Pi Reference ni Fan ko fare Babyor ni Pi N’en ni Ma Rin’ e Piin Kristiano nge Machib ni Yad Ma Tay
June 3-9
BOCH E THIN NIB GA’ FAN KO THIN ROK GOT | GALATIA 4-6
“‘Ba Fanathin’ ni Bay Fan Ngodad”
it-1-E 1018 ¶2
Hagar
Rogon ni weliy apostal Paul e Hagar ni kan fanathinnag murung’agen e be yip’ fan e piin nni gargelegrad ni yad girdien fare nam nu Israel nra manged e girdi’ rok Jehovah u tan fare m’ag ko Motochiyel nni pi’ ngorad u nap’an ni ur med ko fare Burey nu Sinai. Bochan ni kar pared u tan e re m’ag ney ma aram fan ni “yad e sib.” Ma bochan ni yad ba tadenen ma aram fan nde yag rorad ni ngar ted e re m’ag nem u gil’. N’umngin nap’an ni ur med u tan e re m’ag ney, ma yad bogi sib ndawor ni chuwegrad u tan gelngin e denen. Aram fan ni bay rogon ni ngar m’ad. (Joh 8:34; Ro 8:1-3) Fare mach nu Jerusalem u nap’an Paul e aram e tochuch ko fare nam nu Israel, ma girdi’ nu Israel e yad boch e girdi’ ni yad e sib. Ma aram fan yu Jerusalem e rayog ni nge yip’ fan Hagar. Machane pi Kristiano ni kan dugliyrad nga gelngin Got nib thothup e yad pi fak e “bin ba’ u tharmiy e Jerusalem” ni be yip’ fan e ulung rok Got u tharmiy ni kan fanathinnag ni ir e ppin rok Got. Biney e Jerusalem e bod Sarah ni ir fare pin ni gathi ir e sib ma dariy ba ngiyal’ nra mang sib. Bod rogon ni i gafgownag Ishmael Isak, ere ku arrogon e “bin ba’ u tharmiy e Jerusalem” ni ke pithigrad faen ni Fak Got ko denen ni ku yad ra gafgow u tan pa’ pi fak e piin ni yad bang ko fare Jerusalem ni yad e sib. Machane kan tuluf Hagar nge fak, nre n’ey e be yip’ fan ni ke n’ag Jehovah fare nam nu Israel.—Ga 4:21-31; kum guy e Joh 8:31-40.
Ngari Mich Gil’ilungun Got u Wan’um
11 Pi n’en ni micheg Got ngak Abraham ko fare m’ag ni fal’eg u thilrow e lebug ko yay nsom’on u nap’an ni tafanay pi fak Abraham fare Nam ni Kan Micheg. Machane, be tamilangnag e Bible ni bay bayay ni ku ra lebug e pi thin nem. (Gal. 4:22-25) Nni thagthagnag nga laniyan’ apostal Paul nge weliy rogon nra lebug e pi thin nem ko yay ni migid. I yog ni en som’on nra yib ni owchen Abraham e aram Kristus, ma tin ni ka bay i owchen Abraham e aram fare 144,000 i Kristiano ni kan dugliyrad nga gelngin Got nib thothup. (Gal. 3:16, 29; Rev. 5:9, 10; 14:1, 4) Fare pin nra yib owchen e aram e “bin ba’ u tharmiy e Jerusalem,” ara ulung rok Got u tharmiy ni be yip’ fan urngin e pi tapigpig rok Got u tharmiy ni yad ba yul’yul’ ngak. (Gal. 4:26, 31) Rogon nni micheg ngak Abraham e, faen owchen fare pin e ir e ra tow’athnag e girdi’ nu fayleng.
Ngan Fal’eg i Gay Boch Ban’en nib Ga’ Fan ko Thin rok Got
w09-E 4/1 13
Ga Manang Murung’agen e Re N’ey, Fa?
Mang fan ni yog Jesus “Abba ara Chitamag” ngak Jehovah u nap’an ni meybil ngak?
Fare bugithin ni ʼab·baʼʹ ni thin ni Aramaic e rayog ni nge yip’ fan e “chitamag” ara “Ah Chitamag.” Dalip yay ni m’ug e re thin ney u lan e Thin nu Bible ni bang ko meybil ni tay Jesus u nap’an ni be non ngak Jehovah ni Chitamangin ni bay u tharmiy. Mang nib ga’ fan e re bugithin ney?
