Ba Puluw ni Ngad Uned i Madnomnag e Pi Rran ni Ma Madnomnag e Girdi’, Fa?

PI RRAN ni ma madnomnag e pi yurba’ i teliw nge boch e girdi’ e dariy u Bible. Ere, uw e ke sum e pi madnom ney riy? Ga ra beeg boch e babyor u library ni be weliy murung’agen e pi madnom ney, ma ga ra guy nib thil e n’en ni be yog ko n’en ni ma lemnag e girdi’. Baaray boch e pi madnom nem.

Easter. Be gaar reb e babyor: “Dariy bang ko Bin nib Beech e M’ag ko Bible ni be yog ni un madnomnag e Easter.” (The Encyclopædia Britannica) Ere, uw rogon ni sum e Easter? I sum rok e piin ni yad ma meybil nga boch e got ni googsur. Yima yog ni Easter e aram e madnom ko fas ko yam’ ni tay Jesus, machane n’en ni yima rin’ riy e de sum ko piin Kristiano.

Madnom ko New Year ara Beech e Duw. Ba thilthil e rran nge rogon ni yima madnomnag e New Year u reb e nam ngu reb. Ke weliy reb e babyor rogon ni sum e re madnom nem ni gaar: “Sogonap’an 44 e duw u m’on ku Jesus me dugliy Julius Caesar ni nge par e January 1 ni tabolngin reb e duw. Me tay piyu Roma e re rran nem ni nge par ni fan ngak Janus, ni got ko garog, nge mab, nge tabolngin ban’en. Ere, fare bugithin ni January e yib u fithingan Janus ni got rok piyu Roma ni bay owchen u tomur maku bay u m’on.” (The World Book Encyclopedia) Ere, madnom ko New Year e sum rok e piin ni yad ma liyor nga boch e got ni googsur.

Halloween. Be gaar reb e babyor: “Pi n’en ni yima rin’ u nap’an e madnom ko Halloween e sum ko madnom ko prist ni i tay boch e girdi’ u yu yang u Europe kakrom ni ka nog e Celt ngorad. Pi girdi’ nem e l’agruw e madnom ni yad ma tay ni fan nga l’agruw e got rorad ni aram e got ko yal’ nge got ko yam’. Gal madnom nem e yima tay ko November 1 ni aram tabolngin e birorad e duw. Munmun min uneg e bin baaram e madnom ko yam’ ni yad ma tay ko pi madnom ni ma tay e Kristiano.”​—The Encyclopedia Americana.

Yugu boch e rran ni ma madnomnag e girdi’. Dabiyog ni ngan weliy ni urngin e pi madnom ni ma tay e girdi’ u ga’ngin yang e fayleng. Machane, pi madnom ara pi rran ni yima madnomnag ni fan e ngan tayfan boch e girdi’ riy ara yu ulung e girdi’ e de fel’ u wan’ Jehovah. (Jeremiah 17:5-7; Acts 10:25, 26) Maku dab mu pagtalin, ni gin ni yib ara gin ni sum reb e madnom riy e ku be yan u rogon ko ra felfelan’nag Got fa danga’. (Isaiah 52:11; Revelation 18:4) Pi kenggin e motochiyel ni kan weliy murung’agen ko guruy ni 16 ko re babyor ney e ra ayuwegem ni ngam nang rogon e lem rok Got ko pi madnom ni ma tay e girdi’ nu fayleng.