GURUY NI 06
Uw Rogon ni Sum Urngin Ban’en nib Fos?
“[Got] enggin gubin e yafos.” (Psalm 36:9, BT) Ba mich u wan’um e re n’ey, fa? Bay boch e girdi’ ni yad ma yog ndariy be’ ni sunmiy urngin ban’en nib fos. Faanra riyul’ e re n’ey, me ere gadad e girdi’ e dariy be’ ni sunmiydad. Machane faanra Jehovah Got e ke sunmiy urngin ban’en nib fos, me ere ba mudugil ni bay fan ni ke rin’ e re n’ey.a Am lemnag e n’en be yog e Bible u murung’agen rogon ni sum urngin ban’en nib fos nge fan nib puluw ni nge mich e re n’ey u wan’dad.
1. Uw rogon ni sum e fayleng nge pi t’uf u lan e lang?
Be gaar e Bible: “Aram ko tabolngin ni tabab Got i sunmiy e fayleng nge urngin ban’en ni bay u lan e lang.” (Genesis 1:1, BT) Yooren e piin llowan’ e ba puluw u wan’rad ni bay be’ ni sunmiy e fayleng nge pi t’uf u lan e lang. Uw rogon ni sunmiy Got e pi n’ey? I fanay gelngin nib thothup.—Genesis 1:2.
2. Mang fan ni sunmiy Got e fayleng?
“De ngongliy [Jehovah e fayleng] nge tay ni bangi ted ndariy ban’en riy ma der tugul ban’en riy, yi tay ni ngi i par e girdi’ riy.” (Isaiah 45:18) Ba manigil rogon ni ngongliy e fayleng ni nge par e girdi’ riy ndariy n’umngin nap’an ma bay urngin ban’en riy nib t’uf rorad. (Mu beeg e Isaiah 40:28; 42:5.) Ke yog e piin llowan’ ni fayleng e yu gub thil u fithik’ urngin ban’en ni kan sunmiy. Kemus ni yigoo fayleng e bay urngin ban’en riy nrayog ni nge ayuweg e girdi’ ngar pared ni yad ba fos.
3. Uw rogon nib thil e girdi’ ko gamanman?
Tomuren ni ngongliy Jehovah e fayleng, me sunmiy e woldug nge gamanman nge tay nga daken. Ngemu’ me ngongliy e ‘girdi’ ni bod yaan.’ (Mu beeg e Genesis 1:27.) Mang fan ni yu gub thil e girdi’? Bochan ni ke sunmiydad Got ni gad bod yaan, ma rayog ni ngad daged e t’ufeg ma gad rin’ e tin nib mat’aw ni bod ir. Ki sunmiydad nrayog ni ngad filed boch e thin nib thilthil, ma gad adag boch ban’en nib fel’ yaan nge musik. Ma gad ba thil ko gamanman ya rayog ni ngad liyorgad ngak e En Ke Sunmiydad.
KUM FIL BOCH BAN’EN U MURUNG’AGEN
Mu yaliy e mich riy ni bay be’ ni ke sunmiy urngin ban’en nib fos mab puluw e n’en be yog e Bible u murung’agen e tin kan sunmiy. Mu fil murung’agen boch e fel’ngin ni bay ko girdi’ nge n’en be fil ngodad u murung’agen Got.
4. Bay be’ ni ke sunmiy urngin ban’en nib fos
Yima n’uf e girdi’ ko pi n’en yad ma ngongliy ni yad be folwok u boch ban’en ni kan sunmiy. Ere mini’ e susun ni ngan pining e sorok ngak ko pi n’en kan sunmiy? Mu yaliyew e re VIDEO ney, mi gimew weliy e fulweg ko re deer ni baaray.
Mang boch ban’en ni ke ngongliy e girdi’ ni yad be folwok u boch ban’en ni kan sunmiy?
Gubin e naun ni bay be’ ni ke ngongliy yaan ke toy. Machane mini’ e ke sunmiy e pi n’en bay u toobdad? Mu beegew e Hebrews 3:4, mi gimew weliy e fulweg ko pi deer ni baaray:
Mang boch ban’en u rarogon e tin kan sunmiy nib fel’ u wan’um?
Ga be lemnag mab puluw ni nge mich u wan’dad ni bay be’ ni ke sunmiy e pi t’uf, nge fayleng, nge urngin ban’en ni bay riy, fa? Mang fan?