I yog fare babyor ni The International Standard Bible Encyclopedia ni gaar: “Nap’an ni immoy Jesus u fayleng ma ma fanay e girdi’ e re bugithin ney ni ʼabbāʼ nib ga’ ni ireray e re bugithin ni ma yog reb e bitir ni be dag feni chugur e tha’ u thilrow e chitamangin ma be tayfan.” Re thin ney e aram reb i ban’en nnap’an nra tabab e bitir ko numon ma aram ban’en nra yog ni be weliy rogon nib t’uf e chitamangin rok. Ki fanay Jesus e re bugithin ney u nap’an ni weliy e n’en ni bay u gum’irchaen ngak e Chitamangin. Bod nnap’an ni immoy ko fare milay’ nu Gethsemane ni ka in e awa u m’on ni ngan li’ ngem’, ma aram me meybil ngak Jehovah ni gaar, “Abba ara Chitamag.”—Mark 14:36, NW.
Fare babyor e ku be ulul ni gaar, “Re bugithin ney ni ʼAbbāʼ e ireray rogon ni yima pining e chitamangiy. Ma gathi ri yima fanay u lan e yu ke babyor rok piyu Jew ko ngiyal’ ni i gagiyeg piyu Greek nge yu Roma riy. Fan ndanir ma fanay e re bugithin ney e bochan ni yima lemnag nde puluw ni ngan pining ngak Got ya ra yan i aw ni gowa danir tayfan.” Machane “i fanay Jesus e re bugithin ney u nap’an ni be meybil ni bochan e nge micheg gelngin nrib chugur e tha’ u thilrow Got.” Ma ka bay l’agruw yay ni fanay apostal Paul fare bugithin ni “Abba” u lan e pi babyor ni yoloy. Re n’ey e be dag ni ku ma fanay e pi Kristiano ko bin som’on e chibog e re bugithin ney u lan e meybil rorad.—Roma 8:15, NW; Galatia 4:6, NW.
w10-E 11/1 15
Ga Manang Murung’agen e Re N’ey, Fa?
Mang boch e kanawo’ ni “fath” u dow apostal Paul e be m’ug riy ni ir reb e sib rok Jesus?—Galatia 6:17.
▪ Nap’an ni yog Paul e re thin ney ma boor ban’en nrayog ni nge lemnag e piin ni ur med u nap’an e bin som’on e chibog ni aram e n’en ni be weliy Paul murung’agen. Bod ni yima fanay ba wasey ni kan goweliy tabanggin ni ngan tay e pow nga downgin e piin ni kan kolrad u tan e mahl ni kar manged kalbus, ara piin ni kar moro’ro’gad u tempel, nge boch e sib ni yad bay u reb e nam ni gathi nam rorad. Nap’an ni yira tay e re pow ney ngak be’ ni aray rogon ma be yip’ fan nsusun ndabin tayfan facha’.
Machane fapi pow ni un tay nga downgin e girdi’ e gathi gubin ngiyal’ ni be yip’ fan ban’en nib kireb. Ya boor e girdi’ kakrom ni ur fanayed e re miti pow ney ni nge gagiyelnag ni yad girdien reb e ganong ara reb e teliw. I yog reb e babyor ni, “bay e pow ni ma tay piyu Syria nga pa’rad ara k’anganrad ni nge m’ug riy ni yad ma liyor ko fa gal got ni Hadad nge Atargatis . . . Ma piin ni yad ma liyor ko fare got ni Dionysus e yad ma tay ba pow ni yaan yuwan fare gek’iy ni ivy nga dowrad.”—Theological Dictionary of the New Testament.
Boor e piin ni yad ma weliy murung’agen boch ban’en u radio ara TV e ur lemnaged ni fapi fath u downgin Paul e bochan e gafgow ni un tay ngak u nap’an ni i milekag ni be machib. (2 Korinth 11:23-27) Machane sana pow ni be weliy Paul murung’agen e be yip’ fan rarogon e yafos rok ni ir reb e Kristiano, ma gathi riyul’ ni bogi fath ni bay u downgin.
