BIN 11

Ngan Non u Fithik’ e Pasig

Roma 12:11

N’EN NI NGAN RIN’: Mu non u fithik’ e pasig ya nge yag nim pi’ e athamgil nga laniyan’ e piin be motoyil mag pug e tafinay rorad.

Nge rich e tin ni ngam weliy nga gum’irchaem. Nap’an ni ga be fal’eg e welthin rom, mag fal’eg i lemnag feni ga’ fan e n’en ni ngam weliy. Mu fal’eg i fil e welthin rom ya nge yag nim weliy nrogon ni keb u gum’irchaem.
Mu lemnag e piin be motoyil. Mu fal’eg i lemnag rogon nra yib angin e tin ni ngam weliy ko piin be motoyil mar filed ban’en riy. Mu lemnag rogon ni ngam pi’ e welthin rom u reb e kanawo’ nra k’aringrad ni nge ga’ fan u wan’rad e tin ni ngam weliy.
Mu welthin u fithik’ e pasig. Mu tay rogom ko n’en ni ga be weliy. Pi n’en ni bay u lanin’um e susun ni nge m’ug u owchem nge rogon ni ga be welthin ni be un paam ngay.

Dab mu par ni yug taab n’en e ga be yan u yaan, ya ga ra magawonnag e motoyil ko girdi’. Faanra ga be non ni be un paam ngay, ma ngam guy rogon ni ngam rin’ u reb e kanawo’ nra tamilangnag e n’en ni ga be weliy. Nap’an ni ga be weliy e tin nib ga’ fan ara ga be guy rogon ni ngam pug e tafinay ko piin be motoyil ni ngar rin’ed ban’en, mab ga’ ni aram e ngiyal’ nib t’uf ni ngam non u fithik’ e pasig. Yug dab mu non nib pag rogon ya ra chalban e piin be motoyil ngom.