireb? (b) Mang e kub t’uf ni ngar rin’ed?

14 Rriyul’ nreb e tow’ath e ray ni nge n’ag e En ni Gubin ma Rayog Rok fan e denen ni ke af ngak be’ nge kireb ni ke rin’. Dabiyog i theeg urngin e denen ni ke rin’ boch e girdi’ u m’on ni ngar manged Kristiano. Machane, ke yog ni nge n’ag Got fan e pi denen nem ni bochan fare biyul. I yoloy Paul ni gaar: “Tomren e denen ni pire’ me yib fare tow’ath ni yugu dariy rogon ni nga ni pi’ ngak e girdi’, ni aram e ke yan i aw ni ‘Daki Kireb e Rok’ e girdi’!” (Rom. 5:16) Pi apostal nge ku boch e girdi’ ni ke yog e re tow’ath ney ngorad (ni aram e kan pithigrad ko kireb) e ku thingar ra ululgad ko pigpig ngak e bin riyul’ e Got u fithik’ e michan’. Ma mang e tow’ath nra yog ngorad boch nga m’on? “Urngin e piin ni yad ra fek e re runguy ku Got nem nri ba ga’ nge fare tow’ath ni aram e ke mat’awnagrad Got ngak e yad ra gagiyeg ko yafos u daken Kristus.” Arrogon, fare tow’ath ni aram e kan mat’aw u mit Got e ba thil e n’en nra yibnag, ya ra yibnag e yafas.​—Rom. 5:17; mu beeg e Luke 22:28-30.

15 Piin nra yog e re tow’ath nem ngorad ni aram e kar mat’awgad e kar manged pi fak Got. Bochan ni yad ba muun ngak Jesus ma aram fan ni athap rorad e nga ranod nga tharmiy ni kar manged pi fak Got mi yad un ngak Jesus Kristus ko gagiyeg ni yad boch e “pilung.”​—Mu beeg e Roma 8:15-17, 23.

Ke Dag Got e T’ufeg ngak Boch e Girdi’

16. Uw rogon ni yira tow’athnag e piin ni yad be athapeg e par u fayleng?

16 Gathi gubin e girdi’ ni ke mich Got u wan’rad ma yad be pigpig ngak, e yad be athapeg ni ngar ‘gagiyeggad’ Kristus u tharmiy ni yad e pilung. Boor e girdi’ ni taareb rogon e athap rorad ko pi tapigpig rok Got ni ur moyed u m’on ni sum e ulung ni Kristiano. Pi tapigpig rok Got ney e yad be athapeg e yafas ni manemus u paradis u fayleng. Ere rayog ni nge tow’athnagrad Got e chiney mar mat’awgad u wan’ ni yugu aram rogon ni athap rorad e ngar pared u fayleng, fa? Fulweg riy e arrogon, ya ba puluw ko thin ni yoloy Paul ngak piyu Roma!

17, 18. (a) Uw rogon Abraham u wan’ Got ni bochan e michan’ rok? (b) Uw rogon ni yog ni nge mat’aw Abraham u wan’ Jehovah?

17 I weliy Paul murung’agen be’ ni yog e re tow’ath ney ngak ma ke mat’aw u wan’ Got ni aram Abraham. Cha’ ney e ir be’ nib mich Got u wan’ ni immoy u m’on ni pi’ Jehovah fapi motochiyel ngak piyu Israel, ngu m’on ni bing Jesus e kanawo’ ngak e piin ni nga ranod nga tharmiy. (Heb. 10:19, 20) Be gaar e Bible: “Got e yog ngak Abraham nge piin ni owchen ni bayi mil suwon e re fayleng ney ngorad. I yog Got e re bugithin ney ni gathi bochan e i fol Abraham ko fare Motochiyel, machane bochan e mich Got u wan’ me matheeg Got ngak ni be’ ni ke mat’aw.” (Rom. 4:13; Jas. 2:23, 24) Ere ke matheeg Got ngak Abraham ni ir be’ nib mat’aw.​—Mu beeg e Roma 4:20-22.

18 Re n’ey e der yip’ fan nnap’an ni i pigpig Abraham ngak Jehovah ma dariy e denen rok. Ya gathi ke mat’aw u wan’ Got ko binem e kanawo’. (Rom. 3:10, 23) Machane, bochan ni gonop rok Jehovah e dariy e gin nra mus riy ma aram fan ni lemnag e michan’ rok Abraham nge pi n’en ni i rin’. I mich faen ni “owchen” ni kan micheg u wan’ Abraham nra yib ko tabinaw rok. Ma cha’ nem e yib i mang fare Messiah ara Kristus. (Gen. 15:6; Acts 3:25) Ere bochan fare biyul ni pi’ “Kristus Jesus” ma aram fan ni ke yog ni nge n’ag Got fan e denen ni un rin’ kakrom. Ere aram fan nrayog ni ngan faseg Abraham ko yam’ nge ku boch e girdi’ ni yad ba yul’yul’ ni ur moyed u m’on ni sum e ulung ni Kristiano.​—Mu beeg e Roma 3:24, 25; Ps. 32:1, 2.