June 10-16
BOCH E THIN NIB GA’ FAN KO THIN ROK GOT | EFESUS 1-3
“Rogon Nra Lebguy Jehovah e N’en ni Ke Mu’ i Lemnag”
it-2-E 837 ¶4
Fare N’en ni Kan Tay nib Mith
Gil’ilungun fare Messiah. U lan e pi babyor ni yoloy Paul e ke tamilangnag riy murung’agen ban’en ni kan tay nib mith ni bay rogon ngak Kristus. I weliy Paul ko Efesus 1:9-11 murung’agen fare “n’en ni kan tay nib mith” ni bang ko n’en nib m’agan’ Got ngay ni gaar: “[Ke] dag ngodad e n’en ni ke tay nib mith ni ke mu’ i lemnag rok ni nge libguy u daken Kristus. N’en ni ke mu’ i lemnag rok Got ni nge rin’ e bay fini taw nga nap’an me libguy, ni aram e nge kunuy urngin e tin ni sunumeg ban’en nga taabang, ni urngin ban’en ni bay u tharmiy ngu but’, me par Kristus ni ir e llug riy. Ya urngin ban’en ma kan rin’ nrogon ni ke m’ay i lemnag rok Got ke tay nge rogon ni turguy; mi Got e ir e turguy ni ngad manged girdien ko taab girdi’ ni ngad tiyed Kristus ni fan ko tin ni ke lemnag, ni tin ni be finey ni ke m’ay i dugliy rok i iram ko tabolngin.” Fare n’en ni “kan tay nib mith” e ba muun ngay ba am ni aram Gil’ilungun fare Messiah. Ma “urngin ban’en ni bay u tharmiy” ni weliy Paul murung’agen e aram e piin ni yad ra un nga Gil’ilungun Got ngar gagiyeggad Kristus u taabang. Ma pi n’en ni yad bay u “but’” e aram e girdi’ ni yad bay u tan e gagiyeg rok Kristus. I weliy Jesus ngak pi gachalpen ni fare n’en ni kan tay nib mith e bay rogon nga Gil’ilungun u nap’an ni yog ngorad ni gaar: “Gimed e kan weliy ngomed e tin nda nnang ni murung’agen e gagiyeg rok Got.”—Mr 4:11.
Be Kunuy “Jehovah” Chon e Tabinaw Rok
3 Ke yog Moses ngak piyu Israel ni gaar: “I Somol ni ke mus ni ir e ir e Got rodad.” (Deut. 6:4) Tin ni be rin’ Jehovah e ba puluw ko tin nib m’agan’ ngay. Nap’an ni “taw nga nap’an,” me tabab Got ni nge rin’ boch ban’en ni nge taarebnag e tin ke sunmiy. (Mu beeg e Efesus 1:8-10.) Ke rin’ Jehovah l’agruw ban’en. Som’on e ke rin’ ban’en ni nge ayuweg e piin ni kan dugliyrad nrayog ni nga ranod nga tharmiy, yad ra ulul ko maruwel rorad u tan pa’ Jesus Kristus. Ke tabab Jehovah i rin’ e re n’ey ko Pentekost 33 C.E. u nap’an ni kan dugliyrad nga gelngin Got nib thothup. Yad ra un ngak Kristus nga tharmiy ngar gagiyeggad. (Acts 2:1-4) Bochan fare biyul ni pi’ Kristus ma piin ni kan dugliyrad e kar manged e piin nib mat’aw u wan’ Got ma bay rogorad ni nge yog ngorad e yafas. Ma yad manang ni ke fakayrad Got ere kar manged “pi fak.”—Rom. 3:23, 24; 5:1; 8:15-17.
4 Bin migid me kunuy Got e girdi’ ni yad ra par u Paradis u fayleng u tan Gil’ilungun Kristus. Ma fare ulung ko girdi’ ni “pire’ ni pire’” e yad e bin som’on ni ngar pared u Paradis. (Rev. 7:9, 13-17; 21:1-5) Ma nap’an e Gagiyeg rok Kristus u lan reb e biyu’ e duw ma bokum bilyon e girdi’ ni ran fasegrad ko yam’ mar pared u roy u fayleng. (Rev. 20:12, 13) Rayog ni ngad lemnaged ni bay boor e kanawo’ nrayog ni ngad daged riy nriyul’ ni gadad e girdi’ ni ke taareban’dad. Ma fare ulung ko girdi’ ni pire’ ni pire’ nge piin ni kan fasegrad ko yam’ e yad ra mang ‘urngin ban’en ni bay u but’ ni kan kunuyrad. Nap’an nra m’ay fare biyu’ e duw ma yira skengnagrad. Piin ni yad ra par nib yul’yul’ e yad ra mang “pi fak Got” u fayleng.—Rom. 8:21; Rev. 20:7, 8.