Baaray murung’agen ban’en
Rayog ni ngam pirieg boch e article nge video ko jw.org u tan fare thin ni “Was It Designed?” nge “Viewpoints on the Origin of Life.”
“Urngin e naun ma mmudugil ni ba’ be’ ni ir e toy—mi Got e ir e ke sunumeg urngin ban’en”
5. Ba puluw e n’en be yog e Bible u murung’agen e tin kan sunmiy
Be weliy e Bible ko Genesis ko guruy ni 1 rogon ni sum e fayleng nge urngin ban’en nib fos ni bay riy. Rayog ni nge mich u wan’um e n’en be yog fa kemus nib yat? Mu yaliyew e re VIDEO ney, mi gimew weliy e fulweg ko pi deer ni baaray.
Be yog e Bible ni kan sunmiy e fayleng nge urngin ban’en ni bay riy nib fos u lan nel’ e rran, fa?
Ga be lemnag nib puluw e n’en be yog e Bible u murung’agen e tin kan sunmiy, fa? Mang fan?
Mu beegew e Genesis 1:1, mi gimew weliy e fulweg ko re deer ni baaray:
Ke yog e piin llowan’ ni sum e fayleng nge pi t’uf u lan e lang. Uw rogon nib puluw e n’en ka rogned ko n’en ni ka fin mu beeg u Bible?
Bay boch e girdi’ ni yad ma lemnag ko ke sunmiy Got bochi ban’en nib achig me munmun me ngal’ nga yugu boch ban’en nge taw ko ngiyal’ ni ki sum boch e yafos riy fa danga’. Mu beegew e Genesis 1:21, 25, 27, mi gimew weliy e fulweg ko gal deer ni baaray:
Gur, be yog e Bible ni sunmiy Got bochi ban’en nib achig me munmun me ngal’ nga yugu boch ban’en nge taw ko ngiyal’ ni ki sum e gamanman nge girdi’ riy? Fa ir e sunmiy urngin e pi n’ey nib “mit” nge ba mit?
6. Girdi’ e yu gub thil u fithik’ urngin e tin ke sunmiy Got
Gad ba thil ko gamanman ni ke sunmiy Jehovah. Mu beegew e Genesis 1:26, mi gimew weliy e fulweg ko re deer ni baaray:
Bochan ni kan sunmiydad ni gad bod yaan Got nrayog ni ngad daged e t’ufeg nge runguy, ma mang e be dag e re n’ey u rarogon Got?
MA GAAR BOCH E GIRDI’: “N’en be yog e Bible u murung’agen e tin kan sunmiy e goo bogi yat.”
Uw rogon e re n’ey u wan’um? Mang fan?
N’EN KAN FIL
Jehovah e ir e ke sunmiy e fayleng nge pi t’uf u lan e lang nge urngin ban’en nib fos.
Ngan Sul u Daken
Mang e be fil e Bible u murung’agen rogon ni sum e fayleng nge pi t’uf u lan e lang?
Gur, i sunmiy Got bochi ban’en nib achig me munmun me ngal’ nga yugu boch ban’en nge taw ko ngiyal’ ni ki sum boch e yafos riy, fa ir e sunmiy urngin e pi n’ey?
Mang fan ni yu gub thil e girdi’?
MU GAY MURUNG’AGEN
Mu guy boch ban’en u rarogon e tin kan sunmiy ni be dag ni bay be’ ni ke sunmiy e pi n’ey.
Mu guy rogon nrayog ni nge weliy reb e matam e n’en be yog e Bible u murung’agen e tin kan sunmiy ngak bochi pagel ni fak.
Mu guy ko ba puluw fare machib ni ke sum e girdi’ ko gamanman ko n’en be yog e Bible fa danga’.
“Did God Use Evolution to Create the Different Types of Life?” (Article ni bay ko website)
Mu beeg murung’agen boch e yil ko gamanman ni kan pirieg ni immoy kakrom nge boch ban’en ni ke skengnag e piin llowan’ kar nanged, mag guy ko be m’ug riy ni kan sunmiy e yafos fa yigi sum rok.
a Guruy ni 25 e ra weliy e n’en nib m’agan’ Got ngay ni fan ko girdi’.