Rayog ni Ngam Mat’aw u Wan’ Got e Chiney

19. Mang fan nrogon Abraham u wan’ Got e ra pi’ e athamgil nga laniyan’ boor e girdi’ e ngiyal’ ney?

19 Rib felfelan’ e tin riyul’ e Kristiano e ngiyal’ ney ni bochan e kar nanged ni yog rok Abraham ni nge mat’aw u wan’ Got. De mat’aw Abraham u wan’ Got ko bin baaram e kanawo’ ni ke mat’aw e piin ni yad ra ‘un ngak Kristus’ ko gagiyeg riy, ni piin ni kan dugliyrad nga gelngin Got nib thothup. Chi ulung nem e ‘ke piningrad Got ni ngar manged girdien’ ma kar manged “pi fak Got.” (Rom. 1:7; 8:14, 17, 33) Machane, Abraham e ba thil ya ke mang “fager” rok Jehovah u m’on nni ognag fare biyul ni maligach. (Jas. 2:23; Isa. 41:8) Ere uw rogon e tin riyul’ e Kristiano ni yad be athapeg e par u Paradis u fayleng?

20. Mang e baadag Got ni nge rin’ e piin ni yad ba mat’aw u wan’ e ngiyal’ ney ni bod Abraham?

20 Pi girdi’ ney e dawori yog ngorad “fare tow’ath ni aram e ke mat’awnagrad Got ngak,” maku darur athapeged e yan nga tharmiy ni bochan fare biyul ni pi’ “Kristus Jesus.” (Rom. 3:24; 5:15, 17) Machane, ba mich Got u wan’rad nge pi n’en ni ke pi’, ma yad ma dag e re michan’ ney u daken e pi maruwel nib fel’ ni yad ma rin’. Reb ko pi maruwel nem e aram e yad ma “machibnag murung’agen e gagiyeg rok Got” nge “murung’agen faanem i Somol Jesus Kristus.” (Acts 28:31) Rayog ni nge mat’aw e pi girdi’ ney u wan’ Jehovah ko bin baaram e kanawo’ ni mat’aw Abraham riy. Tow’ath ni ke yog ko pi girdi’ ney, ni aram e kar manged fager rok Got, e ba thil ko “fare tow’ath” ni ke yog ngak e piin ni kan dugliyrad. Yugu aram rogon ma ri yad ma pining e magar ko re tow’ath ney.

21. Mang boch e tow’ath nra yog ngodad ni bochan e t’ufeg rok Jehovah nge feni mat’aw?

21 Girdi’ ni yad ma gagiyeg e boor ban’en ni yad ma micheg ko girdi’. Machane, athap ko yafas ni manemus ni bay rom e gathi yad e keb rorad, ya aram e n’en nib m’agan’ e En Th’abi Tolang u Ga’ngin e Palpalth’ib ngay. Boor ban’en ni ke rin’ Jehovah ya nge yog ni lebguy e tin nib m’agan’ ngay. Ma pi n’ey e ba puluw ko ngongol rok nib mat’aw, maku be m’ug e t’ufeg rok riy nib gel. Aram fan nrayog ni nge gaar Paul: “Got e ke dag ngodad gelngin feni ri gadad ba t’uf rok, ya ka gadad be par ni gadad bogi tadenen me yan i yim’ Kristus ni fan ngodad!”​—Rom. 5:8.

Ka Ga Manang?

• Mang e ke af rok Adam ngak pi fak, ma mang wenegan ni yib?

• Uw rogon ni kan pi’ reb e biyul ni taareb rogon ko n’en ni ke mul u pa’ e girdi’, ma mang fan nrayog ni nga nog nre biyul ney e taareb rogon ko n’en ni ke mul u pa’ Adam?

• Fare tow’ath ni ke pi’ Got ni aram e ke pithigdad ko kireb e mang athap e ke yognag ngom?

[Picture on page 17]

I denen Adam ni ir be’ nib flont, me ognag Jesus e biyul ni “taareb rogon ko n’en ni ke mul u pa’ e girdi’”

[Picture on page 19]

Fare n’en nrayog ni ngan pithigdad ko kireb ni bochan Jesus e aram e thin nib fel’!

    Yapese Publications (1984-2025)
    Mu Log Out
    Mu Log In
    • Waab
    • Mu Sharenag
    • Pi N'en Nrayog ni Ngam Mel'eg
    • Copyright © 2025 Watch Tower Bible and Tract Society of Pennsylvania
    • Rogon ni Ngan Fanay
    • Privacy Policy
    • Privacy Settings
    • JW.ORG
    • Mu Log In
    Mu Sharenag