Ngan Fal’eg i Gay Boch Ban’en nib Ga’ Fan ko Thin rok Got
Dab Mu Pag Boch Ban’en ni Nge Magawonnigem, Ya Nge Dab Kun Tayfam
15 Uw rogon ni ngad ayuweged boch e girdi’ ya nge yag ni ngar fel’gad u wan’ Got? Reb e kanawo’ e ngad daged rogon ni ngad k’adedan’dad ko pi magawon nra yib ngodad. Ke yol Paul ko ulung nu Efesus ni gaar: “Gu be wenig ngomed ndabi mulan’med ya gu be gafgow ni fan ngomed, ni urngin ni gimed e nge yib fan ngomed.” (Efe. 3:13) Mang fan ni ke yog Paul ni gafgow ni i tay e “nge yib fan” ngak piyu Efesus? Ke pigpig Paul ngak e pi walag nyugu aram rogon ni boor e magawon ni ke mada’nag, ere ke dag ngorad ni pigpig ngak Got e aram e n’en th’abi ga’ fan nra rin’ reb e Kristiano. Faan mang a ke tal Paul u nap’an ni yib e pi skeng nem ngak, ma rayog ni nge lemnag e pi walagen ni tha’ u thilrad Got, nge machib, nge athap rorad e de ga’ fan. Bochan ni ke k’adan’ Paul, ma aram e ke dag ngak e pi walag ni be’ ni ke mang gachalpen Kristus e bay rogon ni nge pag fan ir.
cl-E 299 ¶21
Ngam “Nanged Rogon” e T’ufeg rok Kristus
21 Fare thin ni mu “nanged rogon” ni kan pilyeg ko thin ni Greek e be yip’ fan “ni ngan rin’ ban’en ya ngan fil rogon.” Ere nap’an ni gad ra dag e t’ufeg ni bod rogon ni dag Jesus ni aram e gad be paged fadad ni ngad ayuweged yugu boch e girdi’, ma ngad runguyed yad ngad ayuweged yad ko n’en nib t’uf rorad, ma gad n’ag fan e kireb ni gomanga kar rin’ed ngodad ni ke yib u gum’ircha’dad, ma aram e ra tamilang u wan’dad rogon laniyan’ Jesus me ga’ fan u wan’dad. Faan gad ra rin’ ni aray rogon, ma aram e nge tamilang u wan’dad ma gad ra ‘nang rogon’ e t’ufeg rok Kristus nre n’ey e ra yan ni aw nib pag feni fel’ nga rogon e tamilangan’ ni bay rorad. Ma dab da paged talin nnap’an nra fel’ boch rogon ni gad be folwok rok Kristus, ma aram e gad ra chugur ngak e en nib fel’ rogon ni i folwok Jesus rok ni aram Jehovah ni ir e Got rodad ni ma t’ufegdad.
June 17-23
BOCH E THIN NIB GA’ FAN KO THIN ROK GOT | EFESUS 4-6
“Mon’ed Nga Dakenmed Urngin e Talin e Cham ni Pi’ Got Ngomed”
Piin Fel’ Yangaren Mu Togopuluwgad Ngak Moonyan’
I YOG apostal Paul ni gadad e piin Kristiano e taareb rogodad ko salthaw ni gad be un ko cham. Machane, gathi rriyul’ ni gad be cham ko girdi’, ya gad be cham ngak Satan nge pi kan nib kireb. Yugu aram rogon, ma riyul’ ni bay e toogor rodad. Satan nge pi engel rok e ri yad bod rogon e salthaw nib falu’ ni ke n’uw nap’an ni kar uned ko cham. Ere gad ra lemnag ma bod ndabiyog ni ngad gelgad ko cham ni gad be tay ngak. Bin riyul’ riy e, bod nib mom ni nge gel ngak e pi fel’ yangaren ni Kristiano. Ere uw rogon ni nge gel e piin fel’ yangaren ko cham ni yad be tay ko pi kan nib kireb? Bin riyul’ riy e, rayog ni nge gel e piin fel’ yangaren ko re cham ney, ma aram e n’en ni yad be rin’ e chiney. Mang fan? Bochan e bay Jehovah ni be ‘gelnagrad nga gelngin nrib gel.’ Machane, ku bay e pi ‘talin e cham ni ke pi’ Got ngorad’ ni ka ron’ed nga dakenrad ni be ayuwegrad ni bod rogon e salthaw.—Mu beeg e Efesus 6:10-12.
