Rogon ni Ngaud Paged Fadad

1. Uw rogon ni dag Jesus e bin th’abi fel’ e kanawo’ u rogon ni ngan pagfay?

NAP’AN ni immoy Jesus u fayleng, me dag e bin th’abi fel’ e kanawo’ u rogon ni ngan pagfay. Ma pag fan e tin ni baadag ni nge rin’, ya nge yag ni rin’ e tin nib m’agan’ Got ngay. (John 5:30) Bochan ni par nib yul’yul’ nge yan i mada’ ko ngiyal’ nni li’ nge yim’ riy, ma be micheg ni demtrug ban’en nra pag fan ya nge rin’ e n’en nib m’agan’ e Chitamangin ngay.​—Fil. 2:8.

2. Uw rogon ni ngad paged fadad, ma mang fan ni thingar da rin’ed e re n’ey?

² Bochan ni gad be folwok rok Jesus, ma rib ga’ fan ni ngkud paged fadad. Mang e be yip’ fan ni ngad paged fadad? Re n’ey e be yip’ fan nib m’agan’dad ngay ni ngad paged fan e tin ni gad baadag ni ngad rin’ed, ya nge yag nda ayuweged boch e girdi’. Biney e lem e ba thil ko fare lem ni fel’ ngak. (Mu beeg e Matthew 16:24.) Ra bay e biney e lem rodad, ma ra u darod nga laniyan’ boch e girdi’. (Fil. 2:3, 4) Bin riyul’ riy e fil Jesus ko e girdi’ ni fare lem ni ngan pagfay e aram e n’en th’abi ga’ fan ko liyor rodad ngak Got. Uw rogon e re n’ey? T’ufeg u thilin e pi Kristiano e aram e n’en ni ma k’aringdad ni ngad paged fadad, maku aram e pow ko tin riyul’ i gachalpen Jesus. (John 13:34, 35) Am lemnag e pi tow’ath ni ke yag ngodad ni bochan e gadad bang u ba ulung i walag u ga’ngin yang e fayleng ni gad ma pag fadad!

3. Mang e rayog ni nge k’aringdad ni ngad lemnaged nde ga’ fan ni ngad paged fadad?

³ Ku bay ban’en nrayog ni nge k’aringdad ni ngad lemnaged nde ga’ fan ni ngad paged fadad. Re n’em e aram fare lem ni fel’ ngak. Am lemnag rogon ni dag Adam nge Efa e biney e lem. N’en ni rin’ Efa e be m’ug riy ni baadag ni nge bod Got, ma Adam e baadag ni nge yan nga laniyan’ Efa. (Gen. 3:5, 6) Nap’an ni waliy Moonyan’ Adam nge Efa ni ngar pagew e bin riyul’ e liyor, maku boor e kanawo’ ni bannag e girdi’ riy ni ngar daged fare lem ni fel’ ngak. Ma aram e n’en ni be rin’ ke mada’ ko chiney. Ku aram e n’en ni rin’ ngak Jesus. (Matt. 4:1-9) Ngiyal’ ney e ku boor e kanawo’ ni be bannag Satan e girdi’ riy, ma ma k’aringrad ni ngaur pared ni yigoo yad e yad be lemnaged yad. Ere, ba ga’ fan ni ngad kol ayuwgad ya ba mom nra af e miti ney e lem ngodad.​—Efe. 2:2.

4. (a) Rayog ni ngaud pared ndab kud lemniged boch ban’en ni gadad e nge fel’ ngodad, fa? Mu weliy rogon. (b) Mang boch e deer ni gad ra weliy?

⁴ Fare lem ni fel’ ngak e rayog ni ngan taarebrogonnag ko t’ay ni ke sum ko wasey. Faanra i munur bangi wasey fa gabal boch ban’en u fithik’ e nifeng ngay ma rayog ni nge t’ay. De fel’ ni ngan pag fare gi wasey nge t’ay, ya ra munmun me muchubu’ nga but’. Ere, ku arrogodad ni yugu aram rogon nib mo’maw’ ni nge dab ku ud lemnaged boch ban’en ni gadad e nge fel’ ngodad, machane thingar da athamgilgad ngaud chamgad ko biney e lem. (1 Kor. 9:26, 27) Uw rogon ma gad nang ni bay e miti ney e lem rodad? Ma uw rogon ni ngad athamgilgad ngaud paged fadad?