Piin Fel’ Yangaren Mu Togopuluwgad Ngak Moonyan’
4 Ku arrogon ni tin riyul’ ni gad ma fil ko Thin rok Got e ma ayuwegdad ko pi machib ni googsur nrayog ni nge magawonnagdad ko tirok Got ban’en. (John 8:31, 32; 1 John 4:1) Ma faanra gel feni t’uf e tin riyul’ rodad, ma aram e ra mom ni nga u darod ni bay “fa gin’en ni ma ing e salthaw nga daken ngorongoren” rodad, ni aram e be yip’ fan ni nga i puluw e ngongol rodad ko pi motochiyel rok Got. (Ps. 111:7, 8; 1 John 5:3) Maku reb e, faanra kari tamilang e tin riyul’ ko Thin rok Got u wan’dad, ma aram e nap’an nra togopuluw be’ ngodad ma rayog ni ngad weliyed e michan’ rodad nib pagan’dad.—1 Pet. 3:15.
7 Pi motochiyel rok Jehovah nib mat’aw e rayog ni ngan taareb rogonnag ko fagi n’en ni ma ing e salthaw nga daken ngorongoren. Ireray e n’en nrayog ni nge ayuweg gum’ircha’dad ni be yip’ fan ban’en ara bin riyul’ i rarogodad. (Prov. 4:23) Be’ nib salthaw e dabi chuweg fagi n’en ni ma ing nga daken ngorongoren nge thilyeg nga yugu bang ni kan ngongliy u ba mit e wasey nde gel. Ere ku arrogodad ndarud rin’ed e n’en ni gad be lemnag nib puluw, ma gad pag fan e pi motochiyel rok Jehovah u murung’agen e ngongol nib puluw ni ngad rin’ed. Ya bin riyul’ riy e dabiyog ni ngad lemgad nib fel’ rogon ya dawor da flontgad, ere dabiyog ni nge ayuwegdad e lem rodad ni ngad dugliyed ban’en nib fel’ rogon nra ayuweg gum’ircha’dad ni be yip’ fan ban’en. (Prov. 3:5, 6) Aram fan ni gubin ngiyal’ ni gad ma yaliy ‘fagi n’en ni gad ma ing nga daken ngorngordad,’ ya ngad guyed ko ka be par u gil’ nrayog ni nge ayuweg gum’ircha’dad ni be yip’ fan ban’en fa danga’.
10 Pi sus ni ma chuw e pi salthaw nu Roma ngay e ma ayuwegrad u nap’an e mahl, ma sus ni be yip’ fan ban’en ni ma chuw e piin Kristiano ngay e ma ayuwegrad ni ngar weliyed fare thin nib fel’ ni murung’agen e gapas. (Isa. 52:7; Rom. 10:15) Yugu aram rogon mab t’uf ni nge dab da rusgad ni ngad machibgad u nap’an nra mab e kanawo’ ngodad. Bo ni 20 e duw rok e yog ni gaar: “Gu ma rus ni nggu machibnag e piin ni gamad nga class. Gu be lemnag ni gu ma tamra’ ni nggu machibnagrad. Gu ra sul nggu lemnag, ma da gur nang ko mang fan ni gu ma tamra’ ngorad. Machane, chiney e gu ma felfelan’ ni gu ma machibnag e pi taab yangar rog.”
Piin Fel’ Yangaren Mu Togopuluwgad Ngak Moonyan’
13 Mang boch e “gan e gat’ing ni be yik’” nrayog ni nge pag Satan ngom? Bod nrayog ni nge fanay boch e ban u murung’agen Jehovah ni nge togopuluw ngom, ni bod ni nge k’aringem ni ngam lemnag nder ma lemnagem Jehovah ma dam t’uf rok. Ida ni 19 e duw rok e ma lemnag ni ir be’ ndariy fan. I yog ni gaar, “Ba ga’ ni gu ma lemnag nde chugur Jehovah ngog ma dabun ni nge mang Fager rog.” Ere mang e ma rin’ u nap’an nra tabab ni nga i lem ni aray rogon? I yog ni gaar: “Pi muulung ni gu ma un ngay e aram e n’en ni ma gelnag e michan’ rog. Kafram e gu ra yan ko muulung ma dab gu pi’ e fulweg ya gu ma lemnag ndariy be’ ni baadag ni nge rung’ag e n’en ni ku gog. Machane, chiney e gu ma fal’eg rogog u m’on ko muulung ma gu ma guy rogon ni nggu pi’ l’agruw ara dalip e fulweg. Ba mo’maw’ e re n’ey, machane gu ma felfelan’ u nap’an ni gu ra rin’. Ma pi walag u lan e ulung e ri yad ma pi’ e athamgil nga lanin’ug. Gubin ngiyal’ nra m’ay e muulung ma kug nang ni gub t’uf rok Jehovah.”
16 “Tin ni be l’agan’dad ngay ni bay da guyed ni bochan e kad thapgad ngak Got” e aram e n’en ni ma ayuweg e lem rodad ni bod rogon ni fare urwach ni ma tay e salthaw nga lolugen e aram e n’en ni ma ayuweg e man’ey rok. (1 Thess. 5:8) Pi n’en ni be l’agan’dad ngay ara athap rodad e aram e n’en ni ma ayuwegdad ni ngad pared ni gad be tedan’dad ko pi n’en ni ke micheg Got ma dabi mulan’dad ko pi magawon ni be yib ngodad. (Ps. 27:1, 14; Acts 24:15) Machane, faanra gad baadag ni nge ayuwegdad e “urwach” rodad, ma aram e thingar da ted nga lolugdad, ma gathi ngaud feked nga pa’dad.
20 I taareb rogonnag Paul e Thin rok Got nga bangi sayden ni ke pi’ Jehovah ngodad. Machane, thingar da filed rogon ni ngad chamgad ngay nib fel’ rogon u nap’an ni gad be guy rogon ni ngad weliyed e pi n’en ni ke mich u wan’dad ara nap’an ni gad be guy rogon ni ngad thilyeged rogon e lem ni gad ma tay. (2 Kor. 10:4, 5; 2 Tim. 2:15) Uw rogon ni ngam mon’ognag e salap rom? Sebastian ni 21 e duw rok e yog ni gaar: “Chiney e nap’an nug ra mu’ i beeg reb e guruy ko Bible, ma aram mug yoloy reb e verse riy nga but’. Gu be yoloy nga but’ urngin e thin nu Bible ni gu baadag. Re n’ey e ma ayuwegeg ni nge tamilang u wan’ug rogon ni ma lem Jehovah.” Daniel ni faan kad weliyed murung’agen e yog ni gaar: “Nap’an ni gu ra beeg e Bible rog, ma gu ma mel’eg boch e verse ni gu be lemnag nra ayuweg e girdi’ ni kug mada’nag u nap’an e machib. Kug guy ni faanra guyem e girdi’ nrib mich e Bible u wan’um ma ga be athamgil u rogon nrayog rom ni ngam ayuwegrad, ma aram e yad ra adag ni ngar motoyilgad.”
Ngan Fal’eg i Gay Boch Ban’en nib Ga’ Fan ko Thin rok Got
it-1-E 1128 ¶3
Ngan Par nib Thothup
Gelngin Got nib thothup. Jehovah e ma gagiyegnag gelngin nib thothup ma gubin ngiyal’ ni ma fanay e re gelngin ney ni nge lebguy e n’en nib m’agan’ ngay. Re gelngin ney e ban’en nib beech, ma dariy thibngin, ma kub thothup, ma ireray e n’en ni ma maruwel Got ngay ko tin nib fel’ ban’en. Aram fan ni ka nog e “Kan ni Thothup” ngay ara gelngin Got nib thothup. (Ps 51:11; Lu 11:13; Ef 1:13) Ra maruwel e re gelngin ney u daken be’ ma ireray ban’en ni be ayuweg facha’ ni nge par nib beech mab machalbog. Ere faanra rin’ be’ e ngongol nde mat’aw ma aram e be ‘kirebnag laniyan’’ ara be togopuluw nga gelngin Got nib thothup. (Ef 4:30) Yugu aram rogon ni gelngin Got e gathi be’, machane ireray e re gelngin ni be gagiyelnag fel’ngin Got nib thothup, ma aram fan nrayog ni ngan ‘kirebnag laniyan’.’ Faan yira rin’ e tin nde mat’aw ban’en ma rayog ni ngan ‘magawonnag e maruwel ni be tay’ gelngin Got nib thothup. (1Th 5:19) Ma faanra ulul be’ i rin’ e tin nde mat’aw, ma aram e ra “kireban’” gelngin Got nib thothup, ma rayog ni nge chel Got nge mang toogor rok. (Isa 63:10) Be’ ni ma rin’ boch ban’en nib togopuluw nga gelngin Got e ku rayog ni nga i yog boch ban’en nib togopuluw ngay, ma miti ney e denen e yog Jesus Kristus ndabiyog ni ngan n’ag fan e ngiyal’ ney i yan nga m’on.—Mt 12:31, 32; Mr 3:28-30; mu guy e SPIRIT.