MU FANAY E BIBLE NI NGAM GUY KO BAY E LEM NI FEL’ NGAK ROM FA DARIY

5. (a) Uw rogon nrayog ni ngan taarebrogonnag e Bible nga bangi therek? (Mu guy e sasing ni bay u tabolngin e re article ney.) (b) Nap’an ni gad be fal’eg i yaliyed gadad ko bay fare lem ni fel’ ngak rodad fa dariy, ma mang e thingar dab da rin’ed?

⁵ Gad ra beeg e Bible ma gad nang ko bay boch ban’en u rarogodad nib t’uf ni ngad thilyeged fa dariy. Re n’ey e rayog ni ngan taarebrogonnag nga bangi therek ni gad be guy yaadad ngay. (Mu beeg e James 1:22-25.) Gad ra fanay fagi therek nib fel’ rogon ma rayog ni nge ayuwegdad. Bod ni faanra kemus ni kad sapgad nga mit e therek ma gad fulweg owchedad nib papey, ma dabisiy ni dab da guyed ban’en nib t’uf ni ngad thilyeged u rogon yaadad. Maku reb e faanra kad cheleged fare gi therek ke sap nga bang, ma yugu be’ e gad ra guy yaan. Ere, ku arrogon e Bible ni faanra ngad fanayed ni ngad guyed ko bay e lem ni fel’ ngak rodad fa dariy, ma ba ga’ fan ni ngad beeged nib fel’ rogon, ma dab da fanayed ni ngad guyed e oloboch rok be’.

6. Uw rogon ni gad ma ‘tiyan’dad’ ko fare motochiyel nrib yal’uw?

⁶ Rayog ni ngad beeged e Thin rok Got ni gubin e rran, ma dab da nanged ni bay e lem nge ngongol ni fel’ ngak rodad. Uw rogon nrayog ni nge buch e re n’ey? Am lemnag: U lan fare fanathin rok James ni murung’agen fare pumoon ni “yaliy” yaan nga therek e fanay bbugithin ni Greek ni be yip’ fan ni ngan fal’eg i yaliy ban’en nib fel’ rogon. Ba fel’ rogon ni be sap fare moon nga therek, machane ku der yag ni nge guy e n’en nib t’uf ni nge thilyeg. I ulul James ngay ni gaar: “Me yan, ma ka chingiyal’ nem me pag talin rogon yaan.” Arrogon, yugu aram rogon ni ke sap nga mit fare therek, machane de yaluweg e n’en ni guy. Re n’ey e ba thil ko fare moon ni gathi kemus ni “fal’eg i yaliy ir nga fithik’ fare motochiyel nrib yal’uw” ya ki athamgil ni nge “tiyan’ ngay.” Ere, de pagtalin e motochiyel rok Got, ya ke athamgil ni nge fol riy. Ki weliy Jesus ban’en ni taareb rogon ko re n’ey u nap’an ni gaar: “Faan gimed ra fol ko thin ni gu be machibnag ngomed ma aram e kari mudugil ni kam manged pi gachalpeg.”​—John 8:31.

7. Uw rogon ni ngad fanayed e Bible ni ngad nanged ko bay e magawon rodad ko fare lem ni fel’ ngak fa dariy?

⁷ Ere, faanra ngam digey e lem ni fel’ ngak, mab ga’ fan ni ngaum beeg e Thin rok Got nib fel’ rogon. Ga ra rin’ e re n’ey, ma ra ayuwegem ni ngam nang e pi n’en nib t’uf ni ngam thilyeg u rarogom. Machane, ku bay boch ban’en nib t’uf ni ngam rin’. Ba ga’ fan ni ngkum fal’eg i gay murung’agen boch ban’en ko thin rok Got. Nap’an ni ga be beeg murung’agen ban’en ni ke buch u Bible, mag susunnag ni ga bay u rom, mag fithem ni nge lungum: ‘Mang e gu ra rin’ ni faanra buch ban’en rog ni aray rogon? Gur, gu ra rin’ e tin nib mat’aw?’ N’en nth’abi ga’ fan e tomuren ni kam fal’eg i lemnag e n’en ni kam beeg, mag gay rogon ni ngam fol riy. (Matt. 7:24, 25) Ngad weliyed rogon nra ayuwegdad e pi n’en ni rin’ Saul ni Pilung nge apostal Peter u rogon ni ngad paged fadad.

PI N’EN NRAYOG NI NGAN FIL KO N’EN NI RIN’ SAUL

8. Som’on ni pilung Saul, ma uw rogon e lem rok?

⁸ Pi n’en ni rin’ Saul ni Pilung nu Israel e be dag nrayog ni nge magawonnagdad e lem ni fel’ ngak u rogon ni ngad paged fadad. Som’on ni pilung Saul ma ir be’ nib sobut’an’. (1 Sam. 9:21) De m’agan’ ngay ni nge gechignag fapi girdi’ nu Israel nra togopuluwgad nga mat’awun ni nge gagiyeg ni yugu aram rogon ni manang ni bay mat’awun ni nge rin’. (1 Sam. 10:27) Ke fol Saul ni Pilung u rogon ni i pow’iy gelngin Got nib thothup ma aram me pow’iy piyu Israel ngar chamgad ngak piyu Ammon ngar gelgad. Maku reb e ki yog ni Jehovah e ir e ke ayuwegrad ni ngar gelgad ko re mahl nem.​—1 Sam. 11:6, 11-13.

9. Uw rogon ni tabab Saul ni nge lemnag boch ban’en ni ir e nge fel’ ngak?

⁹ Boch nga tomuren ma aram me tabab Saul ni nge lemnag boch ban’en ni ir e nge fel’ ngak me tolangan’. N’en ni buch rok e bod rogon e t’ay ni ke yib ko fare wasey. Nap’an ni cham nge gel ngak piyu Amalek, ma aram me tabab ni nge rin’ e tin ni baadag, ma daki fol rok Jehovah. I fek boch ban’en rorad ni tay Got chilen ni ngan kirebnag u tomuren ni ke m’ay e mahl. Maku bochan gelngin e tolangan’ rok me ubung e malang ni ban’en ni nge guy e girdi’ mi yad lemnag riy. (1 Sam. 15:3, 9, 12) Nap’an ni yog Samuel ni profet ngak Saul ndabun Jehovah e n’en ni ke rin’, me guy rogon ni nge gay e tawey rok me yog ngak Samuel ni bay boch ban’en ni ke yog Got ni ke fol riy, me yon’ e kireb rok nga daken boch e girdi’. (1 Sam. 15:16-21) Maku reb e, bochan nib tolangan’ Saul me lemnag ni kab fel’ ni nge fel’ thin u wan’ e girdi’ ko bin ni nge rin’ e tin nib m’agan’ Got ngay. (1 Sam. 15:30) Ere, uw rogon nra ayuwegdad e n’en ni buch rok Saul ni ngaud paged fadad, ni bod rogon bangi therek nra ayuwegdad ni ngad thilyeged boch ban’en u yaadad?

10, 11. (a) Mang e gad ra fil ko n’en ni buch rok Saul u rogon ni ngaud paged fadad? (b) Uw rogon ni nge dab da folwokgad ko n’en nib kireb ni rin’ Saul?

¹⁰ Som’on e, n’en ni buch rok Saul e be dag ndabiyog ni nga yigi pag rogon e pagan’ rodad ngad lemnaged ni faanra kad paged fadad u ba ngiyal’, ma ke mom ngodad ni ngad rin’ed ni gubin ngiyal’. (1 Tim. 4:10) Dab mu pagtalin ni immoy ba ngiyal’ ni i par Saul nib fel’ u wan’ Got, machane munmun ma daki yag ni nge gel ko meewar rok. Ere, tomur riy ma daki fel’ Saul u wan’ Jehovah ni bochan e daki fol rok.

¹¹ Bin l’agruw e, susun ni ngad kol ayuwgad ndab ud pared ni tin nib fel’ ni gad be rin’ e ir e ngaud lemnaged, ma gad fek owchedad ko pi n’en nib t’uf ni ngad thilyeged ko ngongol rodad. Ya faan gad ra rin’ ni aray rogon, ma susun e kad yaliyed yaadad nga therek ni bochan e ngad guyed reb e mad ni kad chuwgad ngay ni kab beech, machane dad nanged ni bay e but’ u owchedad. Mus ni faanra dad boded Saul ni pag rogon e pagan’ ni i tay, machane susun ni ngkud kol ayuwgad u boch ban’en nra k’aringdad ni ngad ngongolgad ni bod Saul. Ma susun ndab da boded Saul nnap’an ni yira fonownagdad, ma gad tawey nga boch ban’en, ara da guyed rogon ni nge aw nde gel e kireb ko n’en ni kad rin’ed, ara don’ed e kireb riy nga daken be’, ya ba fel’ ni ngaud folgad ko fonow ni yima pi’ ngodad.​—Mu beeg e Psalm 141:5.