it-1-E 1006 ¶2
Chogow
Ma M’ug ko Ngongol rok Be’. Chogow e rayog ni nge m’ug u nap’an nra rin’ be’ ban’en nra gagiyelnag e n’en ni be ar’arnag nde puluw mab kireb. I yog James ni yoloy reb e babyor ko Bible nnap’an ni gad ra rin’ e pi n’en ni gad be ar’arnag nib kireb, ma aram e kad denengad. (Jas 1:14, 15) Ere mus ngak e en nib chogow ma yira nang ni bochan rogon e ngongol rok. I yog apostal Paul ni be’ nib chogow e ku taareb rogon ngak be’ ni ma meybil ma ma tayfan yugu boch e got. (Ef 5:5) Ere bochan gelngin e chogow rok facha’, ma ra tay ni n’en nib be ar’arnag e ke mang got rok, ma ra mon’eg e re n’ey ko pigpig nge liyor ni be tay ngak e En ni Sunmiydad.—Ro 1:24, 25.
June 24-30
BOCH E THIN NIB GA’ FAN KO THIN ROK GOT | FILIPPI 1-4
“Dariy Ban’en ni Nge Magafan’med Ngay”
‘Gapas rok Got e Dabi Chuchugur ni Nge Nang e Girdi’ Fan’
10 Mang e rayog ni nge ayuwegdad ni nge dabi magafan’dad nga boch ban’en, miki yag ni nge yib e “gapas rok Got” ngodad? Ba tamilang ko fapi thin ni yog Paul ngak piyu Filippi ni meybil e aram e n’en nrayog ni nge chuweg e magafan’ rodad. Ere, nap’an nra magafan’dad, mab t’uf ni ngad meybilgad. (Mu beeg e 1 Peter 5:6, 7.) Nap’an ni ga ra meybil ngak Jehovah ma nge pagan’um ngak ni ma lemnagem. Mmeybil ngak mag “pining e magar ngak” ko pi n’en ni be tow’athnagem riy. Faanra dab da paged talin nrayog rok Jehovah “ni nge maruwel nge pag rogon ko tin ni kad wenigniged ngak, ara ke taw e lem rodad ngay,” ma aram e rayog ni nge gel e pagan’ rodad ngak.—Efe. 3:20.
‘Gapas rok Got e Dabi Chuchugur ni Nge Nang e Girdi’ Fan’
7 Dariy e maruwar riy nnap’an ni beeg e pi walag nu Filippi e gi babyor nem ni pi’ Paul ngorad, ma aram me yib ngan’rad e n’en ni buch rok nge rogon ni ayuweg Jehovah u reb e kanawo’ ndar lemnaged nra rin’ riy. Ere, mang e be fil Paul ngorad u roy? Be gaar ngorad: Dabi magafan’med. Faan gimed ra meybil, ma aram e ra yib e gapas rok Got ngomed. Ki yog Paul ngorad ni gapas rok Got e ‘dabi chuchugur ni nge nang e girdi’ fan’.’ Mang e be yip’ fan e re n’ey? Bay yu ken e Bible ni kan pilyeg e re thin ney riy ni “dabi chuchugur ni nge taareb rogon ko pi n’en ni gad ma athapeg” ara “ba gel e thil riy ko pi n’en ni ma lemnag e girdi’.” Ere, n’en ni be yog Paul e “gapas rok Got” e rib pag feni manigil ndabi chuchugur ni nge taw e lem rodad ngay. Ere, yugu aram rogon ni bay yu ngiyal’ ni gad ma mada’nag boch e magawon ni gad be lemnag ndariy e puf riy, machane, bin riyul’ riy e Jehovah e manang rogon ni ngad pithiged e pi magawon nem, ma rayog ni nge ayuwegdad u boch e kanawo’ ndad lemnaged nra rin’ riy.—Mu beeg e 2 Peter 2:9.