12. Faan gad ra pag fadad u boch ban’en, ma uw rogon nra ayuwegdad u nap’an ni kad rin’ed reb e denen nib ubchiya’?

¹² Machane, uw rogon ni faanra kad rin’ed reb e denen nib ubchiya’? Dabun Saul ni nge kireb thin, ma bochan e re n’ey ma aram e daki yag ni nge fel’ u wan’ Got. Ere, faan gad ra pag fadad ma rayog ni nge ayuwegdad ni nge dab kud tamra’gad ma gad ning e ayuw. (Prov. 28:13; Jas. 5:14-16) Bay reb e walag ni pumoon ni tabab i yaliy yaan e ngongol ni puwlag u nap’an ni ke gaman 12 e duw rok, mab pag ragag e duw ni ireray e n’en ni i rin’. Ere, yog ni gaar: “Rib mo’maw’ rog ni nggog ko ppin rog nge piin piilal e n’en ni ug rin’. Machane, chiney ni ku gog e gowa ke chuw reb e gilab u pog. Ke damumuw boch e fager rog ngog u nap’an ni kan talegneg nda kug mang reb e ministerial servant, ya da ur lemnaged nra buch ban’en rog ni aram rogon. Yugu aram rogon, ma kug nang ni fin chiney e ke fel’ e liyor ni gu be tay u wan’ Jehovah nib thil ko ngiyal’ ni baaram ni ug yaliy yaan e ngongol ni puwlag. Laniyan’ Jehovah e aram e n’en nth’abi ga’ fan.”

KE YAG ROK PETER NI NGE DAB KI LEMNAG BOCH

13, 14. Uw rogon ni m’ug ko ngongol rok Peter ni immoy e lem rok ni fel’ ngak?

¹³ I pag apostal Peter fan ir u nap’an ni be fil Jesus rogon e machib ngak. (Luke 5:3-11) Yugu aram rogon, maku immoy yu ngiyal’ nthingari guy rogon ni nge dab ki lemnag boch ban’en ni ir e nge fel’ ngak. Bod ni, ke damumuw u nap’an ni guy James nge John ni l’agruw e apostal rok Jesus rogon ni nge yag l’agruw e tagil’ nib fel’ ngorow u Gil’ilungun Got. Sana ke lemnag Peter nra yag reb e gal tagil’ nem ngak ni bochan e ke mu’ Jesus i yog nra pi’ reb e maruwel nib fel’ ngak. (Matt. 16:18, 19) Demtrug rogon ma ke fonownag Jesus James, nge John, nge Peter, nge tin ni ka bay e apostal, me yog ngorad ni ngar kol ayuwgad ndab i “ga’ lungurad u puluwon” pi walagrad.​—Mark 10:35-45.

¹⁴ Ki mada’ nga tomuren ni ke guy Jesus rogon ni nge yal’uweg e lem rok Peter, ma ki mo’maw’ rok Peter ni nge thilyeg e lem rok. Nap’an ni yog Jesus ko pi apostal rok nra taw nga ba ngiyal’ ma yad ra digey ngar milgad, me tolangnag Peter ir nge yog ni yigoo ir e ra par nib yul’yul’. (Matt. 26:31-33) Yigi pagan’ nge pag rogon, ya re nep’ nem ma de yag rok ni nge pag fan ir. Dalip yay ni yog nde nang Jesus ni bochan e be guy rogon ni nge ayuweg e pogofan rok.​—Matt. 26:69-75.

15. Mang fan ni n’en ni rin’ Peter e rayog ni nge pi’ e athamgil nga lanin’uy?

¹⁵ Yugu aram rogon ni ke oloboch Peter, ma bay boch ban’en ni ke rin’ nrayog ni ngad folwokgad riy. Bochan ni ke athamgil nge bochan ni ke ayuweg gelngin Got nib thothup, ma ke yag rok ni nge gel ko pi meewar rok, me t’ar laniyan’, me pag fan ir ni bochan e t’ufeg rok. (Gal. 5:22, 23) Boor e skeng ni athamgil u fithik’ ni kab gel e mo’maw’ riy ko tin baaram e skeng nde yag rok ni nge athamgiliy ko som’on. I sobut’nag laniyan’ ko ngiyal’ ni baaram ni puwan’ apostal Paul ngak u fithik’ e girdi’. (Gal. 2:11-14) Tomuren ni puwan’ Paul ngak, ma de aw nga laniyan’ e n’en ni ke rin’, fa lemnag ni kan kirebnag thin. Ya ke ulul ni nga i t’ufeg Paul. (2 Pet. 3:15) N’en ni rin’ Peter e rayog ni nge ayuwegdad ni ngad paged fadad.