‘Gapas rok Got e Dabi Chuchugur ni Nge Nang e Girdi’ Fan’
16 Mang angin nra yib ngodad u nap’an nra yib e “gapas rok Got” ngodad “ndabi chuchugur ni nge nang e girdi’ fan”? Be yog e Bible nra ‘yororiy gum’ircha’dad nge tafinay rodad ngi i par rok Kristus Jesus.’ (Fil. 4:7) Fare bugithin ni kan pilyeg ni “yororiy” e kan fek u bbugithin ni Greek nib ga’ ni ma yog e salthaw. Be yip’ fan ba ulung i salthaw ni kan tayrad ni ngar yororiyed reb e mach kakrom. Fare mach nu Filippi e aram reb ko pi mach nem. Piin ni yad ma par u Filippi e ba fel’ e mol rorad nnep’ ni bochan e yad manang ni bay boch e salthaw ni kan tayrad ni ngar matanagiyed e pi garog ko mach rorad. Ere ku arrogodad nnap’an nra yib e “gapas rok Got” ngodad, ma aram e rayog ni nge paslag gum’ircha’dad nge tafinay rodad. Gad manang ni ma lemnagdad Jehovah ma baadag ni nge fel’ gubin ban’en nga puluwdad. (1 Pet. 5:10) Re n’ey e ma ayuwegdad ni nge dabi magafan’dad nib pag rogon ara mulan’dad.
Ngan Fal’eg i Gay Boch Ban’en nib Ga’ Fan ko Thin rok Got
it-2-E 528 ¶5
Maligach
Maligach ni yima puog. Re miti maligach ney e aram ban’en ni yima pi’ u nap’an ni yira pi’ e tin ka bay e maligach nib ga’ ni aram e n’en ni ma rin’ piyu Israel u tomuren ni kar tawgad ko fare Nam ni Kan Micheg ni aram e gin ni ngar pared riy. (Nu 15:2, 5, 8-10) Re maligach ney e aram e wain (“ni aram ban’en ni bay e alkul riy”) ni yima puog nga daken e altar. (Nu 28:7, 14; mu taareb rogonnag ko Ex 30:9; Nu 15:10.) I yol apostal Paul ko pi Kristiano nu Filippi ni gaar: “Rachaeg e sana bay ni puog nga daken e maligach ni be pi’ e michan’ romed ngak Got ni ngan puog nga daken ni bod ban’en ni kan pi’ ngak Got. Faanra nge yan i yodorom, me ere kug felan’.” Rogon e thin rok u roy e be fanay e maligach ni yima puog nga daken e altar ni nge tamilangnag rogon nib m’agan’ ngay ni nge pag fan ir ni bochan e nge pigpig ngak pi walagen. (Fil. 2:17) Ma de n’uw nap’an u m’on ni nge yim’ me yol ngak Timothy ni gaar: “Gag e ke taw ko ngiyal’ ni nge thay e pogofan rog riy [“ni bod ba maligach ni kan puog,” NW] ni bochan Kristus; ke taw nga nap’an ni nggu chuw ko biney e tamilang.”—2Ti 4:6.
“Ke Tabab e Yay Nsom’on”—e Fas ko Yam’!
5 Yay ni migid, ma “fare Israel rok Got” ni kan dugliyrad e thingar ra uned ngak Somol ni Jesus Kristus ko flaab u tharmiy, ma aram e “gubin ngiyal’ ni bay ur pired rok Somol.” (Galatia 6:16; 1 Thessalonika 4:17) Re n’em e ka nog e yay “nsom’on e fas ko yam’” ngay. (Filippi 3:10, 11; Revelation 20:6) Nap’an nra mus ere fas ko yam’ nem, ma aram e ke taw nga nap’an bokum milyon e girdi’ ni ngar fosgad u fayleng nge yog e yafos ni manemus ngorad u Paradis. Demtrug rogon, ko bay e athap rodad ko par u tharmiy ara fayleng, ma ri gad baadag ni ngad nanged murung’agen e yay “nsom’on e fas ko yam’.” Miti mang fas ko yam’ e ram? Wuin e ra buch?