16. Uw rogon ni ngad paged fadad u nap’an ni kad mada’naged boch e magawon nib mo’maw’?

¹⁶ Am lemnag e n’en ni ga ra rin’ u nap’an ni kam mada’nag boch e magawon nib mo’maw’. Nap’an ni ka nin’ Peter nge pi apostal nga kalbus ngemu’ min toyrad ni bochan e machib ni ur ted, mu ur pared ni yad ba felfelan’ “ni bochan e ke tafinaynag Got ni ba’ rogorad ni ngar gafgowgad ni fan nga fithingan Jesus.” (Acts 5:41) Ere, ku er rogon gur nnap’an ni ga ra mada’nag e togopuluw ma rayog ni ngam folwok rok Peter mag pag fam ni bod Jesus. (Mu beeg e 1 Peter 2:20, 21.) Re n’ey e ku ra ayuwegem u nap’an ni ke fonownigem e piin piilal. Mu folwok ku Peter ko bin ni ngam guy rogon ni ngam yoror rom.​—Ekl. 7:9.

17, 18. (a) Mang e rayog ni ngad fithed gadad riy ni bay rogon ko pi n’en ni gad ma nameg ni fan ko tirok Got ban’en? (b) Mang e rayog ni ngad rin’ed ni faanra kad pirieged ni bay e lem ni fel’ ngak rodad?

¹⁷ Ku ra yib angin ngom e n’en ni rin’ Peter u nap’an ni ga be nameg boch ban’en ni ngam rin’ ni fan ko tirok Got ban’en. Rayog ni ngam nameg e pi n’ey u boch e kanawo’ nra m’ug riy ni ga be pag fam. Machane, ngam kol ayuw ndabi yan i aw ni ga be nameg e pi n’ey ni bochan e nge m’ug riy ni gur e sorom. Ere, ngam fithem ni nge lungum, ‘Gur, gu be nameg ni nggu mon’og ara nggu yoornag ban’en ni gu be rin’ ni fan ko pigpig ni gu be tay ngak Jehovah ni bochan e nge yog e girdi’ e sorok ngog fa nge ga’ lungug u boch ban’en, ni bod e n’en ni buch rok James nge John?’

¹⁸ Faanra kam nang ni bay e lem rom ni fel’ ngak, ma n’en ni ngam rin’ e nga mog ngak Jehovah ni nge ayuwegem ngam yal’uweg e lem rom; mag athamgil ni ngam rin’ boch ban’en ni ngan pining e sorok riy ngak Jehovah ma gathi gur. (Ps. 86:11) Ku rayog ni ngam nameg boch ban’en nib achig ndabi yog e girdi’ e sorok riy ngom. Bod nrayog ni ngam maruweliy ni nge m’ug yu yang u wom’engin gelngin Got nib thothup ko ngongol rom ni kam pirieg nib mo’maw’ ni ngam rin’. Ma reb e faanra ri gab pasig ni ngam fal’eg rogom ni fan ko muulung, machane gathi ri ga baadag ni ngam un ko klin u Kingdom Hall, ma rayog ni ngam nameg ni ngam fol ko fare fonow ni bay ko Roma 12:16.​—Mu beeg.

19. Mang e rayog ni ngad rin’ed ya nge dabi mulan’dad ni faanra kad guyed e meewar rodad u nap’an ni kad yaliyed gadad nga fithik’ e Thin rok Got?

¹⁹ Faanra da fal’eged i yaliyed gadad nga fithik’ e Thin rok Got ma gad guy e oloboch, ara lem ni fel’ ngak, ma rayog ni nge mulan’dad. Faanra ke buch e re n’ey rom, ma ngam lemnag fare moon ni weliy James murung’agen ko fare fanathin rok. De yog James ni ke gur fare moon ke pithig e magawon rok fe yal’uweg ir; ya ke yog ni ke ‘tiyan’ ko fare motochiyel.’ (Jas. 1:25) Ke yib ngan’ fare moon e n’en ni ke guy ko fagi therek. Ere ke athamgil ni nge thilyeg. Arrogon, um sap nga fel’ngin e tin ni ga be rin’ ma dab mu lemnag e pi meewar rom nge pag rogon. (Mu beeg e Eklesiastes 7:20.) Um fal’eg i yaliyem nga fithik’ fare motochiyel nrib yal’uw, mag athamgil ni ngaum pag fam. Ba m’agan’ Jehovah ngay ni nge ayuwegem ni bod rogon ni ke ayuweg boch e walag ndawor ra flontgad, machane be yag ni ngar pared ni yad ba fel’ u wan’ Got ma be tow’athnagrad.